1. Eseeni enaadhivela opaka atthu awaatta olelo-va?

 NIIRE nyuwo munnoona wiira atthu awaatta olelo-va anniivuwiha waaxira atthu akina? Mwa ntakihero, atthu akina annaarumeela a rede sociais wiira yooniwe ni yoonihere itthu ampaka awa. Ndho mwaha wa elo, atthu vakhaani pahi tanthanla onvuwiha Yehova. Yoosoma ela, nin’ya woona ele ontaphulela awa onvaha ovuwa Yehova ni nthowa ninniiriha opaka elo. Nitho ninawoona moopora nikhanle nhu onvaha Muluku ovuwa omphwanela iye ni moopora owo on’ya iye ovuwiha ndhina-ne nhoolo.

ONTAPHULELANI ONVAHA OVUWA YEHOVA?

 2. Yehova oonihenre dhai ovuwa-we omwaako Sinaayi? (Moone-tho efootu ya ekaapa.)

² Ovuwa eseeni? MBiibiliyani nuulumo nawi “ovuwa,” nintaphulela etthu emmwiiriha ntthu okhala ootepa otthuneya. Yehova aahoonihera wiira toovuwa, noomala owoopola aisarayeeli Weexiitu. Aisarayeeli awaatta yaahithukumana waattamela omwaako Sinaayi wiira yiiwe etthu Yehova aaya iye olotta. Noomala neeku naahikhuneela mwaako. Naanaanoru, etthaya yaahipacera ottikinyeya, mwaako otthuwa mwiisi, oruma itari, odherima ni waahiiweya onyakula wa epusina. (Okhu. 19:16-18; 24:17; Esal. 68:8) Noomala Yehova opaka elo, aisarayeeli yaahitikiniheya mwaha wa ovuwa ni owerya Yehova aawoonihenre iye.

 3. Enamuna seeni nikhanle nhu onvaha Yehova ovuwa?

³ Niire apinaatamu anoowerya onvaha ovuwa Yehova? Aayo anoowerya. Enamuna emodha nikhanle nhu onvuwiha Yehova ori waaleela atthu akina voohima dha owerya ni mikhalelo-dhe dhooreera. Nitho ninninvuwiha Yehova ninttottopelaka mwaha wa itthu ninwerya nhu opaka nikhaliheriwaka ni veene. (Yes. 26:12) Mwene Davidi oovaha ntakihero nooreera na anvuwinhe Yehova. Nivekelo nimodha aapanke iye eriyari ya aisarayeeli, Davidi aahinleela Muluku wiira: ‘Khoo Yehova, okhulupale, ovuwa,  waarya ni ottittimiheya ti wannyu okhala wiira itthu dhootheene dhiri wiirimu ni valaponi ti dhannyu.’ Noomala Davidi opaka nivekelo ‘atthu a nloko nootheene yaahinttottopela Yehova.’ —1 Wah. 29:11, 20.

 4. Yeesu aanvanhe dhai ovuwa Yehova?

⁴ Okathi Yeesu aariiye valaponi, aanavuwiha Atiithi-ye okhala wiira aanidhuwela wiira yaaninkhalihera opaka miiriirya. (Mar. 5:18-20) Nitho Yeesu aahinvuwiha Yehova ni moopora aalotta iye voohima dha Tiithi-ye ni moopora aathokorerya iye atthu akina. Nihiku nimodha Yeesu ahudhihaka nsinakooka, aahikhala nthiyana mmodha aahaasiwa ni nlaikha nootakhala mwa iyaakha 18. Nlaikha nno naahinrakaliha ahikawerya weemela mwa wookowa. Yeesu aahidhuwela wiira nthiyana ole aahiriipiwa nrima! Tivondho mwaha wa omoonela othunku aahimwaattamela nthiyana ole, alotta mooreera nrima airaka: ‘Nthiyana, moopenusiwa eretta nnyu.’ Noomala Yeesu aahimpwehera matata, naanaanoru ookololowa ni apacera onvuwiha Muluku mwaha wookhalana ekumi yooreera ni otthikela okhalana ikuru aariiyena khalai! (Luka 13:10-13) Nthiyana ole aahikhalana mathowa ooreera yaamwiiriha onvuwiha Yehova ni hiyo-tho nookhalana.

