Miyo kiyariwe mwaakha wa 1927 epooma ekhaani waattamela oChicago, elapo ya eIllinois, wEstados Unidos wAmerica. Anaan’yari aka yaarina anamwane atthanu: Jetha, Don, miyo, Karl ni Joy. Ootheene nhu naahilakela onrumeela Yehova ekumi nhu yootheene. Mwaakha wa 1943 Jetha ahirowela etuuruma ya naili ya eskola ya oGileyaadi. Adhuulupale aka akina araru yaahirowa orumeela eBeteeli ya Brooklyn elapo ya Nova York. Don aronwe mwaakha wa 1944, Karl aronwe mwaakha wa 1947 ni Joy mwaakha wa 1951. Ntakihero na adhuulupale aka vamodha na anaan’yari aka, nahikitumererya waacereera nteko kanvarelaaka Yehova.

Anaan’yari nhu yaaninsoma Biibiliya, yaanimpheta Muluku ni yaaninihudhiha ompheta Muluku. Masi noomala apaapa orowela etooropa wEuropa, ekhotto yoopacera ya olumwinku wootheene awo yaahihiya ottittimiha Ikerexa. Ndho noomala awo woopowa okhottoni ni othikela owani, amma yaahixukhuru ni yaahaaleela wiira: “Karl, nirowe nithikela weetta okerexa.” Ndho apaapa yaahilotta wiira: “Miyo kinoorowa ni nyuwo, masi nkinne kivolowe.” Amma yaahakoha wiira: “Mwaha wa seeni?” Awo yaahiwakhula wiira: “Okathi wa ekhotto, ahooleli a itiini emodharu yaawo yaakhalihera awanani nhu, yaanaareeliha atoropa a elapo-ya! Ndho niire Muluku aakhalihera ikhurupu dhoopili?”

Nihiku nimodha amaama eri okerexa, Anamoona a Yehova aili yaahimana nkhora nhu. Awo yaahavaha apaapa ivolume piili dha eliivuru Light (nthuko), yeelo yaalotta voohima dha eliivuru ya Wiidhupulula. Apaapa yaahoonihera odhiveliwa ni yaahaakhulela waakhela. Noomala amma woona iliivuru idho, yaahipacera osoma. Nihiku nimodha amma yaahisoma ihapari nxornaaleni dhaalaleya atthu opacera onsoma Biibiliya erumealaka eliivuru Light (nthuko). Ndho awo yaahilakela orowa yaaya awa osommwa. Noomala amma ophiya opuro ole, nthiyana mmodha aahiwaakhela vankhora. Ndho amma yaahimooniha iliivuru enkoha wiira: “Niire nva opuro ensommwa eliivuru ela?” Nthiyana ole aahiwakhula wiira: “Aayo, nthiyana pooti ovolowa.” Esumana yaattharelana miyo ni amma vamodha ni adhulupale aka nahirowa opuro owo. Okhuma nihiku nne naanirowa isumana dhootheene.

Nihiku nimodha onthukumanoni, nhooleli antthukumano ahikivekela osoma Esalimo 144:15, yeelo enlotta wiira ale aninkokhorela Yehova toohakalala. Yaahikidhivela vawaatta yawaatikhiwa ela. Nitho aahikidhivela  1 Timootheyo 1:11, yoowo onlotta wiira Yehova “Muluku ohakalala,” ni aEefeso 5:1, onlotta wiira ‘nihaana ontakiha Muluku.’ Miyo kahoona wiira kanireerela okhala ohakalala mwaha awa onrumeela Mpattusa ni oxukhurela mwaha awa eparakha elo. Ndho okhuma nihiku nne kinniilipihera opaka itthu idha piili ekumi aka yootheene.

