YOOSOMA YA MWAHA 45
NCIPO 138 Naattittimihe Atthu Oowuuluvala
Etthu Ninhudha nhu ni Moolumo Ookhidhera Arumeyi a Muluku Oororomeleya Akhalai
“Kiira atthu oowuuluvala tarina ankhili, ni atthu arina iyaakha sinceene tarina osuwela?”—YOOBI 12:12.
ETTHU NIN’YA NHU OHUDHA
Nin’ya woona moopora omwiiwelela Yehova omphwanyiha awa mareeliho ni ekumi yoohimala.
1. Eseeni ninrerela nhu opaka wiira nittottele nreerelo miruku dha anna ni arokora awuuluvala?
OOTHEENE nhu ninnitthuna okhaliheriwa vaavo nintthuna nhu opaka yoothanla yootepa otthuneya ya mweekumini. Okathi owo, asitokweene ni anna ni arokora olipa mwa omunepani pooti onikhalihera. Ndho nihuupuwele wiira miruku annivaha awa khadhinvareleya nteko okhala wiira tawuuluvala. Yehova ontthuna wiira nittottele nreerelo miruku annivaha awa. Anna ni arokora awo annidhuwela itthu dhawaatta ni aakhalana dhookumanana dha mweekumini okhala wiira aakhala iyaakha dhawaatta onixira hiyo—Yoobi 12:12.
2. Eseeni nin’ya nhu woona yoosoma ela?
2 Khalai Yehova aharumeela alopwana oororomeleya wiira yaalipihe ni eweettihe atthu-ye. Alopwana awo oororomeleya yahikhalana iyaakha dhawaatta. Mwa ntakihero, Moise, Davidi ni nrummwa Yoohaani. Makhalelo a ekumi-ya ni okathi yaakhala awa yaari oovirikana. Ehalaka vaakhani okhwa alopwana awo oororomeleya, yahavaha miruku dhoovareleya nteko marapasi ni yaahittittimihera otthuneya awa omwiiwelela Muluku. Ndho Yehova ohiiriha moolumo aalopwana awo waatikhiwa mBiibiliyani, wiira enihudhihe itthu dhawaatta. Ootheene nhu voohixikha akhala wiira na marapasi aahiidho na atthu awuuluvala ninoowerya ottottela nreerelo wawaatta itthu alopwana awo alontta awa. (aRo. 15:4; 2 Tim. 3:16) Yoosoma ela nin’ya woona moolumo ookhidhera aalopwana awo araru ni etthu moolumo awo annihudhiha awa.
‘NYUWO NNOOKHALA MAHIKU AWAATTA’
3. Itthu seeni Moise opanke iye?
3 Moise aahinrumeela Yehova ekumi-ye yootheene. Owo arumeela nkhama profeeta mphuki, nhooleli ni nlipa awaatikha. Moise aahihudha itthu dhawaatta mwaha wa itthu dhankhumelenle mweekumini mwe! Owo aahiwoopola aIsarayeeli yaawo yaari nkhama ipottha Weexitu ni aahoona miriirya dhawaatta Yehova apanke iye. Ohiya-vo, Yehova aahinrumeela Moise wiira aatikhe iliivuru 5 dhoopacera dha mBiibiliyani, Esaalimu 90 ni woonawene Esaalimo 91. Nitho woonawene omphwana nkhama wiira Moise taatinkhe eliivuru ya Yoobi.
