YOOSOMA YA MWAHA 8
NCIPO 130 Nilevelelaneke
Mun’ya Owerya Dhai Otakiha Olevelela wa Yehova?
“Ntoko Yehova oolevelenlaaweni, ni nyuwo-tho mwiireke siiso.”—AKOL. 3:13.
ETTHU NIN’YA NHU OHUDHA
Yoosoma ela, nin’ya woona etthu ninreerela nhu opaka wiira naalevelele ale aninyoonyihe.
1-2. (a) Okathi seeni woonawene okhanle woolipa onlevelela ntthu? (b) Eseeni Denise aapanke iye?
NIIRE onnooliperyani olevelela? Atthu awaatta onnaaliperya opaka elo, saasaasa okathi anyoonyihiwa awa. Masi wiira nikhale oolevelela nihaana opaka etthu wiira nihipwehe mathowa ni okhala awaakuva olevelela. Mwa ntakihero, moone etthu yaankhumelenle nrokora oniitthaniwa Denise. a Owo aahoonihera olevelela wuulupale. Mwaakha wa 2017, Denise ni emudhi-ye yaahirowa osekurya Eseeti ya Olumwinku Wootheene ya Anamoona a Yehova, yeelo yaamalaru otthukuleliwa. Okathi yaatthikela awa owaani, motoriista mmodha ahihiya etiresawu-ye amana ekaaro awenle Denise vamodha ni emudhi-ye. Noomala aahikhumelela asitenti Denise aatismayari. Okathi ahihimunwe iye, aahoona wiira ane yahivulala vawaatta ni amamune Brian, yaahuukhwa. Uupuwelelaka etthu yaakhumelenle, Denise onlotta wiira: “Miyo kaahiriipiwa nrima vawaatta ni oxanka.” Noomala, owo aahoona wiira motoriista ole khaahapaliwe nnakhala khaaciye mirette dhoohapala dhaakhanle omwiiriha ompaka asitenti ole. Ndho Denise aahinvekela Yehova wiira anvahe nrettele.
2 Motoriista ole aahileeliwa wiira akhala wiira amphwanyiwana nlattu mwaha wa omwiipha ntthu ni asitenti, otthukeliwa nkateya. Masi mpuki aahinleela Denise wiira olamuliwa wa nlopwana ole waalipa ni itthu an’ya iye olotta okathi waaya awa ophukiwa mwaha ole. Denise onlotta wiira: “Miyo kaahoona owereya nkhama kaaheliwe maakha awaatta vanikhwattani, okhala wiira kaanireerela olotta itthu dhootheene dhaakikhumelele mweekumini mwaka.” Noomala isumana vakhaani akhumelenle asitenti ole, Denise vamodha ni nlopwana ole yaahirowa otribunaali, ndho Denise aahipacera olotta mixankiho dhootheene nlopwana ole akhumihenre iye emudhi-ye. Eseeni yaairanen’ye moottharelana? Denise aahinvekela mphuki wiira anlevelele nlopwana ole. b Okathi Denise amalinhe iye olotta, mphuki ole aahipacera wunla. Mphuki owo aahilotta wiira: “Miyo kamphuki mwa iyaakha 25, masi nkinoone emudhi ekhumiheriwe mixankiho evekelaka wiira aleveleliwa ntthu aakhumihenre mixankiho. Miyo nkitanke wiiwa moolumo a wiira opheta ni olevelela.”
3. Eseeni yaankhalihenre Denise onlevelela nlopwana ole?
3 Eseeni yaankhalihenre Denise onlevelela nlopwana ole? Owo ahuupuwela olevelela wa Yehova. (Mik. 7:18) Vaavo ninoonihera nhu oxukhurela moopora Yehova onnilevelela iye, elo enoonitumererya waalevelela atthu akina.
