JULAYI 27, 2015
ERASHIYA
IRashiya Ivala Iwebhsayithi Esemthethweni YamaNgqina KaYehova
Emva kweenyanga ezisixhenxe iNkundla Ephakamileyo yaseRashiya ithe i-www.pr418.com iyingozi, abasemagunyeni balapho bayivala iwebhsayithi esemthethweni yamaNgqina kaYehova. Bayivala ngoJulayi 21, 2015, xa iSebe Lezobulungisa laseRashiya layifaka kuLudwe Lwezinto Eziyingozi. Umntu akanakukwazi ukungena kule webhsayithi xa eseRashiya kwaye ngoku ukuthetha ngayo kukwaphula umthetho. IRashiya lilo lodwa ilizwe eliye lavala i-jw.org ehlabathini lonke.
Iziganeko Ezikhokelela Ekuvalweni Kwe-JW.ORG
AmaNgqina kaYehova eRashiya ayengayazi ukuba abasemagunyeni kwisixeko saseTver babeqalise ukulungiselela amaphepha omthetho emfihlekweni ngo-2013 ukuze kuvalwe le webhsayithi. Umtshutshisi wesixeko saseTver wafaka isimangalo kwiNkundla yeNqila yaseTsentralniy, enyanzelisa ukuba i-jw.org ivalwe kuba yayineencwadi ezimbalwa zonqulo zamaNgqina kaYehova ezachazwa njengeziyingozi kwisigqibo esenziwa kwinkundla yaseRashiya. * NgoAgasti 7, 2013, inkundla yenqila yasivuma isimangalo somtshutshisi ngaphandle kokuwazisa amaNgqina kaYehova yaze yathi i-jw.org iyingozi.
Akuba amaNgqina esivile isigwebo ezindabeni kwinyanga elandelayo, abhena aza asusa ngokuzithandela iincwadi ekwakusithiwa ziyingozi kubantu baseRashiya. NgoJanuwari 22, 2014,INkundla Yengingqi yaseTver yasijika isigwebo saloo nkundla isithi yayingenasizathu sisemthethweni sokuvala i-jw.org, kwaye yayimele ukuba ibize abantu bewebhsayithi ukuba beze enkundleni bazithethelele.
Linganelisekanga sisigwebo senkundla yengingqi, iSekela loMtshutshisi Oyintloko, uS. G. Kekhlerov, wabhena kwiNkundla Ephakamileyo yaseRashiya. AmaNgqina awazange aziswe ngendlela efanelekileyo ngesi sibheno. Nakuba kunjalo, ngoDisemba 2, 2014, iNkundla Ephakamileyo yaphulaphula isibheno somtshutshisi engekho wona.
Inkundla Ephakamileyo yavuma ukuba amaNgqina ayezisusile iincwadi ekwakuthiwe ziyingozi emva kwesigqibo esasenziwe ngoAgasti 2013 kodwa ngaphandle kwesizathu yayingajiki kwelokuba ezo ncwadi zazinokuphinda zifakwe kule webhsayithi. Ngoko ke,Inkundla yasijika isigwebo esasenziwe yinkundla yengingqi ngelithi i-jw.org iyingozi. * AmaNgqina kaYehova afaka isibheno kwiNkundla Ephakamileyo kodwa sakhatywa. Afaka nesibheno kwiJaji enguSihlalo kwiNkundla Ephakamileyo, ibe sakhatywa ngoJulayi 8, 2015.
Isigqibo Esinokuphelisa Inkululeko Yonqulo
AmaNgqina kaYehova awavumelani nesigwebo seNkundla Ephakamileyo esiqatha nesingenasihlahla, kuba zonke iincwadi zonqulo ekwakuthwe ziyingozi azikhange ziphinde zifumaneke kwi-jw.org eRashiya ukususela ngekwindla ka-2013. Ngenxa yesi sigwebo, abasemagunyeni baseRashiya baye baxelela abantu abenza ifumaneke i-intanethi ukuba bayivale i-jw.org ingafumaneki eRashiya. Oku kuye kwabangela abantu bangakwazi ukuyifumana iBhayibhile ngeelwimi ezingaphezu kwe-130 neencwadi ezithetha ngeBhayibhile ngeelwimi ezingaphezu kwe-700, kuquka isiRashiya neNtetho Yezandla yaseRashiya. Nabani na othetha nokhuthaza abantu ukuba bangene kule webhsayithi eRashiya usenokugwetywa njengesaphuli mthetho ngokwenza umsebenzi abathi uyingozi. Ngenxa yokuvalwa kwayo amaNgqina kaYehova angaphezu kwe-170 000 aye alahlekelwa sisixhobo esibalulekileyo esibanceda kufundo lwabo lweBhayibhile nasekunquleni.
