YOOSOMA YA MWAHA 48
NCIPO 97 Masu a Muluku Anninikhaliherya Okhala Akumi
Itthu Ninhudha nhu ni Mwiiriirya wa Iphaawu
“Miyo ka ephaawu ya okumi. Ole onirwa wa miyo, khonrowa ovoliwa-tho etala.”—YOHANI 6:35.
ETTHU NIN’YA NHU OHUDHA
Nin’ya othokorerya yaawiiraneya emoodha eri Yoohaani ekapiitulu 6, enoonihera moopora Yeesu aacerenre iye iphaawu ni ihopa vakhaani wiira aavahe eyooca nttitthi wa waatta wa atthu ni woona itthu ninhudha nhu.
1. Atthu a khalai yoonela dhai ephaawu?
KHALAI okathi aatikhiwa iye Biibiliya, ephaawu yaari eyooca yuulupale atthu awaatta yaadhuwela awa. (Maph. 14:18; Luka 4:4) Tthiri ephaawu yaari eyooca yootepa otthuneya wa atthu a okathi ole. Tivondho enromoliwa awa ivaara dhawaatta Mbiibiliyani. (Math. 6:11) Mwaha wa elo, Yeesu aahirumeela iphaawu wiira apake miiriirya miili. (Math. 16:9, 10) Ndho miiriirya mmodha ohaatikiwe ekapiitulu 6 ya eliivuru ya Yoohaani. Vaavo nin’ya othokorerya yawiiraneya ela, moone itthu nikhale nhu ovarihela nteko olelo-va.
2. Nxankiho seene waakhumelenle waawiiriha ahudheri a Yeesu oxankiheya?
2 Noomala arummwa a Yeesu weetta nkhwaha woottaiva elaleeryaka, yaahikhumuwa ekatthuna wiitthuuwa. Tivondho Yeesu ni arummwa yaahiwela ekalawa erowa mphantta nkina na nlima na Okalileya. (Mar. 6:7, 30-32; Luka 9:10) Awo yaaronwe opuro woomaleleya wahavira-viriwa epooma ya Obetesaida. Noomala awo ophiya, naanaanaru atthu awaatta yaahuura etthunaka omoona Yeesu. Okathi Yeesu aawonne iye, khaananariwe mwaha wa atthu ale ontthara. Ohiya-vo, owo aahaathokorerya moopheta ni ahiivaha okathi wiira aahudhihe ihapari dha Omwene ni waapenusa ale yaawereiwa. Okhala wiira waahipacera wiila, ahudheri a Yeesu yaahipacera oxanka ni moopora atthu ale yaaya awa ophwanya eyooca. Woonawene atthu akina yaahikusa eyooca vakhaani, masi atthu awaatta yaanitthuneya othuma eyooca okhala wiira khiyaarina. (Math. 14:15; Yohani 6:4, 5) Eseeni Yeesu aapanke iye?
YEESU ONNAACERERA IPHAAWU MWA MWIIRIIRYA
3. Eseeni Yeesu aaleenle iye arummwa wiira epake? (Moone-tho efootu ya.)
3 Yeesu ahaaleela arummwa wiira: ‘Khanikhanle nthowa na waamwarya atthu ala, mwaavahe nyuwo eyooca.’ (Math. 14:16) Vaakhala wiira khivaaweryaneya opaka elo okhala wiira opuro ole yaahikhala alopwana 5.000. Ohiya-vo, yaahikhala-tho athiyana ni anaahima yahaakontariwe, ndho naatakaiha atthu ootheene, woonawene opuro owo yaahikhala atthu yaaphiya 15.000. (Math. 14:21) Elo ti etthu yaamwiirinhe Andre olotta wiira: ‘Ookhala-va mmiravo mmodha orina iphaawu thanu ni ihopa piili ikhaani. Niire dhinawaaphiyera atthu oowaatta dhiidha?’ (Yohani 6:9) Okathi ole, dhaahilimaleliwa iphaawu dha esevaada okhuuriwa ni atthu oohaawa vamodha atthu akina, woonawene ihopa aakunse iye aari pakayawu aahiidho namaakha. Masi iphaawu ni ihopa aakunse mmiravo ole khidhaaphiyera nnakhala vakhaani atthu ootheene yaari opuro ole.
