YOOSOMA YA MWAHA 40
NCIPO 30 Muluku Aka, Moopoli Aka, ni Tiithi Aka
Yehova ‘Onnaamaaliha ale Ariipiwe Nrima’
“Onnaamaaliha ale ariipiwe murima, owo onnitthukwa makhwatta aya.” —ESAL. 147:3.
ETTHU NIN’YA NHU OHUDHA
Yehova onnathokorerya saana atthu anhaawa mwaha wa makhwatta ammuupuweloni. Yoosoma ela enawoonihera moopora Yehova onvukula iye owereya onniphwanya mwaha wa miyuupuwelo dhoohiloka ni moopora owo onnikhalihera iye wiira niwerye waamaaliha atthu akina.
1. Vaavo Yehova onaalipela iye arumeyi-ye onwoonela dhai?
NYUWO nnoona wiira Yehova onwoonela dhai arumeyi-ye valaponi? Yehova onnoona vaavo ninhakalala nhu ni ninriipiwa nhu nrima. (Esal. 37:18) Yehova onnihakalala vaawaatta vaavo onoona iye wiira ninnipaka dhootheene ninwerya nhu wiira ninrumeele hata niwanakana mixankiho mmuupuweloni. Ohiya-vo, owo onnitthuna ni ori oolikana ene wiira anikhalihere ni animaalihe.
2. Eseeni Yehova onaapakela iye ale ariipiwe nrima, ni nin’ya owerya dhai ottottela nrerelo moopora owo onnisuka iye?
2 Esalimo 147:3 enlotta wiira Yehova onnitthuka makhwatta ale ariipiwe nrima. Esalimo ela enninlikanyiha Yehova ni ntthu oninsuka saana ntthu nkina onoona oweereya mmuupuweloni. Masi nin’ya owerya dhai ottottela nreerelo moopora Yehova onnisuka iye moopheta? Muupuwele ela: Meetiku pooti onkhalihera ntthu orina nikhwatta wiira avole, masi wiira ntthu ovulanle avole mwawaakuveya ohaana otthara vakhiviru vene malakihero ootheene onvahiwa iye ni meetiku. Yoosoma ela nin’ya woona etthu Yehova onaaleela iye atthu arina nxankiho mmuupuweloni anrumeelaka Biibiliya, nitho ninawoona moopora nikhanle nhu otthara miruku dhooreera Yehova onnivaha iye.
HIYO NOOKHALANA EFAITA YUULUPALE WA YEHOVA
3. Eseeni enwiiriha atthu akina woona wiira khaana efaita?
3 Hiyo ninkhala olumwinku ohaamo opheta, atthu khanoonihera ophetana nkina ni nkhwe, ndho mwaha wa elo atthu awaatta annipaka itthu dhinwiiriha atthu akina woona wiira annihadhuliwa ni khaana efaita. Nrokora mmodha oniitthaniwa Helen a onlotta wiira: “Miyo kihuiwale ettheko atthu yahoonihera wa ophetana. Apaapa yaari ntthu oowali, ndho okathi wootheene yaalotta wiira nkaarina efaita.” Nkhama yaawiiraneya ya Helen, woonawene nyuwo mwaataka ohadhuliwa aahiidho ovanyihiwa, ndho nkoona wiira khaavo ntthu onoophetani. Akhala wiira nyuwo nnoona dhiidho, woonawene pooti wooliperyani okhupali wiira ookhala ntthu onoothokoreryani saana aahiidho woocalini.
4. Moovarihana ni Esalimo 34:18, eseeni Yehova ontthuna iye wiira nikhupali?
4 Hata khalai ntanke ohaadhuliwa ni atthu akina, Yehova ontthuna wiira nkhupali wiira onnoovahani efaita ni onnoophetani vawaatta. ‘Yehova ori vakhiviru va atthu ariipiwe nrima.’ (Nsome Esalimo 34:18.) Ndho akhala wiira ‘nnookhulumuwa’ mwaha wa miyuupuwelo dhoohiloka, nhiliyale wiira Yehova ohoothanlani wiira munrumeele okhala wiira ohoona etthu yooreera wa nyuwo. (Yohani 6:44) Okathi wootheene Yehova ori oolikana ene wiira okhalihereni ni onnoovahani efaita yuulupale.