4. Taani Moise avanhe iye miruku, ni mwaha wa seeni?
4 Ahalaka vakhaani okhwa, Moise okathi aariiyena iyaakha 120 ahaathukumanya aIsarayeeli ootheene wiira awuupusere itthu dhootheene Yehova awiirenle iye. Aisarayeeli akina okathi yarawa marapasi, yaahoona miriirya Yehova apanke iye ni moopora ahukhumme iye atthu a Weexitu. (Okh. 7:3, 4) Awo yaahoona vaavo Yehova ahunle iye Nlima Noosera wiira elapuwe, ni moopora Yehova ampwetense iye Farawu vamodha ni anakhotto-ye ootheene. (Okh. 14:29-31) Okathi yaaraawa moothakoni Yehova ahakhalihera ni ahaakhapelela. (Otu. 8:3, 4) Ndho ehalaka vakhaani aIsarayeeli ovolowa elapo yoolaiheriwa Moise ahaadhya okathi wiira aalipihe ekwaha yookhidhera. a
5. Nlipelelo seeni naavanha awa aIsarayeeli moolumo ookhidhera a Moise ari Otumererya 30:19, 20?
5 Eseeni Moise alontte iye? (Munsome Otumererya 30:19, 20.) Moise ahiwuupusera atthu a nloko na aIsarayeeli wiira yaanilipelela itthu dhoohakalaliha nhoolo. Ereelihiwaka ni Yehova, awo yankhala mahiku awaatta elapo yeelo Yehova alaihenra iye wiira amwaavaha. Elapo elo yaari yooreera ni yooruwerya! Moise aahilotta moopora elapo elo yaaya awa okhala, owo aalontte wiira: “Mittetthe sorera ni sulupale sahatenkyanyu, n’ipa sosareya mihakhu sinjene sahukenlyanyu, n’ihime sahathimpyanyu n’imatta sa miri sorera sahaphatteĩyanyu.”—Otu. 6:10, 11.
6. Eseeni yaamwiirinhe Yehova waahiya atthu a maloko makina yaatuphelaka aIsarayeelil?
6 Masi Moise aahaalopola atthu aIsarayeeli. Owo ahaaleela airaka, akhala wiira yaantthuna okhala mahiku awaatta elapo yooruwerya yaaya awa waakhela yahaana ohihiya omwiiwelela Yehova. Moise ahiwuupusera aIsarayeeli wiira tivootthuneya ‘othanla ekumi’, emwiiwelelaka Yehova ni ‘ettharaka dhooruma-dhe.’ Masi aIsarayeeli yaahikhootta omwiiwelela Yehova. Ndho mwaha wa elo, Yehova ahaahiya atthu a Waasiriya ni oBabilooniya etuphelaka elapo ele ni ewiirihaka aIsarayeeli okhala ipottha —2 Mam. 17:6-8, 13, 14; 2 Wah. 36:15-17, 20.
7. Moolumo alontte Moise annihudhihani? (Moone-tho efootu.)
7 Eseeni ninhudha nhu? Akhala wiira ninoomwiiwelela Yehova ninookhala mahiku ootheene. Nkhama dhiidhaale aIsarayeeli yaahala awa vakhaani ovolowa Elapo Yoolaiheriwa ni hiyo tho ninhala vakhaani ovolowa elapo epheya Yehova olaihenre iye. Moohilekela elapo yootheene enookhala eparayiisu. (Yes. 35:1; Luka 23:43) Satana vamodha ni malaikha ootakhala khanre etthikele waahapusa atthu. (Wiis. 20:2, 3) Itiini dhootheene dhinhudhiha itthu dhawootha voohima dha Yehova inoopwetesiwa. (Wiis. 17:16) Khaavo on’ya ohaawa mwaha wa mixankiho dhinkhumiheriwa ni ikuveernu dha apinaatamu. (Wiis. 19:19, 20) Yehova khanne awaakhulelihe ovolowa mparayiisu atthu ankhumihera mixankiho. (Esal. 37:10, 11) Atthu ootheene ekamwiiwelela malamulo a Yehova, ndho elo enookhumihera nrettele wawaatta ni wiiraana valaponi. Ohiya-vo, atthu ekamoonihera ophetana ni ororomelana nkina ni nkhwe. (Yes. 11:9) Voohaakanyera hiyo ninnilipelela ophiya okathi owo! Ndho naahihiye omwiiwelela Yehova, ninookhalana eparakha yookhala mparayiisu valaponi vaava ohiya mwa iyaakha vakhaani, masi mwa mahiku ootheene.——Esal. 37:29; Yohani 3:16.
