YOOSOMA 10
Mithukumano dha Anamoona a Yehova Dhin’ya Wookhaliherani Dhai?
Niire mootaka orowa omithukumanoni dha Anamoona a Yehova? Akhala wiira khannatake, nihiku mun’ya nnyu orowa onthukumanoni onawoodhivelani. Woonawene munniikoha: ‘Eseeni eniireya omithukumanoni? Seeni mithukumano dhiraawa dhootthuneya? Seeni kinreerelaka orowa omithukumanoni?’ Yoosoma ela, mun’ya ohudha moopora mithumano dhin’ya awa wookhaliherani otepa omwaattamela Muluku ni wookhaliherani mweekumini mwinyu khuta nihiku.
1. Tiivi eri yoolakela yuulupale ya mithumano dha Anamoona a Yehova?
Nlipa-omwaatinkhe Biibiliya olontte dho: “Kinnimuttottopela Muluku mmithukumanoni.” (Esalimo 26:12) Ni moolumo ala, nlipa-omwaatinkhe Biibiliya onnoonihera etthu yuulupale enniiriha orowela mithukumano: onttottopela aahiidho onkokhorela Muluku. Tivondho, Anamoona a Yehova a olumwinkhu wootheene annithukumana khuta esumana wiira enkokhorele Muluku, omwiipela ni onvekela. Ivaara dhikina vamwaakhani, Anamoona a Yehova annipaka mithukumano dhuulupale. Voohakanyera Anamoona a Yehova waadhivela orowela mithukumano.
2. Etthu seeni mun’ya nnyu ohudha omithukumanoni wihu?
Etthu yuulupale niniiranhu omithumanoni onsoma Biibiliya. Hiyo ninnisoma Nuulumo na Muluku, ni ninnitaphuleliwa “nulumo ti nulumo, wira othene yiwe orattene molumo asommwe.” (Munsome Nehemiya 8:8.) Nyuwo mwarowa omithumanoni dha Anamoona a Yehova, mun’ya ohudha voohima dha Yehova ni mikhalelo-dhe dhooreera. Ndho vaavo mun’ya nnyu ohudha wiira Yehova onnoophetani elo enoowiirihani otepa otthuna omwaattamela. Nitho nnoodhuwela moopora Yehova on’ya iye wookhaliherani wiira nkhalena ekumi yoohakalaliha.—Yesaya 48:17, 18.
3. Waadhuwela atthu akina omithumanoni on’ya wookhaliherani dhai?
Yehova onlotta wiira ‘nuupuwelane nkina ni nkhwe wiira nitumereryane woonihera opheta ni miteko dhooreera, nihihiyaka othukumana.’ (aHeeberi 10:24, 25) Omithukumanoni wihu, nyuwo mun’ya waaphwanya atthu ancalana nkina ni nkhwe. Nitho nnoowiiwa atthu akinaku elottaka itthu dhooreera dha mBiibiliyani. (Munsome aRoma 1:11, 12.) Nkhama dhiidhale nyuwo muntthuna nnyu ondhuwela saana Muluku, ni atthu awo antthuna dhiidho. Ohiya-vo, mun’ya waadhuwela atthu oohakalala hata dhaaphwanyaka mixankiho. Ala mathowa vakhaani ammwiiriha Yehova onitumererya ohihiya othukumana!
NHUDHE ITTHU DHIKINA
Moone itthu dhiniireya omithukumanoni wa Anamoona a Yehova. Nitho moone seeni oraawa vootthuneya wiilipihera orowela mithukumano.
4. Ndhuwele etthu eniiriwa omithukumanoni dha Anamoona a Yehova
Makiristau a eseekulu yoopacera, yaanithukumana voohihiyerera wiira enkokhorele Yehova. (aRoma 16:3-5) Munsome aKolosi 3:16, nuuvinya mwaakhule nikoho ninttharelana:
-
Makiristau a eseekulu yoopacera yaankokhorela dhai Yehova?
Nitho, olelo, Anamoona a Yehova annaatakiha Makiristau a eseekulu yoopacera ethukumanaka voohihiyerera wiira enkokhorele Muluku. Wiira moone moopora dhinpakiwa awa mithukumano, moone EVIIDIYU. Nuuvinya, moone efootu enoonihera moopora dhinpakiwa awa mithukumano mmulokoni ni mwaakhule makoho anttharelana.