Muloko waattamenle owaani waari oChicago yoowo waattaivenle ikiloomo 32. Masi hata eri dhiidho, hiyo naanirowa opuro owo wiira noone mithukumano, ndho ondhuwela waka Biibiliya waanaacerereya. Miyo kinnuupuwela nihiku nimodha nhooleli a nthukumano anthanlala iye Jetha wiira akomentari. Noomala owo okomentari, kahuupuwela wiira: ‘Miyo kanwerya waakhula nikoho nna. Fataari kaveihale moono wiira kikomentari.’ Ndho okhuma nihiku nne kahipacera wiilokihera ni ovaha ikomentaariyu kirumeelaka moolumo aka. Masi etthu yootepa otthuneya, okhala wiira miyo ni adhulupale aka, naaniilipiha waataana wihu ni Yehova. Miyo kipatisiwe mwaakha wa 1941.

Miyo kinnimuupuwela saana konkereesu mmodha a mwaakha wa 1942 apakiwe oCleveland, elapo ya Ohio. Atthu yaakhala mittethe dhaaxira 50 dha wEstados Unidos yahoona eprokaraama elo enrumeelaka telefooni. Emudhi nhu yaahimaka vamodha ni anna akina opuro waattamenle opuro wa konkereesu. Olumwinku wootheene waahikhala nxankiho wa ekhotto ya naili ya olumwinku wootheene ni Anamoona a Yehova yaantepa otharathariwa. Nihiku nimodha ohiyu, anna yaahirukunusa ikaaro elipeliha otthuli wa opuro ole waamakiwe. Anna ootheene yahiiwanana okhalana ntthu aakocela ohiyu ole wootheene. Vaakhala wiira waankhumelela nxankiho, anna awo yanttapunya ipusina ni opattiha maluxu a ikaaro wiira yaariipihe omaithoni anamatuphela. Ndho wiira akina ewerye okhalihera. Noomala woona elo, miyo kahupuuwela wiira: ‘Okathi wootheene atthu a Yehova ari olikaneene!’ Ndho kahirupa moomaaleleya ni khiyaakhumelenle hata etthu yootakhala.

Noovira iyaakha vakhaani, vaavo kamuupuwela aka konkereesu ole, kahoona wiira amma khiyaaxankale aahiidho woova. Awo yahoonihera onroromela Yehova ni nrima wootheene vamodha ni nthenkeso-ye. Ndho miyo nkinkha-khala kiiliyalaka ntakihero-na.

Nihinathi ophiya nihiku na konkereesu amma yaarumeela nkhama piyoneera okilaatheya. Awo yaahivaha ephoole vaavo dhalottiwa awa miyaha dha nteko wa okathi wootheene. Vaavo naathikela nhu owaani, awo yaalotta wiira: “Miyo nkathuna ohiya okhala piyoneera, masi kavikaniha ovara miteko dha vaate meekhaka nkinne kiiwerye opaka elo.” Noomala onikoha akhala wiira hiyo naanwerya waakhalihera. Hiyo naahaaleela wiira naanwerya. Ndho awo yaahikawela khuta ntthu, ekoomota emodha aahiidho piili (nipuro nimphwehiwa itthu) wiira alimpari ohinatthi ophiya okathi woowurya ekafe ya ohiihiyu. Noomala hiyo orowa oskola, awo yanoona akhala wiira itthu dhootheene dhaahiphwehiwa saana ehinatthi orowa nteko woolaleerya. Amaana yaari ntthu awaatteliwa miteko, masi hata eri dhiidho, awo yaninikhapelela saana. Vaavo nathika nhu oskola naaphwanya awo enilipelela aka wiira nince alumooso vamodha ni awo. Nitho mahiku makina noomala othika oskola, yaaninikusa nteko woolaleerya. Ndho elo yaahinikhalihera odhuwela nteko wa opiyoneeru.

Miyo kipacenre orumeela nkhama piyoneeru kirina iyaakha 16. Hata apaapa yaahakhanle Anamoona a  Yehova, yaahikikoha akhala wiira kanikhumela saana nteko woolaleerya. Ohiyu omodha, kaahalela wiira hata kailipihera vawaatta, nlelo nkaarina yoosoma ya Biibiliya. Noomala, kahaakoha wiira: “Niire munnithuna osomihiwa ni miyo?” Awo yaahuupuwela vakhaani, yaakhula wiira: “Miyo nkaana nthowa ninkiiriha okhootta elo.” Ndho kahoona okhala eparakha yuuluupale, apaapa okhala naskola aka opacera a Biibiliya!

