Mary vamodha ni amamune, John, a annihakalala okhala elapo anwerya awa waalaleerya atthu awaatta ankhuma oFilipina mwaha wa nteko. Okathi wa eretta ya koronaviiru, Mary aahiwerya opaceriha dhoosoma dha Biibiliya dhawaatta elapo-ye ni ilapo dhikina. Owo aawerye dhai opaka elo?

Mary aanakoha anaskola-ye a Biibiliya airaka: “Niire ookhala ntthu nnidhuwela nnyu ontthuna onsoma Biibiliya?” Ndho akhala wiira naskola aakhula wiira aahikhala, owo aninvekela wiira ankhalihere odhuwela ntthu owo. Ivaara dhawaatta opaka nikoho nookhweya nkhama nna ninnikhumihera itthu dhooreera. Mwaha wa seeni? Okhala wiira atthu dhinaadhivela itthu anhudha awa mbiibiliyani antthuna wiira amudhi ni axirikha-ya edhuwele itthu idho. Eseeni yaakhumelela noomala Mary waakoha anaskola-ye a Biibiliya?

Naskola mmodha a Mary oniitthaniwa Jasmin ahaalotta atthu a sese yaatthuna onsoma Biibiliya. Ntthu mmodha ari Kristine, okhala wiira waanindhivela onsoma Biibiliya aahivekela osoma ivaara piili vasumanani. Noomala Mary ahinkoha Kristine akhala wiira ookhala ntthu andhuwela iye aatthuna onsoma Biibiliya. Kristine ahaakhula wiira: “Aayo, kinawoodhuwelihani axirikha aka.” Esumana yaattharelana, Kristine aahalaleya axirikha-ye a sese wiira Mary aadhuwele. Noovira okathi, Kristine aahikhalihera Mary waadhuwela axirikha-ye akina. Moottharelana, axirikha a Kristine yaahalotta atthu akina yoonihenre odhiveliwa.

Kristine aatthuna wiira amudhi-ye yaakhala oFilipina epacere onsoma Biibiliya. Tivondho owo aahilotta ni mwane anthiyana oniitthaniwa Andrea. Woopacerani, Andrea uupuwela wiira Anamoona a Yehova etiini ehininkhupali Yeesu ni eninrumeela pahi Biibiliya a Waataana wa Naanaano. Masi noomala opacera onsoma Biibiliya, aahoona wiira ele uupuwela iye voohima dha Anamoona a Yehova yaari etthu yawoothiwa. Okathi wootheene aahudha iye etthu epheya, owo aalotta wiira: “Okhala wiira Biibiliya onlotta dhiidho, kinoona wiira elo ekhweeli!”

Noovira okathi, Andrea aahinkhalihera Mary waadhuwela axirikha aili ni koleka-ye mmodha a ontekoni, ndho awo yaahipacera onsoma Biibiliya. Ohiya-vo, Andrea aahikhalana atiya-ye yaaitthaniwa Angela, yaawo yahoona. Mary khaadhuwela wiira Angela aanawiriyana okathi owo ansomiha iye Biibiliya Andrea. Ndho nihiku nimodha, Angela aahinleela Andrea wiira aatthuna opacera onsoma Biibiliya ni Mary. Angela dhaanindhivela itthu aahudha iye. Noomala ovira mweeri mmodha, owo aahipweha mmuruni dhawaatikhiwa  ni aahivekela osoma ivaara vasese vasumanani! Ndho akhaliheriwaka ni Andrea, Angela aahipacera owiriya mithukumano dhootheene anrumeelaka viidiyukonferensiya.

Vaavo Mary adhuwenle iye wiira amamune Kristine aniithaniwa Joshua, yaanikhala vakhiviru okathi yaasoma awa, owo aahaakoha akhala wiira yaanitthuna osoma. Joshua aahaakhula wiira: “Miyo kikanwiriyana pahi, masi kihipakeliwe makoho. Ndho akhala wiira kinoopakeliwa nikoho, kinookhuma.” Noovira 5 minuutu owo aahipaka makoho awaatta onxira Kristine, noomala owo ahilotta wiira aanitthuna osoma. Nikoho nookhweya Mary apanke iye naahikhumihera dhoosoma dha Biibiliya dhawaatta. Ndho owo aahaavaha dhoosoma idhe anna akina. Mary ahiwerya opaceriha dhoosoma dha Biibiliya 28 ilapo sese dhoovirikana.

Naskola opacera Jasmin yoowo ninlontte nhu ottuli, opatisiwe abril a 2021. Kristine opatisiwe Maio a 2022 ni ootthikela oFilipina wiira akhale vakhiviru ni amudhi-ye. Noomala miyeeri vakhaani Angela aahipatisiwa ni nenna-va onrumeela nkhama piyoneera okilaatheya. Nitho atthu aili Kristine aankhalihenre iye Mary waadhuwela aapatisiwa. Anaskola akina awaatta, onhela mpuwa Joshua ni Andrea, annirowa vahoolo.

Eseekulu yoopacera, atthu awaatta yaanaaleela ihapari dhooreera atthu yaattamannawana, amudhi ni axirikha-ya. (Yohani 1:41, 42a; Mit. 10:24, 27, 48; 16:25-33) Nnoonela dhai anaskola nnyu a Biibiliya ni atthu anoonihera odhiveliwa waakoha wiira: “Niire ookhala ntthu nnindhuwela nnyu ontthuna onsoma Biibiliya?” Akhala wiira ninoopaka nikoho nna, woonawene ninoowerya waadhuwela atthu awaatta antthuna onsoma Biibiliya.