Xa usithi awukuthandi ukuya esikolweni, siyaqondakala eso sizathu. Kukho ootitshala oboyikayo, abantwana ofunda nabo bafuna wenze izinto ezithile, kukho istres esenziwa zizinto enizibhalayo, nomsebenzi omninzi owenziwayo. a Intombi ekuthiwa nguRachel b uthi:

 “Kunokuba ndibe sesikolweni, kubhetele ukuba ndiye elwandle, ndibe kunye nabahlobo bam okanye ndincedise abazali bam ekuphekeni nasekuklineni!”

 Ukuba uziva njengoRachel, ungakufanisa ukuba sesikolweni nokubasetrongweni, ugwetyiwe ibe kufuneka unyamezele de uyokukhululwa xa ugreda. Ngaba ikhona indlela ebhetele onokukujonga ngayo ukuba sesikolweni?

 Ngaba ubusazi? Xa ukujonga kakuhle ukuya esikolweni, awuye ukubone njengento edinisayo nekumele uyinyamezele. Kwelinye icala, isikolo siye sikuncede ube nezinto okwaziyo ukuzenza nezingakunceda naxa sele umdala.

 Ukuze usibone bhetele isikolo, zama ukucinga ngezi zinto zilandelayo:

 Imfundo yakho. Ngokuya ufunda, uza kuya ubona iindlela ezibhetele onokuzisebenzisa xa ulungisa iingxaki oza kubanazo emsebenzini okanye ebomini bakho, endaweni yokuba usoloko ulindele abanye abantu ukuba bakwenzele izinto. Zibuze, ‘Nokuba kukho izinto endingazithandiyo esikolweni, ziintoni ezinokundinceda nendinokuzisebenzisa ebomini bam xa ndifundile?’

 Umgaqo weBhayibhile: “Bukhusele ubulumko namandla okucinga.”—IMIzekeliso 3:21.

 Izinto oqhele ukuzenza. Izinto ezintle oqhele ukuzenza xa usesikolweni, zinokunceda ukwazi ukulisebenzisa kakuhle ixesha lakho, ukwazi ukuzibamba, uze usebenze nzima. Zonke ezi zinto ziza kukunceda xa sele umdala. Zibuze: ‘Zeziphi izinto zesikolo endiqhele ukuzenza kakuhle eziye zindincede ndibe ngumntu ozenza kakuhle izinto nosebenza nzima? Ndingaphucula phi kwezi zinto?’

 Umgaqo weBhayibhile: “Kukho umvuzo kulo lonke uhlobo lomsebenzi onzima.”—IMizekeliso 14:23.

 Indlela obaphatha ngayo abantu. Ukuncokola nabantu ofunda nabo kungakunceda ube ngumntu onovelwano nobahloniphayo abanye. Umfana ekuthiwa nguJoshua uthi “Ukufunda ukuthetha nabantu kubaluleke kakhulu, kufana nokufunda ihistory nesayensi. Le yinto eza kukunceda ubomi bakho bonke.” Zibuze, ‘Ziintoni endizifundileyo esikolweni ngokuvana nabanye abantu, nabo bakhuliswe ngendlela eyahlukileyo kweyam, nabakholelwa izinto ezahlukileyo kwezam?’

 Umgaqo weBhayibhile: “Zamani ukuba seluxolweni nabantu bonke.”—Hebhere 12:14.

 Ikamva lakho. Isikolo sinokukunceda ukwazi ubona izinto okwazi ukuzenza kakuhle, uze uzibekele izinto onokuzenza ucinga ngezo zinto. Elinye ibhinqa ekuthiwa nguBrooke uthi: “Ungakwazi nokufumana uqeqesho ukuze xa ugredile ukwazi ukufumana umsebenzi.” Zibuze: ‘Ndiza kwenza ntoni ukuze ndikwazi ukuziphilisa emva kokuba ndigqibe isikolo?’ Ndingazikhetha njani kakuhle izinto endiza kuzifunda ukuze ndikwazi ukuwenza lo msebenzi?

 Umgaqo weBhayibhile: “Qiqa phambi kokuba ubeke unyawo lwakho endleleni.”—IMizekeliso 4:26, iBhayibhile yesiXhosa ka-1996.