Okhuma enaahima apaapa ni amma yeettela etiini katoolika, masi noomala ohudha mbiibiliyani wiira ndhina na Muluku ti Yehova, yaahikhala Anamoona a Yehova oluttuweliwa. Okhala wiira apaapa yaari kalapinteeru, yahihiya opattha ilatarato dha Yeesu ni yaahipacera orumeela odhuwela-wa mwa enamuna ekina. Awo yaahiiriha mphantta emodha wa empa nhu okhala Empa ya Omwene yoopacera ya oSan Juan del Monte, waattamela oManila, ekapitaale ya oFilipina.

Noomala oyariwa mwaakha wa 1952, anaan’yari aka yaahipacera okihudhiha voohima dha Yehova, miyo ni adhuulupala aka asese vamodha ni arokoraka araru. Vaavo kannuwaaka apaapa yaanisoma vamodha ni miyo iliivuru dhihu ni yaanikitumererya osoma ekapiitulu emodha ya mbiibiliyani khuta nihiku. Ivaara dhikina, apaapa yanalaleya asitokweene a esirkwiitu ni mabeteliita wiira ere owaani wiira nice vamodha. Wiiwa dhawiiraneya dha mweekumini-mwa dhaaninihakalaliha vawaatta ni dhaanilipiha emudhi nhu. Ndho elo yaahiniiriha oluttuweliwa ovara nteko woolaleerya yoowo ori etthu yootepa otthuneya mweekumini mwihu.

Anaan’yari aka aakivaha ntakihero nooreera na waamini. Mwaakha wa 1971, noomala amma opacera owereiwa ni okhwa, miyo ni apaapa naahipacera orumeela nkhama mapiyoneeru. Moottharelana mwaakha wa 1973, vaavo kaarakana iyaakha 20 apaapa yaahuukhwa. Okhweliwa anaan’yari aka waakiiriha oriipiha nrima vawaatta ni okiphwanya omeekha. Masi nlipelelo na mbiibiliyani ‘ninnikhalihera okhala oolipa’, nno naari nkhama nankura aakikhalihenre ohihiya okhala oolipa nkhalelo wa mmuupuweloni ni wa omunepani. (aHeb. 6:19) Noovira okathi vakhaani apaapa ekhwiye, kahithanleliwa okhala piyoneeru avameekhaaya elika yoottaivela ya oCoron elapo ya oPalawan.

Noomala ophiya elika ya oCoron karina iyaakha 21. Okhala wiira kahuiwale ositati, kahixanka noomala woona wiira elika ele khiyaariwo enerxiiya ni maadhi ooreerela owurya. Nitho khidhaariwo ikaaro ni miyoota dhawaatta. Ekhweeli wiira elika ele yaahikhalawo anna awaatta, masi khaariwo piyoneeru nkina wiira kikakhumana nteko woolalerya, ndho mwaha wa elo ivaara dhawaatta kaarowa meekhaaka nteko woolalerya. Mweeri woopacera kaaphin’ya aka yahikinkhela  amudhi aka vamodha na axirikha aka. Ohiyu, vaavo kaalipela aka wiirimu, kaaninla vawaatta. Miyo kahanle vakhaani ohiya yoothanleliwa aka ni otthikela owaani.

Okathi wootheene kaidhoonaka okhala meekhaaka, kaanintthukulela nrima aka Yehova. Miyo kaneehererya wuupuwelela itthu kaatanke aka osoma mbiibiliyani ni iliivuru dhihu. Ndho okathi wootheene kaanuupuwela Esalimo 19:14. Miyo kanidhuwela wiira akhala wiira kamuupuwelela itthu inindhivela Yehova, nkhama moopora ompaka iye itthu ni mikhalelo-dhe, owo ankhala ‘mwaako aka ni moopoli aka’. Yoosoma ya Wiikocela yaarina muru oni: “Nyuwo Khamukhanle Mekhinnyu” a yookikhalihera vawaatta, okhala wiira nkireere osoma ivaara dhawaatta. Okathi kaakhala aka meekhaaka, kanoona wiira Yehova ari ni miyo ni owo waakhala okathi wooreerela wiira kivekele, osoma ni wuupuwelela.

Ndho nooviri okathi kiri oCoron, kahithanliwa wiira kikhale ntokweene. Okhala wiira muloko ole ntokweene kaari meekhaaka, ndho khuta esumana kanihoolela Nthukumano wa Eriyari ya Esumana, Nthukumano wa Nteko Woolaleerya, Yoosoma ya Biibiliya ya Muloko ni Yoosoma ya Wiikocela. Nitho isumana dhootheene kanipaka mwaha, ndho mwaha elo, nkakhalana okathi wa wuupuwela wiira kaari meekhaaka!