4. Eseeni Yehova onlipelela iye wiira nipaka? (aEefeso 4:32)
4 Yehova ontthuna wiira naalevelela atthu akina, nkhama dhiidhaale onnilevelela iye. (Munsome aEefeso 4:32.) Owo onlipelela wiira nikhale oolikaneene wiira naalevelela ale anninyoonyiha. (Esal. 86:5; Luka 17:4) Yoosoma ela, nin’ya woona itthu tthaaru ninreerela nhu opaka wiira nitepe okhala atthu oolevelela.
NXAKE WIIPITHIHA MIYUUPUWELO DHINYU
5. Moovarihana ni Miruku 12:18, ninoonela dhai vaavo ntthu onniirela iye aahiidho onnilottela iye etthu enniwereya?
5 Hiyo ninniriipiwa nrima vawaatta vaavo ntthu onniirela iye aahiidho olotta etthu enniwereya, elo ennitepa owereya saasaasa akhala wiira ntthu olontte aahiidho opanke etthu elo nxirikha nhu muulupale aahiidho mmudhi nhu. (Esal. 55:12-14) Ivaara dhikina, pooti woona owereya mmuupuwelo nikaphwana nkhama nihommwe ni mwaalo. (Nsome Miruku 12:18.) Woonawene hiyo pooti wiipithiha wiira khekhumelenle etthu aahiidho opaka itthu wiira nihoonihere wiira yookhala etthu eniweren’ye. Masi opaka elo, onlikana ni ohommwa ni mwaalo noomala nikeetta ni mwaalo owo nihixomonle vanikhwattani. Mwa enamuna emodharu, nihilipelela wiira oriipiwa wihu nrima onoomala meekhaya niipithihaka olotta wiira yookhala etthu ekhumelenle.
6. Eseeni woonawene nimpaka nhu vaavo ntthu ompaka iye etthu enniwereya?
6 Vaavo ntthu ompaka iye etthu eniweren’ya, woonawene etthu yoopacera nimpaka nhu onkhala onanariwa. Biibiliya onnoonihera wiira ivaara dhikina kahi etthu yootakhala onanariwa vaavo ntthu nkina onniirela iye etthu eninananre, masi-tho onninilopola wiira nihihiye onanariwa oniweryaka. (Esal. 4:4; aEefe. 4:26) Mwaha wa seeni? Okhala wiira miyuupuwelo dhihu pooti oniiriha opaka etthu. Ndho elo pooti onikhumihera mixankiho. (Yak. 1:20) Muupuwele ela: Ootheene nhu ninninanariwa, masi wuumelela onanariwa enkhala yoothanla.
Ootheene nhu ninninanariwa, masi wuumelela onanariwa enkhala yoothanla
7. Miyuupuwelo seeni dhikhanle okhumelela vaavo ntthu onninyoonyiha iye?
7 Okathi ninthokorera nhu vootakhala, pooti opacera okhalana miyuupuwelo dhoohiloka. Mwa ntakihero, nrokora mmodha oniitthaniwa Ann onlotta wiira: “Okathi kaaraka mwaana, apaapa yaahahiya amma, enthela makayaaya aka. Ndho miyo kahoona wiira kahinyanyaliwa. Noomala awo waayara anamwane, kaahipacera wuupuwela wiira anaahima ale yaahikaakha opuro aka. Miyo kinnunwe kidhoonaka okhala ntthu ohinthokoreriwa.” Nrokora mmodha oniitthaniwa Georgette onnilotta moopora oonenle iye noomala amamune onraruwela. Owo onlotta wiira: “Hiyo naari axirikha okhuma enaahima nhu. Naarumeela vamodha nkhama mapiyoneeru! Miyo kahoona owereya vawaatta.” Nrokora mmodha oniitthaniwa Naomi onlotta wiira: “Miyo nkitanke wuupuwela wiira amamunaka yaankinyoonyiha. Masi noomala nihiku nimodha okileela wiira yaataka woona epornokarafiiya ehikileela, nkaakhupanli ni kaahiriipiwa nrima vawaatta.”