5. Eseeni ninhudha nhu moopora Yeesu athokorerya iye saana atthu yaahadhuliwa?
5 Ninoowerya odhuwela saana moopora Yehova onnoonela iye nithokoreryaka ntakihero na Yeesu. Okathi Yeesu aariiye valaponi, aanathokorerya saana atthu yaahadhuliwa ni yahooneliwa vatthu ni atthu akina. (Math. 9:9-12) Mwa ntakihero okathi nthiyana mmodha aalipelela openuwa eretta ya ovuuva ephome aphanre iye niveru na nlaya na Yeesu, owo ahimmaaliha ni ahinttottopela mwaha wa waamini onihenre iye. (Marko 5:25-34) Nkhama nindhuwela nhu Yeesu aatakiha moomalela ontthu wa Yehova. (Yohani 14:9) Ndho nkhupali wiira Yehova onnoovahani efaita yuulupale ni onnoona mikhalelo dhinyu dhooreera, ohela mpuwa waamini winyu ni opheta mummoonihera nnyu.
6. Eseeni ntthu onreerela iye opaka akhala wiira onnaakanyera wiira Yehova onninvaha efaita?
6 Eseeni munrerela nnyu opaka akhala wiira munnaakanyera wiira Yehova onnoovahani efaita yuulupale? Nsome dhawaatikhiwa dha mBiibiliyani inoonihera moopora Yehova onoovahaiyeni efaita ni mwiivahe okathi wiira muupuwelele dhawaatikhiwa idho. b (Esal. 94:19) Akhala wiira khanwenrye waakhwanihera yoolukama emodha aahiidho munnikhulumuwa mwaha woohiwerya opaka itthu dhawaatta nkhama atthu akina, nhipacere wiikuputi. Hiyo ninnikuputi vawaatta, masi Yehova khampaka elo. Owo ontthuna wiira khuta ntthu apake ele onwerya iye. (Esal. 103:13, 14) Ndho akhala wiira mwaataka wiireliwa etthu yootakhala nkhama olodhoweliwa, ovenyeriwa aahiidho otupheliwa, nhiivahe nthowa mwaha wa etthu mwiireliwe nnyu. Moohakanyera nyuwo khimwaarerela othokoreriwa mwa enamuna elo! Masi nhiliyale wiira vamaithoni va Yehova khimwaana nthowa, masi orina nthowa tuule oopakenleni elo. (1 Ped. 3:12) Sandra yoowo otanke otupheliwa ari mwana, onlotta wiira: “Miyo kinninvekela okathi wootheene Yehova wiira akikhalihere wiidhoona nkhama veene onkoonela iye.”
7. Nirumeele dhai itthu dhinikhumelenle khalai mweekumini mwihu vaavo ninvara nhu nteko wa Yehova?
7 Nhikhala-khale mwaakanyeraka wiira Yehova pooti woorumeelani wiira mwaakhalihere atthu akina. Yehova ohoovahani eparakha wiira nvare nuuwo nteko woolaleerya. (1 aKor. 3:9) Itthu dhookhumelenleni mweekumini mwinyu pooti wookhaliherani wiipweha nipuro na atthu akina ni wiiwasasa saana owereya anoona awa mwaha wa miyuupuwelo dhoohiloka. Ndho mwapaka elo, nnoowerya opaka itthu dhawaatta wiira mwaakhalihere atthu akina. Helen, yoowo ninlontte nhu woopacerani aahikhaliheriwa ni olelo onniwerya waakhalihera atthu akina, owo onlotta wiira: “Miyo ‘nkaidhoonela vatthu’ masi kikhaliheriwaka ni Yehova, nenna kinniidhoonela vatthu. Kantthu kirina efaita ni kinnoona wiira atthu akina annikipheta.” Vano Helen onnihakalala okhala wiira onrumeela nkhama piyoneera ookilatheya.
MWAAKHULELE OLEVELELA WA YEHOVA
8. Eseeni Yehova onlaihera iye opaka yawaatikhiwa ya Yesaya 1:18?
8 Arumeyi akina a Yehova anniriipiwa nrima ni oxanka hata noomala opatisiwa, mwaha wa etampi yaapanka awa khalai. Masi tivoorera wuupuwelela wiira Yehova ovaha nkuttho wa woopola okhala wiira onninipheta vawaatta. Owo ontthuna wiira naakhulele yoovaha elo. Nitho Yehova oolaihera wiira narowa ‘ovaanela nuuwo’ c onoonilevelela moomalela. (Munsome Yesaya 1:18.) Mwaha wa Yehova oliyala itampi dhihu dha khalai, onnoonihera onipheta vawaatta! Ohiya-vo, Yehova onlotta wiira khanrowa oliyala itthu dhootheene dhooreera ninimpakela nhu.—Esal. 103:9, 12; aHeb. 6:10.