Eliivuru naasoma nhu yaaithaniwa “A Verdade Vos Tornará Livres.” (Ekhweeli enawootaphulani). Noovira okathi, kaahoona wiira apaapa yaanikikhalihera odhuwela ohudhiha saana ni okhalana yoolema ya onsoma Biibiliya. Mwa ntakihero, nihiku nimodha nipakaka yoosoma emodha, noomala osoma ettima emodha, awo yaalontte wiira: “Miyo kihiiwasaasa etthu enlotta awa eliivuru ela. Masi nyuwo mundhuwela dhai wiira eliivuru ela elotta ekhweeli?” Miyo nkhaadhuwela moopora wa waakhula. Ndho kahiwaakhula wiira: “Nenna-va nkiwerya owaakhula, masi yoosoma nhu entharelana, kinoowakhulani.” Miyo kaahiwerya opaka elo, okhala wiira kaahiphwanya dhawaatikhiwa dhaalotta saana epontu naathokorenrye nhu yoosoma nhu. Okhuma nihiku nne, miyo kahihudha othokodha ni wiilokihera saana nihinathi ophiya nihiku na yoosoma nhu. Elo yaahacereera wunnuwa waka nkhalelo wa omunepani ni wa apaapa. Awo yaahipacera ovarihela nteko itthu yaahudha awa, mwaakha wa 1952 yaahipatisiwa.

Miyo kikhume owaani kirina iyaakha 17. Jetha a aahikhala Misiyonaariya ni Don aahikhala Betelita. Owaili dhaanadhivela dhoothanleliwa-dha, ndho elo, yahikilipiha vawaatta. Noomala kahaatikha epetisawu wiira karumeele oBeteeli ni ekina ya oGileyaadi ni kahinhiya Yehova wiira akithanlele opuro aaya iye othuna okirumeela. Noomala, mwaakha wa 1946 kaahilaleiwa orowa orumeela oBeteeli.

Mwa iyaakha 75 kivirihaka kirumeelaka oBeteeli, kahikhalana dhoothanleliwa doovirikana ni koohudha itthu dhawaatta. Mwa ntakihero, kaahithanleliwa okhalihera nteko woopaka iliivuru, osuka nsurukhu ni otthuma itthu dharameliwa oBeteeli ni wunnyerera itthu idho mapuro makina. Masi etthu yootepa otthuneya wa miyo, waari moopora iprokaraama dha oBeteeli dhaakikhalihenra awa wunnuwa nkhalelo wa omunepani. Mwa ntakihero, onkokhorela Muluku ohiihiyu ni miyaha dha emudhi ya oBeteeli.

Nitho koohudha itthu dhawaatta ni nhimaka, Karl, yoowo opacenre orumeela oBeteeli mwaakha wa 1947. Owo anidhuwela osomiha ni onhudhiha saana Biibiliya. Kinuupuwela ivaara emodha kaavekelaka okikhalihera olokihera mwaha mmodha. Miyo kahinleela wiira kahithokodha vawaatta, masi nkaadhuwela moopora woorumeela itthu kaaphwanyaka.  Noomala owo aahikikhalihera akipakela nikoho nimodha, owo akikonhe wiira: “Joel, muru wa mwaha nnyu onlottani?” Mwawaakuveya kahiwasasa wiira kanireerela orumeela moolumo yaakhalihera saana muru wa mwaha aka ni ohiya itthu dhikina othuli. Miyo nkinkhala-khala kiliyalaka malakihero ala.

