•  AmaNgqina kaYehova abona njani ukuba iholide ethile yamkelekile?

•  Ngaba amaNgqina kaYehova angazenziyo ezinye iiholide azikhathalele iintsapho zawo?

•  Ngaba amaNgqina kaYehova axelela nabanye ukuba bangazibhiyozeli ezinye iiholide?

 AmaNgqina kaYehova aqale ajonge ukuba ithini iBhayibhile xa eza kukhetha ukuba aza kuyibhiyozela na iholide ethile. Ezinye iindlela ezenziwa ngazo ezinye iiholide iyangqubana nemigaqo yeBhayibhile. Xa kunjalo, aye akhethe ukungazibhiyozeli. Kwezinye iiholide, iNgqina lifanele lizenzele ngokwalo isigqibo, lizama “ukuba nesazela esicocekileyo phambi koThixo nabantu.”​—IZenzo 24:16.

 AmaNgqina kaYehova xa eza kukhetha ukuba aza kuyibhiyozela iholide ethile aye azibuze le mibuzo. a

•   Ngaba kuloo holide kubhiyozelwa into engafundiswayo yiBhayibhile?

   Umgaqo weBhayibhile: “Uthi uYehova, ‘Phumani phakathi kwabo, nizahlule, ningayichukumisi into engcolileyo.’”​—2 Korinte 6:15-17.

   AmaNgqina kaYehova aye azame ukuzahlula ngokupheleleyo kwiimfundiso ezingcolileyo neziphikisanayo nento efundiswa yiBhayibhile. Loo nto ayenza ngokungazibhiyozeli iiholide ezisekelwe kwezi zinto zilandelayo.

   Iiholide ezisekelwe kwiinkolelo nokukhonzwa kwabanye oothixo. UYesu wathi: “Umele ukhonze uYehova uThixo wakho kuphela, ukhonze yena yedwa.” (Mateyu 4:10) Ukulandela elo cebiso amaNgqina kaYehova awayibhiyozeli iKrismesi, iPasika neMay Day, kuba ezi holide zisekelwe ekukhonzweni kwezithixo kunokukhonza uYehova. Nezi holide zilandelayo awazenzi.

  •  Umbhiyozo ekuthiwa yi-Kwanzaa. Igama elithi Kwanzaa “lisuka kwigama lesiSwahili elithi matunda ya kwanza. Eli gama lithetha ‘isiqhamo sokuqala.’ Loo nto ibonisa ukuba le holide yaqala xa kwakubhiyozelwa isivuno sokuqala eAfrika.” (Amazwi akwi-Encyclopedia of Black Studies) Abanye abantu bayijonga i-Kwanzaa njengeholide engadibenanga nonqulo. Kodwa i-Encyclopedia of African Religion iyifanisa nombhiyozo owenziwa eAfrika xa kubulelwa koothixo nakwizinyanya ngokunikela ngesiqhamo sokuqala. Lo ngumbhiyozo owenziwa ngabantu abamnyama baseMerika xa bebulela izithixo nezinyanya.”

  •  Umbhiyozo ekuthiwa yiMid-Autumn Festival. “Wenziwa ukuze kuzukiswe uthixokazi wenyanga.” (Amazwi akwi-Holidays, Festivals, and Celebrations of the World Dictionary) Kuwo, kuye kwenziwe isiko apho amabhinqa aye aqubude phambi kwesithixokazi. Loo nto ngesiTshayina kuthiwa yikowtow.”​—Kwi-Religions of the World—A Comprehensive Encyclopedia of Beliefs and Practices.

  •  Umbhiyozo ekuthiwa yi-Nauruz. “Lo mbhiyozo weza nenkonzo kaZoroaster. Kwikhalenda yalo nkonzo olusuku lolona lungcwele. . . . Ngolusuku lweNauruz kwakusenziwa isiko lokwamkela imimoya ebizwa ngokuba yiRapithwin, eyayibaphantsi komhlaba ebusika. Lo mbhiyozo wawusenziwa emva kwemini ngokwesiko lwenkonzo kaZoroaster.”​—Amazwi eUnited Nations Educational, Scientific and Cultural Organization.