9. Ohiya wuumelela wuupuwelela itthu nipanke nhu khalai, seeni oraawa vootthuneya wiilipihera opaka ele ninwerya nhu nenna-va ni wuupuwelela mareeliho a nhoolo?
9 Akhala wiira nnookhulumuwa mwaha wa dhoovonya dhinyu dha khalai, mwiilipihere wuupuwelela itthu dhooreera mumpaka nnyu nenna-va ni idhe mun’ya nnyu opaka nhoolo. Muupuwele ntakihero na nrummwa Paaulu. Owo ahaattharatthara vootakhala Makiristau, noovira okathi owo ahithanana mwaha wa itthu apanke iye. Masi owo aanidhuwela wiira Yehova aahinlevelela. (1 Tim. 1:12-15) Niire Paaulu aahuumelela wiivaha nthowa mwaha wa itampi apanke iye khalai? Naari. Nitho owo khuumelenle wuupuwelela itthu dhootheene aapanke iye okathi aariiye nfarisi oottittimiheya. (aFil 3:4-8, 13-15) Ohiya-vo, Paaulu khaahin’ye oluttuweliwa ovara nteko woolalerya ni wuupuwelela mareeliho a nhoolo. Ndho nkhama Paaulu, hiyo khaninwerya orukunusa dhoovonya nipanke nhu khalai. Masi ninoowerya onvuwiha Yehova nipakaka khuta etthu ninwerya nhu nenna-va ni nilipelaka mareeliho oohakalaliha a nhoolo, Yehova onnilaihera iye.
10. Eseeni ninrerela nhu opaka akhala wiira khalai naataka onriipiha nrima ntthu?
10 Woonawene nyuwo munnithanana mwaha wa itthu mpanke nnyu khalai dheidho dhaakhumihenre mixankiho aahiidho waariipiha nrima atthu akina. Ndho eseeni en’ya wookhaliherani? Mpake itthu dhootheene munwerya nnyu wiira mphuke mwaha owo, mwaalelaka ni nwooniheraka atthu mwaakhumihenre nnyu mixankiho wiira munniriipiwa nrima mwaha wa etthu mpanke nnyu. (2 aKor. 7:11) Ohiya-vo, munvekele Yehova wiira aakhalihere atthu dhaaphwannye mixankiho mwaha wa itthu mpanke nnyu. Moohaakanyera Yehova onawookhaliherani nyuwo vamodha ni ale mwaakhumihenre nnyu mixankiho ohihiya ovilela ni okhalana nrettele.
11. Eseeni ninhudha nhu ni ntakihero na profeeta Yoona? (Moone-tho efootu ya )
11 Moone etthu munhudha nnyu ni dhoovonya dhinyu dha khalai ni mwaakhulele orumeeliwa ni Yehova mwa enamuna onoona iye oreerela. Moone etthu yaamwiiranenle profeeta Yoona. Yehova aahinvekela Yoona wiira arowe oNiinive masi ohiya orowa oNiinive, aatthawenle opuro nkina. Yehova ahinttarusa Yoona, ndho owo aahihudha etthu ni yoovonya-ye. (Yona 1:1-4, 15-17; 2:7-10) Masi ohiya Yehova ohiya onrumeela Yoona, owo aahinvaha eparakha ekina wiira arowe oNiinive, ndho ekwaha ela Yoona aahiwelela mwawaakuveya. Woonawene Yoona aahimwiira kerihiweni mwaha woohiiwelela evaara yoopacera, masi elo khiyamwiirinhe okhootta yoothanleliwa ekina aavahiwe iye ni Yehova.—Yona 3:1-3.
Noomala profeeta Yoona woopowa mmirimani mwa ehopa yuulupale, Yehova aahitthikela tooto-tho onruma wiira arowe oNiinive alaleye nhupi-ye. (Moone ettima 11)
YEHOVA ONNIRUMEELA MUNEPA-YE WAWAARYA WIIRA ANIMAALIHE
12. Vaavo ennikhumelela awa etthu yootakhala nin’ya owerya dhai ophwanya nrettele wa Yehova? (aFilipi 4:6, 7)
12 Vaavo ninkhweliwa nhu aahiidho ennikhumelela awa etthu yootakhala Yehova onnirumeela munepa-ye wawaaarya wiira animaalihe. Moone etthu yaamwiiranenle Ron ni Carol. Mooriipiha nrima mwana aahiidhipha, awo anlotta wiira: “Hiyo naataka oviriha mixankiho dhuulupale khalai, masi ola wootepa oniwereya oxira dhootheene. Hiyo nooviriha mahiku awaatta ohiyu ninvekelaka Yehova, ndho elo yaahinikhalihera ophwanya nrettele onromoliwa aFilipi 4:6, 7.” (Munsome.) Ndho akhala wiira nyuwo munniriipiwa nrima vawaatta mwaha wa nxakiho munviriha nnyu, munvekele Yehova mmuleelaka mixankiho dhinyu dhootheene. Nyuwo pooti opaka elo ivaara dhootheene muntthuna nnyu ni okathi nnoona nnyu oreerela. (Esal. 86:3; 88:1) Nvekele munepa wawaarya wa Yehova ivaara dhawaatta nkhupaliki ni nrima nnyu wootheene wiira Yehova onawiiwa mavekelo nnyu.—Luka 11:9-13.
