YOOSOMA YA MWAHA 4
NCIPO 18 Ninnixukhurela Yowoopola
Eseeni Ennihudhiha awa Yawoopola?
“Moota Muluku oonihenrye awe oniphenta wawe.” —1 YOH. 4:9.
ETTHU NIN’YA NHU OHUDHA
Nin’ya woona ele yawoopola ennihudhiha awa voohima dha mikhalelo dhooreera dha Yehova ni Yeesu.
1. Seeni oraawa vootthuneya orowe nthukumano wa Wuupuwelela okhwa wa Yeesu khuta mwaakha?
MOOHAAKANYERA nyuwo munnikhupali wiira yawoopola etthu ya efaita yuulupale Yehova onivanhe iye! (2 aKor. 9:15) Mwaha wa Yeesu waakhwela apinaatamu hiyo ninoowerya okhalana oxirikha woolipa ni Yehova. Nitho ninoowerya okhalana nlipelelo na ekumi yoohimala. Nookhalana mathowa awaatta anniiriha onxukhurela Yehova yoowo onivanhe yawoopola mwaha wa onninipheta vawaatta! (aRoma 5:8) Masi wiira nihikhala-khale niliyalaka ele Yehova ni Yeesu anipakenla awa, Yeesu oonivaha yooruma ya Wuupuwelela okhwa-we khuta mwaakha. —Luka 22:19, 20.
2. Eseeni nin’ya nhu othokorerya yoosoma ela?
2 Ntano Wuupuwelela okhwa wa Yeesu on’ya okhala Saabadu 12 a Abril a 2025. Moohakanyera ootheene nhu noompaka mareheryo wiira nirowele nthukumano owo. Ndho ninoowerya ottottela nreerelo wawaatta akhala wiira ninawaadhya okathi wiira nuupuwelele a ele Yehova ni Yeesu anipakenla awa nihinatthi ophiya nihiku nno ni noomala ovira. Yoosoma ela, nin’ya woona ele yawoopola ennihudhiha awa voohima dha Yehova vamodha ni Mwane Yeesu. Yoosoma enttharelana, enoonikhalihera wiiwasasa moopora nikhanle nhu ottottela nreerelo yawoopola ni moopora nikhanle nhu woonihera oxukhuru.
ELE YAWOOPOLA ENNIHUDHIHA AWA VOOHIMA DHA YEHOVA
3. Oweryaneya dhai okhwa wa nlopwana mmodha oomalela owoopola atthu ootheene? (Moone-tho efootu.)
3 Yawoopola ennihudhiha wiira Yehova Muluku exariya. (Otum. 32:4) Mooporani? Nkuupuwelani ela: Mwaha wa Adamu ohimwiiwelela Muluku, hiyo noorava etampi ni okhwa. (aRoma 5:12) Ndho wiira Yehova anitaphule mwa etampi ni okhwa, onleva Mwane Yeesu wiira anoopole. Masi oweryaneya dhai okhwa wa nlopwana mmodha oomalela owoopola atthu awaatta? Nrummwa Paaulu onnitthokihera airaka: ‘Tthiri mwaha wa ohiiwelela wa nlopwana mmodha [Adamu] atthu awaatta yaahikhalihiwa anatampi, dhiidho-tho, mwaha wa wiiwelela wa nlopwana mmodha [Yeesu] atthu awaatta anookhalihiwa anaxariya.’ (aRoma 5:19; 1 Tim. 2:6) Ndho ni moolumo makina, mwaha wa ohiiwelela wa ntthu mmodha, apinaatamu ootheene aarava etampi ni okhwa. Nitho mwaha wa wiiwelela wa ntthu mmodha oomalela, apinaatamu onoowerya woopowa.
Mwaha ntthu mmodha ootheene nhu noorava etampi ni okhwa. Nitho mwaha wa ntthu mmodha ootheene nhu noothaphuliwa mwa etampi ni okhwa (Moone ettima 3)
4. Seeni Yehova ahihiyaka odhulu wa wiiwelela wa Adamu okhalaka valaponi mahiku ootheene?
4 Niire vaanitthuneya Yeesu okhwa wiira anoopowele? Seeni Yehova ahihiyaka odhulu wa wiiwelela wa Adamu okhalaka valaponi mahiku ootheene? Woonawene wa moonelo wa apinaatamu ela enamuna yooreera ni yaxariya ya ophuka mwaha ola. Masi elo khiyaare evarihane ni exariya yoomalela ya Yehova. Okhala wiira Yehova Muluku a xariya, ndho vaakhanle wiira opaka elo waaya okhala nkhama Adamu khapanke etampi ni odhulu-ye toomalela.
