YOOSOMA YA MWAHA 3
NCIPO 35 “Nisuweleke Othanla Itthu Sootepa Otthuneya”
Mpake Dhoothanla Dhininhakalaliha Yehova
“Etthu yoopacerya wiira mutthu okhalane ankhili, ti omuttittimiha vanceene Yehova, nave mwamusuwela Muluku Oowaarya, munookhalana ankhili.” —MIR. 9:10.
ITTHU NIN’YA NHU ODHUDHA
Nin’ya woona moopora nin’ya nhu orumeela odhuwela, wiiwasasa ni akhili wiira niwerye opaka dhoothanla mwa miruku.
1. Nxankiho seeni ninhoolela nhu khuta nihiku?
KHUTA NIHIKU ninnipaka dhoothanla. Dhoothanla dhikina ti dhookhweya opaka, nkhama etthu nin’ya nhu oca aahiidho okathi woorupa. Masi dhoothanla dhikina ti dhoolipa opaka. Dhoothanla idho pooti okhumihera mireerelo aahiidho mixankiho ekumi nhu, ohakalala wihu ni atthu ninaapheta nhu aahiidho onkokhorela wihu Muluku. Hiyo nintthuna wiira dhoothanla idho dhinikhalihere mweekumini mwihu ni dhaaphwanyihe nreerelo amudhi nhu. Nitho etthu yootepa otthuneya, nintthuna wiira dhoothanla dhihu dhinhakalalihe Yehova. —aRoma 12:1, 2.
2. Itthu seeni tthaaru dhin’ya wookhaliherani opaka dhoothanla mwa miruku?
2 Nyuwo nnoowerya opaka dhoothanla dhooreera akhala wiira (1) nnoodhuwela itthu dhootheene voohima dha mwaha owo, (2) othokorerya moopora Yehova onoonela iye mwaha owo ni (3) wuupuwela saana yoothanla munreerela nnyu opaka. Yoosoma ela, nin’ya woona itthu idha tthaaru dhin’ya onikhalihera opaka dhoothanla dhooreera ni ninawoona moopora nikhanle nhu wunnuwihera owerya wihu wuupuwela saana —Mir. 2:11.
NDHUWELE ITTHU DHOOTHEENE VOOHIMA DHA MWAHA OWO
3. Nlikanyiho seeni ninnikhalihera wiiwasasa, otthuneya awa odhuwela itthu dhootheene dhinhela mpuwa mwaha mmodha nihinatthi opaka yoothanla?
3 Etthu yoopacera en’ya wookhaliherani opaka dhoothanla dhooreera ori odhuwela itthu dhootheene voohima dha mwaha owo. Seeni elo eraawa etthu yootthuneya? Nkuupuweleni wiira ntthu mmodha onwereya eretta yuulupale onnirowa okumana ni meetiku. Niire meetiku ammuvaha ikiniinu ahimpanke anaalisi toko-toko aahiidho akoha moopora eretta elo eninwereya awa? Moohaakanyera owo khaapaka elo. Nitho nyuwo nnoowerya opaka dhoothanla dhooreera akhala wiira nnoodhuwela toko-toko itthu dhootheene dhinhela mpuwa mwaha owo. Ndho mun’ya owerya dhai opaka elo?
4. Moovarihana ni yawaatikhiwa ya Miruku 18:13, eseeni munreerela nnyu opaka wiira ndhuwela itthu dhootheene dhinhela mpuwa mwaha mmodha? (Moone-tho efootu.)
4 Etthu en’ya wookhaliherani wiira nwerye odhuwela itthu dhootheene dhinhela mpuwa mwaha mmodha, ori opaka makoho. Nkuupuwelani nyuwo nlaleiwe orowela efeesta. Niire nyuwo mwaanrowa? Akhala wiira khamundhuwele ntthu on’ya ohoolela efeesta elo ni itthu dhootheene dhin’ya opakiwa, woonawene nyuwo mwaampaka makoho nkhama ala: “En’ya opakiwa liini ni opuro seeni? En’ya oviriha iwoora kavi? Taani on’ya ohoolela efeesta elo? Taani an’ya wiirela mphantta? Itthu seeni dhin’ya opakiwa ofeesta iwo? Niire enookhalawo eviinyu?” Waakhuliwa wa makoho ala onawookhaliherani opaka dhoothanla mwa miruku. —Munsome Miruku 18:13.
