NgoAprili 7, 2020, amaNgqina KaYehova emhlabeni wonke enze iSikhumbuzo Sokufa KukaYesu Kristu, nangona kukho icoronavirus. Kanye njengokuba uMzalwana uStephen Lett okwiQumrhu Elilawulayo ebethe: “Akukho sifo, nokuba singasehlabathini lonke esinokusenza siyeke ukubonisa uYehova noYesu indlela esibabulela ngayo ngento abasenzele yona, okanye singasenzi iSidlo SeNkosi Sangokuhlwa.” Senziwe njani iSikhumbuzo kulo nyaka?

Eli linqaku lokuqala kwiiNdaba zethu kumanqaku aza kuthetha ngendlela abazalwana bethu emhlabeni wonke abasenze ngayo iSikhumbuzo kweli xesha le coronavirus. Kweli nqaku, siza kuva ukuba iSikhumbuzo senziwe njani kwikomkhulu lamaNgqina KaYehova nakwiofisi yesebe laseMerika.

IQumrhu Elilawulayo lenze isigqibo sokuba yonke intsapho yaseBheteli ibe neSikhumbuzo esinye ukuze ithobele umthetho karhulumente othi abantu abaninzi mabangadibani. Intetho yenziwe nguMzalwana uAnthony Morris kwiholo eseWarwick. Bonke abantu abakwiBheteli eseMerika bebenokuyibukela besemagumbini abo. Nangona bembalwa abantu abatyayo eSikhumbuzweni, iOfisi YaseBheteli ibanike bonke eBheteli isonka newayini.

Abantu abaseBheteli bebekwazi nokuba kwiSikhumbuzo kunye namabandla abo besebenzisa ivideoconference. Nabadala abaseBheteli bebekwazi ukwenza intetho yeSikhumbuzo emabandleni kwivideoconference.

Abantu abaninzi abaseBheteli bathe esi Sikhumbuzo ibisesinye sezona zikhethekileyo abakha baya kuzo. Nangona bebekwiindawo ezahlukeneyo, babone indlela abamanyene ngayo nabazalwana noodade emhlabeni wonke xa bebekhumbula indlela uThixo wethu, uYehova, noNyana wakhe, uYesu Kristu abasithanda ngayo.—Yohane 3:16; Mateyu 20:28.