Akhala wiira ninoomwiwelela Yehova, ninookhala mparayiisu valaponi vaava ohiya mwa iyaakha vakhaani, masi mwa mahiku ootheene (Moone ettima 7)
8. Yoolaihera ya ekumi yoohimala yankhalihenre dhai misiyonaariyu mmodha? (Yuda 20, 21)
8 Akhala wiira ninawuupuwela yoolaihera ya Yehova ya onivaha ekumi yoohimala, enoonikhalihera ohihiya omwiiwelela Yehova voohixikha mixankiho dhikhanle onikhumelela mweekumini mwihu. (Munsome Yuda 20, 21.) Yoolaihera elo enoowerya onivaha ikuru ninramela nhu wiira niwerye owanana ottettheya wihu. Munna mmodha onrumeela nkhama misiyonaariyu mwa iyaakha dhawaatta wÁfrica, onlotta wiira ivaara dhawaatta aaneehereryiwa opaka etthu ehinindhivela Yehova. Owo onlotta wiira: “Noomala woona wiira nkarowa ovolowa mparayiisu kahimwiiwelele Yehova kahilakela opaka itthu dhootheene wiira kiwerye owanana nxankiho kaarakana ni kaahinvekela Yehova wiira akikhalihere. Ndho kikhaliheriwaka ni Yehova koowerya omaliha nxankiho owo.”
‘NNOOVARA ITTHU NI MIRUKU’
9. Mixankiho seeni Davidi ovirinhe iye mweekumini mwe?
9 Davidi aari mwene oororomeleya wa Yehova. Nitho aari nlipa a wiipa macipo, poweta, nakhotto ni profeeta. Masi owo aahiviriha mixankiho dhawaatta. Mwa ntakihero mwa iyaakha dhawaatta khuta opuro aakhala iye antthawa oovaka wiiphiwa ni Sawuli, yoowo ankhalela nrima. Noomala okhala mwene, Davidi aahitthawa wiira oopole ekumi-ye okhala wiira mwane Absalooni atthuna omwiipha wiira anranttele. Hata Davidi arina mixankiho ni dhoottettheya dhikina dha veerutthuni owo khaahin’ye okhala oororomeleya wa Yehova ekumi-ye yootheene. Ndho elo yaahimwiiriha Yehova olotta wiira: ‘Owo onnihakalaliha nrima aka.’ Tivondho tivootthuneya ovaha ephoole miruku Davidi ovanhe iye!—Mit. 13:22; 1 Mam. 15:5.
10. Eseeni yaamwiirinhe Davidi onvaha miruku mwane Salomooni ahinatthi okhala mwene?
10 Mwa ntakihero, moone miruku Davidi anvanhe iye mwane Salomooni yoowo aaya okhala mwene oottharela awiisarayeeli. Yehova ahinthanla Salomooni yoowo ari rapasi wiira ateke etempulu opuro yoowo atthu yaaya awa ekankokhorela Yehova. (1 Wah. 22:5) Salomooni ahikhalana nteko wawaatta areerela iye ovara nhoolo ni aanitthuneya okhaliheriwa ni Yehova wiira awerye waalamulela saana atthu. Ndho eseeni Davidi alontte iye wiira ankhalihere Salomooni? Nirowe noone.
11. Moovarihana ni 1 Mamwene 2:2, 3, miruku seeni Davidi anvanhe iye Salomooni ni itthu seeni dhooreera dhaakhumelenle vaavo Salomooni amwiiwelela iye Yehova? (Moone-tho efootu.)