Wiira niwerye orumeela oBeteeli voohakalala, hiyo nihaana apaka ninwerya nhu nteko woolaleerya, elo pooti onnilipiha. Kinnuupuwela nihiku nimodha miyo ni munna nkina naaronwe onsekurya odhoodhilo nthiyana mmodha aakhulenle ereviista Wiikocela ni Nvenye! oBronx, epooma ya oNova York. Noomala ophiya naapacerihe ovaanela, niiraka: “Odhoodhilo ola ninaakhalihera atthu ohudha itthu dhootepa otthuneya dhiri mBiibiliyani.” Owo aahaakhula wiira: “Akhala wiira atthu anlotta voohima dha Biibiliya, pooti ovolowa.” Noomala nahivaanela nuuwo ni osoma dhawaatikha dhawaatta dha mBiibiliyani dhaalotta voohima dha Omwene wa Muluku ni elapo epheya. Owo aahihakalala vawaatta, mpakha elo omwiiriha waalaleya axirikha-ye wiira nikhalena vamodha esumana yaattharelana. Noovira okathi, owo ni amamune yaahikhala arumeyi ororomeleya a Yehova.

Miyo kooviriha iyaakha 10 khaadhyaka othela kihinathi waadhuwela amwaaraka. Niire munnidhuwela etthu yaakikhalihenre omphwanya ntthu ooreerela onthela? Miyo kaahinvekela Yehova ni kahuupuwela wiira: ‘Tiivi dhiri dhulukama dhaka noomala othela?’

Noomala konkereesu a mwaakha wa 1953, aapakiwe estatiyu ya oYankee, kahindhuwela nrokora mmodha aiithaniwa Mary Aniol. Owo aasomme eskola ya oGileyaadi etuuruma emodha ni nrokoraka Jetha ni awo yaarumeela vamodha nkhama mamisiyonaariya. Mary aahikilela moohakalala voohima dha yoothanleliwa-ye ya omisiyonaariya elapo ya oCaribe ni dhoosoma dha Biibiliya aariiyena mwa iyaakha dhaawatta. Noomala odhuwelana saana, naahona wiira naarina dhoolukama dhimodharu dha omunepani. Vakhaani-vakhaani ophetana wihu nkina ni nkhwe waahinnuwa. Hiyo nithelanne Abril mwaakha wa 1955. Okathi wootheene, miyo kanimoona Mary wiira mweekhweeli aari yoovaha yaakhuma wa Yehova ni anikihudhiha itthu dhootepa otthuneya. Owo anihakalala ni khuta yoothanleliwa aavahiwa iye, ari awiilipihera, anatthokorerya saana atthu akina ni okathi wootheene aaniphweha opuro woopacera Omwene. (Math. 6:33) Noorumeela nteko wa esirkwiitu mwa iyaakha ttharu ni mwaakha wa 1958 nahilaleiwa orowa orumeela oBeteeli.

Miyo koohudha itthu dhawaatta ni Mary. Mwa ntakihero, noomala othelana naahilakela onsoma Biibiliya vamodha. Hiyo naanisoma iveersu 15 okathi omodha. Noomala khuta ntthu osoma, nanivaanela voohima dha itthu naasomme nhu ni moopora woovarihela nteko mweekumini mwihu. Khula okathi Mary aanikileela itthu aahundhe iye oGileyaadi ni nteko wa omisiyonaariya. Itthu kihundhaka ni Mary dhookikhalihera odhuwela saana olotta miyaha ni waalipiha arokora.—Mir. 25:11.

Mwaaraka Mary okhwiye mwaakha wa 2013. Miyo kinnitthuna vawaatta okumana ni owo elapo epheya! Masi kilipelelaka ophiya okathi owo, koolakela ohihiya ohudhihiwa ni Yehova ni onroromela ni nrima aka wootheene. (Mir. 3:5, 6) Wuupuweela itthu atthu a Yehova an’ya awa opaka elapo epheya ennikimaaliha ni okihakalaliha. Moohakanyera, elapo epheya hiyo ninoohudha itthu dhawaatta ipheya ni Nhudhihi Muulupale! Miyo nkindhuwela moopora woonxukhurela Yehova mwaha wa itthu dhootheene okihudhinha iye nenna-va ni opheta okoonihenre iye.