  •  Umbhiyozo ekuthiwa yiShab-e Yalda. Lo mbhiyozo wenziwa ebusika “unento yokwenza nokukhonzwa kukaMithra,” onguthixo wokukhanya ngokutsho kwencwadi iSufism in the Secret History of Persia. Kwakhona le holide iyafana nokunqulwa koothixo belanga bamaRoma namaGrike. b

  •  Iholide ekuthiwa yi-Thanksgiving. Ngokufanayo nombhiyozo ekuthiwa yi-Kwanzaa, le holide yaqala kudala xa kwakubhiyozelwa isivuno esasizukisa izithixo ezahlukahlukeneyo. Ekuhambeni kwexesha, “ezi zithethe zakudala zaphela zisenziwa nasezicaweni.”​—I-A Great and Godly Adventure—The Pilgrims and the Myth of the First Thanksgiving.

   Iiholide ezisekelwe kwiinkolelo okanye kwizinto zethamsanqa. IBhayibhile ithi: “Abo badekela uthixo weThamsanqa itafile” baphakathi “kwabantu abamshiyayo uYehova.” (Isaya 65:11) Ngoko ke amaNgqina kaYehova awazibhiyozeli ezi holide zilandelayo:

  •  I-Ivan Kupala. “Ngokwenkolo eqhelekileyo, ngexesha le-Ivan Kupala indalo ikhupha amandla angaqhelekanga alawulwa lithamsanqa” ngokutsho kwencwadi ethi The A to Z of Belarus. Ezi holide zisuka kwimibhiyozo yobuhedeni eyayisenziwa ngexesha lasehlotyeni. Nangona kunjalo, i-Encyclopedia of Contemporary Russian Culture, “iye yayidibanisa neholide [usuku leengcwele lukaYohane umBhaptizi] emva kokwamkela inkolo yobuKristu.”

  •  Umbhiyozo Wonyaka Omtsha WaseTshayina okanye OwaseKorea. “Kweli xesha lonyaka, iintsapho nabahlobo benza lo mbhiyozo ukuze babulele oothixo babo nemimoya, bebanqwenelela ilakhi nezinto ezintle kunyaka omtsha.” (I-Mooncakes and Hungry Ghosts​—Festivals of China) Ngendlela efanayo kumbhiyozo woNyaka Omtsha waseKorea, baye banqule izinyanya, bagxothe imimoya emibi baze banqwenelele ukuba unyaka wabo omtsha ube namathamsanqa. Baye bavumise befuna ukwazi ukuba unyaka omtsha ubaphathele ntoni.”​—Ngokutsho kwe-Encyclopedia of New Year’s Holidays Worldwide.

   Iiholide ezisekelwe kwinkolelo yokuba umphefumlo awufi. IBhayibhile iyenza icace into yokuba umphefumlo uyafa. (Hezekile 18:4) Ngoko amaNgqina kaYehova awazibhiyozeli ezi holide zilandelayo ezisekelwe kwinkolelo yomphefumlo ongafiyo:

  •  Imini yabafi. I-New Catholic Encyclopedia ithi ngale mini kuye “kukhunjulwe bonke abo baye bafa bethembekile. Kangangexesha elide, bekukholelwe ukuba le miphefumlo ingafiyo iyakwazi ukuvela njengeziporho, amagqwirha, namasele amakhulu kubantu ababexabene nabo ngexesha ababesaphila ngalo.”