8. (a) Mathowa seeni anniiriha olevelela? (b) Mireerelo seeni nimphwanya nhu vaavo ninkhala atthu oolevelela? (Moone ekwaaturu eni: “ Eseeni Ninreerela nhu Opaka Akhala Wiira Okhala Ntthu Oninyoonyihe?”)
8 Hiyo khaninwerya wawateeriha atthu akina onilottela aahiidho onipakela etthu en’ya oniweereya, masi ninoowerya okhapelela muupuwelo nhu. Ivaara dhawaatta etthu ninreerela nhu opaka ori olevelela. Mwaha wa seeni? Okhala wiira ninnimpheta Yehova, owo ontthuna wiira nikhale atthu oolevelela. Masi akhala wiira ninawuumelela onanariwa ni nihikatthuna olevelela, elo pooti oniiriha opaka dhoothanla dhoohiloka ni onikhumihera mixankiho mweekumini mwihu. (Mir. 14:17, 29, 30) Moone ntakihero na nrokora mmodha oniitthaniwa Christine. Owo onlotta wiira: “Okathi kinnanariwaka aahiidho onyoonyiheya, nkinwerya otheya, oca saana, orupa ni onnikiliperya okhapelela miyuupuwelo dhaka. Ndho elo ennihonona ekasamentu aka ni waataana waka ni atthu akina.”
9. Seeni ninreerela nhu oxaka opweha mathowa?
9 Hata ntthu onipakenle etthu eniweren’ye ahinivekelaka nswammaha, nihaana opaka etthu wiira nimalihe nxankiho owo. Nin’ya owerya dhai opaka elo? Georgette, yoowo ninlontte nhu ottuli onlotta wiira: “Khiwaakhwen’ye, masi noovira okathi kaahipacera oliyala mixankiho dhootheene dhaakhumelenle ni kahiphwanya nrettele muulupale.” Vaavo ninlevelela nhu ni oliyala etthu niireliwe nhu, ninnixaka opweha mathowa yaawo yaaya oniiriha oriipiwa nrima. Ohipweha mathowa eri nkhama etthu ninivaha nhu, vaavo ninkhala nhu oolevelela ninnitthikela okhalana ekumi yoohakalaliha. (Mir. 11:17) Ankhi akhala wiira nyuwo onnooliperyani olevelela?
MOOPORA WOOMALIHA MIYUUPUWELO DHINYU
10. Seeni oraawa vootthuneya wiivaha okathi wiira nivole mmuupuweloni? (Moone-tho efootu.)
10 Eseeni munreerela nnyu opaka wiira nxake oriipiwa nrima mwaha wa etthu mwiireliwe nnyu? Vaavo ntthu onvulala iye nikhwatta nuulupale onnivira okathi wawaatta wiira nikhwatta nno nivole. Mwa enamuna emodha, onnivira okathi wiira nivole nkhalelo wa mmuupuweloni wiira niwerye onlevelela ntthu onipakenle etthu eniweren’ye.—Mus. 3:3; 1 Ped. 1:22.
Vaavo ninvulala nhu, nintthuneya okhapeleliwa ni onnivira okathi wiira nivole. Mwa enamuna emodharu eniiraneya ni nkhalelo wa mmuupuweloni (Moone ettima 10)
11. Ovekela on’ya wookhaliherani dhai okhala ntthu oolevelela?
11 Munvekele Yehova wiira ookhalihereni okhala ntthu oolevelela. c Ann, yoowo ninlontte nhu ottuli, onnilotta moopora ovekela waankhalihenra awa. Owo onlotta wiira: “Miyo kaahinvekela Yehova wiira anilevelele ootheene vatthekoni mwaha wa itthu dhoohiloka naalontte nhu ni naapanke nhu. Moottharelana, kaahiwaatikhela ewarakha apaapa ni amwaariya kaaleelaka wiira kaahalevelela itthu dhootheene yaakipakenla awa.” Ann onnikhupali wiira khivaakhwen’ye opaka elo. Masi owo onlotta wiira: “Mwaha wa otakiha olevelela wa Yehova, kinlipelela wiira apaapa vamodha ni amwaariya ewiirihe otepa ontthuna ohudha voohima dha Yehova.”
