YOOSOMA YA MWAHA 49
NCIPO 147 Muluku Ooleiherya Okumi Woohimala
Eseeni Munreerela Nnyu Opaka Wiira Nkhale Mahiku Ootheene?
“Ole onimweemererya Mwaana ni omwaamini yoowo, okhalane okumi woohimala.”—YOHANI 6:40.
ETTHU NIN’YA NHU OHUDHA
Nin’ya woona mareeliho an’ya awa waakhela Makiristau oothanliwa ni a ipwittipwitthi dhikina mwaha wa nkuttho wa Yeesu Kiriistu.
1. Seeni atthu awaatta anuupuwela awa wiira khonweryaneya okhala mahiku ootheene?
ATTHU awaatta olelo-va, anniilipihera oca saana ni otthimaka khuta nihiku wiira ekhalena ekumi yooreera mwa mahiku awaatta. Masi hata eri dhiidho, awo khanlipelela okhala mahiku ootheene. Woonawene awo anuupuwela wiira okhala mahiku ootheene, ekumi yaankhala yooxankiha mwaha wa wuuluvala aahiidho khonweryaneya okhala mahiku ootheene. Masi hata eri dhiidho, Yohani 3:16 ni 5:24 Yeesu olontte wiira onniweryaneya ophwanya ‘ekumi yoohimala’.
2. Eseeni Yoohaani ekapiitulu 6 enlotta iye voohima dha ekumi yoohimala? (Yohani 6:39, 40)
2 Nihiku nimodha, Yeesu aahireeliha iphaawu ni ihopa vakhaani dheidho dhaaciwe ni nttitthi wa atthu awaatta. a Ndho elo yaari etthu yootikiniha. Masi etthu Yeesu aalontte iye nihiku naattharelana yaari etthu yootepa otikiniha. Noomala nttitthi ole wa atthu omutthara Yeesu mpakha oKafarnawu, waattamela oKalileya, owo aahaaleela wiira atthu akhwiye anoohihimusiwa wiira ekhala mahiku ootheene. (Munsome Yohani 6:39, 40.) Nkahaya muupuwele ele moolumo ala antaphulela awa wa amudhi nnyu ni axirikha nnyu akhwiye. Ele Yeesu alontte iye enninikhupaliha wiira atthu akhwiye anoohihimusiwa wiira awo vamodha ni hiyo ni atthu ninaapheta nhu niphwanye ekumi yoohimala! Masi etthu Yeesu aalontte iye iveersu dhinttharelana dha Yoohaani ekapiitulu 6, atthu awaatta okathi ole khiyaiwasanse. Nitho olelo-va, atthu awaatta khaniiwasasa. Vano nirowe noone etthu Yeesu aalontte iye.
3. Moovarihana ni Yohani 6:51, eseeni Yeesu aalontte iye voohima dha yeene?
3 Noomala Yeesu ovaha eyooca nttitthi ole wa atthu, awo yuupuwela emana Yehova aavanhe iye aIsarayeeli okathi yaara awa moothakoni. Atthu awo yaanuupuwela dhiidho okhala wiira Biibiliya oniitthana elo okhala ‘ephaawu enkhuma wiirimu.’ (Esal. 105:40; Yohani 6:31) Yeesu aahirumeela emana wiira aahudhihe atthu ale etthu yootepa otthuneya. Nnaamwi Muluku aakhumihenre emana mwa mwiiriirya, atthu yaaciye noovira okathi yaahuukhwa. (Yohani 6:49) Ohiya-vo, Yeesu aalontte wiira yeene aari “ephaawu enikhuma wiirimu,” ‘ephaawu ya Muluku’ ni “ephaawu ya ekumi.” (Yohani 6:32, 33, 35) Moottharela, Yeesu aahilotta ovirikana waakhanle ephaawu ya emana ni ele yaataphulela awa erutthu-ye. Owo aalontte wiira: ‘Miyo ka ephaawu ya ekumi ekhurunwe wiirimu. Akhala ntthu onkhuura ephaawu ela, onookhalana mahiku ootheene.’ (Munsome Yohani 6:51.) Noomala ayuuda wiiwa elo, yaahitikiniheya vawaatta. Awo khiyaadhuwela nthowa naamwiiriha Yeesu olotta wiira aari ephaawu enikumme wiirimu ni moopora ephaawu elo yaara awa yootepa otthuneya oxira emana Muluku aavanhe iye anhavinre-ya. Yeesu aahilotta etthu yootepa otthuneya vaavo aalontte iye wiira: ‘Ephaawu kinvaha aka erutthu aka.’ Eseeni Yeesu aatthuna iye olotta ni moolumo ala? Tivootthuneya odhuwela elo, okhala wiira enninikhalihera wiiwasasa moopora nin’ya nhu ophwanya ekumi yoohimala vamodha ni axirikha nhu akhwiye. Vano nirowe noone ele Yeesu aatthuna iye olotta ni moolumo awo.