Nteko aka woolaleerya oCoron wanikhumela saana, anaskolaka akina a Biibiliya yahipatisiwa. Ohiya pahi ophwanya mareeliho, kanikhalana mixankiho. Ivaara dhikina kahaana weetta ohiihiyu wootheene wiira kiphiye nttetthe kalaleeryaka, kihidhuwela aka vatthu kaaya aka orupavo kaphiya. Nttetthe walaleeriwa ni muloko wahela mpuwa ilika dhawaatta ikhaani. Ivaara dhikina kaaneetta ni exaata mpahari wawaattamo meepi wiira kiphiye opuro owo, hata kahadhuwela orapelela! Yehova khahin’ye okikhapelela ni okikhalihera okathi ole wooxankiha. Noovira okathi, kahoona wiira Yehova ankihudhiha wiira kiwerye ovilela mixankiho dhaaya okikhumelela dhoothanleliwa dha nhoolo.

Mwaakha wa 1978, kaahithanleliwa orowa okhalihera oPapua Nova Guiné, onoorti wAustrália. OPapua-Nova Guiné elapo yawaatta miyaako ni wuunuwa-wa emphwana ni wEspanha. Ndho kahihakalala odhuwela wiira atthu amphiyera imilyawu tthaaru a elapo ele annilotta ilottelo 800. Masi moohakalaliha atthu awaatta a nttetthe ole anlotta elottelo eniitthaniwa Tok Pisin.

Woopacerani kahithanliwa okhalihera muloko wa Enkelexi ekapitaali ya oPort Moresby. Noomala kaahithamela muloko waalottiwa Tok Pisin, kipacera ohudha elottelo ele. Ndho kanirumeela moolumo kahudhihiwa aka nteko woolaleerya. Elo yahikiiriha ohudhera elottelo ele mwawaakuveya. Noovira okathi vakhaani, kaaniwerya olotta mwaha wa atthu ootheene ni elottelo Tok Pisin. Muupuwele moopora kahakalanlaka noomala ophiya oPapua-Nova Guiné, ohimanle mwaakha mmodha kaahithaliwa wiira kikhale ntokweene a esirkwiitu a miloko dha Tok Pisin ni mittetthe dhikina dha elapo ele.

Ndho okhala wiira miloko dhahittaivelana, miyo kanitthuneya wakocihera asembeleiya awaatta a esirkwiitu ni opaka mikwaha. Woopacerani, miyo kaniidhoona okhala meekhaaka mwaha wa okhala elapo epheya, elottelo epheya ni yoolema epheya. Mwaha wa elapo ele waatta miyaako, ikhuruwela ni iwelela, nkawerya orowa osekurya miloko ni ekaaro. Ndho mwaha wa elo, kaaneetta mikwaha khuta esumana kinrumeelaka eviyaawu. Ivaara dhikina aviyawu kanwelaka yaakhala akhaani ni kiyaakhalana makhalelo ooreera, ndho pasaxeru kaakhala meekhaaka. Nitho  okathi keettaka mikwaha kirumeelaka ekalawa aahiidho eviyawu kanixanka vawaatta.

Okhala wiira atthu yaarina telefooni yaari vakhaani, karumeela iwarakha wiira kaleelele anna esumana muloko-ya waaya awa osekuriwa. Masi ivaara dhawaatta miyo kaniphiya iwarakha kannyereraka dhihinaphiye, ndho kanikoherya wiira kidhuwele mapuro yakhala anna. Vaavo kaaphwanya aka anna, awo yanikakhela ni nrima wootheene. Oxukhuru ni opheta anna awo yoonihera awa, wanikuupusera etthu yaakiirinhe wiilipihera wiira kiphiye opuro ole. Waataana waka ni Yehova waahilipa vawaatta ni kahoona wiira Yehova aanikikhalihera ivaara dhawaatta mwa inamuna dhoovirikana.

Ekwaha yoopacera kapankaaka nthukumano elika ya oBougainville, anamathelana amodha yahikaattamela etheyaka ekakikoha wiira: “Niire munninuupuwela?” Noomala kahuupuwela wiira kiphiyakaru oPort Moresby kataka waalaleerya anamatthelana ale. Miyo kinnupuwela wiira kaahipacera waasomiha Biibiliya anamathela ale ni okathi kaakhumaka kaahinhiyera munna aakhala opuro ole. Ndho nenna-va awo apatisiwa! Ala mareeliho kaaphwannyaka mpuwa wa miyaakha miraru karumeela aka oPapua-Nova Guiné.

Kihinatthi othamela oCoron mwaakha wa 1978, miyo kaahindhuwela nrokora aaitthaniwa Adel yoowo ari ooreera ni oluttuweliwa. Ndho owo aahikhalana anaahima aili, Samuel ni Shirley ni arumeela nkhama piyoneera ookilaatheya. Ohiya-vo, anaakhapelela amaamaye awuuluvala. Mweeri wa Maio wa mwaakha wa 1981, kahitthikela oFilipiina ni kahithelana ni Adel. Noomala othelana, naahipacera okhapelela emudhi nhu vamodha nirumeelaka nkhama mapiyoneeru ookilatheya.