Mpake makoho wiira ndhuwele itthu dhootheene dhinhela mpuwa (Moone ettima 4) a
5. Eseeni munreerela nnyu wuupuwelela noomala odhuwela itthu dhootheene dhinhela mpuwa mwaha mmodha?
5 Moottharelana noomala odhuwela itthu dhootheene, muupuwele saana voohima dha itthu dhin’ya opakiwa efeestani elo. Mwa ntakihero, ankhi akhala wiira moodhuwela wiira nlipa on’ya ohoolela efeesta elo ni atthu an’ya oreela khanttittimiha malakihero a mBiibiliyani voohima dha owurya eviinyu aahiidho khuta ntthu akaawurya nkhama otthuna iye? Niire nyuwo nnoona wiira efeesta elo enookhala yootakhala ni ya wuuliha muru? (1 Ped. 4:3) Ankhi efeesta elo yakhala nihiku na mithukumano dha mulokoni aahiidho nihiku munkhuma nnyu nteko wooleerya vamodha ni muloko? Ndho wuupuwelela itthu dhootheene dhinhela mpuwa efeesta elo enawookhaliherani opaka yoothanla yooreera. Noomala nyuwo odhuwela itthu dhootheene voohima dha mwaha owo, mwiikohe wiira: Ankhi Yehova onoonela dhai mwaha ola? —Mir. 2:6.
NDHUWELE MOONELO WA YEHOVA
6. Moovarihana ni Yakobo 1:5, seeni ninreerela nhu onvekela Yehova wiira anikhalihere?
6 Munvekele Yehova wiira ookhalihereni odhuwela moonelo-ye. Yehova onnilaihera onivaha akhili an’ya onikhalihera odhuwela akhala wiira etthu emodha nin’ya nhu opaka eninhakalaliha. Owo onnivaha akhili khuta ntthu ni ‘nrima wootheene ni voohidhakalela.’ —Munsome Yakobo 1:5.
7. Eseeni en’ya onikhalihera odhuwela moonelo wa Yehova voohima dha mwaha mmodha? Nvahe nlikanyiho.
7 Noomala onvekela Yehova malakihero, nvahe ephoole wiira moone waakhuliwa wa nivekelo ninyu. Wiira nilikanyihe: Nkuupuwela mweettaka nkwaha noomala nthweelela aahiidho nvuwa, woonawene nyuwo mwammukoha ntthu mmodha onkhala nthere owo wiira oleeleni ephuro munreerela nnyu otthara. Niire nyuwo mwaakhuma opuro owo nkakhwaranya ahinatthi ntthu owo owaakhulani? Voohakanyera nyuwo khimwaapaka elo. Ohiya-vo, mwaalipelela owaakhulani ni mwaawiriyana ni ephoole malakihero aaya iye woovahani. Emodha-modharu noomala onvekela Yehova wiira oovaheni akhili, moone moopora owo aakhule iye nivekelo nno. Nyuwo pooti opaka elo, mwaadhyaka malamulo ni malakihero a mBiibiliyani anvareleya nteko mwaha owo. Mwa ntakihero, nhinatthi opaka yoothanla ya orowela efeesta nilontte nhu ottuli, nthokorerye ele Biibiliya onlotta iye voohima dha ifeesta dhootakhala, axirikha oohiloka ni otthuneya-wa opweha opuro woopacera Omwene ohiya dhootthuna dhihu. —Math. 6:33; aRoma 13:13; 1 aKor. 15:33.
8. Eseeni munreerela nnyu opaka wiira mphwanye miyaha munaadhya nnyu? (Moone-tho efootu.)
8 Ivaara dhikina nyuwo pooti otthuna okhaliheriwa wiira mphwanye miyaha munaadhya nnyu. Nyuwo pooti onvekela miruku munna aahiidho nrokora ondhuwela itthu dhawaatta voohima dha mwaha owo. Ohiya-vo, enookhala etthu yooreera akhala wiira nnoothokodha meekhinnyu. Dhookhala miyaha dhawaatta dhiri ikaruma dhihu dhinnikhalihera othokodha, nkhama Eliivuru Enaakhaliherya Anamoona a Yehova Otokosa Myaha Sikumiheriwe ni Iversikulu Sinaakhaliherya Makristau. Masi vaavo munthokodha nnyu nhiliyale wiira yoolakela nnyu opaka yoothanla eninhakalaliha Yehova.