Yeesu aanaavaha atthu itthu dhaatthowa dha omunepani ni dha veerutthuni (Moone ettima 3)
4. Itthu seeni ninhudha nhu ni Yohani 6:11-13? (Moone-tho ifootu.)
4 Awooniheraka oreera nrima, Yeesu aahaavekela atthu ootheene wiira ekilaathi ikhurupu ikhaani. (Mar. 6:39, 40; munsome Yohani 6:11-13.) Nkhama Biibiliya onlotta iye, moottharelana Yeesu aahaavekela Atiithi-ye aaxukhurelaka mwaha wa iphaawu ni ihopa idhe. Opaka elo yaari etthu yootthuneya, okhala wiira eyooca yootheene enkhuma wa Yehova. Nna ntakihero nooreera Yeesu oonivahe iye nenno ninreerela nhu othara. Ndho voohixikha akhala wiira niri meekhihu aahiidho opuro waawaatta atthu, okathi wootheene nihaana onvekela Yehova nihinatthi opacera oca. Noomala Yeesu ovekela akawa eyooca, atthu ootheene yaahoca evona mpakha ohala iphaawu dhawaatta. Okhala wiira Yeesu khaatthuna wiira eyooca ehoneneye. Aahaavekela ahudheri-ye wiira etakaihere ni ekhapelele eyooca yaahanle. Nitho nna ntakihero nooreera ninreerela nhu otthara, nihaana oxaka ohonona eyooca. Tivondho nihaana orumeela mwa miruku itthu nirinhuna. Ndho akhala wiira nyuwo mwa naan’yari, nnoonela dhai orumeela yawiiraneya ela wiira mwaakhalihere aninnyu woona otthuneya-wa ovekela, waareerela nrima aletto ni okhala oovaha entakihaka Yeesu?
Mwiikohe wiira: ‘Kiire kinnintakiha Yeesu kipakaka nivekelo kihinatthi opacera oca?’ (Moone ettima 4)
5. Etthu seeni ayuuda yaatthuna awa ompakela Yeesu, ndho owo oonenle dhai?
5 Noomala woona elo, atthu ootheene yaahitikinihiwa mwaha wa miiriirya Yeesu aapanke iye ni itthu dhootheene owo aahudhiha iye. Atthu ale yaanidhuwela ele Moise aaleenle iye aisarayeeli khalai wiira Muluku aammukhumihera profeeta muulupale aaya olikana nyuuwo. Woonawene awo yaanikoha yiiraka: ‘Masi profeeta yoole aalaiheriwe kahi yoola?’ (Otum. 18:15-18) Noomala woona mwiiriirya dhootheene Yeesu aapaka iye, woonawene atthu ale yaahikhupali wiira owo aankhala namalamulela ooloka. Tivondho awo yaahipacera ompaka palano wiira enkhanyerere Yeesu ‘okhala mwene-ya’. (Yohani 6:14, 15) Vaakhanle wiira Yeesu aamwaakhulela okhala Mwene, owo amwiirela mphantta miyaha dha epoliitika dha ayuuda yaawo yaalamuleliwa ni arooma. Masi okhala wiira Yeesu khaatthuna wiirela mphantta miyaha dha epoliitika, ahikhuma opuro ole ‘arowa omwaako.’ Ndho hata aakhanyereriwe wiirela mphantta miyaha dha epoliitika, owo aahikhootta opaka elo. Nna ntakihero nooreera ninreerela nhu otthara!
6. Nin’ya otthara dhai ntakihero na Yeesu? (Moone-tho efootu.)
6 Ekhweeli wiira olelo-va, khaavo onrowa onikhanyerera waaceerera eyooca aahiidho waapenusa aretta mwa mwiiriirya ni okhala nhooleli a elapo. Masi atthu akina pooti onikhanyerera wiirela mphantta miyaha dha epoliitika nkhama ompaka mwaathanle aahiidho onkhalihera nhooleli mmodha epartiitu anoona awa wiira enoowerya olamulela saana. Elo yaakhumelela Yeesu onoonihera saana etthu ninreerela nhu opaka: Owo aahikhootta wiirela mphantta miyaha dha epoliitika. Okathi nkina owo aahilotta mooluluwanya wiira: “Omwene aka khahiyo wa olumwenku ola.” (Yohani 17:14; 18:36) Nkhama Makiristau eekhweeli nihaana opaka itthu ni wuupuwela nitakihaka Yeesu. Tivondho ninkhalihera pahi Omwene wa Muluku yoowo ninlaleya nhu ni ninvekela nhu wiira ore valaponi. (Math. 6:10) Vano nirowe noone itthu dhikina ninhudha nhu ni mwiiriirya ola Yeesu aacarenre iye iphaawu.