  •  Umbhiyozo ekuthiwa yi-Qingming nowe-Hungry Ghost. Le mibhiyozo mibini yenzelwa ukunqula izinyanya. Xa kusenziwa i-Ch’ing Ming, incwadi ethi Celebrating Life Customs Around the World​—Baby Showers to Funerals ithi, “kubakho ukutya, idrinki, kuye kutshiswe nemali kuqinisekiswa ukuba abantu abafileyo akhonto bayidingayo.” Le ncwadi ichaza nokuba “ngenyanga yeziporho ezilambileyo, ingakumbi ebusuku xa inyanga iphelele, ababhiyozi bayo bakholelwa ukuba eli iba lelona xesha bakwazi ngalo ukunxibelelana nabantu abafileyo ukodlula naluphi na olunye usuku. Bakubona kufanelekile ukuba behlise imisindo yabantu abafileyo baze banqule nezinyanya.”

  •  I-Chuseok. Lo mbhiyozo we-The Korean Tradition of Religion, Society, and Ethics, uquka “ukunikela ngokutya newayini kubantu abafileyo.” Le minikelo yenziwa ukubonisa ukuba “umphefumlo uqhubeka uphila emva kokuba umzimba ufile.”

   Iiholide ezinento yokwenza nobugqi. IBhayibhile ithi makungabikho “mntu uvumisayo, owenza imilingo, ochaza ikamva ngokuvumisa, othakathayo, oya egqirheni okanye kumntu ochaza izinto kwangaphambili, okanye obuza ebantwini abafileyo. Kuba nabani na ozenzayo ezi zinto uyenyanyeka kuYehova.” (Duteronomi 18:10-12) Ukuze ahlale ethandwa nguThixo, amaNgqina kaYehova awenzi nantoni na enento yokwenza nobugqi kuquka ukubuzisa kubantu abachaza izinto kwangaphambili, nokubuza kubantu abafileyo. Abayibhiyozeli neHalloween nezi holide zilandelayo:

  •  I-Sinhala ne-Tamil New Year. “Izithethe ezidibene nalo mbhiyozo . . . ziquka ukubuza kubantu abachaza izinto kwangaphambili.”​—I-Encyclopedia of Sri Lanka.

  •  ISongkran. Igama lalo mbhiyozo wase-Asia “lisuka kwigama lesi-Sanskrit  . . elithetha ‘ukushukuma’ okanye ‘ukutshintsha,’ ibe lo mbhiyozo wenziwa xa ilanga lijikeleza lide liyokufika kwinkwenkwezi ekuthiwa yiAries.”​—I-Food, Feasts, and Faith—An Encyclopedia of Food Culture in World Religions.

   Amatheko awayesenziwa ngexesha loMthetho kaMoses ayekwa emva kokufa kukaYesu. IBhayibhile ithi: “UMthetho wayeka ukusebenza xa uKristu wafayo.” (Roma 10:4) AmaKristu asancedakala yimigaqo ayifumana kuMthetho kaMoses owawunikwe amaSirayeli kudala. Kodwa awasawenzi amatheko ela xesha, ingakumbi lawo awayebonisa izinto eziza kwenzeka xa kufike uMesiya, kuba wafika. IBhayibhile ithi: “Ezo zinto zisisithunzi sezinto ezizayo, kodwa umzimba weso sithunzi nguKristu.” (Kolose 2:17) Ngenxa yaloo nto, la matheko awasadingeki kuba kuwo kwenziwa izinto ezingavumelaniyo nezibhalo. Yiloo nto amaNgqina kaYehova engawabhiyozeli.

  •  Umbhiyozo ekuthiwa yiHanuka. Lo mbhiyozo wenziwa kuba kukhunjulwa imini ekwanikezelwa ngayo itempile yamaYuda, emva kokuba yakhiwe okwesibini eYerusalem. Kodwa iBhayibhile ithi, uYesu waba ngumbingeleli omkhulu “kwintente [okanye itempile] ebaluleke ngakumbi negqibeleleyo engenziwanga ngezandla, oko kukuthi engekhoyo phakathi kwezinto ezidaliweyo emhlabeni.” (Hebhere 9:11) AmaKristu ayazi ukuba itempile yokoqobo yathathelwa indawo yitempile yasezulwini.

