Niire nyuwo moowerya osoma miyaha dhootheene dhikhumiheriwe ireviista Wiikocela dha ntano? Nrowe muupuwelele itthu vakhaani mwaakhulaka makoho anttharelana:

Ntakihero seeni Yehova onnivaha iye voohima dha moopora wa waathokorerya athiyana?

Owo khanaathanya athiyana ni khaniwoona alopwana okhala efaita yuulupale waaxira athiyana. Yehova onnaawiriyana athiyana ootheene aninvekela enleelaka miyoonelo-dha ni mixankiho-dha. Yehova onnaarumeela athiyana wiira evare miteko-dhe.—Owehaweha 24.01, epaax. 15-16.

Nin’ya ovarihela dhai nteko moolumo ari aEefeso 5:7 ani: ‘Nhiire itthu aniira awa’?

Nrummwa Paaulu onnaalopola Makiristau otthuneya-wa oxaka weetta ni atthu ahintthuna wiiwelela malamulo a Yehova wiira ehihapusiwe. Elo enhela mpuwa waaxaka atthu nineetta nhu aahiidho ale ninaaphwanya nhu narumeelaka areedi sosiyaaxi.—Owehaweha, 24.03, epaax. 22-23.

Miyaha seeni dhawoothiwa ninreerela nhu okhalana ephoole?

Tivootthuneya okhalana ephoole ni miyaha dhootheene ihindhuweliwa akhala wiira ti dheekhweeli aahiidho naari, dheidho ninleeliwa nhu ni amudhi, nininviyareliwa nhu ni Imeeili dha atthu nihinaadhuwela nhu ni dhinlottiwa ni anamavaanyiha.—Owehaweha, 24.04, epaax. 12.

Itthu seeni nihindhuwela nhu ni nindhuwela nhu voohima dha moopora Yehova on’ya iye omphukela Salomoni, ale apwetesiwe oSadoma ni oKomora vamodha ni ale akhwiye okathi wa Nowe?

Hiyo khanindhuwela akhala wiira atthu awo anootthikela okhala aahiidho naari. Masi ninnidhuwela wiira Yehova onnidhuwela itthu dhootheene dhikhumelenle ni toomoriwa ikharari vawaatta.—Owehaweha, 24.05, epaax. 3-4.

Eseeni Muluku yoowo ori nkhama “Mwala” onlaihera iye? (Otum. 32:4)

Hiyo nihaana ompaka Yehova okhala ntthawelo nihu. Owo toororomeleya ni okathi wootheene onnaakhwanihera dhoolaihera-dhe. Owo khanviliwa, itthu dhootheene olaihenre iye ti dhooororomeleya ni onawaakhwanihera yoolakela-ye.—Owehaweha, 24.06, epaax. 26-28.

Eseeni en’ya wookhaliherani olamalela makhalelo a muloko mpheya?

Munroromele Yehova, owo onawookhaliherani nkhama dhiidhale aakhalihera iye arumeyi-ye a khalai. Nhilikanyihe muloko mwaarinnyu khalai ni ole nrinnyu nenna-va. Nwaattamele anna a muloko nnyu ni mwaapake axirikha apheya.—Owehaweha, 24.07, epaax. 26-28.

Itthu seeni ninhudha nhu ni malikanyiho mararu ari Matheyo ekapiitulu 25?

Nlikanyiho na ipwittipwitthi ni ipuri ninttittimihera ohihiya okhala oororomeleya. Nlikanyiho na imwali dhaakhili ni dhoololo ninnitumererya okhala oolikana ene ni awiikocela. Nitho nlikanyiho na italentu ninnitumererya okhala ooluttuweliwa ovara nteko ni waarumeela akhili.—Owehaweha, 24.09, epaax. 20-24.

Waari dhai ottaiva wa nipithela na etempulu ya Salomooni?

Moovarihana ni 2 Wahala 3:4, dhawaatikhiwa dha khalai dhinnilotta wiira ottaiva wa nipithela waari wa ‘ikoovatu 120’; niire dho, ottaivela-wa odhulu waari wa imeeturu 53! Masi dhawaatikhiwa dhoororomeleya dhinlotta wiira ottaiva-wa waari wa ikoovatu 20, aahiidho imeeturu 9. Moonelo ola wookhidhera oninvarihana saana ni ottaiva wa ipareti dha etempulu.—Wiikocela, 24.10, epaax. 31.

Ontaphulelani nrumeyi ookhalihera okhala ‘nlopwana orina nthiyana mmodha pahi’? (1 Tim. 3:12)

Ontaphulela wiira arumeyi ookhalihera ahaana onthela nthiyana mmodha pahi ni oxaka opaka orupihana woohiloka. Ohiya-vo, owo ohaana okhala oororomeleya wa amwaariye ni oxaka woonihera wiira onnidhiveliwa ni athiyana akina.—Wiikocela, 24.11, epaax. 19.

Eseeni enoonihera wiira moolumo a Yeesu ari Yohani 6:53 khahi malakihero a moopora woopakiwa Eyooca ya Ohiyu ya Apwiya?

Yohani 6:53 onlotta voohima dha otthuneya-wa okhuura erutthu ya Yeesu ni owurya ephome-ye. Yeesu aalontte moolumo ala mwaakha wa 32 Noomala Kiriistu Ora oKalileya ni aaleela ayuuda yaawo nlelo yaatthuneya omwaamini Yeesu. Masi Eyooca ya Ohiyu ya Apwiya epacerihiwe noovira mwaakha mmodha oYerusaleemu. Okathi aalontte iye moolumo ala, aaleela ale aaya iye olamulelana vamodha wiirimu.—Wiikocela, 24.12, epaax. 10-11.