12. Seeni ninreerela nhu onroromela Yehova ohiya ororomela miyuupuwelo dhihu? (Miruku 3:5, 6)
12 Okathi wootheene munroromele Yehova, ohiya ororomela miyuupuwelo dhinyu, okhala wiira muupuwelo nnyu pooti owootothani. (Nsome Miruku 3:5, 6.) Yehova pahi tondhuwela ele eri yooreera wa hiyo. (Yes. 55:8, 9) Owo khankhala-khala anivekelaka opaka etthu adhuwelaka wiira enoonikhumihera mixankiho. Ndho, vaavo owo onnitumererya iye wiira nikhale atthu oolevelela, nikhupali ni nrima wootheene wiira elo enooniphwanyiha nreerelo. (Esal. 40:4; Yes. 48:17, 18) Masi akhala wiira ninroromela miyuupuwelo dhihu, woonawene elo pooti oniiriha ohiwerya waalevelela atthu akina. (Mir. 14:12; Yer. 17:9) Naomi, ninlontte nhu ottuli, onlotta wiira: “Woopacerani, kuupuwela wiira kaahikhalana mathowa ootheene wiira kihaalevelele amamunaka mwaha wa woona epornokarafiiya. Miyo kuupuwela wiira kaalevelela yaatthikela okinyoonyiha aahiidho yaaliyala oriipiwa nrima koonaka. Miyo kaanidhuwela wiira Yehova aanoona owereya koonaka. Noomala, kaahuupuwela wiira mwaha wa Yehova woona owereya kinoonaka elo khentaphulela wiira ontthuna wiira kihilevele. Yehova onnoona owereya kinoonaka ni onnidhuwela wiira onnivira okathi wawaatta wiira kivole mmuupuweloni, masi-tho ontthuna wiira kikhale ntthu oolevelela.” d
MOOPORA WOOKHALANA MIYUUPUWELO DHOOREERA
13. Moovarihana ni aRoma 12:18-21, eseeni ninreerela nhu opaka?
13 Okathi nininlevelela nhu ntthu oninyoonyihe, nihaana opaka etthu ekina ohiya pahi oxaka olotta etthu ekhumelenle. Akhala wiira ninyoonyihiwe ni munna aahiidho nrokora nihaana wiilipihera opaka nrettele. (Math. 5:23, 24) Ndho nihaana omaliha onanariwa ni opweha mathowa, masi nikhale omoriwa ikharari ni oolevelela. (Munsome aRoma 12:18-21; 1 Ped. 3:9) Eseeni en’ya onikhalihera opaka elo?
14. Eseeni ninreerela nhu wiilipihera opaka, mwaha wa seeni?
14 Nihaana wiilipihera okhala moonelo wooloka voohima dha ntthu oninyoonyihe nkhama Yehova. Yehova onaadhya mikhalelo dhooreera khuta mmodha hiyo oriiyena. (2 Wah. 16:9; Esal. 130:3) Okhalawene, vaavo ntthu onaadhya iye etthu onniphwanya voohixikha akhala wiira etthu elo ti yooreera aahiidho yoonanara. Ndho akhala wiira ninawoona mikhalelo dhooreera atthu dha akina elo pooti onikhweela waalevelela. Mwa ntakihero, munna mmodha oniitthaniwa Jarrod onlotta wiira: “Vaavo kinuupuwelaka itthu dhinkidhivela munna mmodha ompaka iye onikikhweela waakuva onlevelela ni ohuumelela wuupuwelela etthu okipakenle iye.”