  •  Umbhiyozo ekuthiwa yi-Rosh Hashanah. Olu lusuku lokuqala lonyaka wamaYuda. Ngexesha lakudala, lo mbhiyozo wawuquka ukwenziwa kweminikelo kuThixo. (Numeri 29:1-6) Kodwa uYesu njengoMesiya ‘wayiphelisa imibingelelo neminikelo esisipho,’ yayeka ukuxabiseka emehlweni kaThixo.​—Daniyeli 9:26, 27.

•   Ngaba loo nkonzo idibanisa abantu abakholelwa izinto ezingafaniyo?

   Umgaqo weBhayibhile: “Yintoni edibanisa umntu okholwayo nomntu ongakholwayo? Idibana njani itempile kaThixo nezithixo?”​—2 Korinte 6:15-17.

   AmaNgqina kaYehova asoloko ezama ukuba seluxolweni nabamelwane bawo. Ayayihlonipha into yokuba mntu ngamnye uyazikhethela izinto afuna ukuzikholelwa. Kodwa ayayiphepha imibhiyozo edibanisa abantu abakholelwa izinto ezingafaniyo, njengale ilandelayo:

   Xa kubhiyozelwa umntu wenkonzo okanye xa kukho itheko elikhuthaza ukuba abantu bakhonze kunye nangona beneenkolelo ezingafaniyo. Xa uThixo wayekhokela abantu bakhe ebasa kwilizwe elitsha, apho kwakukho abantu ababekhonza abanye oothixo, wathi kubo: “Uze ungenzi sivumelwano nabo okanye noothixo babo. . . . Ukuba ukhe wakhonza oothixo babo, loo nto iza kuba ngumgibe kuwe.” (Eksodus 23:32, 33) Ngoko, amaNgqina kaYehova awazenzi ezi holide zilandelayo.

  •  Umbhiyozo ekuthiwa yi-Loy Krathong. Wenziwa eThailand. “Abantu baye bathathe izitya bazifake amagqabi, amakhandlela okanye impepho, baze bazibeke phezu kwamanzi. Bathi basusa amashwa. Eli theko lenzelwa ukukhumbula into eyenziwa nguBhuda.”​—I-Encyclopedia of Buddhism.

  •  Usuku ekuthiwa yi-National Repentance Day. Omnye wabasemagunyeni ekuthethwa ngaye kwelinye iphephandaba wathi, abantu abenza lo mbhiyozo “bayavumelana ngenkolelo yabo yobuKristu.” Uthi ngolu suku “kukhuthazwa abantu belizwe ukuba baphile njengamaKristu.”

  •  Umbhiyozo ekuthiwa yiVesak. “Olu lolona suku lungcwele lwamaBhuda, kuba kubhiyozelwa ukuzalwa kukaBhuda, ukukhanyiselwa kunye nokufa kwakhe, okanye ukufika eNirvana.”​—Ingcaciso ekwi-Holidays, Festivals, and Celebrations of the World Dictionary.

   Imibhiyozo esuka kwizithethe neenkolelo zabantu ezingaxhaswayo yiBhayibhile. UYesu wathi kwiinkokheli zeenkonzo: “Nilenze layinto engenamsebenzi ilizwi likaThixo ngenxa yezithethe zenu.” Wathi bamkhonzela ilize, kuba bafundisa “imithetho yabantu, beyenza ngathi yimithetho kaThixo.” (Mateyu 15:6, 9) Maninzi kakhulu amatheko amaNgqina kaYehova angawabhiyozeliyo kuba ethobela esi silumkiso.

  •  Iholide ekuthiwa yiEpiphany (okanye yi-Three Kings’ Day, i-Timkat, okanye i-Los Reyes Magos). Abantu baye bakhumbule ela xesha abavumisi abaya ngalo kuYesu okanye xa uYesu wayebhaptizwa. Kulo mbhiyozo “kwenziwa amatheko obuhedeni njengawamaKristu, ibe kuye kuzukiswe oothixo bamanzi, imilambo nemithombo.” (Amazwi akwi-The Christmas Encyclopedia) Nombhiyozo ekuthiwa yi-Timkat, “usekelwe kwizithethe.”​—I-Encyclopedia of Society and Culture in the Ancient World.