Nnaamwi kakhapelela emudhi, mwaakha wa 1983, kaahithikela okhala piyoneeru avameekhaaya ni kaahithanleliwa orumeela elika ya oLinapacan elapo ya oPalawan. Emudhi aka yootheene yaahakhulela othamela elika ele yoottaivela hata yahaariwo anna. Noovira mwaakha mmodha, amaamaye Adel yaahuukhwa. Etthu yanikhalihenre wiira niwerye ovilela nxankiho ole wa okhweliwa waari oluttuweliwa ni nteko woolaleerya. Naahikhalana dhoosoma dha Biibiliya dhawaatta elika ele dhaaya vahoolo ni noovira okathi vakhaani yaanitthuneya otekiwa Empa ya Omwene. Ndho hiyo naahiteka Empa ya Omwene ekhaani. Naahihakalala noomala woona wiira hata dhaavinre iyaakha tthaaru niphiye opuro ole, atthu 110 yaahireela nthukumano wa Wuupuwelela ni noovira okathi vakhaani akina yaahirowa vahoolo mpakha opatisiwa.

Mwaakha 1986, kahithanleliwa orowa okhalihera elika ya oCulion, elika ele waahikhala nttetthe mmodha yaakhala awa atthu yaarina maretta. Okathi mmodharu yoowo, Adel aahithanliwa okhala piyoneera avameekhaaya. Woopacerani, hiyo nanoova waalaleerya atthu yaarina maretta. Masi anamalaleerya a nttetthe ole yaahinileela wiira anamaretta ootheene yahivahiwa nrette wiira ehikaaraviha atthu akina. Anamaretta akina yaahipacera owoona mithukumano owannye nrokora mmodha. Noovira okathi vakhaani, hiyo naahikhala otaphuwa waalaleerya. Ndho okhala wiira atthu ale yoona wiira yahinyanyaliwa ni Muluku vamodha ni atthu a nttetthe ole, yaari etthu yoohakalaliha olotta naawo voohima dha nlipelelo na mbiibiliyani. Naahihakalala woona moopora yaahitteeliwa awa nrima vawaatta noomala odhuwela  wiira nhoolo anookhalana ekumi yooreera ni yoomalela.—Luka 5:12, 13.

Eseeni yaakhalihenre aniihu olimalela makhalelo mapheya a ekumi oCulion? Miyo ni Adel, nahakusa arokora aili a oCoron wiira ekakhala ni hiyo oCulion. Ndho elo yaahakhalihera vawaatta aniihu okhalana axirikha ooreera. Samuel, Shirley, vamodha ni arokora ale aili yaahihakalala vawaatta waakhalihera atthu ohudha ekhweeli. Awo yaasomiha anaahima Biibiliya miyo ni Adel naasomiha anaan’yari-ya. Waahikhala okathi naapakiha nhu dhoosomiha dha Biibiliya ittheko 11. Noovira okathi vakhaani, naahikhalana dhoosoma dha Biibiliya dhawaata dharowa vahoolo, ndho elo yaahiiriha opakiwa muloko nkina.

Woopacerani okhala wiira ntokweene kaari meekhaaka nttetthe ole. Anna a oBeteeli yaahikivekela ohoolela mithukumano khuta esumana ekhurupu emodha ya anna 8 yaari elapo ya oCulion. Noomala kaaneetta iwoora 3 ni barkhu wiira kapake mithukumano imodharu ekhurupu ya anna 9 yaakhala nttetthe oniitthaniwa Marily. Ohiya-vo, emudhi aka yaaniviriha iwoora dhawaatta yeettaka mapuro amiyaako wiira yapakihe dhoosoma dha Biibiliya nttetthe nkina waaitthaniwa Halsey.

Noovira okathi, naahiwoona atthu awaatta ehudhaka ekhweeli oMarily ni oHalsey, ndho elo yaahiniiriha oteka Mampa a Omwene maili opuro ole. Nkhama yairanen’ya awa oLinapacan, anna ni atthu yarowa vahoolo yaahiivahererya wiira etekiwe Mampa awo a Omwene ni yaahikhalihera mwa enamuna ekina avahaka mireero-dha. Empa ya Omwene ya oMarily yaahinnuwa ni yaaniwerya oyamo atthu yaaxira 200. Ndho vaaniweryaneya orumeeliwa wiira apakiwe asembeleiya.