MATHOWA SEENI ANNIIRIHA ONVAHA OVUWA YEHOVA?

 5. Mathowa seeni anniiriha onttittimiha Yehova?

⁵ Hiyo ninninvuwiha Yehova okhala wiira ninninttittimiha vawaatta. Aakhala mathowa awaatta anniiriha opaka elo. Yehova Nanwerya Dhootheene okhala wiira ookhalana owerya ohimmala. (Esal. 96:4-7) Odhuwela-we onnooneya oreela wa itthu opattunse iye, owo tonivanhe ekumi ni itthu dhootheene ninramela nhu wiira nikhale akumi. (Wiis. 4:11) Owo toororomeleya. (Wiis. 15:4) Itthu dhootheene ompaka iye dhinnikhumela saana ni okathi wootheene onnaakhwanihera itthu onlaihera iye. (Yox. 23:14) Ndho ti yeelo yaamwiirinhe profeeta Yeremiiya onleela Yehova wiira: ‘Naathanla atthu odhuwelasa a nlaponi mootheene, wala atthu oweryasa makhulupale-ya khannimphwanya onlikanannyuna.’ (Yer. 10:6, 7) Moohakanyera nookhalana mathowa awaatta ni ooreera anniiriha onttittimiha Tiithi nhu a wiirimu. Masi ohiya pahi Yehova opaka itthu dhinniiriha onttittimiha, owo ookhalana mikhalelo dhooreera dhinniiriha ompheta.

 6. Mathowa seeni anniiriha ompheta Yehova?

⁶ Hiyo ninninvuwiha Yehova okhala wiira ninnimpheta vawaatta. Vano nirowe noone mikhalelo dhawaatta dha Yehova dhinniiriha ompheta. Owo toomoriwa ikharari ni toothunku. (Esal. 103:13; Yes. 49:15) Vaavo dhinniphwanya awa mixankiho, owo onnoona owereya wihu. (Zak. 2:8) Owo oninikhalihera ondhuwela wiira akhale nxirikha nhu. (Esal. 25:14; Mit. 17:27) Yehova tawiiyeviha, ‘owo onnuurama wiira oone erimu ni elapo ya vathi, owo onninveiha ntthu awiiyeviha ori vantthupini.’ (Esal. 113:6, 7) Mikhalelo idha dhootheene, dhinniniiriha otthuna ovuwiha Yehova. —Esal. 86:12.

 7. Eparakha seeni yavameekhaaya nirinhuna?

⁷ Hiyo ninninvuwiha Yehova okhala wiira nintthuna wiira atthu akina endhuwele. Olelo-va, atthu awaatta khandhuwela ekhweeli voohima dha Yehova. Mwaha wa seeni? Okhala wiira Satana ohuumiha miyuupuwelo dha atthu ni onnimwarya-mwarya itthu dhawoothiwa voohima dha Yehova. (2 aKor. 4:4) Satana onniwiiriha atthu okhupali wiira Yehova tawaakuva onanariwa, khannithokorerya ni tonkhumihera mixankiho moolumwinkuni. Masi hiyo noodhuwela ekhweeli voohima dha Muluku nhu. Ndho nookhalana eparakha ya onvuwiha vaavo nnaakhalihera nhu atthu akina, odhuwela ekhweeli voohima dha owo. (Yes. 43:10) Esaalimu 96 enlotta voohima dha onvaha  ovuwa Yehova. Vaavo nin’ya nhu othokorerya moolumo ari Esaalimu ela, muupuwele inamuna nkhanle nnyu onvaha Yehova ovuwa omphwanela iye.

NIN’YA OWERYA DHAI ONVAHA YEHOVA OVUWA OMPHWANELA IYE?