  •  Umbhiyozo ekuthiwa yiFeast of the Assumption of the Virgin Mary. Kuwo, kuye kubhiyozelwe inkolelo yokuba umama kaYesu waya ezulwini enomzimba womntu. I-Religion and Society—Encyclopedia of Fundamentalism ithi, “Le nkolelo yayingaziwa ziinkonzo zakudala ibe akukho Zibhalo ziyixhasayo.”

  •  Umbhiyozo ekuthiwa yiFeast of the Immaculate Conception. “KwiZibhalo akukho nto ibonisa ukuba uMariya wangenasono xa wayekhululwe . . . Loo nto ifundiswa ziinkonzo.”​—I-New Catholic Encyclopedia.

  •  Into eyenziwa ngamaKristu ekuthiwa yiLent. Ngeli xesha amaKristu ahlawulela izono zawo ibe azila ukutya iintsuku eziyi-40. I-New Catholic Encyclopedia ithi le nto yaqala ukwenziwa emva kweminyaka eyi-200 iBhayibhile igqityiwe, “kwiminyaka yoo-300.” Ithi xa ithetha ngosuku lokuqala lweLent: “NgoLwesithathu, abefundisi baye bazobe umnqalezo ngothuthu emabunzini abantu bakulo nkonzo. Loo nto ibakhumbuza ukuba bamele baguquke. Yaqala ukwenziwa ngo-1091 ngamaKatolika.”

  •  Umbhiyozo ekuthiwa yiMeskel (okanye i-Maskal). Lo mbhiyozo wenziwa ngamaTiyopiya. I-Encyclopedia of Society and Culture in the Medieval World ithi kuvuyelwa “ukufunyanwa komnqamlezo awabethelelwa kuwo uYesu, ibe kuye kwenziwe umlilo kuze kudaniswe ecaleni kwawo.” Kodwa amaNgqina kaYehova awawusebenzisi tu umnqamlezo.

•   Ngaba loo holide izukisa umntu, umbutho, okanye izinto ezimela ilizwe?

   Umgaqo weBhayibhile: “Uthi uYehova: ‘Iqalekisiwe indoda ethembela emntwini, exhomekeke emandleni omntu, nenentliziyo emfulathelayo uYehova.’”​—Yeremiya 17:5.

   AmaNgqina kaYehova ayabathanda abantu ibe ade abathandazele nokubathandazela. Sekunjalo, awazenzi ezi zinto zilandelayo:

   Iiholide ezizukisa umntu olawulayo okanye owaziwayo. IBhayibhile ithi, “Ukuba nifuna ukulungelwa, yekani ukuthembela emntwini, uyimpefumlo njee ezimpumlweni zakhe. Yintoni enenza nimthembe?” (Isaya 2:22) Ngenxa yaloo nto, amaNgqina kaYehova awalubhiyozeli usuku lokuzalwa lukakumkani okanye ukumkanikazi.

   Ukubhiyozelwa kweflegi yelizwe. AmaNgqina kaYehova awalubhiyozeli usuku lweflegi. Kuba iBhayibhile ithi: “Makungabikho nto inidibanisa nezithixo.” (1 Yohane 5:21) Kule mihla, abanye abantu bacinga ukuba iflegi ayisosithixo esinokukhonzwa, kodwa ingcali yembali, uCarlton J. H. Hayes wathi: “Ukuthanda ilizwe yinkolo ibe eyona nto ibalulekileyo kuyo yiflegi.”

   Iiholide okanye imibhiyozo ezukisa ingcwele. Kwenzeka ntoni xa enye indoda eyayisoyika uThixo yaqubuda kumpostile uPetros? IBhayibhile ithi: “UPetros wamphakamisa esithi: ‘Phakama; kaloku nam ndingumntu njengawe.’” (IZenzo 10:25, 26) UPetros nabanye abapostile zange bavume ukuzukiswa. Ngoko, amaNgqina kaYehova awazenzi izinto ezizukisa abantu ekuthiwa ziingcwele, njengale mibhiyozo ilandelayo:

  •  Iholide ekuthiwa yi-All Saints’ Day. Esi “sisidlo esenzelwa ukuzukisa zonke iingcwele . . . Akuqinisekwanga ukuba saqala njani.”​—I-New Catholic Encyclopedia.

