YOOSOMA YA MWAHA 5
NCIPO 108 Ophenta wa Muluku Khonimala
Mareeliho Nimphwanya nhu Mwaha wa Opheta wa Yehova
“Kristu Yesu ohoorwa moolumwenkuni wira owoopole anatampi.” —1 TIM. 1:15.
ETTHU NIN’YA NHU OHUDHA
Nin’ya woona mareeliho nimphwanya nhu mwaha wa yawoopola ni moopora nikhanle nhu woonihera onxukhurela Yehova.
1. Eseeni ninreerela nhu opaka wiira ninhakalalihe Yehova?
NKUUPUWELANI munvahe ntthu nnimpheta nnyu etthu yooreera ni erina efaita yuulupale. Voohaakanyera nyuwo mwanriipiwa nrima noomala odhuwela wiira owo oruupweha etthu munvanhe nnyu ni khanrumeela! Masi moovirikana ni elo, nyuwo mwaanhakalala vaakhala wiira owo onnirumeela ni onnoolelani wiira onixukhurela etthu munvahe nnyu. Eseeni nintthuna nhu olotta? Yehova oovaha Mwane nkhama nkutthu. Ndho owo onnihakalala vaavo ninoonihera nhu oxukhurela nkutthu wawoopola onivanhe iye yoowo onoonihera wiira onninipheta! —Yohani 3:16; aRoma 5:7, 8.
2. Eseeni nhu woona yoosoma ela?
2 Woonawene noovira okathi, hiyo pooti opacera oliyala wiira yawoopola yoovaha yavameekhaaya. Vaavo nimpaka nhu elo, olikana ni okusa etthu ya efaita yuulupale Yehova onivahe iye niwalela nkaaxani ni nipweha, noomala nikoona ekaaxa elo masi niliya etthu erimo. Ndho wiira elo ehiiraneya, okathi wootheene, nihaana wuupuwelela itthu Yehova ni Yeesu anipakela awa wiira niwerye woonihera oxukhurela. Ndho yoosoma ela enoonikhalihera opaka elo. Woopacerani, nin’ya woona mareeliho nimphwanya nhu nenna-va mwaha wa yawoopola ni ale nilipelela nhu nhoolo. Mootharelana, nin’ya woona etthu ninreerela nhu opaka wiira noonihere oxukhurela opheta Yehova oonihenre iye, otepasawene ehalaka esumana emodha wiira niphiye nihiku na Wuupuwelela ni noomala ovira nihiku nno.
MAREELIHO NIMPHWANYA NHU NENNA-VA
3. Eseeni nimphwanya nhu nenna-va mwaha wa yawoopola?
3 Nenna-va, nimphwanya mareeliho awaatta mwaha wa nkutthu wawoopola Yeesu ovanhe iye. Mwa ntakihero, arumeelaka yawoopola, Yehova onnilevelela itampi dhihu. Yehova khampaka elo mwaha wa okhanyereriwa. Masi okhala wiira ontthuna onnilevelela. Nasaalimu anixukhurela mwaha wa olevelele ni Yehova, ndho elo yaahimwiiriha olotta wiira: ‘Yehova, nyuwo ti mooreera nrima, nitho okathi wootheene nri oolikana ene wiira nlevelele.’ —Esal. 86:5; 103:3, 10-13.
4. Seeni Yehova ovanhe iye nkutthu wawoopola? (Luka 5:32; 1 Timootheyo 1:15)
4 Atthu akina anuupuwela wiira khamphwanela oleveliwa ni Yehova. Masi olotta ekhweeli khaavo ntthu omphwanela. Nrummwa Paaulu aanidhuwela wiira khaaphwanelela wiitthaniwa okhala nrummwa. Masi hata eri dhiidho, owo aalotte wiira: ‘Oreera nrima wuulupale wa Muluku wookiiriha okhala nrummwa.’ (1 aKor. 15:9, 10) Vaavo nintharuwa nhu opaka itampi, Yehova onninilevelela. Mwaha wa seeni? Okhala wiira Yehova onninipheta vawaatta, owo onninilevelela hata elo nihiphwanela. Ndho, akhala wiira munniriipiwa nkuupuwela wiira khamumphwanelela oleveleliwa ni Yehova, nhiliyale wiira Yehova khanvahe nkutthu wawoopola wiira waakhalihera atthu omalela, masi oovaha wiira eleveleliwe anatampi anttharuwa. —Munsome Luka 5:32; 1 Timootheyo 1:15.