11 Eseeni Davidi aalontte iye? (Munsome 1 Mamwene 2:2, 3.) Davidi aahinleela mwane wiira akhala wiira ammwiiwelela Yehova, amphwanya mareeliho awaatta mwekumini mwe. Mwa iyaakha dhawaatta Yehova ahinvaha itthu dhawaatta dhooreera Salomooni ni ahinkhalihera mwa inamuna dhoovirikana. (1 Wah. 29:23-25) Salomooni aahiteka etempulu yuulupale ni ohaatikha iliivuru dhikina dha mBiibiliyani ni moolumo makina aalontte iye ahaatikhiwa iliivuru dhikina dha mBiibiliyani. Nitho owo aahivuwa mwaha wa akhili ni mihakhu aariiyena (1 Mam. 4:34) Masi nkhama Davidi aalontte iye, Salomooni ankhumela saana mwekumini mwe akhala wiira ammwiiwelela Yehova. Mooripiha nrima noomala Salomooni wuuluvala ahipacera waakokhorela amuluku akina. Mwaha wa opaka elo, Yehova aahihiya onkhalihera Salomooni, ndho owo khaawenrye waalamulela atthu mwa xariya ni mwa akhili.— 1 Mam. 11:9, 10; 12:4.
Moolumo ookhidhera Davidi anleenle iye mwane Salomooni, anninikhalihera wiiwasasa wiira namwiiwelela Yehova, owo onoonivaha akhili an’ya onikhalihera opaka dhoothanla dhooreera (Moone ettima 11-12) b
12. Eseeni ninhudha nhu ni miruku dha Davidi?
12 Eseeni ninhudha nhu? Omwiiwelela Yehova onniphwanyiha mareeliho. (Esal. 1:1-3) Ekhweeli wiira olelo, Yehova khanlaihera oniiriha okhala oothaciri ni oovuwa nkhama Salomooni. Masi akhala wiira ninoomwiiwelela Muluku nhu, okathi wootheene owo onoonivaha miruku ninramela nhu, wiira niwerye opaka dhoothanla dhooreera. (Mir. 2:6, 7; Yak. 1:5) Miruku Yehova onnivaha iye pooti onikhalihera opaka dhoothanla voohima dha nteko, osoma, nsurukhu ni maraarelo. Ndho akhala wiira ninoovarihela nteko mweekumini mwihu miruku idho, dhinoonikhalihera oxaka mixankiho dhawaatta. (Mir. 2:10, 11) Ohiya-vo, ninookhalana axirikha ooloka ni odhuwela etthu nikhanle nhu opaka wiira nikhalena ettheko yoohakalala.
13. Eseeni yankhalihenre Carmen opaka yoothanla yooreera?
13 Carmen yoowo onkhala oMoçambique, uupuwela wiira akhala wiira ansoma iskola dhuulupale, ankhalana makhalelo ooreera. Owo aahirowa wuuniversitaati wiira ahudhe oteka mampa muulupale. Carmen onlotta wiira: “Miyo dhaanikidhivela itthu kaahudhaaka, masi nkaakhalana nnakhala okathi wiira kivare itthu dhikina. Miyo kaapacera osoma 7:30 ni kuuruwa 18:00. Ndho mwaha wa elo, wanikiliperya orowela mithukumano ni waataana waka ni Yehova waahipacera ovukuwa. Vanrimani vaka kahoona wiira veekhweeli kaarumeela mapatarawu maili.” (Math. 6:24) Noomala owo ahinvekela Yehova anleelaka nxankiho ole aviriha iye ni ahithokodha iliivuru dhihu. Carmen onlotta wiira: “Noomala asitokweene ni amma okivaha miruku, kaahilakela ohiya osoma wuuniversitaati wiira kiwerye onrumeela Yehova okathi wootheene. Miyo nkinaakanyera wiira koopaka yoothanla yoorera mweekumini mwaka, ndho kinnihakalala mwaha woopaka elo.”