-
Nkhama moone nnyu eviidiyu, nhoona itthu dhiniireya Empa ya Omwene. Itthu seeni dhiniireya Empa ya Omwene dheidho dhinlikana ni ele nsomme nnyu aKolosi 3:16?
-
Nkhama moone nnyu eviidiyu ni efootu eri odhulu, itthu seeni dhihireere woodhivelani voohima dha mithukumano?
Munsome 2 aKorinto 9:7, nuuvinya mwaakhule nikoho ninttharelana:
-
Seeni mithukumano dha Anamoona a Yehova ohinsokiwa awa nsurukhu?
Nyuwo ni ole onoosomihani Biibiliya, moone eprokaraama ya mithukumano dha esumana enttharelana.
-
Mphantta seeni wa mithukumano nnoona nnyu wiira onawoodhivelani aahiidho wookhaliherani mweekumini mwinyu?
Niire mwaanidhuwela?
Nsaaitini jw.org, nnoowerya ophwanya ewoora ni opuro wa mithukumano olumwinku wootheene.
-
Mithukumano dhihu dhinhela mpuwa miyaha, dhowoonihera, ni iviidiyu. Mithukumano dhinpacera ni dhimmala ni ncipo ni nivekelo
-
Ipaarti dhikina dha mithukumano, atthu ootheene antthuna anniviiha ntata wiira ekomentari
-
Atthu ootheene annaakheliwa: alopwana, athiyana, atthu awuuluvala, ni anaahima
-
Mithukumano dha Anamoona a Yehova, khaawo ntthu onveka nsurukhu
5. Tivootthuneya wiilipihera orowela mithukumano
Nthokorere ntakihero na emudhi ya Yesu. Wiira awo erowele mithukumano dhuulupale khuta mwaakha yaneetta ikiloometuru 100 aahiidho mahiku mararu eviraka mmiyaakoni okhuma ONazarethi erowaka OYerusalemu. Munsome Luka 2:39-42, nuuvinya mwaakhule makoho anttharelana:
-
Nnoona wiira emudhi ya Yesu yaanitthuneya wiilipihera wiira yeette nkhwaha?
-
Seeni nyuwo munreerela nnyu wiilipihera wiira nrowele mithukumano?
-
Nnoona wiira tivootthuneya orowela mithukumano? Mwaha wa seeni?
Biibiliya onlotta wiira tivootthuneya othukumana ni atthu akina wiira ninkokhorele Yehova. Munsome aHeeberi 10:24, 25, nuuvinya mwaakhule nikoho ninttharelana:
-
Seeni nihinreerela nhu ohihiyerera orowela mithukumano?
ATTHU AKINAKU ANLOTTA WIIRA: “Khontthuneya ntthu okhuma owannye wiira wankokhorele Muluku. Onsoma-ru pahi Biibiliya ntthu ori owannye onniphiyera.”
-
Etestu seeni ya mBiibiliyani aahiidho ntakihero nnoonihera moopora Yehova onoonela iye mithukumano?
WUULUULA
Orowela mithukumano onawookhaliherani otepa ondhuwela saana Yehova ni olipiha waatana winyu ni yeene. Ohiya-vo, mithukumano dhinawoovahani eparakha ya onkokhorela Muluku vamodha ni atthu akina.
Ipontu dhuulupale
-
Seeni Yehova onnitumererya iye orowela mithukumano?
-
Eseeni mun’ya nnyu ohudha omithukumanoni wa Anamoona a Yehova?
-
Niire munnuupuwela etthu emodha ya moopora mithukumano dhin’ya awa wookhaliherani?
NTHOKODHE ITTHU DHIKINA
Niire onnoxankihani wuupuwelela orowa omithukumanoni? Elo yootaka omwiiranela nlopwana mmodha. Moone moopora aapacenre iye odhiveliwa ni mithukumano.
Moone moopora rapasi adhiveliwe iye ni mithukumano ni etthu apanke iye wiira ahiyeleele nnakhala nthukumano mmodha.
Moone ele atthu akina anuupuwela awa voohima dha orowela mithukumano.
“Seeni Oraawa Vootthuneya Orowela Mithukumano?” (Mwaha ori nsaaitini jw.org)
Moone ntakihero na nlopwana mmodha yoowo ari ootakhala nrima ni airela mphantta ekhurupu ya malatarau. Moone moopora mithukumano dha Anamoona a Yehova dhirukunusala awa ekumi-ye.
“Miyo Nkaawerya Weetta Kihinkunse Kapwitthi Aka” (A Sentinela, 1 de Julho de 2014)