13. Munepa wawaarya onnikhalihera dhai ohihiya onrumeela Yehova? (aEefeso 3:16)
13 Niire nnoona wiira khimwaana ikuru dhoopaka itthu dhikina mwaha wa nxankiho wookhulumula munviriha nnyu? Akhala wiira ti dhiidho munepa wawaarya onawoovahani ikuru wiira nhihiye onrumeela Yehova moororomeleya. (Munsome aEefeso 3:16.) Moone etthu yaamwiiranenle nrokora mmodha oniitthaniwa Flora. Owo ni amamune yaarumeela vamodha nkhama mamisiyonaariyu, masi noomala amamune onraruwela awo yaahimwala. Flora onlotta wiira: “Miyo nkaarele woona owereya oraruweliwa ni amamuna aka ni nkaawerya oliyala etthu yaakipakenla awa. Ndho kaahinvekela Yehova wiira akivahe munepa-ye wawaarya wiira kihitthikele ottuli. Yehova ookivaha itthu dhootheene kaaramelaka wiira kiwerye ovilela nxankiho yoowo woopacerani kuupuwela aka wiira nkaawerya.” Flora ohoona wiira Yehova aahinkhalihera waacerera waamini-we ni anikhupali wiira hata akumanakana mixankiho dhikina Yehova khanre ahiye onkhalihera. Owo omalinhe alottaka wiira: “Moolumo ari Esalimo 119:32 annilotta saana moopora Yehova okikhalihenre iye, yawaatikhiwa ela enlotta wiira: ‘Kinootthara dhooruma dhinyu ni nrima aka wootheene okhala wiira mookikhalihera odhuwela saana dhooruma idho.’’’
14. Eseeni ninreerela nhu opaka wiira nitepe waakhela munepa wawaarya wa Muluku?
14 Noomala onvekela Yehova munepa wawaarya, eseeni munrerela nnyu opaka wiira nkhale moovarihana ni yooveka nnyu? Mwiilipihere ovara miteko dhin’ya wookhaliherani otepa waakhela munepa wawaarya. Mwa ntakihero, orowela mithukumano, olaleerya ni onsoma Biibiliya khuta nihiku wiira nkhalena miyuupuwelo dha Yehova. (aFil. 4:8, 9) Vaavo muninsoma nnyu Biibiliya, mwaavahe ephoole atthu anromoliwa mBiibiliyani yaawo dhaaphwanye mixankiho dhawaatta ni moone moopora Yehova aakhalihenre iye wiira ewerye ovilela. Sandra yoowo ovirinhe mixankiho dhawaatta mweekumini-mwe onlotta wiira: “Yawiiraneya ya Yoosefi yaahikiphara nrima vawaatta, Yoosefi aahiviriha mixankiho dhawaatta ni aahithokoreriwa moohixariya masi owo khahin’ye mixankiho idho ihononaka waatana-we ni Yehova.”—Maph. 39:21-23.
YEHOVA ONNARUMEELA ANNA NI AROKORA WIIRA ENILIPIHE
15. Taani akhanle onilipiha, ndho awo annikhalihera dhai? (Moone-tho efootu.)
15 Vaavo dhinniphwanya awa mixankiho anna ni arokora pooti ‘onilipiha vawaatta.’ (aKol. 4:11) Yehova onnaarumeela anna ni arokora wiira anoonihere wiira onninipheta. Awo anninilipiha vaavo anniwiriyana awa ni ephoole ni anilipihera awa odhuwela itthu dhinnixankiha. Masi hata ivaara dhikina awo ehiweryaka olotta etthu, vaavo ankhala awa ni hiyo okathi wooxankiha enninikhalihera vawaatta. Awo pooti onilipiha enooniheraka yawaatikhiwa emodha ya mBiibiliyani aahiidho ovekela ni hiyo. d (aRo. 15:4) Ikwaha dhikina anna pooti onikhalihera enuupuseraka moopora Yehova onoonela iye mwaha owo, ndho wuupuwelela elo enoowerya onimaaliha ni onikhalihera ovilela. Nitho anna ni arokora pooti onikhalihera, enivahaka eyooca okathi ninxanka nhu.