14. Miruku seeni dhootthuneya Moise ni Davidi anivanha awa?
14 Moise ni Davidi yaanimpheta vawaatta Yehova ni yaanidhuwela wiira tivootthuneya omwiiwelela. Moolumo ookhidhera aalontte Moise ni Davidi ahalaka vakhaani okhwa yahaatumererya atthu akina otthara ntakihero-na. Nitho yaahoonihera wiira ale anhiya omwiiwelela Yehova, anniyelela waakhela mareeliho-ye. Miruku awo avanha awa pooti onikhalihera hiyo olelo-va. Noovira iyaakha dhawaatta nrumeyi nkina ororomeleya a Yehova, aahoonihera wiira tivootthuneya ohihiya okhala ororomeleya wa Muluku nhu. Vano nirowe noone itthu vakhaani voohima dha owo.
‘KHIYAAVO ETTHU EKINA ENKITTEELIHA NRIMA DHIIDHO’
15. Itthu seeni nrummwa Yoohaani oonne iye dhiireyaka?
15 Yoohaani aari nhudheri aphetiwa vawaatta ni Yeesu. (Math. 10:2; Yohani 19:26) Owo aaninhoola Yeesu okathi aavara iye nteko woolaleerya valaponi, ahoona miriirya apanke iye ni okathi wooxankiha aakhala vamodha nuuwo. Owo aahimoona Yeesu okathi iiphiwa iye ni noomala ohihimusiwa. Nitho noovira okathi Yoohaani ahoona waacerereya wa Makiristau. Owo ahikhala iyaakha dhawaatta wiira oone moopora ihapari dhooreera ‘yaalaleeriwa awa atthu ootheene vathi-va.’—aKol. 1:23.
16. Taani anlipihiwa ni iwarakha Yoohaani aatinkhe iye?
16 Noomala Yoohaani wuuluvala aahikhalana eparakha yawaatikha eliivuru ya Wiidhuupulula, yeelo enlotta itthu ‘Yeesu Kiristu oonihenre iye.’ (Wiis. 1:1) Nitho Yoohaani ohaatikha evanxeelyu erina ndhina-ne ni iwarakha ikina tthaaru uupuseriwe iye waatikha ni Muluku. Ndho ewarakha ya neeraru Yoohaani ahimwaatikhela Nkiristau ororomeleya aitthaniwa Kaayo, yoowo ampheta iye nkhama mwane. (3 Yohani 1) Woonawene Yoohaani ahikhalana ane oomunepani apheta iye vawaatta. Ele nlopwana ola ororomeleya aatinkhe iye, ennaalipiha atthareli ootheene a Yeesu okhuma okathi ole mpakha mahiku nhu ala.
17. Moovarihana ni 3 Yohani 4, eseeni enniiriha ohakalala?
17 Eseeni Yoohaani aatinkhe iye? (Munsome 3 Yohani 4.) Yoohaani aatinkhe wiira omwiiwelela Yehova onniphwanyiha ohakalala wawaatta. Okathi aatinkhe iye ewarakha ya neeraru, atthu akina yaaira emwaryamwaryaka dhoohudhiha dhawootha ni ekhumiheraka mixankiho mmulokoni. Masi moohakalaliha atthu akina khiyaahin’ye ‘weettela ekhweeli.’ Awo yaanimwiiwelela Yehova ni khiyaahin’ye weettela dhooruma-dhe. (2 Yohani 4, 6) Atthu awo oororomeleya khiyahakalalinhe pahi nrima wa Yoohaani, masi-tho yaahinhakalaliha Yehova.—Mir. 27:11.
18. Eseeni ninhudha nhu ni moolumo a Yoohaani?
18 Eseeni ninhudha nhu? Vaavo ninkhala nhu oororomeleya wa Yehova ninniphwanya ohakalala. (1 Yohani 5:3) Mwa ntakihero, hiyo ninnihakalala mwaha woodhuwela wiira ninnihakalaliha nrima wa Yehova. Yehova onnihakalala vawaatta vaavo onnoona iye wiira ninniilipihera okhootta dhaweeha dhoolumwinku ola ni ohihiya wiiwelela dhooruma-dhe. (Mir. 23:15) Nitho malaikha wiirimu annihakalala vawaatta vaavo nimpaka nhu elo. (Luka 15:10) Ohiya-vo, hiyo ninnihakalala vawaatta vaavo ninwoona nhu anna ni arokora ehihiyaka okhala ororomeleya hata yeehereriwaka aahiidho ottharatthariwa. (2 aTes. 1:4) Ndho, noomala opwetesiwa olumwinku wa Satana hiyo ninoohakalala mwaha woodhuwela wiira noowerya okhala oororomeleya wa Yehova mpakha wookhidhera.
