YOOSOMA YA MWAHA 7
NCIPO 15 Munvuwihe Kristu: Mwaana Oopacerya a Yehova
Eseeni Entaphulela awa wa Nyuwo Olevelela wa Yehova?
‘Nyuwo tinrina olevelela weekhweeli’—ESAL. 130:4.
ETTHU NIN’YA NHU OHUDHA
Nin’ya woona malikanyiho Biibiliya onrumeela iye vaavo onlotta iye olevelela wa Yehova, yaawo anaacerera onxukhurela wihu.
1. Seeni olevelela wa apinaatamu onkhala awa wooxankiha?
“MIYO KIHOOLEVELELANI.” Moolumo ala toolipiha vawaatta, otepasawene akhala wiira munnidhuwela wiira moopaka etthu ennyoonyinhe ntthu nkina! Masi moolumo a wiira: “Miyo kihoolevelelani” antaphulelani? Niire ntthu munnyoonyinhe nnyu ontthuna olotta wiira atthu aatthikela waataana? Aahiidho ontthuna olotta wiira khantthuna otthikela olotta voohima dha mwaha owo? Olevelela apinaatamu anooniherana awa pooti okhala wooxakiha.
2. Eseeni Biibiliya onlotta iye voohima dha olevelela wa Yehova? (Moone-tho enoota.)
2 Moopora Yehova onaalevelela iye apinaatamu oohimalela ti woovirikana ni olevelela nnooniherana nhu. Olevelela wa Yehova ti wavameekhaaya. Nasaalimu ahilotta olevelela wa Yehova airaka: ‘Nyuwo tinrina olevelela weekhweeli wiira nttittimihiwe.’ a (Esal. 130:4) Moohaakanyera, olevelela wa Yehova ti ‘weekhweeli.’ Owo pahi todhuwele ele entaphulela awa olevelela. Ivaara dhikina, atthu yaamwaatikha Biibiliya yaarumeela noolumo na eHeeberi ettittimiheraka olevelela wa Yehova, nenno nihinrumeeliwa olottiwaka olevelela wa apinaatamu.
3. Olevelela wa Yehova ovirikanne dhai ni olevelela wa apinaatamu? (Yesaya 55:6, 7)
3 Vaavo Yehova oninlevelela iye ntthu, onniliyala moomalela etampi opanke iye. Noomala ntthu owo onnitthikela okhalana waataana wooloka ni Yehova. Olevelela wa Yehova ti wootepa otikiniha ni onnoonihera wiira owo toovaha.—Munsome Yesaya 55:6, 7.
4. Eseeni Yehova onrumeela iye wiira anikhalihere wiiwasasa ele entaphulela awa olevelela?
4 Akhala wiira olevelela wa Yehova ti woovirikana ni wa apinaatamu, nin’ya owerya dhai wiiwasasa olevelela wa Yehova? Yehova onnirumeela itthu ninwerya nhu woona wiira anoonihera moopora owo onlevelela iye. Yoosoma ela, ninawoona itthu dhikina dhinoonihera wiira vaavo nittharuwa nhu Yehova onnikhumiha moomalela itampi dhihu ni moopora onniiriha iye otthikela okhalana waataana wooloka nuuwo. Vaavo nin’ya nhu nithokorerya malikanyiho Biibiliyani onrumeela iye ninawaacerera onxukhurela wihu Tiithi nhu Yehova, yoowo onoonihera onilevelela mwa inamuna dhoovirikana.