5. Niire nihaana wuupuwelele ninniphwanelela oleveleliwa ni Yehova? Nthokihere.
5 Nihuupuwela wiira ninniphwanelela oleveleliwa ni Yehova okhala wiira nipacenre khalai onrumeela. Ekhweeli wiira elo khentaphulela wiira Yehova khanvaha efaita aahiidho ooliyala itthu nimpakenle nhu khalai. (aHeb. 6:10) Nitho owo khanivanhe Mwane wiira anilive itthu ninimpakela nhu. Ndho vaankhala voohiloka wuupuwelela wiira ninniphwanelela oleveleliwa ni Yehova aahiidho othokoreriwa mwa enamuna yavemeekhaya. Wuupuwela dhiidho olikana ni olotta wiira Yeesu khaatthuneya okhwa wiira anoopole. —Mmoone-tho aGalasia 2:21.
6. Seeni Paaulu aalipihera iye ovara nteko wa Yehova?
6 Paaulu aanidhuwela wiira khaaphwanelela oleveliwa ni Yehova. Ndho, seeni aalipihera iye ovara nteko wa Yehova? Owo aahipaka elo wiira oonihere oxukhurela vawaatta oreera nrima ni omooriwa ikharari Yehova aamoonihere iye. (aEefe. 3:7) Ndho nitakihaka Paaulu, nihihiye onrumeela Yehova mooluttuweliwa wiira noonihere onxukhurela mwaha wa itthu dhootheene onnipakela iye, hata nidhuwelaka wiira khaniphwanelela oleveleliwa nuuwo.
7. Etthu seeni ekina nimphwanya nhu mwaha wa nkutthu wawoopola? (aRoma 5:1; Yakobo 2:23)
7 Mwaha wa nkutthu wawoopola olelo-va ninniwerya olipiha waataana wihu ni Yehova. a Nkhama ninoone nhu mwaha ovinre, hiyo khanin’yariwa niri axirikha a Muluku. Masi mwaha wa yawoopola, noowerya okhalana ‘nrettele ni Muluku’ ni okhala axirikha-ye. —Munsome aRoma 5:1; Yakobo 2:23.
8. Seeni ninreerela nhu onxukhurela Yehova mwaha wa okhalana eparakha ya ovekela?
8 Ovekela etthu yootepa otthuneya wiira niwerye okhalana waataana woolipa ni Yehova. Yehova khanwiriyana pahi navekelo ampakiwa vaavo ninthukumana nhu, masi oniiwa mavekelo nipaka nhu niri meekhinhu. Ovekela pooti onikhalihera ophwanya omaaleleya vanrimani ni onivaha nrettele mmuupuweloni. Ndho elo kahiyo enamuna pahi ninrumeela wiira nilotte mixankiho dhihu. Masi enninikhalihera olipiha waataana wihu ni Muluku. (Esal. 65:2; Yak. 4:8; 1 Yoh. 5:14) Okathi Yeesu aariiye valaponi aanivekela ivaara dhawaatta, okhala wiira aanidhuwela wiira Yehova aaninwiriyana. Nitho aanidhuwela wiira ovekela waaninkhalihera okhala waataana woolipa ni Tiithi-ye. (Luka 5:16) Ndho ninnixukhurela vawaatta odhuwela wiira ninoowerya okhala axirikha a Yehova ni olotta nuuwo oreela wa nivekelo mwaha wa nkutthu wa Yeesu!
MAREEELIHO NIN’YA NHU OPHWANYA NHOOLO
9. Mareeliho seeni arumeyi a Yehova anlipelela awa ophwanya nhoolo mwaha wa yawoopola?
9 Eseeni an’ya awa ophwanya arumeyi a Yehova nhoolo mwaha yawoopola? Awo anoophwanya ekumi yoohimala. Atthu awaatta anuupuwela wiira elo khenweryaneya okhala wiira okhuma khalai apinaatamu anuukhwa. Masi woopacera Yehova aapattusaka apinaatamu, aalakenle wiira ekhale mahiku ootheene. Ndho vaakhanle wiira Adamu khaapanke etampi, khaavo aaya wuupuwelela wiira okhala mahiku ootheene etthu yawoothiwa. Masi hata atthu awaatta yuupuwelaka wiira khonweryaneya okhala mahiku ootheene, hiyo ninnikhupali wiira elo enawiiraneya okhala wiira Yehova ooliva esapo yuulupale anlevaka Mwane onimpheta iye vawaatta wiira elo eweryaneye. —aRoma 8:32.