Yeesu khaaivoleihale mpuwa wa miyaha dha epoliitika dha ayuuda ni arooma, ndho hiyo nihaana otthara ntakihero-ne (Moone ettima 6)
“YOOTAPHULELA YA MWIIRIIRYA WA IPHAAWU”
7. Eseeni Yeesu aapanke iye, ndho ahudheri-ye yoonenle dhai? (Yohani 6:16-20)
7 Noomala nttitthi ole wa atthu okhuura iphaawu idhe, Yeesu aahaaleela ahudheri-ye wiira ewele ekalawa etthikele oKafarnawu. Masi Yeesu khaarowe vamodha naawo, owo aaronwe omwaako meekhe atthawaka nttitthi ole waatthuna omwiiriha okhala mwene. (Munsome Yohani 6:16-20.) Nlelo arummwa elapuwaka nlimani ni ekalawa, yaahikhumelela ettheku yuulupale yeelo yaakhumihere meepi muulupale. Naanaanoru, awo yaahimoona Yeesu araaka eettaka vadhulu va maadhi. Owo aahinruma Pheeduru opaka etthu emodharu. (Math. 14:22-31) Noomala Yeesu owela ekalawa ettheku ele yahimaala. Ndho elo, yaahaatikiha vawaatta ahudheri mpakha olotta wiira: ‘Veekhweeli, nyuwo mwa Mwaana a Muluku.’ a (Math. 14:33) Ahudheri a Yeesu khiyaalontte moolumo ala noomala woona mwiiriirya wa iphaawu. Maarku ohaacerera etthu emodha ennikhalihera wiiwasasa elo, owo aatinke wiira: ‘Ahudheri yaahitikinihiwa vawaatta, maana khiyaiwesanse yootaphulela ya mwiiriirya wa iphaawu. Tthiri awo khiyaawerya wiiwesasa.’ (Mar. 6:50-52) Ahudheri khiyaadhuwela wiira Yehova aahinvaha Yeesu owerya wa opaka miiriirya dhuulupale. Noovira okathi vakhaani, Yeesu aahitthikela olotta mwiiriirya wa iphaawu, ndho itthu alontte iye dhinninihudhiha itthu dhootepa dhootthuneya.
8-9. Seeni nttitthi ole wa atthu waakoca Yeesu oKafarnawu? (Yohani 6:26, 27)
8 Nttitthi ole wa atthu waanivaha efaita yuulupale itthu dha veerutthuni. Eseeni eniiriha olotta dhiidho? Okhala wiira mmeelo-mwa, nttitthi ole wa atthu waahitthikela opuro ole Yeesu aapanke iye mwiiriirya wa iphaawu. Masi awo khiyaamphwannye Yeesu ni ahudheri-ye. Ndho awo yaahiwela ikalawa dhaakhuma oTiberiyaadi erowa onkoca Yeesu oKafarnawu. (Yohani 6:22-24) Eseeni yawiirinhe opaka elo? Niire dhaadhivele ihapari dha Omwene yaalaleeriwe awa? Naari. Awo yaatthuna wiira Yeesu apake mwiiriirya wa aacerera iphaawu wiira ekhuure. Eseeni enniiriha olotta dhiidho?
9 Moone etthu yaakhumelenle noomala atthu ale omphwanya Yeesu waattamela oKafarnawu. Yeesu ahaaleela atthu ale mooluluwanya wiira yankoca okhala wiira yaatthuna iphaawu ‘yaakhuunre awa mpakha ovona’ . Noomala olotta dhiidho, Yeesu aahaalopola airaka: ‘Nhivare nteko mwaha wa eyooca enintta.’ Masi aahatumererya ovara nteko ‘mwaha wa eyooca envaha ekumi yoohimala’. (Munsome Yohani 6:26, 27.) Yeesu ahaalela wiira Yehova tonvaha eyooca elo. Nkuupuwelani moopora ahudheri a Yeesu yoonenla awa! Awo yaahitikiniheya vaavo yuupuwela awa oca eyooca emphwanyiha ekumi yoohimala. Eyooca elo eseeni ni yaaya owerya dhai ophwanya eyooca elo?
10. Etthu seeni atthu ale yaareerela awa opaka wiira ekhalena ekumi yoohimala?
10 Onkhala wiira ayuuda ale yaahidhuwela wiira yaanireerela opaka etthu wiira ephwanye eyooca elo. Woonawene, awo yuupuwela ovara ‘miteko’ dhaavekeliwa ni nlamulo na Moise. Noomala Yeesu odhuwela ele yuupuwela awa, ahaaleela wiira: ‘Nteko nkhanle nnyu onvarela Muluku tuula: moonihere wiira munnimwaamini ole onrumme iye.’ (Yohani 6:28, 29) Ela khiyaari evaara yoopacera Yeesu aaleele iye wiira yaanireerela omwaamini ole Muluku onrumme iye wiira ‘ekhalena ekumi yoohimala’. (Yohani 3:16-18, 36) Noovira okathi, Yeesu aahitthikela olotta ele ninreerela nhu opaka wiira niphwanye ekumi yoohimala.—Yohani 17:3.
