YOOSOMA YA MWAHA 44
NCIPO 33 Ninvahererye Yehova Ovelavela Wahu
Moopora Woovilela Ohixariya
“Muhihiye muxinttiwaka ni sootakhala, masi muxintteke sootakhala mwiiraka sooreera.”—AROMA 12:21.
ETTHU NIN’YA NHU OHUDHA
Nin’ya woona moopora woovilela ohixariya wiira nixake opaka etthu ekhanle otepiha itthu.
1-2. Inamuna seeni nikhanle nhu othokoreriwa voohixariya?
YEESU aahilotta nlikanyinho nimodha na naankhweli yoowo aathipelela onvekela mphuki omwiirela exariya. Moohakanyera yawiiraneya ela yaahapara nrima ahudharei a Yeesu, okhala wiira atthu awaatta okathi ole yaanithokoreriwa voohixariya. (Luka 18:1-5) Nitho nlikanyiho nna pooti onikhalihera olelo-va, okhala wiira ivaara dhikina pooti othokoreriwa voohixariya.
2 Olelo olumwinku wootheene, woodhareya nthalu, ohooneliwa vathu ni olavilavi, ndho mwaha wa elo, hiyo khanintikhina vaavo ninthokoreriwa nhu voohixariya. (Mus. 5:8) Woonawene hiyo khaninlipelela wiira anna ni arokora enithokorerye voohixariya, masi elo pooti wiiraneya. Moovirikana ni atthu akina, anna awo khanlakela opaka elo. Elo enniiraneya okhala wiira toohimalela. Masi woona moopora Yeesu oonela iye vaavo athokoreriwa iye voohixariya, enoonikhalihera woona etthu ninreerela nhu opaka vaavo eniiraneya awa elo. Ndho okhala wiira niniilipihera okhala oopisa nrima vaavo ninthokoreriwa nhu voohixariya ni atthu ahininrumeela Yehova, nihaana waapisera nrima anna ni arokora! Niire Yehova onnoona vaavo ninthokoreriwa nhu voohixariya ni atthu a nlaponi aahiidho mmulokoni? Niire owo onninicali?
3. Eseeni ennikhupaliha wiira Yehova onnoona moopora atthu akina annithokorerya awa?
3 Yehova onnoona moopora atthu akina annithokorerya awa. ‘Yehova ennimudhivela exariya.’ (Esal. 37:28) Nitho Yeesu olaihera wiira waphiya okathi wooreerela Yehova ‘khanrowa olekela opaka exariya.’ (Luka 18:7, 8) Moohilekela owo onoomaliha itthu dhootheene dhootakhala dhinnikhumihera mixankiho, ohela mpuwa inamuna dhootheene dha ohixariya.—Esal. 72:1, 2.
4. Yehova onnikhalihera dhai olelo-va?
4 Ndho nilipelelaka ophiya okathi Yehova on’ya iye omaliha mixankiho dhootheene, nenna Yehova onninikhalihera odhuwela etthu ninreerela nhu opaka vaavo ninthokoreriwa nhu voohixariya. (2 Ped. 3:13) Owo onninihudhiha moopora wookhalana moonelo wooreera wiira nihipake etthu ekhanle onikhumihera mixankiho. Ohiya-vo, oreela wa Mwane Yeesu, Yehova oonivaha ntakihero noomalela ninnikhalihera woona moopora woovilela ohixariya. Nitho owo onninivaha miruku anrumeelaka Biibiliya wiira anoonihere etthu ninreerela nhu opaka okathi ninthokoreriwa nhu voohixariya.
NKHALENA EPHOOLE NI MOOPORA NNOONELA NNYU OHIXARIYA
5. Seeni ninreerela nhu okhalana ephoole ni moopora ninoonela nhu ohixariya?
5 Hiyo pooti woona owereya ni onyoonyiheya mwaha wa ohixariya. (Mus. 7:7) Nitho arumeyi a khalai oororomeleya nkhama Yoobi ni Habakukhi yaataka woonela dhiidho. (Yoobi 6:2, 3; Hab. 1:1-3) Ekhweeli wiira kahi etthu yootakhala okhalana moonelo owo, masi nihaana okhalana ephoole wiira moonelo nhu ohiniirihe opaka etthu nihuupuwenle.
