NIIRE munnoona wiira atthu awaatta olelo-va annoona wiira anniphwanelela othokoreriwa mwa enamuna yavameekhaaya, okhalana miritti aahiidho ihakhi? Nnaamwi awo ethokoreriwaka mwa enamuna yavameekhaaya, anuupuwela wiira anniphwanelela okhalana-tho miritti dhikina. Ndho atthu dhiidho aniipheta aneene ni khanxukhurela itthu araawana. Biibiliya onlotta wiira mahiku ookhidhera atthu awaatta yaankhalana muupuwelo owo.—2 Tim. 3:2.

Masi nkhalelo wa wiipheta ntthu mwaneene ni wiikuserera khonoopaceraru. Mwa ntakihero, Adamu ni Eva yaahilakela othanla aneene etthu yooreera ni yoonanara, ndho mwaha wa elo ootheene nhu ninnihaawa. Noovira iyaakha dhawaatta, mwene a oyuda aaitthaniwa Oziya uupuwela wiira aaniphwanelela opaha erupani mpani mwa Muluku masi owo khiwaari nteko aaphwanelela iye ovara. (2 Wah. 26:18, 19) Nitho afaresi ni asadukhi yuupuwela wiira yaari ootepa ootthuneya vamaithoni va Muluku okhala wiira yaari adhuulu a Abrahaamu.—Math. 3:9.

Hiyo ninkhala olumwinku atthu aniipheta awa aneene ni anikuserera awa. Ndho mikhalelo idho pooti onihapuwela. (aGal. 5:26) Vakhaani-vakhaani elo pooti oniiriha wuupuwelela wiira ninniphwanelela ophwanya etthu, okhalana miritti aahiidho othokoreriwa mwa enamuna yavameekhaya. Eseeni ninreerela nhu opaka wiira nihihapuweliwe ni miyuupuwelo idho? Wiira nipake elo nihaana wuupuwelela moopora Yehova onoonela iye mwaha owo. Ndho malakihero maili a mbiibiliyani pooti onikhalihera opaka elo.

Yehova tonthanla etthu nimphwanela nhu waakhela. Nirowe noone matakihero vakhaani.

•   Yehova tothanlale wiira vatthekoni nlopwana oothela aphwanelele ottittimihiwa ni amwaariye ni nthiyana ootheliwa aphwanelela ophetiwa ni amamune. (aEefe. 5:33) Ntthu othenle aahiidho otheliwe onlipelela wiira amwaariye aahiidho amamune ehidhiveliwe ni ntthu nkina. (1 aKor. 7:3) Anaan’yari anlipelela wiira ana ekhale awiiwelela ni anamwane anniphwanelela ophetiwa vawaatta ni okhaliheriwa ni anaan’yari-ya.—2 aKor. 12:14; aEefe. 6:2.

• Yehova onlotta wiira asitokweene mmulokoni ahaana ottittimihiwa mwaha wa nteko anvara awa ni nthiti. (1 aTes. 5:12) Masi elo khentaphulela wiira ahaana woona khuta etthu anna ni arokora ampaka awa.—1 Ped. 5:2, 3.

• Muluku ohiiriha wiira ikuveernu dhiphwanelele waakhela misokho ni nttittimiho na atthu dhinaalamulela awa.—aRoma 13:1, 6, 7.

Yehova onnoonihera wiira onninipheta vawaatta anivahaka itthu nihimphwanela nhu. Okhala wiira noorava etampi, ootheene nhu ninniphwanelela okhwa. (aRoma 6:23) Masi hata eri dhiidho, Yehova onninoonihera opheta woororomeleya anivahaka mareeliho awaatta. (Esal. 103:10, 11) Ndho mareeliho ni iparakha idho ninaakhela mwaha wa oreera nrima wuulupale wa Yehova.—aRoma 12:6-8; aEefe. 2:8.

Nkhootte muupuwelo wa olumwinku. Naahikhalena ephoole pooti opacera wuupuwelela wiira ninniphwanelela itthu dhikina waaxira atthu akina. Evaara emodha, Yeesu aahilotta nlikanyiho nimodha ninoonihera wiira tivookhweya okhalana muupuwelo owo. Yeesu aahilotta nlikanyiho na mwaneene ematta aavekenle ananteko ovara okhuma ohiihiyu mpakha odhoodhilo wiira yaakhele etenaariyu emodha. Noovira okathi, aahaalaleya ananteko akina. Ohalaka wiila, owo aahiwiitthana ananteko ootheene aaliva amunnyaka khuta nanteko etenaariyu emodha. Masi ale yaapacenra ovara nteko ohiihiyu yuupuwela wiira yaaniphwanela waakhela nsurukhu wawaatta okhala wiira yaahivilela oviha nihiku nootheene. (Math. 20:1-16) Nlikanyiho nna, Yeesu ohoonihera wiira atthareli-ye ahaana oxukhurela itthu Muluku onthanla iye waavaha.

Nkhale oxukhuru ni nhaakuputi atthu akina. (1 aTes. 5:18) Muntakihe nrummwa Paaulu, owo khaavekenle anna a oKorinto wiira enkhalihere ni itthu dhanthowa, hata aarina ehakhi ya opaka elo. (1 aKor. 9:11-14) Nihaana oxukhurela itthu atthu  akina annipakela awa ohiya olipelela wiira enipakele dhikina.

Nkhale awiiyeviha. Vaavo ntthu onoona iye wiira tootepa otthuneya waaxira atthu akina pooti opacera wuupuwelela wiira onniphwanelela okhalana itthu dhikina. Masi wiiyeviha onoonikhalaihera okhootta muupuwelo owo woohiloka.

Profeeta Daniyeele ohoonihera ntakihero nooreera na wiiyeviha. Owo aayariwe ettheko yoottittimiheya, ari ophwaneliwa, aakhili ni anidhuwela ovara itthu dhawaatta. Woonawene itthu idho dhaamwiiriha wuupuwelela wiira aaniphwanelela othokoreriwa mwa enamuna yavameekhaaya aahiidho ovahiwa miritti. (Dan. 1:3, 4, 19, 20) Masi Daniyeele aahivikaniha okhala awiiyeviha, ndho nkhalelo owo waahimmwiiriha okhala ootepa otthuneya vamaithoni va Yehova.—Dan. 2:30; 10:11, 12.

Tivondho nikhootte nkhalelo wa wiipheta ni wiikhuserera, yoowo olelo-va wuunlanne olumwinku wootheene. Ohiya-vo, nihakalale ni mareeliho Yehova onnivaha iye mwaha wa oreera nrima wuulupale.