•  Abona bahlobo ungavaniyo nabo

•  Izizathu ezimbini zokuba kwenziwe uxolo

•  Oko kuthethwa lolunye ulutsha

Abantwana bakowenu baye babizwa ngokuba “ngabona bahlobo ungavaniyo nabo.” Uyabathanda, ibe nabo bayakuthanda​—kodwa ngamanye amaxesha nikhe nibhidane. UHelena oneminyaka eli-18 uthi: “Umntakwethu omncinci uyandicaphukisa. Uyazi ukuba ndicofwa phi ibe nini ukuze andicaphukise!”

Ezinye iingxabano zinokulungiswa ngokuthetha. Ngokomzekelo:

• Amakhwenkwe amabini ahlala egumbini elinye anokuxabana ngalo. Ingalungiswa njani? Mawathethe ibe ngamnye azi ukuba elo gumbi asilolakhe yedwa. Mawasebenzise umgaqo weBhayibhile okuLuka 6:31.

• Intombazana inokunxiba iimpahla zikadade wayo ingazibolekanga. Ingalungiswa njani? Mabathethe ngale ngxaki baze babekelane imida efanelekileyo. Mabasebenzise umgaqo weBhayibhile okweyesi-2 kaTimoti 2:24.

Kwezinye iimeko, ukungavani kwabantu abazalwa kunye kuba yingxaki ibe kusenokubangela imiphumo emibi. Cinga ngale mizekelo mibini yeBhayibhile:

• UMiriyam noAron babemmonela uMoses, umntakwabo ibe imiphumo yaba buhlungu. Funda ingxelo ekwiNumeri 12:1-15. Emva koko uzibuze: ‘Ndingakulumkela njani ukumonela umntwana wasekhaya?’

• UKayin waba nomsindo kangangokuba wabulala umntakwabo uAbheli. Funda ingxelo ekwiGenesis 4:​1-​12. Emva koko uzibuze: ‘Ndingakunqanda njani ukuba nomsindo kumntakwethu okanye kudadewethu?’

Nokuba kunzima kangakanani na ukuxolelana nomntwana wakowenu, zikho izizathu ezimbini zokwenza uqonde isizathu sokuba kubalulekile.

1. Kubonisa ukuba ukhulile. UAlex umfana oselula uthi: “Ndandidla ngokuxabana noodadewethu ababini abancinci. Ngoku andisabaphathi njengakuqala ngenxa yokuba ndizolile. Unokuthi ndikhulile.”

   IBhayibhile ithi: “Ozeka kade umsindo unokuqonda okuninzi, kodwa ongenamonde uphakamisa ubudenge.”​—IMizekeliso 14:29.

2. Luqeqesho oluya kukunceda kwixesha elizayo. Ukuba awukwazi kubanyamezela abantwana bakowenu, uza kukwazi njani kumntu otshate naye, umntu osebenza naye, umqeshi wakho okanye nabani na osoloko ukunye naye?

   Inyani engenakuphikwa: Indlela oza kuba phatha ngayo abanye ixhomekeke kwindlela okwazi ngayo ukuthetha ibe ayikho enye indawo onokukhulisa kuyo ubuchule bakho ngaphandle kwentsapho.

   IBhayibhile ithi: ‘Ekubeni kuxhomekeke kuni, yibani noxolo.’​—Roma 12:18.

Ngaba uyafuna ukulungisa ukungavani nomntwana wakowenu? Funda inqaku elithi “Oko kuthethwa lolunye ulutsha” uze ujonge nephepha onokubhala kulo elihamba neli nqaku elinomxholo othi, “Ukuxolelana Nabantwana Bakowenu.”