11. Eseeni enoonihera wiira etthu ayuuda yaatepa awa ovaha efaita yaari eyooca ya veerutthuni? (Esalimo 78:24, 25)
11 Etthu seeni atthu ale yaareerela awa opaka wiira ekhalena ekumi yoohimala? Ayuuda ale khiyaakhupali wiira yaanireerela omwaamini Yeesu wiira ephwanye ekumi yoohimala. Tivondho awo yaankonhe awa Yeesu wiira: ‘Mwiiriirya seeni mun’ya nnyu opaka, wiira noone ni nookupalini?’ (Yoh 6:30) Noomala awo yaahinleela Yeesu wiira okathi wa Moise, aisareyeeli yaahivahiwa emana nkhama eyooca, ndho elo yaaniwiiriha atthu omwaamini Moise. (Neh. 9:15; Nsome Esalimo 78:24, 25.) Voohaakanhera atthu ala yaatthuna ovahiwa eyooca ya veerutthu pahi. Moottharelana, Yeesu ahaalela wiira yaahikhala ‘ephaawu yeekhweeli, yeelo enkhuma wiirimu”. Ndho moovirikana ni emana, ephaawu elo yaamwaavaha ekumi. Masi noomala wiiwa elo, awo khiyaankohe Yeesu ele yaataphulela awa ephaawu elo. (Yohani 6:32) Okhala wiira atthu ale yaanitepa ovaha efaita eyooca ya veerutthuni, elo yawiiriha ohivaha ephoole itthu dhootthuneya Yeesu aahudhiha iye. Eseeni ninhudha nhu?
ETTHU ENREERELA OKHALA YOOTEPA OTTHUNEYA MWEEKUMINI MWIHU
12. Nkhama Yeesu oonihenre iye, eseeni ninreerela nhu otepa ovaha efaita mweekumini mwihu?
12 Yoohaani ekapiitulu 6 onninihudhiwa etthu yootthuneya, nihaana ovaha efaita itthu dha omunepani oxira itthu dha veerutthuni. Yeesu ohoonihera elo vaavo ehereriwe iye ni Satana. Okathi ole, Yeesu aahoonihera wiira omwiiwelela Yehova etthu yootepa otthuneya oxira itthu dha veerutthuni. (Math. 4:3, 4) Nitho mwaha muulupale aalontte iye vamwaako, aahittittimihera wiira tivootthuneya odhuwela itthu dhinnithowa dha omunepani. (Math. 5:3) Tivondho niikohe dho: ‘Kiire dhoothanla dhaka dhinnoonihera wiira kinnivaha efaita waataana waka ni Yehova oxira itthu nrima aka ontthuna awa?’
13. (a) Eseeni ehikhala awa etthu yootthekeya oca ni opuha itthu nirinhuna? (b) Eseeni Paaulu oniloponle iye? (1 aKorinto 10:6, 7, 11) (Moone-tho efootu.)
13 Ekhweeli wiira kahi etthu yootthekeya onvekela Yehova itthu dhinnithowa khuta nihiku, aahiidho opuha itthu nirinhuna. (Luka 11:3) Biibiliya onlotta wiira etthu yooreera oca, owurya ni opuha mihokorokho dha nteko nnyu. Owo onlotta wiira elo ‘yoovaha enkhuma wa Muluku.’ (Mus. 2:24; 8:15; Yak. 1:17) Masi nihaana okhalana ephoole wiira nihihiye itthu dha veerutthuni dhikhalaka dhootepa otthuneya mweekumini mwihu. Wuupuwela etthu nrummwa Paaulu awaatikenle iye Makiristau a okorinto pooti onikhalihera. Owo ooromola itthu vakhaani dhaakhumelenle aisareyeeli, ohela mpuwa ele awo yaapanke awa yaattamelaka omwaako Siyooni. Wookhidherani, owo onninilopola wiira ‘nihitthune opaka itthu dhootakhala, nkhama atthu awo yaatthuna awa’. (Munsome 1 aKorinto 10:6, 7, 11.) Yehova aanikhapelela saana nloko nne mpakha opaka mwiiriirya wa okhumihera eyooca, masi mooriipiha nrima nloko nne naanitepa opheta eyooca onxira Yehova, mpakha elo waaphwanyiha maxakha. (Moth. 11:4-6, 31-34) Ohiya-vo, aIsarayeeli yaahoonihera wiira yaanipheta eyooca, owurya ni oraara oxira omwiiwelela Yehova, vaavo yaakokhorela awa elatarato ya emoope. (Okhu. 32:4-6) Paaulu aahiromola yawiiraneya ela wiira aalopole Makiristau a okathi ole okhala wiira waanaattamela opwetesiwa wa Yerusaleemu yoowo waairanen’ye mwaakha wa 70 Noomala Kiriistu Ora. Nkhama aisarayeeli, hiyo ninkhala wookhidherani wa mahiku ookhidhera wa olumwinku ola. Tivondho oraawa vootthuneya wiiwelela miruku dha Paaulu ni oxaka opaka yoovonya emodharu yaapanka awa aisarayeeli.