ELE ENTAPHULELA AWA MOOLUMO ANI ‘EPHAAWU YA EKUMI’ NI ‘ERUTTHU AKA’
4. Seeni atthu akina yaatikininha awa ni moolumo a Yeesu?
4 Atthu awaatta yaanwiriyanne Yeesu yaahitikiniheya vaavo aalontte iye wiira anvaha erutthu-ye ‘wiira atthu ankhala valaponi ephwanye ekumi’. Woonawene awo yuupuwela wiira aaya waavaha erutthu-ye ya opinatamu wiira ekhuure. (Yohani 6:52) Noomala-vo, Yeesu aahilotta etthu yaatempe waatikiniha, airaka: ‘Mwaahikure-ru erutthu ya Mwaana a ntthu ni owurya ephome-ye, khamunrowa ophwanya ekumi yoohimala.’—Yohani 6:53.
5. Eseeni ennikhupaliha wiira Yeesu khaatthuna olotta wiira atthu yaanireerela owurya ephome-ye ya opinaatamu?
5 Mahiku a Nowe Yehova aahaakhoottiha apinaatamu oca ephome. (Maph. 9:3, 4) Nitho noovira okathi Yehova ahaakhoottiha aIsarayeeli oca ephome. Ndho akhala ntthu aaphwanyiwa acaka ephome ‘aaniiphiwa.’ (Onam. 7:27.) Yeesu aaniiwelela Nlamulo nna. (Math. 5:17-19) Ndho khaakhala-khala aavekelaka ayuuda ale okhuura erutthu-ye ya opinaatamu aahiidho owurya ephome-ye. Masi Yeesu aahilotta moolumo ala, aatthunaka waahudhiha atthu ale etthu yaareerela awa opaka wiira ephwanye ‘ekumi yoohimala.’—Yohani 6:54.
6. Nindhuwela dhai wiira Yeesu aalotta mwa enamuna ya nthoonyero moolumo ari Yohani 6:53?
6 Eseeni Yeesu aatthuna iye olotta? Moohaakanyera, Yeesu aalotta ni nttitthi ole arumeelaka moolumo a nthoonyero nkhama aalontte iye ni nthiyana a oSamariya airaka: ‘Ndho ole onrowa owurya maadhi kin’ya aka onvaha, khanvoliwa-tho ntthona. Vano maadhi kin’ya aka onvaha, anrowa olikana ni nipuro nimphattuwa maadhi mwa yoowo, aninvaha ekumi yoohimala.’ (Yohani 4:7, 14) b Yeesu khaalontte wiira nthiyana ole a oSamariya awuryaru pahi maadhi a weehimeni, naanaanoru amphwanya ekumi yoohimala. Mwa enamuna emodharu, Yeesu khaalontte wiira nttitthi wa atthu waari oKafarnawu waamphwanya ekumi yoohimala, akhala wiira pahi waankhuura erutthu aahiidho owurya ephome ya opinaatamu ya Yeesu.