YEHOVA ONNIKUMIHA ITAMPI DHIHU
5. Eseeni eniiraneya noomala Yehova onnilevelela itampi dhihu?
5 Ivaara dhawaatta Biibiliya, onnilikanyiha itampi ni nritti woolemela. Mwene Davidi ahilotta voohima dha itampi-dhe airaka: ‘Itampi dhaka dhihuukeleleya vamuru vaka; nkhama nritti woolemela, kihinwerya aka opwesera.’ (Esal. 38:4) Masi Yehova onnilevelela itampi dha ale anttharuwa. (Esal. 25:18; 32:5) Nuulumo na eHeeberi nawi “olevelela” nintaphulela “ovenyiha” aahiidho “otthepa.” Ndho nihaana omoona Yehova nkhama ntthu orina ikuru dhawaatta, onnikhalihera akusa nritti nivikenle nhu arahelela ottaiwene.
“Nyuwo mwaahikilevelela.” (Esal. 32:5)
6. Mpakha vai Yehova onnilevelela iye?
6 Biibiliya onnirumeela nuulumo nikina na nlikanyiho ninoonihera wiira Yehova onnirahelela ottaiwene itampi dhihu. Esalimo 103:12 enlotta wiira: ‘Nkhama dhiidhaale ottaivelanna awa onkhuma ndhuwa ni omputuwela ndhuwa, owo onnipweha itampi dhihu, ottaiwene ni hiyo.’ Mphantta onkhuma ndhuwa woottaivelana ni omputuwela ndhuwa. Mapuro awo oomaili khankumanela. Ni moolumo makina Yehova onnipweha itampi dhihu opuro nihinwerya nhu wuupuwelela. Ndho etthu yoolipiha odhuwela wiira Yehova onninilevelela moomalela!
‘Nkhama dhiidhaale ottaivelanna awa onkhuma ndhuwa ni omputuwela ndhuwa.’ (Esal. 103:12)
7. Eseeni Biibiliya onlotta iye voohima dha ele Yehova oniiriha iye itampi dhihu? (Mikeya 7:18, 19)
7 Akhala wiira Yehova onnipweha itampi dhihu ottaiwene ni hiyo, niire owo onnitthikela wuupuwelela itampi idho? Naari. Mwene Ezekiiya alottaka voohima dha Yehova aatinkhe wiira: ‘Nyuwo moorahelela ottaiwene itampi dhaka.’ (Yes. 38:9, 17) Elo enoonihera wiira Yehova onnikhumiha vamaithoni-ve itampi dha ale anttharuwa ni onniliyala moomalela. Ndho disinaariyu mmodha onlotta wiira moolumo a Ezekiiya pooti otaphuleliwa wiira: “Nyuwo moopaka [itampi dhaka] okapwana nkhama kimpanke etthu.” Nitho Biibiliya onnittittimihera mwaha ola, alottaka etthu ekina yawaattikiwa ya Mikeya 7:18, 19. (Munsome Tradução do Novo Mundo da Bíblia Sagrada.) Yawaatikhiwa ela enlotta wiira Yehova onnikusa itampi dhihu arahelela mapuro awiisa a epahari. Khalai, akhala wiira etthu yaaniputuwela mapuro awiisa a epahari, khiyaawerya ophwanyiwa.
‘Nyuwo moorahelela itampi dhaka dhootheene ottaiwene wa nyuwo.’ (Yes. 38:17)
‘Nyuwo nnoorahelela mapuro awiisa a epahari itampi-dha dhootheene.’ (Mik. 7:19)
8. Eseeni nihundhe nhu mpakha-va?
8 Mpakha-va, noohudha wiira vaavo Yehova onnilevelela iye, onkhala nkhama onnirula nritti woolemela nivikenle nhu dheidho iri itampi dhihu. Woonawene nrina moonelo mmodharu aariiyena Davidi, yoowo alontte wiira: ‘Oohakalala taale aleveleliwe miteko-dha dhootakhala, ni dhiliyaliwe itampi-dha. Oohakalala tuule Yehova ohinkotari iye itampi-dhe.’ (aRoma 4:7, 8) Voohakanyera nno tori olevelela weekhweeli!