 8. Nin’ya owerya dhai onvuwiha? (Esalimo 96:1-3)

⁸ Nsome Esalimo 96:1-3. Hiyo ninoowerya onvuwiha Yehova oreela wa itthu ninlotta nhu voohima dha veene. Iveersu idha, arumeyi a Yehova annitumereryiwa ‘omwiipela Yehova,’ ‘ottottopela ndhina-ne,’ ‘olaleya ihapari dhooreera dha moopora Muluku oniwoopola iye atthu’ ni ‘eriyari ya maloko olaleya ovuwa-we.’ Ndho ninoowerya onvuwiha Tiithi nhu a wiirimu nirumeelaka inamuna idha dhoovirikana. Khalai ayuuda oororomeleya ni Makiristau a eseekulu yoopacera, khiyoovelenle waaleela atthu akina itthu dhawaatta dhooreera Yehova aapakenle awa ni waakihera ontthu-ye. (Dan. 3:16-18; Mit 4:29) Ndho nin’ya owerya dhai otthara ntakihero-na?

9-10. Eseeni munhudha nnyu ni yawiiraneya ya Angelena? (Moone-tho efootu.)

⁹ Moone yawiiraneya ya nrokora Angelena, a yoowo onkhala wEstados Unidos. Moolipa nrima owo aahivaanyiha miyoonelo dhoohiloka atthu akina yaaraawana voohima dha Yehova ontekoni-we. Okhala wiira owo vamodha ni atthu akina ampaceraru ovara nteko, yaahilaleiwa wiira yairele mphantta nthukumano mmodha yoowo waaya waavaha eparakha ya olotta dhaawiiraneya dha mweekumini-mwa. Angelena aahilakela ohilokihera ifootu wiira oonihere ni alotte ekumi yoohakalaliha oriiyena mwaha wa okhala Namoona a Yehova. Ndho ahinatthi wiitthaniwa wiira alotte yawiiraneya ya mweekumini-mwe, aahiitthaniwa koleeka-ye mmodha apacera olotta wiira aahuiwale ettheko ya Anamoona a Yehova. Owo aahipacera waalotta voohiloka Anamoona a Yehova vamodha ni dhookhupali-dha. Angelena onlotta wiira: “Miyo kaahipacera woova nrima okakitthimaka. Masi kaahidhuwela wiira ele koleeka aka ole aalotta iye voohima dha Yehova yaari etthu yawoothiwa. Ndho kaahuupuwela wiira: ‘Nkinreerela omaala kihaana waaleela atthu ala ekhweeli voohima dha Yehova.’”

¹⁰ Noomala koleeka-ye ole omaliha olotta, mwawaakuveya Angelena aahipaka nivekelo nookhuveya mpuwa-mpuwa. Ndho Angelena aahimwaattamela ni apacera onleela mooreera nrima airaka: “Yawiiraneya nnyu enoophwana ni yaaka ni miyo-tho kihuiwale ettheko ya Anamoona  a Yehova ni mpakha olelo ka Namoona a Yehova.” Hata oova, Angelena khaahin’ye okhala oomaaleleya. Owo aahipacera owoonihera ni waaleela atthu aavaraiyeena nteko ifootu-dhe dhoohakalaliha dheidho aakhuminhe iye ari vamodha ni axirikha-ye enrumeelaka Yehova vamodha moohakalala. Mwa nttittimiho Angelena aahilotta dhookhupali-dhe. (1 Ped. 3:15) Noomala Angelena omaliha olotta, nlopwana ole aahimaaleleya. Ndho nlopwana owo aahuupuwela itthu dhoohakalaliha dhaairanen’ye okathi aahuiwale iye ettheko emodha ya Anamoona a Yehova. Angelena onlotta wiira: “Yehova onniphwanela waakihiwa, eparakha yuulupale waakihera ndhina na Yehova.” Nitho hiyo nookhalana eparakha ya onttottopela Yehova ni onvuwiha hata atthu akina ehinttittimihaka.