14. Eseeni Biibiliya onlaihera iye voohima dha eyooca en’ya okhala elapo epheya?
14 Okathi Yeesu aahudhiha iye moopora woovekela owo ahihela mpuwa eyooca, masi woopacerani owo aalotte wiira nivekele wiira ‘yootthuna [ya Muluku] yiireye valaponi, nkhama wiirimu’. (Math. 6:9-11) Nkuupuwelani moopora elapo en’ya awa okhala noomala waakhuliwa nivekelo nna! Biibiliya onlotta wiira Muluku onawiiriha elapo okhalana eyooca yawaatta. Yesaya 25:6-8, onlotta wiira Omwene wa Yehova onawaavaha atthu eyooca yawaatta yoodhiva. Esalimo 72:16 enlaihera wiira: “Elapo enooruwerya ipyo [aahiidho itthaka] sinceene, vasulu va miyaako sinoosareya ipyo.” Niire khonoovavani nrima vaavo nnuupuwelaka okathi mun’ya nnyu oca iyooca dhoovirikana muntthuna nnyu ni waapeya mwa enamuna enoodhivelani? Ohiya-vo, okathi owo nyuwo ‘nkamwaala nttaikho nnyu ni oca mihokorokho-dha’. (Yes. 65:21, 22) Ndho nhoolo apinaatamu anoopuha itthu idha dhoohakalaliha valaponi.
15. Eseeni an’ya awa ohudhihiwa atthu an’ya ohihimusiwa? (Yohani 6:35)
15 Munsome Yohani 6:35. Niire nlelo munniwuupuwela atthu ale yaakhuunre iphaawu ni ihopa Yeesu aacerenre iye mwa mwiiriirya? Okathi ole awo khiyoonihenre omwaamini Yeesu. Masi hata eri dhiidho, woonawene nhoolo akina anoohihimusiwa wiira mwaadhuwele. (Yohani 5:28, 29) Awo anootthuneya ohudha yootaphulela ya moolumo Yeesu aalontte iye wiira: ‘Miyo ka ephaawu ya okumi. Ole onra wa miyo, khanrowa ovoliwa-tho etala’. Awo anookhalana eparakha ya woonihera wiira annimwaamini Yeesu. Awo anootthuneya woonihera waamini ni okhupali wiira Yeesu ohuukhwa wiira awoopole apinaatamu. Wiira elo eweryaneye, nhoolo enoopakiwa eprokaraama ya ohudhihiwa atthu an’ya ohihimusiwa vamodha ni ale an’ya oyariwa elapo epheya. En’ya okhala etthu yoohakalaliha waakhalihera atthu awo odhuwela yoolakela ya Yehova! Ndho opaka elo, ennixira eyooca ya veerutthuni. Voohakanyera okathi owo, itthu dha omunepani dhinookhala dhootepa otthuneya mweekumini mwihu.
16. Eseeni nin’ya nhu othokorerya yoosoma enttharelana?
16 Yoosoma ela, noohudha itthu dhawaatta dheidho dhiri Yoohaani ekapiitulu 6. Masi dhookhala itthu dhawaatta Yeesu ohudhinhe iye voohima dha ‘ekumi yoohima’. Dheidho ayuuda okathi ole yaareerela awa ovaha ephoole ni hiyo olelo ninnireerela ovaha ephoole. Tivondho yoosoma enttharelana, ninootthikela othokorerya itthu dhikina ninhudha nhu dhiri Yoohaani ekapiitulu 6.
NCIPO 20 Nyuwo Monvaha Mwaninyu Mmoseene
a Wiira ndhuwele itthu dhikina voohima dha yawiiraneya ela, moone eliivuru Yesu ti Ephiro, Ekeekhai ni Ekumi, epaax. 131 ni Mutakihe Waamini Waya, epaax. 185.