YEHOVA ONNUUKUTTHA ITAMPI DHIHU
9. Nlikanyiho seeni Biibiliya onrumeela iye wiira anikhalihere wiiwasasa moopora Yehova onnilevelela iye moomalela?
9 Yehova onnirumeela moolumo a malikanyiho wiira anikhalihere wiiwasasa moopora, nkuttho wawoopola ommaliha awa itampi dha ale anttharuwa. Olotta mooluluwanya, Yehova ori nkhama ntthu onrapiha ni wuukuttha itampi dhihu. Ndho elo enniphwanyiha nreerelo namattheka. (Esal. 51:7; Yes. 4:4; Yer. 33:8) Yehova onnilotta moopora opaka iye elo, airaka: ‘Hata dhoottheka dhinyu dhikhalaka dhoosera nkhama ephome, miyo kinootteliha mpakha olikana ni phaapa; Nnamwi iri dhoophilivila nkhama ekottokhwa, miyo kinooreriha mpakha olikana ni ofu.’ (Yes. 1:18) Khahiyo etthu yookhweya ofula ekuwo ephanre ephome aahiidho ekottokhwa. Tivondho Yehova oorumeela moolumo ala wiira anikhupalihe wiira onnuukutta itampi dhihu moomalela nikaphwana nkhama khanipanke etampi.
‘Hata dhoottheka dhinyu dhikhalaka dhoosera nkhama ephome, miyo kinootteliha mpakha olikana ni phaapa.’ (Yes. 1:18)
10. Nlikanyiho seeni nikina Yehova onrumeela iye wiira oonihere olevelela-we wuulupale?
10 Nkhama noonne nhu yoosoma evinre, itampi iri nkhama ivaale. (Math. 6:12; Luka 11:4) Ndho, ivaara dhootheene ninintthekela nhu Yehova, onlikana ni ompaacera. Voohaakanyera, hiyo khanreere ompaacera vawaatta! Masi vaavo Yehova onnilevelela iye, onlikana ni omaliha evaale, yeelo naareerela nhu oliva meekhinhu. Yehova khannivekela oliverya itampi dhihu dheidho onilevelenle iye. Mweekhweeli nna nlikanyiho noolipiha ninoonihera otaphuwa nimphwanya nhu vaavo Yehova onnilevelela iye!
“Nnilevelele dhoottheka dhihu” (Math. 6:12)
11. Vaavo Biibiliya onlotta iye wiira itampi dhihu ‘dhihuukutthiwa,’ ontaphulelani? (Miteko 3:19)
11 Ohiya pahi omaliha ivaale aahiidho itampi dhihu, Yehova onnuukuttha moomalela. (Nsome Miteko 3:19.) Vaavo ntthu onlevelela iye etthu opaaceriwe iye, owo pooti omphwehavo X opuro aatikhe iye nuumeru na evaale. Hata eri dhiidho, nuumeru na evaale elo khaninhiya wooneya. Masi wuukuttha etthu yoovirikana. Wiira niiwasase saana mwaha ola, nihaana wuupuwelela wiira khalai etinta yaapakiwa erumeeliwaka makhala, ekanyahi ni maadhi. Akhala wiira ntthu aninkhusa esponxa yoonaana aniwerya wuukuttha etthu yaatikhiwe. Ndho vaavo evaale “yuukutthiwa awa,” yaanivenya-vo moomalela. Noomala maleetera yaatikhiwe, khiwerya wooneya. Etthu yoohakalaliha odhuwela wiira Yehova ohiya pahi omaliha itampi dhihu, owo onnuukuttha moomalela!—Esal. 51:9.
‘Wiira Yehova uukutthe itampi dhinyu.’ (Mit. 3:19)
12. Eseeni nintaphulela awa wa hiyo nlikanyiho na neeku nuulupale?
12 Nitho nookhala nlikanyiho nikina Yehova orumeenle iye wiira oonihere moopora owo onuukuttha iye itampi. Owo onlotta wiira: ‘Kinawuukuttha dhootheka dhinyu dhikaphwana nkhama ikhuneeliwe ni neeku, ni itampi dhinyu dhikaphwana nkhama ikhuneeliwe ni neeku nuulupale.’ (Yes. 44:22) Vaavo Yehova onnilevelela iye omphwana nkhama onkhuneela dhoottheka dhihu aahiidho itampi ni neeku nuulupale.