5. Seeni ennikhupaliha wiira ohoolo Yehova onoopaka itthu mwaxariya?
5 Eseeni yaaya okhumelela vaakhanle wiira Yehova khavanhe yawoopola, ahipaka exariya ni aahiya odhulu woohimalela wa Adamu okhalaka mahiku ootheene? Vaakhanle wiira Yehova oopaka elo, woonawene yaawiiriha atthu awaatta opacera waakanyera vakhala wiira Yehova onoopaka itthu olaihenre iye nhoolo mwaxariya. Mwa ntakihero, atthu akina yaampacera waakanyera, yiikohaka wiira: ‘Niire Yehova onawaakhwanihere itthu olaihenre iye?’ Masi hiyo khaninreerela oxanka ni mwaha owo. Okhala wiira Yehova opaka exariya, hata elo etaphulelaka onleva Mwane mmodha ampheta iye vawaatta. Ndho elo enoonihera wiira nhoolo, Yehova onoopaka itthu dhootheene mwaxariya.
6. Yawoopola enoonihera dhai wiira Yehova onninipheta? (1 Yohani 4:9, 10)
6 Ohiya pahi yawoopola onikhalihera wiiwasasa wiira Yehova taxariya, elo ennoonihera wiira Yehova onnipheta vawaatta. (Yohani 3:16; munsome 1 Yohani 4:9, 10.) Yawoopola khenoonihera pahi wiira Yehova ontthuna wiira nikhalena mahiku ootheene, masi-tho enninikhalihera woona wiira Yehova ontthuna wiira niirele mphantta emudhi-ye. Muupuwele ela: Noomala Adamu ottheka Yehova aahimwiikara ni aahihiya wiirela mphantta emudhi eninkokhorela. Tivondho ootheene nhu nin’yariwa nihiirelaka mphantta emudhi ya Muluku. Masi okhala wiira Yehova oovaha yawoopola, onniweryaneya apinaatamu ammwaamini ni omwiiwelela oleveleliwa dhoottheka-dha ni opacera wiirela mphantta emudhi elo. Hata olelo-va, onniweryaneya okhalana waataana woolipa ni Yehova vamodha ni anna ni arokora. Ndho hiyo khaninaakanyera wiira Yehova onninipheta vawaatta! —aRoma 5:10, 11.
7. Mwaha wa Yeesu ovilela mixankiho dhootheene wiira anoopola, elo onoonihera dhai wiira Yehova onninipheta?
7 Ninniwerya woona wiira Yehova onninipheta vaavo nnuupuwela nhu owereya oona iye okathi aamoona iye Mwane animpheta iye vawaatta ahaawaka. Satana olontte wiira khaavo nrumeyi a Yehova onwerya okhala oororomeleya okathi oviriha iye mixankiho. Ndho wiira Yehova oonihere wiira Satana amootha, ahihiya wiira Mwane oonihiwe ekoyi ahinatthi okhwa. (Yobi 2:1-5; 1 Ped. 2:21) Yehova aanimoona Yeesu vaavo aruwaniwa iye ni ahooleli a itiini, owaxuliwa ni atoropa ni okathi aakhomeliwa iye vanttaikhoni. Noomala Yehova aahimoona Mwane ampheta vawaatta akhwaaka mwa enamuna yootepa owereya. (Math. 27:28-31, 39) Yehova aahikhalana owerya wa okhoottihera wiira itthu idho dhihinkhumelele Yeesu. Mwa ntakihero vaavo nttitthi wa atthu waalotta awa wiiraka: ‘Akhala wiira Muluku owo onnimoonela vatthu nandho amoopole,’ Yehova aanwerya okathi ole opaka elo. (Math. 27:42, 43) Masi vaakhanle wiira Yehova aahimwaakihera Mwane wiira ahikhwe, hiyo khinaare nikhalena yawoopola ekina ni nlipelelo na nhoolo. Ndho wiira elo eweryaneya, Yehova ahihiya wiira Mwane avilele mixankiho dhootheene mpakha okhwa.