10. Eseeni anlipelela awa Makiristau oothanliwa ni a ipwittipwitthi dhikina?
10 Hiyo ninnilipelela nhoolo ophwanya ekumi yoohimala. Ndho nilipelelaka ophiya okathi owo, Yehova ontthuna wiira nuupuwelele moopora ekumi en’ya awa okhala nhoolo. Makiristau oothaliwa anlipelela okhalana ekumi yoohakalaliha wiirimu olamulelaka elapo vamodha ni Yeesu. (Wiis. 20:6) Atthu a ipwittipwitthi dhikina annilipelela ophiya okathi an’ya awa okhala Mparayiisu ehihaawaka, owereiwa aahiidho oriipiwa nrima. (Wiis. 21:3, 4) Niire nyuwo nniireela mphantta ekhurupu ya ipwittipwitthi dhikina dhinlipelela okhala valaponi vaava mahiku ootheene? Akhala wiira ti dhiidho, nhuupuwele wiira nlipelelo noophwanya ekumi wiirimu ti nuulupale oxira okhala valaponi. Okhala wiira elo etthu Yehova aalakenle iye aapattusaka apinaatamu. Ndho en’ya okhala etthu yoohakalaliha okhala mahiku ootheene valaponi.
11-12. Mareeliho seeni ninlipelela nhu ophwanya Mparayiisu? (Moone-tho efootu.)
11 Nkuupuwelani moopora ekumi en’ya awa okhala Mparayiisu. Nyuwo khamunrowa owereiwa aahiidho okhwa. (Yes. 25:8; 33:24) Yehova onawoovahani itthu dhootheene muntthuna nnyu. Eseeni munthuna ohudha Mparayiisu? Niire muntthuna odhuwela inama dhikina? Niire muntthuna ohudha wiipa ikaruma dha macipo? Aahiidho odhuwela otesenyari? Voohaakanyera elapo epheya, anootthuneya okhala atthu odhuwela opaka ipalanta, oteka mampa ni alimi. Nitho anootthuneya okhala atthu odhuwela waapeya saana eyooca, ohana ekaruma ni odhuwela waala mittaikho ni okhapelela. (Yes. 35:1; 65:21) Ndho noomala nhoolo ophwanya ekumi yoohimala, nnookhala okathi wawaatta wiira nhudhe ni nlamalela ovara miteko dhawaatta muntthuna nnyu.
12 Nkuupuwelani moopora mun’ya nnyu ohakalala owaakhela atthu akhwiye noomala ohihimusiwa! (Mit. 24:15) Nitho muupuwele moopora en’ya awa okhala etthu yooreera odhuwela itthu dhawaatta Yehova opattunse iye ni woona itthu dhinnihudhiha awa. (Esal. 104:24; Yes. 11:9) Ohiya-vo, en’ya okhala etthu yooreera onrumeela Yehova nihithananaka mwaha wa dhoovonya dhihu! Niire onnireerela olelo-va waakakhanya mareeliho ninlipelela nhu ophwanya nhoolo wiira ‘nipuhe vakhaani miteko dha etampi’? (aHeb. 11:25) Nnakhala vakhaani! Kiyaavo etthu olumwinku ola okhanla awa onivaha enlikana ni mareeliho a nhoolo. Muupuwele ela: Nlipelelo na elapo okhala Eparayiisu kahi na mahiku ootheene. Masi onoophiya nihiku elapo yootheene en’ya awa okhala Eparayiisu. Elo enawiiraneya okhala wiira Yehova ohoonihera onimpheta vawaatta anlevaka Mwane wiira anikhwele!
Eseeni entepa woodhivelani vaavo nnuupuwela nnyu mareeliho mun’ya nnyu ophwanya Mparayiisu? (Moone etima 11-12)
MOONIHERE OXUKHURELA OPHETA WA YEHOVA
13. Nin’ya woonihera dhai onxukhurela Yehova mwaha wa onivaha yawoopola? (2 aKorinto 6:1)
13 Nin’ya woonihera dhai onxukhurela Yehova mwaha wa onivaha yawoopola? Ninoowerya opaka elo nipwehaka nteko-ye nipuro noopacera mweekumini mwihu. (Math. 6:33) Okhala wiira Yeesu ‘ohuukhwa mwaha wa atthu ootheene, wiira ale ari akumi, ehiidhivelihe aneeneya, masi endhivelihe Kiriistu, yoowo okhwiye mwaha wa atthu awo, ni ohihimusiwe’ (2 aKor. 5:15) Yehova Muluku toophenta ni tooreera nrima. Hiyo ninoowerya woonihera onxukhurela Yehova mwaha wa itthu onnipakela iye nipakaka itthu dhootheene ninwerya nhu wiira ninrumeele. —Munsome 2 aKorinto 6:1.
14. Ninoonihera dhai wiira ninniroromela malakihero a Yehova?
14 Enamuna ekina nikhale nhu woonihera oxukhurela opheta wa Yehova ori ororomela ni otthara malakihero. Nin’ya owerya dhai opaka elo? Ninoowerya opaka elo, nuupuwelelaka nihinatthi opaka yoothanla ele Yehova ontthuna iye, nkhama akhala wiira ninoorowa aahiidho naari osoma iskola dhuulupale ni nteko nin’ya othanla ovara. (1 aKor. 10:31; 2 aKor. 5:7) Vaavo nimpaka nhu dhoothanla nittharaka malakihero a Yehova, waamini, nlipelelo nihu na nhoolo vamodha ni waataana wihu ni Yehova onnitepa olipa. —aRoma 5:3-5; Yak. 2:21, 22.