‘Kinawuukuttha dhootheka dhinyu dhikaphwana nkhama ikhuneeliwe ni neeku’ (Yes. 44:22)
13. Vaavo Yehova onlevelela iye itampi dhihu, eseeni ninreerela nhu oxaka?
13 Eseeni ninhudhiha nhu? Vaavo Yehova onnilevelela itampi dhihu, nihaana oxaka oopacera wiivaha nthowa. Oreela wa ephome ya Yeesu Kristu, ivaale dheidho iri itampi dhihu dhinuukutthiwa moomalela. Nitho itampi idho dhinniliyaliwa moomalela. Ndho ela enamuna entaphulela awa olevelela weekhweeli onkhuma wa Yehova, vaavo ninttharuwa nhu opaka itampi.
YEHOVA ONINIIRIHA OTTHIKELA WAATAANA NUUWO
Olevelela wa Tiithi nhu a wiirimu onniniiriha otthikela okhalana waataana wooloka nuuwo (Moone ettima 14)
14. Seeni ennikhupaliha wiira Yehova onninilevelela moomalela? (Moone-tho efootu.)
14 Olevelela weekhweeli onkhuma wa Yehova onniniiriha otthikela okhalana waataana wooreera nuuwo. Ndho elo enninikhalihera oxaka wiivaha mathowa. Tivondho khanintthuneya woova nuupuwelaka wiira Yehova onnipweha mathowa wiira anihukhume nhoolo. Yehova khankhala-khala apakaka elo. Seeni ennikhupaliha wiira elo khenrowa wiiraneya? Yehova aahinleela profeeta Yeremiiya wiira: ‘Miyo kinoolevelela dhoottheka-dha, nkinrowa-tho wuupuwela itampi-dha.’ (Yer. 31:34) Attittimiheraka moolumo ala, nrummwa Paaulu ahirumeela moolumo mamodharu airaka: ‘Nkinrowa-tho wuupuwelela itampi-dha.’ (aHeb. 8:12) Masi moolumo ala antaphulelani?
‘Nkinrowa-tho wuupuwela itampi-dha.’ (Yer. 31:34)
15. Vaavo Yehova onlotta iye wiira khanuupuwela itampi dhihu, ontaphulelani?
15 Mbiibiliyani, noolumo nawi “wuupuwelela” khanintaphulela pahi wuupuwela etthu aahiidho ofikhiri etthu yiiranen’ye khalai. Ohiya-vo, noolumo nno ninhela mpuwa opaka etthu. Mwa ntakihero, nakirime akhomeliwe ni Yeesu aahinvekela airaka: ‘Yeesu, nkuupuwele mwaphiya Moomweneni mwinyu.’ (Luka 23:42, 43) Nakirime ole aavekela Yeesu ompakele etthu. Waakhula wa Yeesu onnoonihera wiira ampaka etthu wiira anhihimuse nakirime ole. Ndho, vaavo Yehova onlotta iye wiira khanuupuwela itampi dhihu, elo entaphulela wiira khankhala-khala anihukhumaka nhoolo mwaha wa itampi onilevelenle iye.
16. Eseeni Biibiliya onlotta iye voohima dha otaphuwa nimphwanya nhu mwaha wa olevelela wa Yehova?
16 Biibiliya onnirumeela nlikanyiho nikina wiira anikhalihere wiiwasasa moopora olevelela weekhweeli omphwanyiha awa otaphuwa. Mwaha wa okhala oohimalela na ‘ipottha dha etampi.’ Masi mwaha wa olevelela wa Yehova ‘nootaphuliwa okhala ipottha dha itampi.’ (aRoma 6:17, 18; Wiis. 1:5) Vaavo nindhuwela nhu wiira Yehova onnilevelela onniniiriha ohakalala vawaatta nkhama ntthu noomala otaphuliwe mweepotthani.