OKATHI MIILI WOOVIRIKANA
7. Eseeni atthu akina anlotta awa voohima dha moolumo a Yeesu ari yawaatikhiwa ya Yohani 6:53?
7 Atthu akina anlotta wiira Yohani 6:53 Yeesu aaleela atthu ele etthu yaareerela awa opaka okathi wa Eyooca ya Ohiyu ya Apwiya, okhala wiira okathi owo orumeenle moolumo mamodharu. (Math. 26:26-28) Atthu akina anlotta wiira atthu ootheene anreela nthukumano wa Eyooca ya Ohiyu ya Apwiya, ahaana okhuura ephaawu ni owurya eviinyu. Niire elo ekhweeli? Tivootthuneya odhuwela waakhuliwa wa nikoho nna okhala wiira khuta mwaakha imilyawu dhawaatta dha atthu olumwinku wootheene, annithukumana wiira yuupuwelele niira nna nootepa otthuneya. Vano nirowe nuupuwelele ovirikana okhanle ele yiiranen’ye Yohani 6:53 ni nihiku na Eyooca ya Ohiyu ya Apwiya.
8. Ovirikana seeni okhanle ni dhawiiraneya idha piili? (Moone-tho ifootu.)
8 Vano nirowe nithokorerye itthu piili dhoovirikana. Yoopacera: Okathi seeni ni opuro seeni Yeesu aalontte iye moolumo ari yawaatikhiwa ya Yohani 6:53-56? Owo aalontte moolumo ala aaleelaka ayuuda mwaakha wa 32 Noomala Kiriistu Ora, nttetthe wa oKalileya. Elo yaairanen’ye woonawene ohalaka mwaakha mmodha wiira Yeesu apacerihe Eyooca ya Apwiya epooma ya oYerusaleemu. Yanaaili: Taani Yeesu aaleela iye moolumo ala? Yeesu aleela moolumo ala atthu yaawo yaaluttuweliwa waadhya eyooca ya veerutthuni, ohiya ohudha voohima dha Yehova ni Omwene wa Muluku. (Yohani 6:26) Ohiya-vo, okathi Yeesu aalontte iye itthu yaahawenrya awa wiiwasasa, mwawaakuveya awo yaahihiya onkhupali. Nitho ahudheri-ye akina yaahihiya ontthara. (Yohani 6:14, 36, 42, 60, 64, 66) Atthu awo yaari oovirikana ni arummwa 11 oororomeleya yaawo noovira mwaakha mmodha yaari vamodha ni Yeesu nihiku noopacera na Eyooca ya Ohiyu ya Apwiya. Okathi owo arummwa 11 yaari vamodha ni owo hata yahaiwasasa moomalela itthu dhootheene aahudhiha iye. Masi arummwa ale yaanikhupali moomalela wiira Yeesu aari Mwaana a Muluku aakhumme wiirimu. (Math. 16:16) Yeesu aahaattottopela arummwa-ye airaka: ‘Nyuwo khimwaakihin’ye hata okathi keehereryiwa aka.’ (Luka 22:28) Ovirikana nno onnoonihera wiira yawaatikhiwa ya Yohani 6:53, Yeesu khaalontte ele yaaya wiireya okathi wa Eyooca ya Ohiyu ya Apwiya. Masi nlelo dhookhala itthu dhikina dhinoonihera ovirikana iwo.
Yoohaani ekapiitulu 6 onlotta voohima dha ele Yeesu aalontte iye aleelaka nttitthi wa ayuuda waari oKalileya (Moono weethiyana). Noomala mwaakha mmodha, owo aahilotta ni ekhurupu ekhaani ya arummwa oYerusaleemu (Moono weelopwana) (Moone ettima 8))