6. Eseeni ninhudha nhu ni ntakihero na Absaloomi? (Moone-tho efootu.)
6 Vaavo ninoona nhu wiira noothokoreriwa vootakhala aahiidho ntthu ninimpheta nhu oothokoreriwa voohixariya, woonawene elo pooti oniiriha omunlela ikuhu ntthu owo aahiidho omwiirela etthu oniirenle iye. Masi opaka elo pooti otepiha itthu dhikina. Nirowe nithokorerye ntakihero na mwaana a Mwene Davidi aitthaniwa Absaloomi. Owo ahinanariwa noomala odhuwela wiira nrokoriye Tamaare ahitupheliwa ni nhimaye Aminooni unkeiyena opaapa. Ndho moovarihana ni nlamulo na Moise, Aminooni anireerela wiiphiwa mwaha wa etthu apanke iye. (Onam. 20:17) Absaloomi aahikhalana mathowa awaatta yamwiiriha onanariwa, masi owo kharina ehakhi ya opaka exariya ni matata-ye.—2 Sam. 13:20-23, 28, 29.
Absaloomi ahinanariwa noomala nrokoriye Tamaare othokoreriwa voohixariya (Moone ettima 6)
7. Nasaalimu oonela dhai ohixariya oona iye?
7 Ivaara dhikina onkhala nkhama wiira atthu anaathokorerya atthu akina voohixariya khanhukhummwa, ndho elo pooti oniiriha opacera waakanyera akhala wiira opaka itthu dhooreera wookhalana efaita. Moone etthu yamwiiranenle nasaalimu, owo ahipacera woona wiira atthu yaapaka itthu dhootakhala yaanikhumela saana masi anaxariya yaanikhalana mixankiho dhawaatta. Owo aalontte wiira: “Okathi wootheene, atakhali khanixanka ni etthu.” (Esal. 73:12) Owo aahinyoonyiheya apacera waakanyera akhala wiira onrumeela Yehova waahikhalana efaita, ndho elo yahimwiiriha olotta wiira: ‘Okathi kaadhyaka odhuwela saana etthu ene, elo yaahikixankiha.’ (Esal. 73:14, 16) Nitho owo onnitthikela olotta airaka: “Miyo kaahanle vakhaani ohapuwa; kaahanle vakhaani otherekuwa.” (Esal. 73:2) Etthu emodharu yaataka omwiiranela munna mmodha nin’ya nhu omwiitthana Alberto.
8. Eseeni apanke iye Alberto noomala woona wiira ahithokoreriwa voohixariya?
8 Alberto aahootheriwa wiira aahiiya nsurukhu wa mmulukoni. Ndho mwaha wa elo, owo ahiyeleela iparakha ni atthu awaatta mmulokoni yaadhuwenle elo yaahihiya onttittimiha. Owo onlotta wiira: “Miyo kaahinanariwa, onyoonyiheya ni okhulumuwa vawaatta.” Etthu yairanen’ye yaahinwereya Alberto emwiiriha ottettheya nkhalelo wa omunepani, mpakha ohiya olaleerya ni orowela mithukumano mwa iyaakha 5. Etthu enkhumelenle Alberto pooti onikhumelela akhala wiira ninoohiya onanariwa oniirihaka opaka etthu vaaavo ninoona nhu wiira noothokoreriwa voohixariya.
MUNTAKIHE YEESU VAAVO MUNVILELA NNYU OHIXARIYA
9. Yeesu athokoreriwe dhai voohixariya? (Moone-tho efootu.)
9 Yeesu oonivaha ntakihero noomalela na moopora woovilela ohixariya. Nirowe nithokorerye moopora Yeesu athokoreriwa iye voohixariya ni amudhi-ye vamodha ni atthu akina. Amudhi-ye akina yaalotta wiira owo aari nlolo, ahooleeli a itiini yaalotta wiira owo eettihiwa ni minepa dhootakhala ni atoropa oRooma yaahinruwana, omooniha ekoyi noomala emwiipha. (Mar. 3:21, 22; 14: 55; 15:16-20, 35-37) Masi hata eri dhiidho, Yeesu aahiwerya ovilela ohixariya wootheene ahinlaka ikuhu. Ndho, eseeni ninhudha nhu ni ntakihero na Yeesu?
Yeesu oonivaha ntakihero noomalela na moopora woovilela ohixariya (Moone ettima 9-10)
10. Yeesu aavilenle dhai ohixariya? (1 Pedru 2:21-23)
10 Munsome 1 Pedro 2:21-23. a Yeesu oonivaha ntakihero noomalela voohima dha itthu ninreerela nhu opaka vaavo atthu akina annithokorerya awa vootakhala aahiidho voohixariya. Yeesu anidhuwela okathi wooreerela olotta ni omaala. (Math. 26:62-64) Owo khuumelela wiidhaakiha khuta etthu atthu yamoothera awa. (Math. 11:19) Okathi aalotta iye khaaruwana aahiidho owoopopiha atthu yanttharatthara. Owo aanipaka elo okhala wiira ‘aanroromela Muluku omphuka mwa xariya.’ Yeesu aanoona okhala etthu yootepa otthuneya odhuwela moopora Yehova oonela iye khuta mwaha. Nitho anikhupali wiira okathi wooreerela Yehova amphuka ohixariya wootheene.