‘Mootaphuliwa okhala ipottha dha etampi.’ (aRoma 6:18)
17. Olevelela wa Yehova onnipenusa dhai? (Yesaya 53:5)
17 Munsome Yesaya 53:5. Nlikanyiho nookhidhera ninnilikanyihiwa ni atthu arina eretta eniipha. Oreela wa nkuttho wawoopola Yehova ovanha iye anrumeelaka Mwane, onninithokorerya okhala atthu apenusiwe. (1 Ped. 2:24) Nkhama dhiidhaale ntthu ori eretta eniipha ohakalala iye noomala openuwa, hiyo ninnihakalala mwaha wa okhalana waataana wooloka ni Yehova ni oleveleliwa itampi dhihu. Masi elo yooweryaneya mwaha yawoopola. Ndho mwaha Yehova onnilevelela, onniwerya waataana nuuwo.
‘Makhwatta-ye tanipenunse’ (Yes. 53:5)
ESEENI ENTAPHULELA AWA WA HIYO OLEVELELA WA YEHOVA?
18. Eseeni annihudhiha awa moolumo a malikanyiho Biibiliya onrumeela iye alottaka voohima dha olevelela wa Yehova? (Moone-tho ekwaaturu eni: “Moopora Yehova Onnilevelela Iye.”)
18 Eseeni annihudhiha awa moolumo a malikanyiho Biibiliya onrumeela iye alottaka voohima dha olevelela wa Yehova? Annihudhiha wiira vaavo Yehova onnilevelela iye, onniliyala moomalela itampi nipanke nhu ni khankhala-khala anihukhumaka nhoolo mwaha wa itampi idho. Ndho elo enniniiriha okhalana waataana wooloka ni Tiithi nhu a wiirimu. Ohiya-vo, nihiliya wiira olevelela weekhweeli ori nkhama yoovaha. Yoovaha elo yooweryaneya mwaha wa opheta ni oreera nrima wuulupale wa Yehova, weiwo onwoonihere iye apinaatamu oottheka. Ndho apinaatamu khaana etireitu yonkhanyerera Yehova waalevelela.—aRoma 3:24.
19. (a) Seeni ninreerela nhu oxukhurela? (aRoma 4:8) (b) Eseeni nin’ya nhu othokorerya yoosoma enttharelana?
19 Munsome aRoma 4:8. Ootheene nihaana oxukhurela vawaatta mwaha wa odhuwela wiira Yehova Muluku ‘onnilevelela veekhweeli’! (Esal. 130:4) Masi wiira owo anilevelele, yookhala etthu yootthuneya ninreerela nhu opaka. Yeesu aahilotta elo airaka: ‘Vaakhala wiira khanaalevelela ala anoothekelani, nitho Tiithi nnyu ori wiirimu khanoolevelelani.’ (Math. 6:14, 15) Moolumo ala, anoonihera wiira tivootthuneya hiyo otakiha olevelela wa Yehova. Masi nin’ya owerya dhai opaka elo? Yoosoma enttharelana, ninoothokorerya mwaha owo.
NCIPO 46 Ninnooxukhuruni Yehova
a Dhawaatikhiwa dha eHeeberi dhinnirumeela noolumo nawi “olevelela”, nenno ninoonihera okhala enamuna emodha ya olevelela weekhweeli, nnamwi ikhanle inamuna dhikina dha olevelela. ABiibiliya ataphuleliwe khaniiwasasiha ovirikana orivo, masi Tradução do Novo Mundo da Bíblia Sagrada, onnoonihera ovirika iwo Esalimo 130:4.