ELE MOOLUMO A YEESU ANTAPHULELA WA NYUWO
9. Ekhurupu seeni ya atthu Yeesu aalotta iye okathi wa Eyooca ya Ohiyu ya Apwiya?
9 Okathi wa Eyooca ya Ohiyu ya Apwiya Yeesu aahikusa ephaawu yoohiheliwa efermentu, aakawela arummwa ni aalotta wiira ela enthoonyera erutthu aka. Noomala waavaha eviinyu aahaleela wiira ela entaphulela “ephome aka ya nivarihano” (Mar. 14:22-25; Luka 22:20; 1 aKor. 11:24) Ele Yeesu aalontte iye yaari etthu yootepa otthuneya, owo aahiitthana elo okhala ‘nivarihano na naanaano’. Nivarihano nna ti na Yehova ni ‘atthu aisarayeeli’ aahiidho ale pahi athanliwe wiira yalamulela ni Yeesu “Moomweneni mwa Muluku”. (aHeeb. 8:6, 10; 9:15) Arummwa okathi ole khiyaiwasasa itthu dhootheene voohima dha nivarihano nne. Masi moohilekela, awo yaanthanliwa ni munepa wawaarya wiira epacere wiirela mphantta nivarihano na naanaano vamodha ni Yeesu wiirimu.—Yohani 14:2, 3.
10. Ovirikana seeni orivo eriyari ya moolumo Yeesu aalontte iye okathi wa Eyooca ya Ohiyu ya Apwiya ni ale aalontte iye oKalileya? (Moone-tho efootu.)
10 Ele Yeesu aalontte iye okathi wa Eyooca ya Ohiyu ya Apwiya, enaahela mpuwa atthu aniitthaniwa ‘nikoto nikhaani’. Arummwa yaari vamodha nuuwo nihiku nne, tapacenre wiirela mphantta nikoto nna nikhaani. (Luka 12:32) Ndho Yeesu aahaavekela awo okhuura ephaawu ni owurya eviinyu. Atthu akina yaaya opacera wiirela mphantta ekhurupu ela ekhaani, ekaankhura ephaawu ni owurya eviinyu. Atthu awo an’ya okhala vamodha ni Yeesu wiirimu. Ndho nno ovirikana okina ooriivo eriyari ya Eyooca ya Ohiyu ya Apwiya ni ele yaairanen’ye oKalileya. Moolumo Yeesu aalontte iye okathi wa Eyooca ya Ohiyu ya Apwiya anaahela mpuwa pahi ale aniirela mphantta ekhurupu ekhaani. Masi moolumo Yeesu aalontte iye oKafarnawu, anaahela mpuwa nttitthi wa waatta wa atthu.
Ootheene ale ankhuura ephaawu ni owurya eviinyu aniirela mphantta ekhurupu ekhaani. Masi khuta ntthu onoowerya woonihera omwaamini Yeesu Kiriistu ni ophwanya ekumi yoohimala (Moone ettima 10)
11. Eseeni Yeesu aalontte iye oKalileya enoonihera wiira yeene khaalotta atthu aniirela mphantta ekhurupu ekhaani?
11 Okathi Yeesu aariiye oKalileya mwaakha wa 32 Noomala Kiriistu Ora, atthu awaatta yaanwiriyana okathi ole yaatthuna pahi ovahiwa eyooca ya veerutthuni. Masi Yeesu aakhalihera wiiwasasa wiira yaahikhala etthu ekina yootepa otthuneya oxira eyooca, yaaya waakhalihera ophwanya ekumi yoohimala. Nitho Yeesu aahilotta wiira atthu akhwiye, anoohihimusiwa nihiku nookhidhera wiira ekhale mahiku ootheene. Moovirikana ni Eyooca ya Ohiyu ya Apwiya, Yoohaani ekapiitulu 6 Yeesu onlotta mareeliho awaatta an’ya awa ophwanya atthu ootheene, niire dho, atthu a makhalelo ootheene. Tthiri owo olontte wiira: “Akhala wiira ntthu onookhuura ephaawu ela, onookhala mahiku ootheene. . . . Ephaawu kinvaha aka erutthu aka wiira atthu ankhala valaponi ephwanye ekumi.’—Yohani 6:51. c
12. Eseeni ninreerela nhu opaka wiira niphwanye ekumi yoohimala?
12 Niire Yeesu aatthuna olotta wiira atthu ootheene ankhala valaponi yamphwanya ekumi yoohimala? Naari. Masi ale ankhuura ephaawu ela pahi, aahiidho anoonihera omwaamini Yeesu, tan’ya ophwanya ekumi yoohimala. Atthu awaatta aniihima okhala Makiristau, ankhupali wiira anawoopowa akhala wiira ‘anoomwaamini [Yeesu]’ okhala moopoli-ya. (Yohani 6:29) Masi yookhala etthu ekina yootepa otthuneya anreerela awa opaka. Yaahikhala atthu awaatta oKalileya yaawo mwa waakuveya yoonihenre onkhupanli Yeesu, masi noovira okathi yaahihiya ontthara. Mwaha wa seeni?
