Anna oobeteeli yaahiviriha iyaakha dhawaatta etekaka opuro wa raadiyu WBBR elapo ya Staten Island, epooma ya oNova York. Woopacerani awo yaahuuha mittaikho, noomala yaahiteka empa yuulupale yaaya awa ekakhalamo anna yaavara nteko ni yaahiteka epereetiyu yaaya awa opwehamo ikaruma. Noomala omaliha nteko wooteka, anna yaahipacera “othomeya odhulu” ikaruma dhootheene dhootthuneya wiira epacere onrumeela raadiyu. Masi nleelo khaalikanne okhala wiira dhaahikhala mixankiho yaareerela awa ophuka.

Vaavo anna yammontara awa anteena ole muulupale yaahoona wiira opuro ole waahiyeva. Okhala wiira wuunnuwa wa anteena waari wa imeeturu 91 ni aatthuneya othomeiwa vadhulu wa mittaikho miili dhaattaivale imeeturu 61. Evaara yoopacera itthu khidhaakhumenle saana. Masi okhala wiira anna yaniroromela nikhalihero na Yehova yaahitthikela ommontari, ndho wookidherani itthu dhaahikhumela saana. Munna Calvin Prosser, yoowo aakhalihera nteko owo, onlotta wiira: “Vaakhanle wiira evaara yoopacera naahiwerya onthomeya anteena nikhumela saana, nampacera wiittottopa nilottaka wiira: ‘Moone etthu nipanke nhu!’” Ohiya opaka elo, anna yaahinvuwiha Yehova mwaha wa waakhalihera okhumela saana. Masi hata eri dhiidho, nlelo dhaahikhala mixankiho dhikina.

Noomala anna omaliha ommontari raadiyu, yaanihala ekaruma ekina yootthuneya yaareerela awa othuma wiira epacere onrumeela raadiyu. Ndho, anna yaahiphwanya ekaruma enrumiha madhu ya 500 watt yaaphwanyaneya opuro ole. Masi ohiya othuma mikorofooni, yanthumme telefooni aarumeeliwa ni atthu awaatta okathi ole. Ndho ohiyu wa mweeri wa Fevereiro, anna yaahilakela weehererya ikaruma dhootheene. Noomala yaahoona wiira yaanitthuneya  okhalana eprokaraama wiira erumihe, ndho wiira epake elo yaahiipa macipo a Omwene. Ernest Lowe onnuupuwela wiira vaavo anna yaaipa awa yaahilikareliwa ni mphuki Rutherford, b yoowo aawiriyanne ncipo nraadiyuni elapo ya oBrooklyn, opuro yoowo waattaivenle ikiloomu 25.

Munna Rutherford aahaafuxuru airaka: “Mmaale khamunrela onyakula vawaatta”. Nitho aahilotta wiira: “Nyuwo munnyakula nkhama ekhurupu ya apaakha akaluwaluwa!” Nooomala wiiwa moolumo ale, anna yaahuuliwa muru, mwaawakuveya emaaliha eprokaraama, masi awo yaahidhuwela wiira raadiyu ole aanivara nteko ni aari olikaneene wiira epacere onrumeela.

Nihiku na 24 a Fevereiro na mwaakha wa 1924, vaavo yaakhumiheriwa awa eprokaraama yoopacera, munna Rutherford aalontte wiira opuro wa raadiyu waaya orumeeliwa wiira okhalihere “dhootthuna dha Omwene wa Mesiya.” Owo aahilotta yoolakela ya raadiyu wiira “waari waakhalihera atthu odhuwela nhupi wa mBiibiliyani ni okathi ankhala awa, voohixikha opuro araawa aahiidho makhalelo-ya.”

Eprokaraama yoopacera orumihiwa yaahikhumela saana ni iyaakha 33 dhaattharelana, ntthenkeso waahinrumeela raadiyu WBBR wiira arumihe iprokaraama.

Mweeri wa Julho wa mwaakha wa 1924, alipa onsoma Biibiliya yaahithukumana wiira empake konkereesu elapo ya oColumbus, Ohio. Atthu yaarule omoona konkereesu yaakhumme ilapo dhoovirikana ni yaahiiwa miyaha ni elottelo ya erabu, enkelexi, efrasexi, elemawu, ekereku, ehunkaru, eitaliyaanu, elituwaanu, epolonixi, erusu, eskantinaavu ni eukaraniyaanu. Miphantta dhikina dha eprokaraama dhaahirumihiwa nraadiyuni ni anna yaahiveka exornaale ya elapo ele yaaitthaniwa Ohio State Journal wiira yaatikhe miyaha dha eprokaraama ya mahiku ootheene akonkereesu.

Neesese a 24 a Julho, anna ni arokora yaaxira 5.000 yaahirowa olaleerya epooma ele aapakiwe konkereesu. Awo yaahivaha iliivuru 30.000 ni yaahipaceriha dhoosoma dha Biibiliya dhawaatta. Erevista ya Wiikocela yaahitthana nihiku nne okhala “nihiku nootepa oohakalaliha na konkereesu ole.”