  •  Umbhiyozo ekuthiwa yi-Fiesta of Our Lady of Guadalupe. Kuwo kuye kuzukiswe “ingcwele yaseMexico,” ekukholelwa ukuba nguMariya, umama kaYesu. Kuthiwa wabonakala ngo-1531 ngokungummangaliso komnye umfama.​—I-The Greenwood Encyclopedia of Latino Literature.

  •  Umbhiyozo ekuthiwa yi-Name Day. Incwadi ekuthiwa yi-Celebrating Life Customs Around the World—From Baby Showers to Funerals ithi: “Olu suku iba lusuku lwesidlo sengcwele emva kokuba umntwana enikwe igama xa ebhaptizwa okanye ebuyela enkonzweni.” Ithi “abantu baye benze izinto zonqulo ngale mini.”

   Imibhiyozo yezepolitiki okanye eyenziwa ukuze kuphuculwe indlela abantu abaphila ngayo. IBhayibhile ithi, “Kubhetele ukubalekela kuYehova kunokuthembela ebantwini.” (INdumiso 118:8, 9) AmaNgqina kaYehova awafuni ukubonakala ngathi athembe abantu ukuba baza kulungisa iingxaki zomhlaba, kuba ayazi ukuba nguThixo qha onokukwazi ukuyenza loo nto. Ngenxa yaloo nto, awazibhiyozeli iiholide ezixhasa ezepolitiki nemibutho yokuphucula izinto zasekuhlaleni, ezifana nosuku lwabantu abasebatsha okanye usuku lwamabhinqa. Awayibhiyozeli nemini yenkululeko okanye into efana nayo. Eyona nto ayilindileyo buBukumkani bukaThixo obuza kulungisa iingxaki ezifana nocalucalulo nokuphathwa kwabantu ngokungafaniyo.​—Roma 2:11; 8:21.

•   Ngaba loo holide yenza kubonakale ngathi iqela okanye ilizwe elithile lelona libhetele kunamanye?

   Umgaqo weBhayibhile: “UThixo akakhethi, kodwa kuzo zonke iintlanga wamkela nabani na omoyikayo nowenza izinto ezilungileyo.”​—IZenzo 10:34, 35.

   AmaNgqina kaYehova ayawathanda amazwe awazalelwa kuwo. Kodwa awazibhiyozeli izinto eziphakamisa ilizwe okanye iqela elithile njengelona libhetele, njengezi zilandelayo.

   Izinto ezizukisa abasemkhosini. Endaweni yokuba akhuthaze imfazwe, uYesu wathi kubalandeli bakhe: “Qhubekani nizithanda iintshaba zenu, nibathandazela nabo banitshutshisayo.” (Mateyu 5:44) Ngenxa yaloo nto, amaNgqina kaYehova awayenzi imibhiyozo ezukisa amajoni, kuquka nezi holide zilandelayo:

  •  Iholide ekuthiwa yi-Anzac Day. “Eli gama lithi ‘Anzac’ limela into ethi Australian and New Zealand Army Corps. Ngolu suku sekukhunjulwa abantu abasweleka emfazweni.”​—I-Historical Dictionary of Australia.

  •  Iholide ekuthiwa yi-Veterans Day (I-Remembrance Day, i-Remembrance Sunday, okanye i-Memorial Day). Ezi holide zizukisa “iingcali zasemkhosini kunye nabo basweleka xa kwakukho imfazwe elizweni.”​—I-Encyclopædia Britannica.