15. Eseeni ninreerela nhu opaka wiira noonihere oxukhurela okathi wa Wuupuwelela?
15 Yookhala etthu ekina ya neeraru ninreerela nhu opaka wiira noonihere oxukhurela opheta wa Yehova. Nihaana orumeela okathi wa Wuupuwelela wiira nimoonihere Yehova wiira ninnivaha efaita yawoopola. Ndho ohiya pahi wiilipihera wiira nirowe nthukumano wa Wuupuwelela, nihaana waalaleya atthu akina wiira nikhalana vamodha nihiku nno. (1 Tim. 2:4) Okathi munaalaleya nnyu mwaaleele etthu eniiraneya nihiku na Wuupuwelela. Woonawene nyuwo pooti opaka elo nwooniheraka eviidiyu eni: Eseeni Yaamwirinhe Yesu Okhwa? ni Muupuwelele Okhwa wa Yesu eri jw.org. Nitho asitokweene ahaana waalaleya ale ahin’ye olaleerya ni orowela mithukumano. Nkuupuwelani ohakalala onkhala wiirimu ni valaponi noomala epwittipwitthi emodha ya Yehova othikela opuro yaaraawa! (Luka 15:4-7) Tivondho, tivootthuneya nihiku na Wuupuwelela waakoha ehaali anna ni arokora, waahela mpuwa ale areele nthukumano wa Wuupuwelela ni ale ahin’ye khalai woona mithukumano dhihu. Hiyo nintthuna wiira awo yoone wiira ahaakheliwa saana! —aRoma 12:13.
16. Seeni oraawa vootthuneya wuupuwelela waacerera nteko nhu woolaleerya okathi wa Wuupuwelela?
16 Niire noowerya waacerera nteko nnyu woolaleerya dhinhalaka isumana vakhaani wiira niphiye nihiku na Wuupuwelela? Opaka elo enamuna emodha nkhanle nnyu woonihera onxukhurela Yehova vamodha ni Yeesu mwaha wa etthu yoopakelawani. Vaavo ninvara nhu vamodha ni Yehova ninniwerya woona moopora onnikhalihera iye ni onroromela wihu onnitepa olipa. (1 aKor. 3:9) Ohiya-vo, nhiliyale onsoma Biibiliya okathi wa Wuupuwelele nttharaka eprokaraama emphwanyaneya ebroxuura Ovarerya Soolempwa Khuta Nihiku ni Ekateernu ya Mithukumano dha eriyari ya esumana. Nyuwo pooti orumeela dhawiiraneya dhiri dhawaatikiwa idho wiira mpake yoosoma nnyu yoomwaneene.
17. Eseeni eninhakalaliha Yehova? (Moone-tho ekwaaturu eni: “ Moopora wa Woonihera Oxukhurela Opheta wa Yehova.”)
17 Woonawene, makhalelo nnyu khanwaakhuleliha opaka itthu dhootheene nithokorerye nhu mwaha ola. Masi muupuwele ela: Yehova khanlikanyiha itthu mumpaka nnyu ni idhe ampaka awa atthu akina, masi owo onoona ele eri vanrima vinyu. Yehova onnihakala vawaatta vaavo onoona iye wiira munnoonihera oxukhurela yawoopola yeelo eri yoovaha ya efaita yuulupale. —1 Sam. 16:7; Mar. 12:41-44.
18. Seeni enniiriha onxukhurela Yehova Muluku vamodha ni Yeesu Kiriistu?
18 Mwaha wa yawoopola ninoowerya oleveleliwa itampi dhihu, okhala axirikha a Yehova ni okhalana nlipelelo na omphwanya ekumi yoohimala. Tivondho okathi wootheene noonihere wiira ninnixukhurela opheta wa Yehova omwiirihe onivaha mareeliho ala. (1 Yoh. 4:19) Nitho noonihere oxukhurela Yeesu yoowo oonihenre opheta wuulupale alevaka ekumi-ye wiira anoopole! —Yohani 15:13.
NCIPO 154 Ophentana Khonimala
a Ahinatthi Yeesu ovaha yawoopola, Yehova aanalelevelela arumeyi-ye a khalai. Yehova aanipaka elo okhala wiira anikhupali wiira Mwane anwerya okhala ororomeleya mpakha okhwa. Ndho vamaithoni va Yehova, vaaphwana nkhama yawoopola yaahilinvwa khalairu.—aRoma 3:25.