Axirikha oororomeleya ni oolipa mwa omunepani, pooti onilipiha ni onikhalihera (Moone ettima 15)
16. Eseeni ninreerela nhu opaka wiira atthu akina ewerye onikhalihera?
16 Anna ni arokora anninipheta vawaatta ni antthuna onikhalihera. (Mir. 17:17) Masi wiira ewerye onikhalihera, ahaana odhuwela nikhalihero ninramela nhu. (Mir. 14:10) Akhala wiira munnoona owereya mmupuweloni munleele nxirikha nnyu oolipa nkhalelo wa omunepani. Nitho munleele etthu onrerela iye opaka wiira ookhalihereni. Woonawene nyuwo pooti onthanla ntokweene mmodha aahiidho aili nnoona nnyu okhala ootaphuwa olottana. Akhala wiira arokora, woonawene awo pooti okhala ootaphuwa olotta ni nrokora nkina olipa mwa omunepani.
17. Eseeni ekhanle onooceliha waakhela nikhalihero na anna ni arokora, ndho nin’ya owerya dhai oviriha nxankiho owo?
17 Nxake oviriha okathi wawaatta nri meekhinnyu. Mwaha wookhalana nxankiho mmuupuweloni ivaara dhikina pooti otthuna okhala meekhinhu. Ndho ivaara dhikina annihu pooti ohiiwasasa aahiidho olotta itthu dhinniiriha oriipiwa nrima. (Yak. 3:2) Masi nhihiye elo ewiirihakani wiivalanya ni anna. Yehova pooti warumeela awo wiira yoolipiheni. Ntokweene mmodha yoowo oniitthaniwa Kavin onwereiwa eretta ya oriipiwa nrima, onlotta wiira: “Ivaara dhikina etthu yuulupale kintthunaka ori okhala vamodha ni axirikha aka”. Masi hata eri dhiidho, Kavin khahin’ye wiilipihera okhala vamodha ni anna, ndho ivaara dhawaatta ompaka iye elo ennivukula oriipiwa-we nrima. Nrokora mmodha oniitthaniwa Amy onlotta wiira: “Mwaha wa itthu ikikhumelenle khalai, onnikiliperya waaroromela atthu akina. Masi kintakihaka Yehova kinnihudha waapheta ni waaroromela anna. Miyo kinnikhupali wiira elo enninhakalaliha Yehova, ndho mwaha wa odhuwela elo ennikihakalaliha.”
DHOOLAIHERA DHA YEHOVA DHIN’YA WIIREYA NHOOLO DHINNINIMAALIHA
18. Eseeni ninlipelela nhu wiireya nhoolo, ndho eseeni ninreerela nhu opaka nenna-va?
18 Hiyo ninoowerya olipela ohoolo ni ororomela, nidhuwewelaka wiira moohilekela Yehova onoomaliha owereya wihu wootheene wa veerutthuni ni mmuupuweloni. (Wiis. 21:3, 4) Okathi owo waaphiya, itthu dhootheene dhinniripiha nrima khadhinrowa wuupuweliwa ni ‘dhinooliyaliwa khuluyi.’ (Yes. 65:17) Nkhama noonne nhu yoosoma ela, Yehova ‘onnimaka makhwatta nhu’ olelo-va. Tivondho nttottele nreerelo itthu dhootheene Yehova ompaka iye wiira oolipiheni ni ookhalihereni. Nhikhala-khale mwaakanyeraka wiira “owo onnookhapelelani.”—1 Ped. 5:7.
NCIPO 7 Yehova, ti Ikuru Sahu
a Madhina makina aamotariwa.
b Moone ekwaaturu eni: “ Nyuwo mookhalana efaita yuulupale wa Yehova.”
c Wiira ‘nirowe ovaanela’ ni Yehova nihaana woonihera wiira noottharuwa nivekaka oleveleliwa nuuwo dhoovonya dhihu ni nittharuwaka opaka itthu dhootakhala. Masi akhala wiira noopaka etampi yuulupale nihaana wavekela nikhalihero asitokweene a mmulokoni.—Yak. 5:14, 15.