Isigwebo seNkundla Ephakamileyo sivulela abasemagunyeni baseRashiya ithuba lokuba bacinezele ukukhonza ngoxolo kwamaNgqina kaYehova. Logama besaqhubeka bewusebenzisa ngendlela engafanelekanga uMthetho waseRashiya Onxamnye Nezinto Eziyingozi, inkululeko yonqulo eRashiya iza qhubeka ityeshelwa yaye isenokuphela. AmaNgqina kaYehova anethemba lokuba kuza kubakho abasemagunyeni abathethelela ilungelo elisisiseko lokukhonza ngokukhululekileyo nokuxoxwa kwetyala ngendlela efanelekileyo, njengoko usitsho izivumelwano nehlabathi nomgaqo-siseko waseRashiya.
^ isiqe. 4 Ukususela ngoJuni 1, 2015, iinkundla zaseRashiya ziye zachaza iincwadi eziyi-78 zamaNgqina kaYehova njengeziyingozi. AmaNgqina abhena nxamnye nezi zigqibo kwiinkundla zasekuhlaleni nakwiNkundla Yamalungelo Abantu YaseYurophu.
^ isiqe. 7 Ngokuthe ngqo, isekela mtshutshisi lafaka isibheno yaye iOfisi yeJaji Yamatyala Embambano yeNkundla Ephakamileyo yiyo eyathatha isigqibo.
Mhlawumbi Ungayithanda Nale
EZISEMATHENI
INkundla Yezibheno YaseRashiya Imela Amalungelo Abantu Ngokungavumi Ukuba Ivalwe I-JW.ORG
INkundla yeNgingqi yaseTver yajika isigwebo esiwiswe yenye inkundla encinane sokuvala iwebhsayithi yamaNgqina kaYehova.
EZISEMATHENI
INkundla Ephakamileyo YaseRashiya Iwisa Isigwebo Esiyingozi KumaNgqina KaYehova
Isigwebo seNkundla siwenza angakhululeki amaNgqina kaYehova aseRashiya amalunga nayi-180 000. Abasemagunyeni basenokuzigqibela ukuba amaNgqina amele ayeke ukunqula.
EZISEMATHENI
AmaNgqina KaYehova Abhenile, Ngaba Aza Kukhululwa Okanye Aza Kuqhubeka Evalelwe?
NgoDisemba 11, 2014, iNkundla yeNgingqi yaseRostov iza kuchophela isibheno samaNgqina kaYehova ayi-16 atyholwe ngokuba nonqulo oluyingozi eTaganrog, eRashiya.
EZISEMATHENI
INkundla YaseTaganrog Igweba AmaNgqina KaYehova Ngenxa Yokholo Lwawo
Esi sigwebo siza kubangela amaNgqina kaYehova akulo lonke elaseRashiya angaphezu kwayi-160 000 angabi nayo ncam inkululeko yonqulo.
EZISEMATHENI
INkundla YaseYurophu Yamalungelo Abantu Ithethelela Ilungelo LamaNgqina KaYehova AseRashiya Lokuhlanganisana
INkundla YaseYurophu Yamalungelo Abantu isamile kwelokuba, iRashiya ayiwahloneli amalungelo amaNgqina kaYehova.
EZISEMATHENI
INkundla Ephakamileyo YaseRashiya Iphelisa Ilungelo LamaNgqina Lokuba Ngumbutho Osemthethweni ESamara—Iza Kulandelisa Ngantoni?
Isigqibo seNkundla Ephakamileyo senza amaNgqina kaYehova aseRashiya amalunga nayi-180 000 angakhululeki. Abasemagunyeni basenokusebenzisa esi sigwebo ukuze batshutshise amaNgqina.