13. Eseeni ntthu onreerela iye opaka wiira akhale ahudheri a Yeesu?
13 Atthu awaatta a nttitthi ole yantthara Yeesu pahi okhala wiira aanaavaha itthu yaaramela awa. Awo yaatthuna wiira Yeesu akaapenusa iretta mwa miiriirya, akaavaha eyooca ni akaahudhiha itthu dhaadhivela owiriyana. Masi Yeesu aahiwoonihera etthu yootepa otthuneya yaareerela awa opaka wiira ekhale ahudheri-ye. Yeesu ahaaleela mooluluwanya wiira yeene khaarule valaponi wiira avahe itthu dhaadhivela atthu ale pahi. Masi atthu ale yaanireerela ‘orowa wa owo’, niire dho, onwiriyana ni omwiiwelela .—Yohani 5:40; 6:44.
14. Eseeni ninreerela nhu opaka wiira nittottele nreerelo erutthu ni ephome Yeesu ovanhe iye?
14 Yeesu aahahudhiha wiira mwaha wa ovaha erutthu ni ephome-ye, vanweryaneya apinaatamu okhala mahiku ootheene. Masi atthu ale yaanireerela okhupali ekhweeli ela ni woonihera waamini. Waamini iwo yaanitthuneya ayuuda okhalana ni hiyo oleelo-va tiwootthuneya okhalana. (Yohani 6:40) Ndho ele Yeesu olontte iye Yohani 6:53, entaphulela wiira ni nihaana woonihera waamini nkuttho wa Yeesu wiira niwerye ophwanya ekumi yoohimala. Elo etthu eweryaneya ophwanyiwa ni atthu ootheene.—aEefe. 1:7.
15-16. Itthu seeni dhootepa otthuneya ninhudha nhu dhiri Yoohaani ekapiitulu 6
15 Yawaatikhiwa ya mBiibiliyani ya Yoohaani ekapiitulu 6 ti yootepa otthuneya wa hiyo ootheene nhu. Elo ennihudhiha wiira Yeesu onnaapheta vawaatta atthu. Okathi Yeesu aariiye oKalileeya, ahaapenusa aretta, ahaahudhiha atthu voohima dha Omwene ni ahaavaha eyooca. (Luka 9:11; Yohani 6:2, 11, 12) Masi etthu yootepa otthuneya owo ahaahudhiha wiira owo aari “ephaawu ya ekumi.”—Yohani 6:35, 48.
16 Ekhweeli wiira atthu ale Yeesu owiitthanne iye okhala a ‘ipwittipwitthi dhikina’ khankhuura ni khanwurya eviinyu nihiku wa Eyooca ya Ohiyu ya Apwiya. (Yohani 10:16) Masi hata eri dhiidho, awo annittottela nreerelo erutthu ni ephome Yeesu Kiriistu ovanhe iye. Mooporani? Awo annittottela nreerelo mwaha wa woonihera waamini nkuttho wa Yeesu ni itthu dhootheene dhiirinhe wiira nkuttho owo oweryaneye. (Yohani 6:53) Ohiya-vo, ale ankhuura ephaawu ni owurya eviinyu, annoonihera wiira anniirela mphantta nivarihano na naanaano ni aakhalana nlipelelo na orowa olamulela Moomweneni wiirimu. Ndho moohixikha akhala wiira niniirela mphantta ekhurupu ya atthu oothanliwa aahiidho ya ipwittipwitthi dhikina, yawaatikhiwa ya Yoohaani ekapiitulu 6 ti yootepa otthuneya wa hiyo. Elo enninihudhiha wiira ootheene nhu nihaana woonihera waamini woolipa nkuttho wa Yeesu wiira niwerye okhala mahiku ootheene.
NCIPO 150 Mumphavele Muluku Wira Moopoliwe