11. Okhuma khalai mpakha olelo-va, arumeyi a Yehova anvarihela dhai nteko yawaatikhiwa ya Esalimo 96:8?

¹¹ Ninoowerya onvuwiha Yehova ninvahaka itthu dha faita nirinhuna. (Nsome Esalimo 96:8.) Okhuma khalai arumeyi a Yehova annivuwiha owo erumeelaka enamuna ela. (Mir. 3:9) Mwa ntakihero, aisarayeeli yaahivaha itthu dha faita yaraawana wiira ekhalihere otekiwa ni okociheriwa etempulu. (2 Mam. 12:4, 5; 1 Wah. 29:3-9) Ahudheri akina a Yeesu yaahinkhalihera owo vamodha ni arummwa-ye ‘erumeelaka mireerelo-dha.’ (Luka 8:1-3) Nitho Biibiliya onlotta wiira Makiristau a eseekulu yoopacera yaahipaka etthu emodharu wiira yaakhalihere anna ni arokora yaawo yaaphwanyiwe etala. (Mit. 11:27-29) Olelo-va, hiyo ninoowerya onvuwiha Yehova nirumeelaka dhoovaha dhihu dhoohikhanyereriwa.

12. Dhoovaha dhihu dhininvuwiha dhai Yehova? (Moone-tho efootu.)

¹² Moone yawiiraneya emodha enoonihera moopora dhoovaha dhihu dhininvuwiha awa Yehova. Yoohima emodha ya 2020 ennilotta etthu yaakhumelenle oZimbábue mwaha wa othowa epula. Atthu awaatta yaahaaphwanya etala yuulupale onhela mpuwa nrokora mmodha oniitthaniwa Prisca mwaha wa othowa eyooca. Hata waakhumelenle nxankiho ole, Prisca khaahin’ye otthara eprokaraama-ye ya nteko woolaleerya, khuta neeraru ni neethanu aanikhuma nteko woolaleerya hata waari okathi woolima. Ndho okhala wiira mahiku makina aanilova omatta wiira arowe nteko woolaleerya, atthu aattamanneiyena yaahipacera ontheya yiiraka: “Nyuwo nnookhwa etala.” Masi okhala wiira Prisca aaninroromela Yehova, owo aaniwaakhula airaka: “Yehova khankhala-khala aanyanyalaka arumeyi-ye.” Noovira okathi  vakhaani, ntthenkeso nhu waahinkhalihera nrokora ole onvahaka itthu dhanthowa. Prisca aahiwerya ophwanya eyooca ni itthu dhikina dhanthowa mwaha wa dhoovaha dha anna ni arokora. Ndho atthu aattamanneiyena yaahixanka epacera onleela wiira: “Muluku khanatake woonyanyalani, ndho hiyo ninnitthuna ondhuwela.” Noomala anamwaattamanani-ye 7 yaahipacera orowela mithukumano.

13. Eseeni ninreerela nhu opaka wiira mweettelo nhu onvuwiha Yehova? (Esalimo 96:9)

¹³ Nsome Esalimo 96:9. Ninoowerya onvuwiha Yehova ni mweettelo nhu. Anankuttho yaarumeela ntempulu mwa Yehova yaatthuneya okhala atthu eepewe. (Okhu. 40:30-32) Nihaana okhala atthu eepewe, ohiya nkhalelo wa veerutthuni pahi, masi nixakaka opaka itthu dhootheene Yehova onnyokha iye. (Esal. 24:3, 4; 1 Ped. 1: 15, 16) Nitho nihaana wiilipihera vawaatta wiira ‘nirule ontthu wa khalai’ nixakaka mweettelo ni opaka itthu ininnanara Yehova ni owara ‘ontthu wa naanaano’ nipakaka itthu ni wuupuwela mwa enamuna enoonihera wiira ninnitakiha mikhalelo dha Yehova. (aKol. 3:9, 10) Hata atthu ampaka itthu dhootakhala, ekhaliheriwaka ni Yehova anoowerya opaka marukunuso ni owara ontthu wa naanaano.