8. Eseeni ennikhupaliha wiira Yehova aahoona owereya wuulupale vaavo aamoona iye Mwane ahaawaka? Nthokihere. (Moone-tho efootu.)
8 Hiyo nihuupuwele wiira Muluku khanoona owereya okhala wiira Nanwerya Dhootheene! Muluku onipattunse anilikanyihaka ni yeene ni oonivaha nkhalelo wa woona owereya, ndho elo enoonihera wiira owo onnoona owereya. Biibiliya onlotta wiira Yehova ‘ahiwereihiwa nrima’ ni ‘oriipiwa nrima.’ (Esal. 78:40, 41) Yehova oonela dhai vaavo aamoona iye Mwane ahaawaka? Muupuwele yawiiraneya ya Abarahaamu ni Isaakhi. Nkhama mundhuwela nnyu, Yehova aahinvekela Abrahaamu wiira anvahe mwane mmodheene aariiyena nkhama nkuttho. (Maph. 22:9-12; aHeb. 11:17-19) Nkuupuwelani oriipiwa nrima Abarahaamu oonne iye vaavo apharele iye mwaalo wiira amwiiphe mwane Isaakhi. Voohakanyera Yehova aahoona owereya wuulupale vaavo aamoona iye Mwane ahaawaka mpakha okhwa voowereya ni vootakhala!—Moone eviidiyu eri va jw.org eni: Mutakiheke Waamini Waya— Abarahamu, Mpantta 2.
Yehova aahoona owereya vawaatta okathi aamoona iye Mwane ahaawaka (Moone ettima 8)
9. Eseeni munhudha nnyu aRoma 8:32, 38, 39 voohima dha opheta wa Yehova?
9 Yawoopola ennihudhiha wiira khaavo mmudhi aahiidho nxirikha nhu onnipheta vawaatta onxira Yehova. (Munsome aRoma 8:32, 38, 39.) Ndho nikhupali ni nrima wootheene wiira Yehova onninipheta vawaatta oxira nkhama hiyo ninipheta nhu. Akhala wiira munnitthuna okhala mahiku ootheene nkhupali wiira Yehova onnitthuna elo vawaatta wooxirani nyuwo. Akhala wiira muntthuna oleveleliwa dhoottheka dhinyu, nkhupali ni nrima wootheene wiira Yehova ontthuna woolevelelani moomalela oxira nkhama nnuupuwela nnyu. Yehova onnivekela wiira noonihere oxukhurela yawoopola, omwaamini ni omwiiwelela. Yawoopola enamuna emodha Muluku oonihenre iye onipheta wuulupale. Ndho elapo epheya ninoowerya ohudha itthu dhawaatta voohima dha opheta wa Yehova. —Mus. 3:11.
ELE YAWOOPOLA ENNIHUDHIHA AWA VOOHIMA DHA YEESU
10. (a) Itthu seeni atthu yamoothenrya awa Yeesu ahalaka vakhaani okhwa dhaamwiirinhe oriipiwa nrima? (b) Yeesu aattelinhe dhai ndhina na Yehova? (Moone ekwaaturu eni: “ Ororomeleya wa Yeesu Waahitteeliha Ndhina na Yehova.”)
10 Yeesu onnivaha efaita ele atthu akina anuupuwela awa voohima dha Tiithi-ye. (Yohani 14:31) Yeesu aahiriipiwa nrima vawaatta vaavo ootheriwe iye wiira aahiveiha Muluku ni ari ntthu ootakhala, okhala wiira elo yaanwiiriha atthu ohittittimiha ndhina na Tiithi-ye. Ndho elo yaahimwiiriha Yeesu ovekela airaka: ‘Tiithi vaaweryaneyaka nhiye ekaalisi ela wiira evire.’ (Math. 26:39) Mwaha wa ohihiya okhala oororomeleya wa Yehova mpakha okhwa Yeesu ootteliha ndhina na Tiithi-ye.