Etthu ekina yuulupale ya konkereesu ole yaairanen’ye Neethanu, nihiku na 25 a Julho, vaavo munna Rutherford alontte iye moolipa nrima itthu dhoohiloka dhaapakiwa ni ahooleli a itiini. Ndho opanka elo, waalikhana nkhama aasoma edukumentu yaakhulelihiwe ni nlamulo. Owo alontte wiira ahooleli a epoliitika, ahooleli a itiini ni alipa anakoso “yaanaakhoottiha atthu odhuwela ekhweeli voohima dha Omwene wa  Muluku, yoowo Muluku on’ya iye orumeela wiira aareelihe apinaatamu.” Nitho owo alontte wiira awo “yaanipaka etthu yoohiloka okhala wiira yaanikhalihera ntthenkesu wa Liga das Nações elottaka wiira elo yaari ‘enamuna Muluku onlamulela iye elapo.’” Ndho alipa onsoma Biibiliya yaanitthuneya okhala oolipa nrima ni ovilela wiira ewerye waalaleerya atthu onhupi ola.

Noovira okathi, mwaha mmodha wa erevista Wiikocela waalontte wiira: “Konkereesu a oColombus aahilipiha waamini wa anna ni arokora . . . , nitho aahaavaha olipa nrima wiira elaleerye hata ettharatthariwaka.” Leo Claus, yoowo amoonne konkereesu, onlotta wiira: “Hiyo naakhumme opuro ole nilipiwe wiira nilaleerye onhupi ole nttetthe nhu.”

Mweeri wa Outubro, alipa onsoma Biibiliya yaahipacera okawa ikoopiya dhawaatta ya efolyetu yaarina muru oni: Nthowa na Ahooleli a Itiini, yeelo yaarina mwaha wawiimpirimiriwa yoowo munna Rutherford aalontte iye okonkereesuni. Esitati ekhaani eniitthaniwa oCleveland, Oklahoma, Frank Johnson aahimaliha okawa ifolyetu mpuwa wa minuutu 20, ehinatthi ophiya ewoora aaiwananne iye okumana ni anna akina. Ndho atthu akina esitati ele yaahinanariwa mwaha wa nhupi wa munna ole, epacera onkoca. Tivondho owo khaikhuraanne alipelelaka ophiya anna akina. Noomala owo aahirowa wiipitha nkerexa yaattamenle opuro ole. Ndho okhala wiira nkerexa mmwe khiyaarimo atthu owo aahihiya ekoopiya ya efolyetu eni: Nthowa na Ahooleli a Itiini, mpuwa wa Biibiliya apastoore ni mapuro ootheene yaakilathi atthu. Owo aapanke elo mwawaakuveya wiira aahiphwanyeriwe. Nitho okhala wiira aahikhalana okathi, aahikhuma arowa ikerexa piili apaka etthu emodharu.

Noomala opaka elo, Frank aahitthimaka arowaka opuro aaiwananne iye okumana ni anna akina. Owo aahiipitha ottuli wa opuro aathumihiwa kasoliina akaathurumela ohoolo wiira oone akhala wiira atthu ale yaankoca yaanvira opuro ole. Atthu awo yaahivira ohoolo wa opuro ole, masi khiyawenrye omoona. Naanaanoru, anna yaalaleerya waattamela opuro ole yaahiphiya, enkusa munna Frank erowa.

Munna mmodha onnilotta etthu yiiranen’ye airaka: “Noomala okhuma opuro ole, naahivira ohoolo wa ikerexa idhe ttharu, naaphwanya atthu yaaphiya 50 eri ohoolo. Atthu awo yaasoma efolyetu ni akina yaamooniha efolyetu elo pastoore. Ndho, ninnixukhurela Yehova mwaha wa onikhapelela ni onikhalihera wiira nihooniwe ni awanani awo Omwene.”

Ilapo dhikina, alipa onsoma Biibiliya yaanilaleerya moolipa nrima. Mwa ntakihero, onoorti wa oFrança, munna Józef Krett ahaalaleerya atthu yanthipa toroma, yaawo yaakhumme elapo ya oPolônia. Ohiya-vo, anna yaahaalaleya atthu yaakhala epooma ele wiira ere ewiriyane mwaha yoowo waaya olottiwa ni munna Józef, waarina muru oni: “Moohilekela Atthu Akhwiye Anoohihimusiwa.” Noomala pastoore odhuwela elo, aahaleela atthu etiini-ye wiira ehirowe owiriyana mwaha owo. Masi mootikiniha yaahiiraneya etthu yoovirikana, atthu yaaxira 5.000 yaahura owiriyana mwaha waalottiwe ni munna Józef onhela mpuwa pastoore ole. Ndho munna Józef aahinvekela pastoore wiira aakihere dhookhupali-dhe masi owo aahikhootta. Noomala munna Józef olotta mwaha, aahaakawela atthu ootheene iliivuru aariyeena ni aahoona wiira atthu yaarule yaanitthuna odhuwela ekhweeli ya Nuulumo na Muluku.—Amosi 8:11.

