Ngaba Zikhona Izinto Ezinokundithuthuzela EBhayibhileni?
Impendulo esuka eBhayibhileni
Ewe. (Roma 15:4) Khawujonge ezinye iivesi zeBhayibhile eziye zathuthuzela abantu abaninzi abaneengxaki nabakhathazekileyo.
Kweli nqaku
Ubunzima
INdumiso 23:4: “Nangona ndihamba kwintlambo emnyama kakhulu, andoyiki kwenzakala, kuba unam wena.”
Ithetha Ukuthini Le Nto: Xa uthandaza kuThixo uze ulithembe icebiso elikwiLizwi lakhe, iBhayibhile, unokumelana neengxaki ungoyiki.
Filipi 4:13: “Ezintweni zonke ndinamandla ngenxa yalowo undinika amandla.”
Ithetha Ukuthini Le Nto: UThixo angakunika amandla okumelana neengxaki.
Ukuswelekelwa ngumntu omthandayo
INtshumayeli 9:10: “Akukho msebenzi nakuceba nakwazi nabulumko engcwabeni, apho uya khona.”
Ithetha Ukuthini Le Nto: Abantu abaswelekileyo abeva ntlungu, abanakusenzakalisa ibe akhonto bayivayo.
IZenzo 24:15: “Uza kuvusa abantu.”
Ithetha Ukuthini Le Nto: UThixo uza kubavusa abantu abaswelekileyo esibathandayo.
Ukutyiwa sisazela
INdumiso 86:5: “Kaloku wena Yehova, a ulungile futhi usoloko ufuna ukuxolela; uthando lwakho olungagungqiyo luyaphuphuma kwabo bakhalela kuwe.”
Ithetha Ukuthini Le Nto: UThixo uyabaxolela abo bazisola nyhani ngeempazamo abazenzayo, nabazimisele ukungaziphindi.
INdumiso 103:12: “Uzibhekelisele kude nathi izono zethu, njengokuba kude kwempumalanga entshonalanga.”
Ithetha Ukuthini Le Nto: Xa uThixo esixolela, uyazisusa kuthi iimpazamo zethu. Akasikhumbuzi ngazo kuba efuna ukusohlwaya.
Ukukhathazeka
INdumiso 31:7: “Uyibonile inkxwaleko yam; uyayibona intlungu yam engathethekiyo.”
Ithetha Ukuthini Le Nto: UThixo uzazi kakuhle zonke izinto ezikwehlelayo. Uyiqonda kakuhle indlela oziva ngayo, naxa abanye bengayiqondi.
INdumiso 34:18: “UYehova usondele kwabo baphuke intliziyo; uyabasindisa abo batyumkileyo emoyeni.”
Ithetha Ukuthini Le Nto: UThixo uthembisa ukuba uza kukuxhasa xa ukhathazekile. Angakunika amandla okunyamezela intlungu okuyo.
Ukugula
INdumiso 41:3: “UYehova uza kumxhasa xa egula esebhedini.”
Ithetha Ukuthini Le Nto: UThixo angakunceda xa ugula ngokukunika uxolo lwengqondo, amandla aze akuncede unyamezele uze ube nobulumko bokwenza izigqibo ezifanelekileyo.
Isaya 33:24: “Akakho umhlali wakhona oza kuthi: ‘Ndiyagula.’”
Ithetha Ukuthini Le Nto: UThixo uthembisa ukuba kuza ixesha apho abantu baza kuhlala besempilweni.
Ukuba Nexhala Nestres
INdumiso 94:19: “Xa amaxhala ayengaphezu kwamandla am, wena wandithuthuzela waza wandenza ndazola.”
Ithetha Ukuthini Le Nto: Ukuba sithi xa sinestres sisondele kuThixo, unokusinceda sizole.
1 Petros 5:7: “Liphoseni kuye lonke ixhala lenu, kuba unikhathalele.”
Ithetha Ukuthini Le Nto: UThixo uyayibona intlungu yethu, kangangokuba usikhuthaza ukuba sithandaze kuye, simxelele iingxaki esinazo.
Iimfazwe
INdumiso 46:9: “Uphelisa iimfazwe emhlabeni wonke.”
Ithetha Ukuthini Le Nto: UBukumkani bukaThixo sele buza kuziphelisa zonke iimfazwe.
INdumiso 37:11, 29: “Kodwa umhlaba uza kuba ngowabalulamileyo, ibe baza kuphila kamnandi kukho uxolo oluninzi. . . . Umhlaba uza kuba ngowamalungisa, ibe aza kuhlala kuwo ngonaphakade.”
Ithetha Ukuthini Le Nto: Abantu abalungileyo baza kuphila emhlabeni kamnandi ngonaphakade kukho uxolo.
Ukuba Nexhala Ngekamva
Yeremiya 29:11: “‘Kuba mna ndizazi kakuhle izinto endizicingayo ngani,’ utsho uYehova, ‘ndicinga ngoxolo, kungekhona intlekele, ukuze ndininike ithemba nekamva.’”
Ithetha Ukuthini Le Nto: UThixo uqinisekisa abantu bakhe ukuba baza kuphila kamnandi.
ISityhilelo 21:4: “Uza kuzosula zonke iinyembezi emehlweni abo, kungabi sabakho kufa, kungabi sabakho kuzila nakukhala nantlungu. Izinto zangaphambili azisekho.”
Ithetha Ukuthini Le Nto: UThixo uthembisa ukuba zonke izinto ezimbi ezenzekayo ziza kuphela.
a UYehova ligama likaThixo. (INdumiso 83:18) Jonga inqaku elithi “Ngubani UYehova?”
Mhlawumbi Ungayithanda Nale
IMBONISELO
Inkathalo KaThixo Ingakunceda Njani Wena?
IBhayibhile isenza sizikholelwe izithembiso zikaThixo zekamva eliqaqambileyo.
IMIXHOLO ENGAKUMBI
Ukuthuthuzelwa Kwabantu Abaswelekelweyo
Xa siswelekelwa ngumntu esimthandayo, sisenokuziva ngathi akukho mntu unokuyiqonda intlungu esikuyo. Kodwa uThixo uyayiqonda ibe angasinceda.
IZINTO EZIBALULEKILEYO EZIFUNDISWA YIBHAYIBHILE
Kutheni UThixo Evumela Ukubandezeleka?
Abantu abaninzi bayazibuza ukuba kutheni emhlabeni kusenzeka izinto ezimbi kangaka. IBhayibhile ineempendulo ezithuthuzelayo nezanelisayo.