11. Yeesu oonihenre dhai wiira onaapheta apinaatamu? (Yohani 13:1)
11 Yawoopola ennihudhiha wiira Yeesu onnaathokorerya apinaatamu, saasaasa ahudheri-ye. (Mir. 8:31; munsome Yohani 13:1.) Mwa ntakihero, Yeesu aahidhuwela wiira olaleerya valaponi waaya okhala vooxankiha ni ankhwa mwa enamuna yoowereya. Okathi Yeesu aariiye valaponi khaapaka itthu okhala wiira aarummwale ni Yehova pahi, masi okhala wiira anaapheta vawaatta apinaatamu. Tivondho Yeesu aahivarerya wiira aalaleerye, waahudhiha ni waakhalihera atthu akina. Hata ahalakana okathi vakhaani wiira akhwe, Yeesu aahaadhya okathi wiira arapihe manawu aarummwa-ye, waahudhiha ni waalaiha aaleelaka moolumo oolipiha. (Yohani 13:12-15) Nnaamwi Yeesu oona owereya wuulupale vaavo aakhomeliwe iye vanttaikhoni, owo ahirumeela okathi vakhaani aariiyena wiira anvahe nlipelelo nakirime ni aahoonihera wiira anathokorerya saana amamaye anvekelaka Yoohaani wiira ahala aakhapelele. (Luka 23:42, 43; Yohani 19:26, 27) Yeesu khoonihere pahi wiira onnaapheta atthu mwaha wa oleva ekumi-ye, masi ohoonihera ni itthu aapaka iye okathi aariiye valaponi.
12. Itthu seeni Yeesu ompaka iye nenna-va dhinoonihera wiira onninikhalihera olelo-va?
12 Ekhweeli wiira Yeesu ‘okhwiye evaara emodha pahi,’ masi owo khahin’ye onipakela itthu dhawaatta. (aRoma 6:10) Mooporani? Owo onnivara nteko muulupale wiira anivahe itthu dhawaatta dheidho dhinweryaneya pahi mwaha wa yawoopola ovanhe iye. Mwa ntakihero, nenna-va owo onrumeela nkhama Mwene nhu, Nankuttho muulupale ni nhooleli a muloko wa Ekiristau. (1 aKor. 15:25; aEefe. 5:23; aHeb. 2:17) Yehova onvaha Yeesu nritti wa waathukumanya atthu oothanliwa ni a nttitthi muulupale, nteko yoowo on’ya iye ovara mpakha wookhidherani wa maxakha muulupale. b (Math. 25:32; Mar. 13:27) Nitho Yeesu onninrumeela nrumeyi oororomeleya ni aakhili wiira anivahe eyooca ya omunepani ennikhalihera ohihiya onrumeela Yehova moororomeleya mahiku ala ookhidhera. (Math. 24:45) Ndho vaavo Yeesu on’ya iye olamulela iyaakha ekonto emodha, onoovikaniha onivaha itthu dhootheene ninramela nhu wiira nihihiye okhala oororomeleya wa Yehova. Mweekhweeli Yehova khanvahe Mwane wiira anikhwele pahi, masi oonivaha wiira anipakele itthu dhawaatta!
NVIKANIHE OHUDHA ITTHU IPHEYA
13. Eseeni en’ya wookhaliherani ohihiya ohudha voohima dha opheta Yehova ni Yeesu anoonihera awa?
13 Nyuwo nnoowerya ohudha voohima dha opheta Yehova ni Yeesu anoonihenra awa muupuwelelaka etthu anipakenla awa. Nyuwo pooti opaka elo, mwiivahaka okathi wiira nsoma Evanxeelyu emodha aahiidho piili dhihalaka isumana vakhaani wiira niphiye nihiku na Wuupuwelela ni noomala ovira nihiku nno. Masi wiira mwiiwasase etthu mun’ya nnyu osoma, nhaana osoma ikapiitulu vakhaani ni wiilipihere ophwanya mathowa anwiirihani ompheta Yehova ni Yeesu. Nitho nhiliyale waaleela atthu akina ele nhundhe nnyu okathi mwaasoma nnyu.
14. Moovarihana ni Esalimo 119:97 ni enoota, othokodha on’ya wookhaliherani dhai ohihiya ohudhera voohima dha yawoopola vamodha ni miyaha dhikina? (Moone-tho efootu.)