Elapo ya wÁfrica, Claude Brown ahipacera olaleerya ihapari elapo ya oCosta de Ouro, olelo ondhuweliwa okhala oGana. Mwaha aalonte iye ni iliivuru aakanwe iye dhaahakhalihera atthu awaatta elapo ele odhuwela ekhweeli. Ntthu mmodha awiriyanne mwaha wa munna Brown ti John Blankson. Owo aahoona wiira aahiphwanya ekhweeli, okathi aasoma iye wuuniversitati wiira akhale nfirimeeru onvaha ikininu. John olontte wiira: “Odhuwela ekhweeli wookiphwanyiha ohakalala, ndho elo yaanikiiriha waaleela atthu akina wuuniversitati itthu kaahudhaka.”

 Okathi John ansoma iye Biibiliya aahihudha wiira yoohudhiha ya amuluku araru khenvarihana ni Biibiliya. Ndho nihiku nimodha, John aahirowa ekerexa Ankilikaana wiira ankohe phaatiri voohima dha mwaha owo. Noomala owo opaka elo, phaatiri aahinanariwa amwiikara akhuwelaka wiira: “Nyuwo moohiya okhala Nkiristau, nenna mwa ntthu a Satana. Mwaakuve nkhume opuro ola!”

Noomala John ophiya owaani, aahimwaatikhela ewarakha phaatiri ole anlaleyaka wiira yaalotte mwaha ole wa amuluku araru ohoolo wa atthu. Ndho phaatiri aahimwaakhula wiira arowe wiskiritooriyu wa purusoore, yoowo aari xeefi a wuuniversitaati asoma iye. Noomala ophiya, purusoore aahinkoha John akhala wiira aahimwaatikhela ewarakha phaatiri.

Ndho John ahaakhula wiira: “Aayo atokweene”.

Purusoore aahintumererya John omwaatikhela ewarakha phaatiri anvekaka nswammaha. Noomala John aahatikha ewarakha airaka:

“Atokweene, purusoore aka okivekela wiira kiwaatikheleni ewarakha koovekelakani nswammaha, masi miyo kiri olikaneene wiira kipake elo, akhala wiira nnawaakhulela wiira munhudhiha itthu dhawootha.”

Ahikhupali, purusoore aahinkoha wiira: “John, niire munnikhupali wiira ti yeela muntthuna nnyu waatikha?”

John ahaakhula wiira: Aayo atokweene. Nkinoona etthu ekina yawaatikha.”

Purusoore aahilotta wiira: “Mwaapaka ela nnawiikariwa. Nyuwo nnoohiya osoma eskola ela mwaha wa onvanyiha phaatiri a ekerexa yeelo enkhaliheriwa ni kuveernu.”

John aahinkoha purusoore wiira: Masi Purusoore, . . . okathi munnisomiha nnyu nihikaiwasasa etthu emodha, niire tivootthekeya okoha?”

Purusoore ahaakhula wiira: “Naari.”

John aahilotta wiira: Ndho ti yeelo, yiiranen’ye. Phaatiri aanihudhiha Biibiliya, miyo kimpakela nikoho. Ndho akhala wiira khawenrye okaakhula, niire tivootthuneya miyo onveka nswammaha?”

Noomala John khaikariwe. Nitho khamwaatikhenle ewarakha phaatiri anvekaka nswammaha.

Voohima dha miteko dhaareerela ovariwa okathi ole, Wiikocela alontte wiira: “Ninoowerya olotta nkhama Davidi, yoowo olontte wiira: ‘Nyuwo munookivaha ikuru wiira kawane ekhotto.’ (Esalimo 18:39) Ola mwaakha woohakalaliha okhala wiira nihoona nikhalihero na Yehova . . . Arumeyi-ye awiivahererya . . . yaahihakalala mwaha woolaleya ekhweeli.”

Wookidherani wa mwaakha ole, anna yaahipaka mareheryo wiira etepe onrumeela raadiyu nteko woolaleerya. Wiira epake elo, yaahiteka nipuro nikina na raadiyu waattamela oChicago. Opuro ole wa naanaano waaitthaniwa WORD, ndhina nna naari nooreerela okhala wiira WORD ni enkelexi nintaphulela “nuulumo” niire dho, Nuulumo na Muluku. Ekwaha ela anna yaarumeenle ekaruma ya madhu ya 5.000 watt. Mwaha wa opaka elo awo yaahiwerya olaleya nhupi wa Omwene mapuro oottaivela mpakha oCanada.

Mwaakha wa 1925 yaahikhumelela etthu yoohiliyaleya. Yehova aahaakhalihera anna okhalana odhuwela wa omunepani. Alipa onsoma Biibiliya yahikhalana wiiwasasa wa naanaano voohima dha eliivuru ya Wiidhuupulula ekapiitulu 12. Ndho elo yaahiwiiriha atthu akina okakattuwa. Masi atthu akina, yaahihakalala mwaha wookhalana wiiwasasa wa naanaano voohima dha itthu dhiiranen’ye wiirimu ni moopora itthu idho dhinaahapuwela awa atthu a Muluku valaponi.