Nthokorerye moopora Yehova onoonela iye mwaha owo (Moone ettima 8) b
9. Eseeni ninreerela nhu opaka wiira nikhupali akhala wiira yoothanla nintthuna nhu opaka enoondhivela Yehova? (aEefeso 5:17)
9 Eseeni ninreerela nhu opaka wiira nikhupali akhala wiira yoothanla nintthuna nhu opaka enoondhivela Yehova? Etthu yoopacera nihaana toko ondhuwela saana Yehova. Biibiliya onlotta wiira: ‘Mwandhuwela Muluku Awaarya, nnookhalana akhili.’ (Mir. 9:10) Ndho ni moolumo makina, okhalana akhili ontaphulela odhuwela mikhalelo dha Yehova, yoolakela-ye ni odhuwela itthu dhimmudhivela ni onnyokha iye. Ndho mwiikohe dho: ‘Moovarihana ni ele kindhuwela aka voohima dha Yehova, yoothanla seeni kinreerela aka opaka wiira kinhakalalihe?’ —Munsome aEefeso 5:17.
10. Seeni malakihero a mBiibiliyani araawa ootepa otthuneya oxira dhoolema dha nttetthe ninkhala nhu?
10 Wiira niwerye onhakalaliha Yehova, ivaara dhikina pooti ovekela opaka itthu dhihinaadhivela amudhi aahiidho axirikha nhu. Mwa ntakihero, anaan’yari akina pooti onkhanyerera mwana athiyana wiira atheliwa ni nlopwana orina nsurukhu wawaatta, hata nlopwana owo ahilipe nkhalelo wa omunepani. Ekhweeli wiira anaan’yari awo antthuna wiira mwana akhale saana. Masi awo ahaana wiikoha wiira: Niire nlopwana ola onoowerya onkhalihera mwanaka okhalana waataana woolipiha ni Yehova? Ankhi Yehova onoonela dhai mwaha ola? Matheyo 6:33 onaakhula nikoho nna. Yawaatikhiwa ela Yeesu onaatumererya Makiristau ohihiya ‘opweha nipuro noopacera Omwene.’ Ekhweeli wiira hiyo ninaattittimihaka anaan’yari nhu ni atthu a nttetthe nhu, masi etthu yootepa otthuneya ori onhakalaliha Yehova.
MUUPUWELA SAANA YOOTHANLA MUNREERELA NNYU OPAKA
11. Nkhalelo seeni onromoliwa aFilipi 1:9, 10 on’ya wookhaliherani wuupuwelela saana yoothanla munreerela nnyu opaka?
11 Noomala othokorerya malakihero a mBiibiliyani anvarihana ni yoothanla nnyu, nhaana wuupuwelela saana yoothanla munreerela nnyu opaka. (Munsome aFilipi 1:9, 10) Akhili pooti wookhaliherani wuupuwelela saana etthu en’ya okhumelela mwaha wa yoothanla mun’ya nnyu. Ivaara dhikina, dhoothanla dhikina pooti okhala dhookhweya opaka. Masi dhoothanla dhikina pooti okhala dhooxankiha opaka. Tivondho, akhili pooti wookhaliherani opaka dhoothanla mwa miruku hata miyaha dhooxankiha.
12-13. Akhili an’ya wookhaliherani dhai opaka yoothanla mwa miruku voohima dha nteko munreerela nnyu ovara?
12 Muupuwele ela: Nkuupuwelani wiira nyuwo munkoca nteko wiira ncihe ettheko nnyu. Noomala mphwanya miteko miili dhihinvonyera malakihero a mBiibiliya. Ndho nhinatthi othanla nteko mmodha, nkuupuwela itthu dhootheene dhinhela mpuwa nteko owo, nkhama iwoora mun’ya nnyu oviriha nvaraka, iwoora mun’ya nnyu oviriha mphuroni wiira mphiye ontekoni ni miyaha dhikina dhinvarihana ni nteko owo. Woonawene nyuwo mwaanthanla nteko mmodha onoodhivela aahiidho nnoona nnyu wiira onnilinvwa nsurukhu wawaatta. Masi dhookhala itthu dhikina nlelo munreerela nnyu wuupuwelela nhinatthi opaka yoothanla elo.
13 Mwa ntakihero, niire nteko owo okanwiirihani olova mithukumano? Niire nteko owo onoovukula okathi munrumeela nnyu wiira nkhapelele ettheko nnyu nkhalelo wa mmuupuweloni ni omunepani? Wiipakela makoho ala onawookhaliherani opweha nipuro noopacera itthu dhootepa otthuneya, nkhama onkokhorela Muluku ni okhapelela ettheko nnyu, ohiya otthuna ophwanya nsurukhu wawaatta. Ndho mwapaka elo, munoowerya opaka yoothanla yooreera ni Yehova onooreeliha yoothanla nnyu.