   Imibhiyozo yembali yelizwe okanye inkululeko yalo. UYesu wathi ngabafundi bakhe: “Abangabo abehlabathi, njengokuba nam ndingenguye owehlabathi.” (Yohane 17:16) Nangona amaNgqina kaYehova enomdla wokwazi ngembali yamazwe awo, awazibhiyozeli ezi zinto zilandelayo:

  •  Iholide ekuthiwa yi-Australia Day. Ngokutsho kwe-Worldmark Encyclopedia of Cultures and Daily Life, kule holide kwenziwa isikhumbuzo “semini eyayingo-1788 xa amajoni amaNgesi aphakamisa iflegi, aza enza isaziso sokuba iOstreliya izimele.”

  •  Umbhiyozo ekuthiwa yi-Guy Fawkes Day. “Ngolu suku eBritani kuyabhiyozwa ibe kwenziwa nesikhumbuzo saxa uGuy Fawkes namaKatolika, azama ukubulala uKing James I norhulumente wamaNgesi ngo-1605, kodwa akaphumelela.”​—I-A Dictionary of English Folklore.

  •  Umhla Wenkululeko. Kumazwe amaninzi “abantu babhiyozela imini ilizwe labo elayifumana ngayo inkululeko.”​—I-Merriam-Webster’s Unabridged Dictionary.

•   Ngaba kuloo holide abantu baziphatha kakubi okanye abalawuleki?

   Umgaqo weBhayibhile: “Lanele ixesha enilichithe nisenza ukuthanda kweentlanga, niziphethe ngokungenazintloni, nineminqweno engalawulekiyo, nisela kakhulu, nihamba iipati ezingalawulekiyo, nikhuphisana ngokusela utywala, nikhonza izithixo ngendlela eyenyanyekayo.”​—1 Petros 4:3.

   Ngenxa yaloo nto, amaNgqina kaYehova ayayiphepha imibhiyozo enabantu abanxilayo neepati ezingalawulekiyo. Ayakuvuyela kona ukudibana nabahlobo bawo, ibe asenokukhetha ukusela utywala kancinci, okanye angabuphathi kwaukubuphatha. Azama ngandlela zonke ukuthobela icebiso leBhayibhile elithi: “Kungakhathaliseki ukuba niyatya, niyasela okanye nenza nantoni na, yonke into yenzeleni ukuzukisa uThixo.”​—1 Korinte 10:31.

   Ngoko amaNgqina kaYehova awayi kwiikhanivali okanye amatheko afana nazo apho abantu baye baziphathe kakubi, nto leyo ingavumelaniyo neBhayibhile. Le nto iquka itheko lamaYuda ekuthiwa yiPurim. Kudala iPurim yayisenziwa kuba kukhunjulwa xa amaYuda akhululwayo ngoo-500 B.C.E. Kodwa incwadi ekuthiwa yi-Essential Judaism ibonisa ukuba “ngoku amaYuda afana ngathi azenzela ikhanivali.” Abantu abaninzi abayibhiyozelayo, “baye baziphathe ngendlela engalawulekileyo, banxile, bangxole ibe amadoda anxibe izinto zabafazi.”

 Ewe. IBhayibhile ifundisa abantu ukuba babathande ibe babahloniphe abo bakwiintsapho zabo, nokuba bakholelwa ntoni. (1 Petros 3:1, 2, 7) Ewe kona, xa omnye wamaNgqina kaYehova eyeka ukubhiyozela ezinye iiholide, abanye abantu azalana nabo basenokukhathazeka, babe buhlungu, de bazive ngathi abasathandwa. Ngoko amaNgqina amaninzi aye azame ukubonisa abantu azalana nabo ukuba ayabathanda. Loo nto ayenza ngokubacacisela kakuhle ukuba kutheni eyiyekile loo mibhiyozo, nangokumane eyobabona.

 Hayi. Akholelwa ukuba wonke umntu umele azenzele isigqibo. (Yoshuwa 24:15) Azama ukuba “nembeko kumntu wonke,” kungakhathaliseki ukuba bakholelwa ntoni.​—1 Petros 2:17.