NIIRE waataka woophwanyani nxankiho waawiirinheni woona wiira nri meekhinnyu? Hiyo ninkhala okathi ‘makhalelo araawa ooxankiha ni awoopiha’, ndho elo pooti oniiriha oriipiwa nrima ni woona wiira niri meekhinhu. (2 Tim. 3:1) Masi okathi dhinniphwanya awa mixankiho aakhala atthu akhanle onikhalihera. Biibiliya onlotta wiira axirikha eekhweeli tootepa otthuneya “okathi wa mixankiho.”—Mir. 17:17.

Nrummwa Paaulu aahikhaliheriwa ni axirikha-ye yaawo yaanhoola okathi eetta iye mikwaha avaraka nteko wa omisiyonaariyu. (aKol. 4:7-11) Okathi Paaulu aatthukeliwe iye oRooma, axirikha-ye yaahinkhalihera epakaka itthu ahaarowa iye owerya meekhe. Mwa ntakihero, Epafrodiitu aahinrohela Paaulu itthu dhanthowa dheidho dhannyereriwe ni anna a oFilipi. (Fil. 4:18) Nitho Tiikiku aahiroiha iwarakha dha nrummwa Paaulu miloko dhawaatta. (aKol. 4:7) Ndho akhaliheriwaka ni axirikha-ye, Paaulu ahiwerya olipiha miloko dhawaata hata okathi ahaakhuleliwa iye okhuma owaani ni aatthukeliwe iye nkateya. Ankhi nyuwo olelo-va, mun’ya owerya dhai okhala nxirikha eekhweeli?

Olelo-va aakhala matakihero awaatta anna ni arokora anoonihera wiira okhala nxirikha eekhweeli etthu yootepa ootthuneya. Mwa ntakihero, nrokora mmodha aahimoonihera okhala nxirikha eekhweeli piyoneera mmodha ookilatheya oniitthaniwa Elisabete onkhala wEspanha. Noomala amamaye Elisabete ophwanyiwano eretta ya kanseri awoopiha, nrokora ole aanimunviyarela Elisabete mensaaxe oolipiha yaarina dhawaatikhiwa dha mbiibiliyani. Elisabete onlotta wiira: “Okathi miyo koonaka mensaaxe-ye, kanihakalala vawaatta mwaha woodhuwela wiira ookhala ntthu onkuupuwela, ndho elo yaanikivaha khuta nihiku ikuru wiira kivielele.”—Mir. 18:24.

Ninoowerya olipiha oxirikha wihu na anna ni arokora naakhaliheraka orowela onthukumano ni nteko woolaleerya. Mwa ntakihero, niire nnoowerya onvaha puleya munna awuuluvala aahiidho nrokora okathi mun’ya nnyu onthukumanoni ni nteko woolaleerya? Mwapaka elo, noowerya waalipiha atthu akina ni olipihiwa. (aRoma 1:12) Masi anna ni arokora akina khanwerya okhuma owaani. Ndho eseeni munreerela nnyu opaka wiira moonihere okhala nxirikha eekhweeli?

Anna akina khanwerya orowela mithukumano Empa ya Omwene mwaha wa owereiwa ni mixankiho dhikina. Moone ntakihero na David, owo aahiphwanyiwana eretta ya kanseri. Noomala owo ahiviriha miyeeri 6 ampakaka quimioterapia. Okathi owo, David vamodha ni mwaariye Lidia yaanoona mithukumano eri owaani.

 Eseeni yaapanka awa anna mmulokoni? Noomala mithukumano, anna yaaninlikarela Davi vamodha ni Lidia enrumeelaka vídeo chamada wiira evaanele naawo. Ohiya-vo, okathi David ni Lidia yaakomentara awa onthukumanoni, anna yanniwinviyarela mensaaxe oolipiha. Ndho elo yaakhalihenre dhai? Elo yaanimwiiriha David ni Lidia woona wiira aaniphetiwa ni otepa okhala vakiviru ni anna.

Nnoonela dhai ompaka palanu wiira nlaleerya vamodha ni munna aahiidho nrokora ohinwerya okhuma owaani? Akhala wiira ninoopaka marukunuso vakhaani wiira nilaleerye vamodha naawo, elo enoowiiriha woona wiira khaliyaliwe. (Mir. 3:27) Nnoonela dhai opaka eprokaarama wiira nlaleerye vamodha naawo mwaatikhaka iwarakha aahiidho munrumeelaka telefooni? Asitokweene ahaana opaka mareheryo wiira anna ahinwerya okhuma owaani ewerye woona nthukumano wa nteko woolaleerya arumeeliwaka viidiyukofereensiya. David ni Lidia annixukhurela mwaha wa nikhalihero na mmulokoni. David onlotta wiira: “Mwaha wa oweryaneya okhala vamodha ni ekhurupu nhu okathi wa nthukumano wa nteko woolaleerya ni owiriyana mavekelo, yaaninilipiha vawaatta.” Ohiya-vo, akhala wiira onniweryaneya pooti onkusa naskola nnyu a Biibiliya wiira mwansomihe ettheko ya namalaleerya ohinwerya okhuma owaani.

Vaavo ninvara nhu ni anna ahinwerya okhuma owaani, ninniwerya woona mikhalelo-dha dhooreera ni ninnilipiha waataana wihu naawo. Mwa ntakihero, nyuwo onawoodhivelani woona moopora awo aninrumeela awa Biibiliya wiira ephare mirima dha atthu. Ndho akhala wiira nnawaakhalihera anna owo woona mithukumano ni olaleerya, nnoowerya waapaka axirikha apheya.—2 aKor. 6:13.

Okathi Paaulu aaviriha iye mixankiho, nxirikha-ye Tiitu aahinsekurya, ndho elo yaahinlipiha. (2 aKor. 7:5-7) Ekhweeli wiira etthu yooreera waaleela moolumo oolipiha anna ni arokora. Masi ntakihero na Tiitu niinnoonihera wiira ninoowerya waalipiha anna ni arokora nivirihaka okathi naawo ni nipakaka itthu wiira naakhalihere.—1 Yoh. 3:18.

Anna ni arokora a oRússia annoonihera ntakihero nooreera na okhaliherana nkina ni nkhwe. Moone yawiiraneya ya Sergey ni mwaariye, Tatyana. Noomala mapolisiya okukurya empa-ya, yaahaakusa wiira yakohakohiwe. Ndho Tatyana aahitaphuliwa atthikela owaani meekhe. Sergey onlotta wiira: “Noomala owo ophiya owaani, nrokora mmodha aahuura onsekurya. Nitho anna ni arokora awaatta yaahuura onikhalihera ovela ni okocihera empa nhu.”

Sergey onlotta wiira: “Miyo okidhivela Miruku 17:17, owo onlotta wiira: ‘Nxirikha eekhweeli toopheta okathi wootheene nitho onnikhala munna okathi wooxankiha.’ Moolumo ela kihoona yiiraneyaka mweekumini mwaka, okathi woottharatthariwa kihoona moopora axirikha aka akikhalihera awa. Yehova ookivaha axirikha ahinoova okikhalihera okathi wooxankiha.” a

Okathi dhinniphwanya awa mixankiho, ninnilipelela okhaliheriwa ni axirikha nhu. Nitho okathi wa maxakha muulupale ninootepa otthuna okhaliheriwa ni axirikha nhu. Tivondho ola okathi ninreerela nhu ootheene nhu wiilipihera wiira nikhale axirikha eekhweeli!—1 Ped. 4:7, 8.