19. Eseeni olontte iye nrokora mmodha oniitthaniwa Rachel voohima dha waahudhiha atthu akina ekhweeli? (Moone-tho efootu.)
19 Etthu ekina enniiriha ohakalala ori waaleela atthu akina voohima dha Yehova. Rachel yoowo onkhala oRepública Dominicana, onlotta wiira onnoona okhala eparakha yuulupale waaleela atthu akina voohima dha Yehova. Awuupuwelaka atthu ootheene akhalihenre iye ondhuwela Yehova, owo onlotta wiira: “Onnikivila olotta ohakalala kinoonaka, vaavo kinwoona aka atthu kaakhalihenre aka ondhuwela Yehova epakaka marukunuso mweekumini-mwa ni epaceraka onroromela Yehova moomalela. Ohakalala iwo onnikiiriha oliyala mixankiho kivirinha aka aahiidho itthu kipanka aka wiira kiwerye waakhalihera atthu awo odhuwela ekhweeli.”
Hiyo ninnoona okhala etthu yoohakalaliha waahudhiha atthu akina ompheta Yehova (Moone ettima 19)
NHUDHE ETTHU NI MOOLUMO OOKHIDHERA ARUMEYI OOROROMELEYA
20. Eseeni ninlikananhuna Moise, Davidi ni Yoohaani?
20 Moise, Davidi, ni Yoohaani, yaakhala okathi woovirikana ni okathi ninkhala nhu. Masi hata eri dhiidho, yookhala etthu ninlikananhuna. Awo yanrumeela Muluku ekhweeli Yehova, yoowo nininrumeela nhu. Nkhama awo yaapaka awa, hiyo ninninvekela Yehova, onroromela ni otthara malakihero-ye. Ohiya-vo, nkhama arumeyi awo oororomeleya, hiyo ninnikhupali wiira Yehova onnaareliha vawaatta atthu ootheene ammwiiwelela.
21. Mareeliho seeni anlipelela awa ale antthara miruku dha Moise, Davidi ni Yoohaani?
21 Moohakanyera, hiyo nintthuna ovarihela nteko miruku arumeyi awo awuuluvala anivanha awa ni omwiiwelela Yehova. Ndho napaka elo, Muluku nhu onoonivaha mareeliho awaatta. Nitho ninookhalana eparakha ya “okhala mahiku awaatta,” aayo mwa mahiku ootheene! (Otu. 30:20) Ninoohakalala mwaha wa ondhiveliha Tiithi nhu a wiirimu oopheta, yoowo on’ya onitthuvela nhoolo mwa enamuna nihinuupuwela nhu.—aEefe. 3:20.
NCIPO 129 Nimphavela Ovilela
a Aisarayeeli akina yoonne miriirya Yehova apanke iye Nlima Noosera yahiyeleela eparakha ya woona Elapo yoolaiheriwa. (Moth. 14:22, 23) Yehova aalontte wiira atthu ootheene yaarina iyaakha dhaaxira 20 yaankhwa moothakoni. (Moth. 14:29) Masi Yooxuuwa, Kalebi ni atthu akina yaari marapasi ni yaari a nihimo na Levi yahikhalana eparakha ya olapuwa Muro Yordaani ni ovolowa elapo yoolaiheriwa.—Otu. 1:24-40.
b OTTHOKIHERIWA WA EFOOTU: Moono weethiyana: Davidi anvahaka miruku dhookhidhera mwane Salomooni. Moono weelopwana: Anna ni arokora eri eskola ya mapiyoneeru evahaka ephoole miruku anvahiwa awa ni Yehova.