14 Akhala wiira mooviriha iyaakha dhawaatta nhundhe ekhweeli, woonawene nyuwo pooti opacera wiikoha akhala wiira onniweryaneya ohudha itthu ipheya voohima dha exariya ya Muluku, opheta-we ni yawoopola. Tthiri hiyo khaninhiya ohudha itthu ipheya voohima dha miyaha idho ni miyaha dhikina. Ndho eseeni munreerela nnyu opaka? Nsome miyaha dhoohakalaliha dhinkhumiheriwa ni iliivuru dhihu. Akhala wiira munniphwanya mwaha nhiniiwasasa nnyu saana nhaana othokodha. Noomala muupuwelele nihiku nootheene ele nhudhe nnyu voohima dha Yehova, Mwane ni moopora anoophetawani. —Nsome Esalimo 119:97 ni enoota.
Hata nipacenre khalai onrumeela Yehova, ninoowerya waacerera oxukhurela wihu yawoopola (Moone ettima 14)
15. Seeni oraawa vootthuneya okhalela nthiti waadhya mihakhu dha mBiibiliyani?
15 Vaavo munsoma nnyu aahiidho nthokodha, nhikhulumuwe akhala wiira mooviriha okathi wawaatta masi nhiwerya ohudha etthu mpheya. Nyuwo pooti wiilikanyiha ni ntthu oninthipa toroma. Ivaara dhawaata, ntthu oninthipa toroma pooti oviriha okathi wawaatta aahiidho mahiku wiira aphwanya nluku nikhaana na ewooru. Masi hata eri dhiidho, owo khanhiya othipa okhala wiira odhuwela wiira khuta nluku na ewooru ophwanya iye hata nikhalaka nikhaani nookhalana efaita yuulupale. Ekhweeli wiira itthu ninhudhera nhu mBiibiliyani dhookhalana efaita yuulupale oxira ewooru! (Esal. 119:127; Mir. 8:10) Tivondho nhihiye onsoma Biibiliya ni mwaadhya ohudha itthu ipheya. —Esal. 1:2.
16. Nin’ya owerya dhai ontakiha Yehova ni Yeesu?
16 Okathi nninsoma nnyu Biibiliya, moone moopora woovarihela nteko mweekumini mwinyu ele nhudhe nnyu. Mwa ntakihero, nyuwo pooti otakiha exariya ya Yehova mwaathokoreryaka atthu voohaakalela nthalu. Ndho ntakihe opheta wa Yeesu mpakaka ele Yehova ontthuna iye ni nkhalaka oolikana ene wiira mwaakhalihera atthu akina hata ivaara dhikina ohikhweyaka opaka elo. Nitho enamuna ekina nkhanle nnyu otakiha Yeesu ori waalaleerya atthu akina ihapari dhooreera wiira awo ewerye odhuwela etthu yuulupale Yehova onivanhe iye.
17. Eseeni nin’ya nhu ohudha yoosoma enttharelana?
17 Vaavo nintepa nhu ohudha voohima dha yawoopola ni woonihera oxukhurela, ninnaacerera ompheta wihu Yehova vamodha ni Yeesu. Ndho elo ennimwiiriha Yehova ni Yeesu otepa onipheta vawaatta. (Yohani 14:21; Yak. 4:8) Tivondho nihihiye orumeela ikaruma Yehova onnivaha iye wiira nihudhe itthu dhikina voohima dha yawoopola. Yoosoma enttharelana, nin’ya woona mareeliho makina nin’ya ophwanya nhoolo mwaha wa yawoopola ni etthu ninreerela nhu opaka wiira noonihere oxukhurela opheta wa Yehova.
NCIPO 107 Yehova ti Ntakiheryo Nuulupale na Ophenta
a OLEELIHERIWA WA NUULUMO: “Wuupuwelela” ontaphulela muupuwelo nnyu wootheene ofikhiri mwaha mmodha ni woona itthu dhootheene dhinhela mpuwa wiira mwiiwasase mwaha owo.
b Yawaatikhiwa ya aEefeso 1:10, Paaulu onlotta voohima dha othukumana ‘itthu dhiri wiirimu.’ Masi Matheyo 24:31 ni Marko 13:27, Yeesu onlotta voohima dha othukumanyiwa wa ‘atthu oothanliwa’. Ndho ennooneya wiira Paaulu ni Yeesu yaalotta itthu dhoovirikana. Mwa ntakihero, Paaulu aalotta okathi Yehova onaathanla iye ni munepa wawaarya ale an’ya olamulela vamodha ni Yeesu. Masi Yeesu aalotta okathi an’ya awa othumanyiwa atthu oothanliwa an’ya okhala valaponi okathi wa maxakha muulupale wiira erowe wiirimu.
