“UThixo uyakwazi ukusebenzisa amandla akhe kuthi ukuze enze izinto ezingaphaya kwezo sizicelayo nesinokuzicinga. Makazukiswe.”—Efese 3:20, 21, INguqulelo Yehlabathi Elitsha.

 “Kulowo unako ukwenza ngaphezu kokuba sicela nokuba siqiqa, ngamandla akhe asebenza ngaphakathi kuthi: makubekho udumo.”—Efese 3:20, 21, IBhayibhile Yowe-1996.

 Umpostile uPawulos uchaza indlela aqiniseke ngayo ukuba uThixo uyayiphendula imithandazo yabakhonzi Bakhe, ibe izinto abazifunayo uyakwazi ukuzenza ngaphezulu kunoko bakulindeleyo okanye banethemba lako.

 “Kulowo unako . . . ngamandla akhe asebenza ngaphakathi kuthi.” Ivesi 21 ibonisa ukuba ‘lowo’ nguYehova uThixo. a Kangangokuba, uPawulos wabhala wathi: “Makazukiswe ngenxa yezinto azenzileyo ngebandla nangoKristu Yesu.” (Yohane 20:31) Ngoko, uThixo angasinika amandla esiwadingayo ukuze sikwazi ukwenza ukuthanda kwakhe.—Filipi 4:13.

 Kwivesi 20, umpostile uPawulos uchaza into ebalulekileyo ngendlela uYehova abanceda ngayo abakhonzi Bakhe. Enye ingcaciso xa ithetha ngala mazwi abonisa ukuba uThixo “uyakwazi” ithi: “Amandla ekuthethwa ngawo apha angaphezulu kwamandla nje aqhelekileyo, kodwa ngamandla aqinisekisiweyo ukuba anokukwazi ukwenza izinto.” Umntu ongumhlobo usenokufuna ukusinceda, kodwa ngamanye amaxesha usenokungakwazi. Ngokungafaniyo naloo mhlobo, uYehova yena usoloko ekwazi ukwenzela abakhonzi bakhe nantoni na abayidingayo ukuze abancede nokuze aphendule imithandazo yabo. Nguye qha onamandla angohlulwa yinto.—Isaya 40:26.

 “UThixo uyakwazi . . . [ukwenza] izinto ezingaphaya kwezo sizicelayo nesinokuzicinga.” UYehova angakwazi ukunceda abakhonzi bakhe ngezinto abazidingayo ngaphezulu kwezinto abanokuzicinga. Angabanceda ngeendlela ezikogqitha lee oko bacinga ukuba kukuncedwa kakhulu okanye kukuboniswa ububele.

 Amazwi athi “ezingaphaya kwezo sizicelayo nesinokuzicinga” asifundisa enye into ngale vesi. Xa umpostile esithi “ezingaphaya kwezo [zinto] sizicelayo nesinokuzicinga,” ufuna onke amaKristu aqonde ukuba uThixo angawanceda ngeendlela angazilindelanga. Ngamanye amaxesha, amaKristu asenokubona ngathi iingxaki zawo zinkulu kakhulu okanye azinakulungiseka. Mhlawumbi ade angayazi nokuba athandazele ntoni. Kodwa uYehova uyiqonda yonke ingxaki yawo ibe akanakungakwazi ukubanceda. Ngexesha elifanelekileyo, angalungisa nayiphi na ingxaki, ngeendlela angazange ayicinga. (Yobhi 42:2; Yeremiya 32:17) Okwangoku, uwanika amandla okunyamezela evuya!—Yakobi 1:2, 3.

 Incwadi yamaEfese yileta umpostile uPawulos awayibhalela amaKristu awayehlala e-Efese eAsia Minor, kwindawo ekuthiwa kuseTurkey ngoku. Kule leta, wabhala izinto awabathandazela ngazo. (Efese 3:14-21) Wathandazela ukuba onke amaKristu alwazi uthando lukaKristu ngokuzama ngandlela zonke ukulinganisa indlela awayecinga nawayesenza ngayo uYesu. Xa egqibezela lo mthandazo, uPawulos wazukisa uThixo waza wathetha amazwi akumaEfese 3:20, 21.

 Bukela le vidiyo imfutshane, ukuze ubone nezinye izinto ekuthethwa ngazo kwincwadi yamaEfese.