11. Inamuna seeni ninreerela nhu okhalana ephoole vaavo ninlotta nhu? (Moone-tho ifootu.)
11 Ninoowerya ontakiha Yeesu nikhalanaka ephoole ni etthu ninlotta nhu vaavo ninthokoreriwa nhu voohixariya. Okathi nkina niniireliwa nhu itthu ikhaani dhoohixariya nihaana oliyala mwawaakuveya. Nitho ivaara dhikina pooti othanla omaala wiira nihilotte etthu en’ya otepiha mwaha. (Mus. 3:7; Yak. 1:19, 20) Woonawene ivaara dhikina, pooti otthuneya omwaakihera ntthu othokoreriwe vootakhala aahiidho olotta ekhweeli ni waakihera dhookhupali dhihu. (Mit. 6:1, 2) Masi vaavo nimpaka nhu elo, nihaana wiilipihera wiira nilotte moomaleleya ni mwa nttittimiho.—1 Ped. 3:15. b
Okathi ninthokoreriwa nhu voohixariya, ninoowerya ontakiha Yeesu nithanlaka ni ephoole okathi woolotta ni moopora woolotta (Moone ettima 11-12)
12. Eseeni ninreerela nhu opaka wiira nihihiye onroromela ‘Muluku omphuka mwa xariya’?
12 Nitho enamuna ekina nikhanle nhu ontakiha Yeesu ori onroromela ‘Muluku omphuka mwa xariya.’ Okathi atthu akina anniphukela awa aahiidho annithokorerya awa vootakhala, hiyo ninnikhupali wiira Yehova onnidhuwela itthu dhootheene dhiiranen’ye. Ndho elo enninikhalihera ovilela vaavo ninthokoreriwa nhu vootakhala okhala wiira ninnidhuwela wiira okathi wooreerela Yehova onoomaliha mwaha owo. Masi okathi ninhiya nhu itthu mmatani wa Yehova, enninikhalihera omaliha onanariwa ni ohipweha mathowa nixakaka ohiya itthu idho dhinnuwaka vanrimani vihu. Okhala wiira itthu idho pooti oniiriha opaka etthu yootakhala, omaliha ohakalala wihu ni ohonona waataana wihu ni Yehova.—Esal. 37:8.
13. Eseeni ekhanle onnikhalihera ovilela ohixariya moopisa nrima?
13 Ekhweeli wiira hiyo khaninwerya otthara moomalela ntakihero na Yeesu. Okhala wiira ivaara dhikina, hiyo pooti olotta aahiidho opaka etthu ekhanle oniiriha othanana noovira okathi. (Yak. 3:2) Ivaara dhikina itthu niniireliwa nhu pooti onniiriha okhalana mahalapa mmuupuweloni ni veerutthuni oolekela omala. Akhala wiira mwaataka othokoreriwa voohixariya nkhupali wiira Yehova onnidhuwela nxankiho munviriha nnyu. Nitho Yeesu, yoowo otanke othokoreriwa voohixariya khalai, onnoona owereya winyu. (aHeeb. 4:15, 16) Ohiya pahi Yehova onivaha ntakihero noomalela na Yeesu wiira nitthare, owo onninivaha miruku dhoovareleya nteko dhinnikhalihera ovilela ohixariya. Vano nirowe noone dhawaatikhiwa piili dha eliivuru ya aRoma dhikhanle onnikhalihera.
‘MUNHIYE MULUKU OONIHERE ONANARIWA-WE’
14. Ontaphuleleni ‘onhiya Muluku ooniheraka onanariwa-we’? (aRoma 12:19)
14 Munsome aRoma 12:19. Eseeni nrummwa Paaulu aatthuna iye olotta vaavo aavaha iye miruku Makiristau wiira ‘munhiye Muluku oonihere onanariwa-we’? Moovarihana ni moolumo ala, Paaulu aalotta onanariwa wa Yehova. Hiyo ninnihiya Yehova wiira oonihere onanariwa-we vaavo nininhiya nhu wiira aphuke mwaha mwa xariya okathi ontthuna iye ni mwa enamuna onoona iye oreerela. Munna mmodha oniitthaniwa John otanke othokoreriwa moohixariya, onlotta wiira: “Miyo kanireerela okhalana ephoole ni moopora kananariwaka wiira kihiphuke itthu mwa enamuna koonaka oreerela, masi opaka elo khiyaari etthu yookhweya. Yawaatikhiwa ya aRoma 12:19 yookikhalihera ohihiya onlipelela Yehova.”
