ISIFUNDO 55

Nceda Ibandla Lakho

DLALA

Nceda Ibandla Lakho

Emhlabeni wonke, kukho iimiliyoni zabantu ezikhonza uYehova kumabandla amaninzi. Aba bantu baluvuyela kakhulu ukhokelo abalufumanayo ibe baxhasa uYehova ngeendlela ezininzi. Ngaba nawe uziva ngendlela efanayo ngebandla lakho?

1. Zeziphi iindlela ongasebenzisa ngazo ixesha namandla akho ukuze uncede ibandla?

Sonke singakwazi ukunceda ebandleni. Ngokomzekelo, ebandleni lakho, ngaba bakhona abazalwana noodade abakhulileyo okanye abanengxaki yempilo? Ungakwazi ukubanceda baye ezintlanganisweni? Ungakwazi ukubathengela ukutya nezinto abazidingayo okanye uyokucoca izindlu zabo? (Funda uYakobi 1:27.) Enye indlela esinokunceda ngayo kukucoca nokuhoya iHolo yethu yoBukumkani. Akukho mntu usinyanzelayo ukuba sizenze ezi zinto. Indlela esimthanda ngayo uYehova nabazalwana noodade isenza ‘sizinikele ngokuvumayo.’—INdumiso 110:3.

AmaNgqina abhaptiziweyo angakwazi ukunceda ibandla nangezinye iindlela. Abazalwana abafanelekayo bangaba zizicaka zolungiselelo nabadala. Enye into, abazalwana noodade bangakwazi ukuxhasa umsebenzi wokushumayela ngokuba ngoovulindlela. Abanye basenokuncedisa xa kusakhiwa iindawo esikhonzela kuzo, okanye bayokuhlala kwindawo enebandla elidinga uncedo.

2. Singayisebenzisa njani imali yethu nezinto esinazo ukuze sincede ibandla?

Singakwazi ukumnika “imbeko uYehova ngezinto [zethu] ezixabisekileyo.” (IMizekeliso 3:9) Ukunikela ngemali nangezinye izinto esinazo ukuze sixhase ibandla, nomsebenzi wokushumayela owenziwa emhlabeni wonke, kuyasivuyisa. (Funda 2 Korinte 9:7.) Iminikelo yethu inceda nabantu abehlelwe yintlekele. Abaninzi ‘babeka ecaleni loo nto banokukwazi ukunikela ngayo.’ (Funda 1 Korinte 16:2.) Sinokunikela kwiibhokisi zeminikelo ezikwiindawo esikhonzela kuzo okanye kwi-intanethi ku-donate.pr418.com. UYehova usinika ithuba lokubonisa indlela esimthanda ngayo ngendlela esiyisebenzisa ngayo imali nezinto esinazo.

FUNDA NEZINYE IZINTO

Jonga ezinye iindlela onokulinceda ngazo ibandla.

3. Singasebenzisa izinto esinazo

UYehova noYesu bathanda umntu opha evuya. Ngokomzekelo, uYesu wancoma omnye umhlolokazi owayenemali encinci kakhulu, kodwa wakhetha ukunikela ngayo. Funda uLuka 21:1-4, nize nincokole ngale mibuzo:

Ngaba kufuneka sinikele ngemali eninzi ukuze sivuyise uYehova?
UYehova noYesu baziva njani xa sinikela sivuya?

Ukuze ufunde ukuba iminikelo isetyenziswa njani, dlala IVIDIYO, nize nincokole ngalo mbuzo.

IVIDIYO: ‘Umnikelo Oya KuYehova’ (4:47)

Iminikelo isetyenziswa njani ukuze incede amabandla asemhlabeni wonke?

4. Singancedisa

Ngamaxesha okubhalwa kweBhayibhile, abakhonzi bakaYehova babesebenza ngokuzimisela ukuze bahoye iindawo ababekhonzela kuzo. Kodwa babengapheleli ekunikeleni kuphela. Funda 2 Kronike 34:9-11, nize nincokole ngalo mbuzo:

AmaSirayeli ancedisana njani onke ukuze ahoye indlu kaYehova okanye indawo awayekhonzela kuyo?

Ukuze ubone ukuba amaNgqina kaYehova awalinganisa njani amaSirayeli, dlala IVIDIYO, nize nincokole ngale mibuzo

IVIDIYO: Ukunyamekela Iindawo Esinqulela Kuzo (3:31)

Kutheni kubalulekile ukuba sigcine iindawo esikhonzela kuzo zicocekile futhi zisemgangathweni?
Zeziphi ezinye iindlela onokunceda ngazo?

5. Abazalwana banokusebenzela ukufanelekela ukwenza eminye imisebenzi ebandleni

IBhayibhile ikhuthaza ukuba abazalwana basebenzele ukwenza imisebenzi emininzi ukuze bancede ibandla. Ukuze ubone umzekelo, dlala IVIDIYO, nize nincokole ngalo mbuzo.

IVIDIYO: Bazalwana—Zabalazelani Umsebenzi Omhle (5:19)

Kule vidiyo, uRyan wenze njani ukuze ancedise ngakumbi ebandleni?

IBhayibhile iyazichaza izinto ezilindeleke kubazalwana abazizicaka zolungiselelo nabadala. Funda 1 Timoti 3:1-13, nize nincokole ngale mibuzo:

Abazalwana abafuna ukuba zizicaka zolungiselelo nabadala bafanele benze ntoni?
Kulindeleke ntoni kwiintsapho zabo?—Jonga ivesi 4 no-11.
Xa abazalwana bezimisela ukuzenza ezi zinto, babanceda njani abantu abasebandleni?