14. Waarumeela akhili on’ya onikhalihera dhai woonihera opheta ni oxaka waakwattuliha atthu akina?
14 Akhili anoonikhalihera waathokorerya atthu vaavo nimpaka nhu yoothanla wiira ‘nihaatthekihe atthu akina.’ (aFil. 1:10) Elo etthu yootepa otthuneya okathi nimpaka nhu dhoothanla voohima dha ikuwo dhoowara ni moopora wa wiikociha. Mwa ntakihero, hiyo pooti othanla ikuwo dhinnidhivela ni enamuna ya wiikociha ennidhivela. Ankhi akhala wiira enamuna ninwara nhu ni wiikociha ennaakwattuliha anna ni arokora vamodha ni atthu ankhala nttetthe nhu? Akhili pooti onikhalihera ottittimiha moonelo ni yawuupusera ya nrima ya atthu awo. Nitho opheta onooniiriha waadhya nreerelo wa ‘atthu akina’ ohiya nreerelo nhu pahi ni okhala awiiyeviha. (1 aKor. 10:23, 24, 32; 1 Tim. 2:9, 10) Ndho napaka elo, ninoowerya opaka dhoothanla dhinoonihera wiira ninnaapheta ni waattittimiha atthu akina.
15. Itthu seeni munreerela nnyu wuupuwelela toko nhinatthi opaka yoothanla yootepa otthuneya?
15 Akhala wiira muntthuna opaka yoothanla yootepa otthuneya, muupuwelele etthu munreerela nnyu opaka wiira mwaakhwanihere yoothanla nnyu. Yeesu oonihudhiha wiira nihaana ‘woona’ etthu ninreerela nhu opaka wiira naakhwanihere yoothanla nhu. (Luka 14:28) Tivondho nthokorerye okathi, mireerelo ni ikuru dhintthuneya wiira yoothanla nnyu ekhumele saana. Ivaara dhikina, nhaana opaka elo nvaanelaka ni atthu a ettheko nnyu voohima dha ele khuta ntthu onreerela iye opaka wiira akhalihere yoothanla elo okhumela saana. Seeni opaka elo eraawa etthu yootthuneya? Opaka elo enawookhaliherani woona wiira yoothanla mpanke nnyu ennitthuna okociheriwa, aahiidho onnitthuneya opaka yoothanla ekina eri yootepa oreera. Vaavo nnaaveka nnyu moonelo atthu a ettheko nnyu okathi muntthuna nnyu opaka yoothanla, elo enoowiiriha awo opaka itthu dhootheene anwerya awa wiira ekhalihere yoothanla elo okhumela saana. —Mir. 15:22.
MPAKE YOOTHANLA EN’YA OKHUMELA SAANA
16. Itthu seeni munreerela nnyu otthara wiira nwerye opaka yoothanla en’ya okhumela saana? (Moone-tho ekwaaturu eni: ‘ Moopora Woopaka Dhoothanla mwa Miruku.”)
16 Akhala wiira nnootthara itthu dhootheene nithokorenrye nhu mwaha ola, nookhala oolikana ene wiira mpake yoothanla mwa miruku. Nyuwo pooti opaka elo, nthokoreryaka itthu dhootheene dhinhela mpuwa mwaha owo ni nthokodhaka malakihero an’ya wookhaliherani opaka yoothanla eninhakalaliha Yehova. Moottharelana, munvekela Yehova wiira ookhalihereni opaka yoothanla en’ya ekhumele saana.
17. Eseeni en’ya wookhaliherani opaka dhoothanla dhooreera?
17 Hata khalai ntanke opaka yoothanla yaakhumenle saana, nhiliyale wiira etthu en’ya wookhaliherani opaka yoothanla yooreera ori ororomela odhuwela wa Yehova ohiya ororomela odhuwela winyu aahiidho itthu dhookhumelenleni khalai. Yehova pahi tonwerya woovahani odhuwela weekhweeli, wiiwasasa ni akhili, okhala wiira owo tori mathipelo a odhuwela. (Mir. 2:1-5) Yehova onawookhaliherani wiira nwerye opaka dhoothanla dhininhakalaliha. —Esal. 23:2, 3.
NCIPO 28 Ti Pani Ophwanenle Okhala Mpatthani a Yehova
