EMAPUTO, eMozambique—Izantyalantyala zemvula ezine kangangeeveki eziliqela ukususela ngoDisemba ukuya kutsho phakathi kuJanuwari, kwiphondo laseZambezia eMozambique, zibangele izikhukula ezibulele abantu abayi-158. Iofisi yesebe yamaNgqina KaYehova eMozambique inikele ingxelo yokuba akukho maNgqina aswelekileyo okanye onzakeleyo. Sekunjalo, izikhukula zonakalise iindawo ezimbini zonqulo, ezibizwa ngokuba ziiHolo ZoBukumkani nezindlu zamaNgqina eziyi-225.

AmaNgqina aye amisela iikomiti zoncedo eziliqela ukuze zinyamekele iintswelo zabantu abakwindawo ebinezikhukula. Ezinye iiHolo ZoBukumkani ziye zasetyenziswa njengekhusi lokwexeshana namaziko okusasaza ukutya. EChire, eziikhilomitha ezimalunga neziyi-1 500 ukusuka eMaputo, izikhukula zonakalise iibhulorho ebezisetyenziswa xa kusiyiwa apho, nto leyo ebangele ukuba kungakwazi ukuyiwa kumaNgqina angaphezu kwayi-1 300. Umbutho osebenza ngeenqwelo-moya eMozambique unike amaNgqina imvume yokuwisa kulo mmandla izinto zokunceda eziziitoni eziyi-17 esebenzisa inqwelo-ntaka.

Isithethi samaNgqina KaYehova eMozambique, uAlberto Libombo, sithi: “Bekuvuyisa ukubona isisa abantu abanaso ngokuthi bancedise kwiikomiti zoncedo. Iofisi yesebe eseMozambique iyaqhubeka ilungiselela ukuthunyelwa kokutya nokulungiselela ukwakha nokulungisa izindlu. Siza kuqhubeka sisenza konke okusemandleni ethu ukuze siwathuthuzele size siwancede amaxhoba.”

Media Contact(s):

International: J. R. Brown, Office of Public Information, tel. +1 718 560 5000

Mozambique: Alberto Libombo, tel. +258 21 450 500