15. Seeni oraawa vootthuneya onleele ntthu onyoonyiheni wiira monlevelela?
15 Etthu ekina yootepa otthuneya ninreerela nhu opaka ori onleela ntthu owo wiira noolevelela. Mwaha wa seeni? Moone etthu olontte iye Naomi yoowo ninlontte nhu ottuli, owo onlotta wiira: “Amamunaka yaahikikoha yiiraka: ‘Niire mookilevelela?’ Okathi kaatthunaka owaakhula wiira kihaalevelela kaahiviliwa, okhala wiira kahoona nkaalevelenle ni nrima wootheene. Noovira okathi, kahaaleela moolumo ala arina owereya wuulupale, kiiraka: ‘Miyo kihoolevelelani.’ Noomala waaleela amamunaka wiira kaahalevelela ni nrima wootheene yaahipacera wuunla. Miyo kahitikiniheya noomala woona wiira yaahimaleleya, ndho elo yaahiphwanya nrettele. Vano kootthikela waroromela amamunaka ni noothikela okhala axirikha eekhweeli.”
16. Eseeni nhundhe nnyu voohima dha olevelela?
16 Yehova ontthuna wiira nikhale atthu oolevelela. (aKol. 3:13) Masi hata eri dhiidho, ivaara dhikina pooti okhala etthu yoolipa waalevelela atthu akina. Ndho wiira nipaka elo, nihaana wiilipihera olotta miyuupuwelo dhihu ni oxaka onanariwa. Napaka elo, ninnokhalana miyuupuwelo ipheya ni dhooreera.—Moone ekwaaturu eni: “ Itthu Tthaaru Dhin’ya Wookhaliherani Okhala Oolevelela.”
MOONE MIREERELO DHINKHUMELELA VAAVO NINKHALA NHU ATTHU OOLEVELELA
17. Mathowa seeni anniiriha okhala atthu oolevelela?
17 Hiyo nookhalana mathowa awaatta anniiriha okhala atthu oolevelela. Nirowe noone mathowa vakhaani. Noopacera, hiyo ninintakiha Tiithi nhu Yehova. Ndho opaka elo, enninhakalaliha vawaatta. (Luka 6:36) Nanaili, ninnoonihera oxukhurela oreera nrima wa Yehova mwaha woonilevelela. (Math. 6:12) Naneeraru, olevelela onniniiriha okhala saana ni onnilipiha waataana wihu ni atthu akina.
18-19. Eseeni enkhumelela vaavo ninaalevelela nhu atthu akina?
18 Vaavo ninkhala nhu atthu oolevelela, pooti okhumelela itthu dhawaatta nihaalipelela nhu. Mwa ntakihero, moone etthu yamwiiranenle Denise, yoowo ninlontte nhu ottuli. Okathi aariiye otribunaali, Denise khaadhuwela wiira nlopwana ole ankhumihenre asitenti aahimpaka palanu wiira aiheya noomala ophukeliwa. Masi owo aahihakalala vawaatta noomala odhuwela wiira Denise ahinlevelela, ndho elo yaahimwiiriha olakela opacera onsoma Biibiliya ni Anamoona a Yehova.
19 Ivaara dhikina hiyo pooti oniliperya waalevelela atthu akina, masi opaka elo etthu yoohakalaliha. (Math. 5:7) Tivondho, mpake itthu dhootheene munwerya nnyu wiira ntakihe olevelela wa Yehova.
NCIPO 125 Atthu “Ómoriwa Ikharari” Anoohakalala
a Madhina makina aamotariwa.
b Okathi onkhumelela awa nxankiho nkhama ola, khuta nkiristau ookhalana eparakha yoothanla etthu onreerela iye opaka.
c Moone va jw.org iviidiyu dha macipo dhini: “Perdoem Uns aos Outros,” “Ajuda a Esquecer” ni “Kinooliyala Sotheene.”
d Hata woona epornokarafiiya eri etampi ni enkhumiheraka mixankiho ntthu othelanneyene, masi mbiibiliyani khaamo mathowa amwaakhuleliha ole onyoonyihiwe othanla omwalana.