14. Yawiiraneya ya Jack ennihudhihani? (Moone-tho efootu.)

¹⁴ Vano nirowe nithokorerye yawiiraneya ya Jack, owo aari ntthu ootakhala ni awoopiha ni aaitthaniwa ‘Satana.’ Mwaha woopaka ikirime, Jack aahilamuliwa wiiphiwa. Alipelelaka nihiku aaya iye wiiphiwa, Jack aahipacera onsoma Biibiliya noomala munna mmodha osekurya ekateya aatthukeliwe iye. Hata Jack aari ntthu ootakhala, aahiwerya opaka marukunuso, noovira okathi aapatisiwa ni akhala Namoona a Yehova. Marukunuso muulupale Jack aapake iye, yaahiwiiriha makwaarta a nkateya wunla elaihanaka nuuwo noomala ophiya nihiku aaya iye wiiphiwa. Nkhulupale mmodha onvara nteko ekateya ele onlotta wiira: “Jack aari naperesu ootepa otakhala nrima otanke otthukeliwa opuro ola. Masi nenna owo ntthu ooreera nrima.” Noomala esumana emodha Jack aiphiwe, anna yaahoolela mithukumano dha eriyari ya esumana nkateya, yaahimphwanya peresu mmodha areenle woona mithukumano evaara yoopacera. Eseeni yaamwiirinhe oreela woona nthukumano ole? Owo aatikinihen’ye ni marukunuso aapanke Jack, ndho aatthuna odhuwela etthu aareerela iye opaka wiira apacere onrumeela Yehova. Yawiiraneya ya Jack ennihudhiha  wiira mweettelo nhu onoowerya onvuwiha Tiithi nhu a wiirimu! —1 Ped. 2:12

YEHOVA ON’YA OVUWIHA DHAI NDHINA-NE NHOOLO?

15. Yehova on’ya ovuwiha dhai ndhina-ne nhoolo? (Esalimo 96:10-13)

¹⁵ Nsome Esalimo 96:10-13. Iveersu idha dhookhidhera dha Esalimo 96 dhinninlotta Yehova okhala Mphuki ni Mwene a xariya. Yehova on’ya ovuwiha dhai ndhina-ne nhoolo? Owo onoopaka elo aaphukelaka atthu mwaxariya. Moohilekela, Yehova onoompwetesa Babilooniya Muulupale okhala wiira itiini dhawootha dhinnipaka itthu dhawaatta dhootakhala ni dhinnihudhiha itthu dhawootha voohima dha veene. (Wiis. 17:5, 16; 19:1, 2) Noomala Babilooniya Muulupale apwetesiwa, woonawene atthu akina pooti othanla onkokhorela Yehova vamodha ni hiyo. Ndho arumeelaka ekhotto a Armaxedooni, Yehova onoopwetesa olumwinku wa Satana vamodha ni atthu ootheene anrukunuwenle ni annanariha ndhina-ne. Masi onoowoopola atthu ootheene animpheta, omwiiwelela ni andhiveliwa ovuwiha ndhina-ne. (Mar. 8:38; 2 aTes. 1:6-10) Nitho wookhidherani wa olamulelo wa eyaakha ekonto emodha wa Kiriistu, Yehova onootteeliha ndhina-ne moomalela ooniheraka wiira onniphwanela okokhoreliwa ni apinaatamu ootheene. (Wiis. 20:7-10) Okathi owo, ‘elapo yootheene enoodhala odhuwela wa ovuwa wa Yehova nkhama dhiidha ale maadhi andhala awa mpahari.’ —Hab. 2:14.

16. Eseeni nlakenle nnyu opaka? (Moone-tho efootu.)

¹⁶ On’ya okhala voohakalaliha okhala olumwinku atthu ootheene an’ya awa ovuwiha ndhina na Yehova nkhama nimphwanela awa. Nilipelelaka ophiya okathi owo, nihaana opaka itthu dhootheene ninwerya nhu wiira naalaleerye atthu akina voohima dha Yehova Muluku nhu. Nitho nihaana opaka itthu moovarihana ni ele ninlaleerya nhu. Ndho wiira nittittimihere mwaha ola wootthuneya, Nikhuru Noolamulela noothanla Esalimo 96:8 wiira ekhale yawaatikhiwa ya mwaakha wa 2025, yeelo eni: ‘Munvahe Yehova ovuwa omphwanela ndhina-ne.’