Mwaakha wa 1993 noomala aniihu wunnuwa, miyo vamodha Adel naahithanleliwa okhala asitokweene esirkwiitu elapo ya oFilipina. Noomala mwaakha wa 2000, kaahirowela Eskola Yanamalaleerya a Omwene ni kaahithanliwa okhala namahudhiha a eskola ele. Miyo nkaidhoona wiira kaaniphwanelela yoothanleliwa ele, masi Adel anikilipiha vawaatta. Owo aanikileela wiira Yehova ankivaha ikuru kanramelaka wiira kiwerye okhapelela yoothanleliwa aka epheya. (aFil. 4:13) Nitho Adel aanidhuwela wiira Yehova ampaka elo okhala wiira hata aviriha nxankiho woowereiwa khahin’ye waakhwanihera yoothanleliwa-ye.

Mwaakha wa 2006 vaavo karumeelaka nkhama nhudhihi a eskola ele, naahiriipiwa nrima vaavo naadhuwenle nhu wiira Adel ahiphwanyiwana eretta  eniitthaniwa Parkinson. Ndho okathi kanleelaka wiira kanhiya yoothanleliwaka wiira kinkhapelele, Adel aahikileela wiira: “Munkoce meetiku on’ya owerya okikhalihera eretta ela, miyo kinnidhuwela wiira Yehova onoonikhalihera wiira nihihiye waakhwanihera yoothanleliwa nhu.” Iyaakha 6 dhaattharelana Adel khahin’ye opaka itthu dhootheene awerya iye wiira anrumeele Yehova aahiidhinlelaka. Okathi amwaaraka yaapacenra awa ohiwerya weetta awo yaanilaleerya ekilanthi vakhaterani ya maroota. Ndho okathi yaahawerya awa olotta saana, awo yaanikomentari omithukumanoni erumeelaka moolumo maili aahiidho nimodha. Anna ni arokora yaanimunviyarela mensaaxe Adel yooniheraka wiira yaanivaha efaita ntakihero na ovilela oonihenre iye. Wookhidherani mwaakha 2013 aahuukhwa! Miyo kinnuupuwela wiira Adel aari nthiyana ororomeleya ni opheta mwa iyaakha dhinxira 30. Masi noomala okhwa kaahiriipiha nrima vawaatta ni otthikela okiphwanya omeekha.

Ahinatthi Adel okhwa okathi wootheene aanikitumererya waakhwanihera yoothanleliwa aka. Ndho elo ti etthu kipanka aka, ohihiya oluttuweliwa ovara nteko wa Yehova wookikhalihera ohitepasa wiidhoona okhala meekhaaka. Mwaakha wa 2014 mpakha 2017, kaahithanliwa wiira kikasekurya miloko dha elottelo Tagalo elapo yeelo nteko nhu woolaleerya onkhoottihiwa awa. Noomala kaahisekurya miloko dha eTagalo oTaiwan, wEstados Unido ni oCanadá. Mwaakha wa 2019 kahikhalana eparakha ya okhala nhudhihi a Eskola ya Anamalaleerya a Omwene elottelo ya Enkelexi elapo ya wÍndia ni oTailândia. Dhoothanleliwa dhootheene kaakhenlaka dhookiiriha ophwanya otteeliwa nrima. Kiyaavo etthu entepa okihakalaliha oxira oluttuweliwa ovara nteko wa Yehova.

Khuta yoothanleliwa kinaakhela aka, kinnitepa waapheta anna ni arokora, ndho noomala waakhela yoothanleliwa epheya khonkhweya waalaiha. Masi dhoothanleliwa dhootheene, koohudha onroromela Yehova ni nrima wootheene. Okathi wootheene kinnoona wiira Yehova onnikikhapelela. Ndho elo ennikikhalihera waakhulela marukunuso ootheene ankhumelela mweekumini mwaka. Nenna-va kinrumeela nkhama piyoneeru avameekhaaya elapo ya oFilipina. Miyo kinnihakalala ni muloko aka wa naanano, okhala wiira owo ori nkhama emudhi enkikhalihera ni enkikhapelela. Miyo kinnihakalala vawaatta omoona Samuel vamodha Shirley etakihaka waamini wa amaamaya.—3 Yoh. 4.

Miyo kooviriha mixankiho dhawaatta mweekumini mwaka, ohela mpuwa owoona amwaaraka ewereiwaka eretta yuulupale mpakha okhwa. Mwa itthu dhootheene, miyo kaahaana olimalela makhalelo mapheya. Ndho kihoona wiira Yehova ‘ori vakhiviru wa khuta mmodha a hiyo.’ (Mit. 17:27) Ntata na Yehova ‘kahi nookhuveya’ wiira naakhalihera ni naakhapelela arumeyi-ye hata ekhalaka mapuro ottaivela. (Yes. 59:1) Yehova mwaako aka, owo ari ni miyo ni onookhala ni miyo ekumi aka yootheene ndho kinninxukhurela vawaatta. Tthiri kinnikhupali ni nrima wootheene wiira nkitanke okhala meekhaaka.