15. Seeni eraawa etthu yootepa oreera onlipelela Yehova wiira aphuke mixankiho dhihu?
15 Vaavo nininhiya nhu Yehova wiira aphuke ohixariya, ninniphwanya mireerelo dhawaatta. Ndho opaka elo, enninikhalihera oxaka opwesera nritti woolemela ni onyoonyiheya mwaha wa weehererya ophuka mixankiho meekhinhu. Yehova ori olikaneene wiira anikhalihere. Vaavo ninthokoreriwa nhu voohixariya omphwana nkhama owo onlotta wiira: “Nkihiyere mwaha ola; Miyo kinoophuka.” Akhala wiira ninnikhupali ele Yehova onlaihera iye wiira “miyo kinawaatthikihera,” ninoowerya onhiyera mwaha nhu niroromelaka wiira Yehova onnidhuwela etthu yooreerela opaka. Elo etthu yaankhalihenre John, ninlotte nhu ottuli. Owo onlotta wiira: “Akhala wiira kinoonlipelela Yehova wiira aphuke nxankiho aka, kinoophwanya mireerelo dhawaatta oxira weehererya ophuka meekhaka.”
‘NXIRE DHOOTAKHALA MWIIRAKA DHOOREERA’
16-17. Ovekela on’ya onikhalihera dhai ‘oxira dhootakhala niiraka dhooreera’? (aRoma 12:21)
16 Munsome aRoma 12:21. Nitho Paaulu ahaavaha miruku Makiristau airaka: ‘Nxire dhootakhala mwiiraka dhooreera.’ Okathi Yeesu aariiye vamwaako Siyooni, aalontte wiira: ‘Nhihiye waapheta awanani nnyu ni waavekelela ale anoottharattharani.’ (Math. 5:44) Ndho ti yeelo Yeesu aapanke iye. Woonawene nyuwo munnuupuwela owereya Yeesu onne iye vaavo aakhomeliwa iye vanttaikhoni ni atoropa a oRooma. Owo ahivilela owereya wawaatta, othokoreriwa voohixariya ni vootakhala.
17 Yeesu khaahin’ye okhala oopheta ni ororomeleya wa Yehova, hata athokoreriwe voohixariya. Ohiya-vo, ohiya onvekela Yehova wiira awiirihe etthu yootakhala atoropa ale, owo aavekenle airaka: ‘Tiithi, mwaalevelele, maana khandhuwela etthu aniira awa.’ (Luka 23:34) Vaavo ninaavekelela nhu atthu annithokorerya mootakhala, enninikhalihera ohipweha mathowa aahiidho mayoko, onanariwa ni ennirukunsa moopora ninwoonela nhu atthu awo.
18. Ovekela waankhalihere dhai Alberto ni John ovilela ohixariya?
18 Ovekela waahaakhalihera anna naalotte nhu ottuli wa yoosoma ela ovilela othokoreriwa voohixariya. Alberto onlotta wiira: “Miyo kaahavekelela anna yaakithokorenrye voohixariya. Kaahinvekela ivaara dhawaatta Yehova wiira akikhalihere oliyala etthu yaakhumelenle.” Voohakalaliha, Alberto ootthikela onrumeela Yehova moororomeleya. John onlotta wiira: “Ivaara dhawaatta, kaaninvekelela munna akiveihale. Mwaha woopaka elo, Yehova okikhalihera ohipweha mayoko, olevelela ni ohimphukela munna ole. Ndho elo yookikhalihera ophwanya nrettele.”
19. Nlelo nilipelaka omala olumwinku ola wootakhala, eseeni ninreerela nhu opaka? (1 Pedru 3:8, 9)
19 Nlelo nilipelelaka omala olumwinku ola wootakhala ninoothokoreriwa voohixariya. Masi voohixikha itthu dhin’ya onikhumelela nhoolo, hiyo khaninhiya onvekela Yehova wiira anikhalihere. Ohiya-vo, nihihiye otthara ntakihero na Yeesu vaavo ninthokoreriwa nhu voohixariya ni ovarihela nteko malakihero a mBiibiliyani. Ndho napaka elo, nikhupali wiira Yehova onoonireeliha mahiku ootheene.—Munsome 1 Pedru 3:8, 9.
NCIPO 38 Yehova Onimoovahani Ikuru
a Pheeduru oopacera ekapiitulu 2 ni 3, nrummwa Pheeduru onnilotta inamuna dha ohixariya yaaviriha awa Makiristau a eseekulu yoopacera. Mwa ntakihero, ananteko akina yaanihadhuliwa ni mapatarawu-ya ni athiyana yaanihadhuliwa ni adhimamuna yaahakhanle Makiristau.—1 Ped. 2:18-20; 3:1-6, 8, 9.
b Moone eviidiyu eni: Moota ophenta Onniphwanyiha Aya Murettele Weekeekhai eri nsaaitini jw.org.
