YOOSOMA YA MWAHA 46
NCIPO 49 Nimuhakalalihe Yehova
Niire Munna Munniilipihera Wiira Nkhale Nrumeyi Ookhalihera?
“Ovaha onnitepa ohakalaliha ovikana ovahiwa.”—MIT. 20:35.
ETTHU NIN’YA NHU OHUDHA
Yoosoma ela enawaatumererya anna oopatisiwa wiilipihera wiira ekhale arumeyi ookhalihera.
1. Nrummwa Paaulu awoonela dhai arumeyi ookhalihera?
ARUMEYI ookhalihera annivara itthu dhawaatta wiira ekhalihere miloko. Nrummwa Paaulu anaavaha efaita yuulupale alopwana awo oororomeleya. Etthu enoonihera elo, okhala wiira okathi awaatikhenle iye ewarakha Makiristau a oFilipi ahaavaherera isalamu arumeyi ookhalihera vamodha ni asitokweene.—aFil. 1:1.
2. Munna mmodha onitthaniwa Luis onoonela dhai eparakha oriiyeena yookhala nrumeyi ookhalihera?
2 Anna awaatta oopatisiwa yaawo arina iyaakha dhoovirikana, annihakalala okhalihera mmulokoni nkhama arumeyi ookhalihera. Mwa ntakihero, Devan othanliwe okhala nrumeyi ookhalihera arina iyaakha 18. Masi munna mmodha oniitthaniwa Luis ahithanliwa okhala nrumeyi ookhalihera arina iyaakha 50. Owo onlotta wiira: “Miyo kinnoona okhala eparakha yuulupale okhalihera muloko kirumeelaka nkhama nrumeyi ookhalihera, saasaasa vaavo kinuupuwela aka opheta anna ni arokora ankoonihera awa!” Arumeyi ookhalihera awaatta anoonela dhiidho.
3. Eseeni nin’ya nhu woona yoosoma ela?
3 Akhala wiira nyuwo mwa munna oopatisiwa ni kahi mwa nrumeyi ookhalihera, nnoonela dhai okhalana yoolukama elo? Eseeni en’ya wookhaliherani opaka elo? Eseeni Biibiliya onlotta iye munreerela nnyu opaka, wiira nkhale nrumeyi ookhalihera? Yoosoma ela enoonikhalihera woona waakhuliwa wa makoho ala. Masi nihinatthi nirowe noone miteko nrumeyi ookhalihera onvara iye.
MITEKO SEENI ARUMEYI OOKHALIHERA ANVARA AWA?
4. Miteko seeni arumeyi ookhalihera anvara awa? (Moone-tho efootu.)
4 Arumeyi akina ookhalihera annikhapelela mittetthe aahiidho mithere ni iliivuru ninrumela nhu nteko wolaleerya. Akinaku ankhalihera nteko woorattela ni okocihera Empa ya Omwene. Nitho annithanliwa wiira ekhale anamathoonyera ni annikhapelela ikaruma dhinrumeeliwa wiira irumihiwe ni dhooniheriwe iviidiyu mmithukumanoni. Miteko dhawaatta arumeyi ookhalihera anvara awa ti dhuulupale ni dhinvekela ikuru. Masi anna awo alopwana oolipa mwa omunepani, annimpheta Yehova ni aneettela ele Biibiliya onhudhiha iye. Nitho annaapheta vawaatta anna ni arokora mmulokoni. (Math. 22:37-39) Eseeni munna oopatisiwa onreerela iye opaka wiira akhale nrumeyi ookhalihera?
Arumeeyi ookhalihera anintakiha Yeesu, yiivahereryaka wiira yaarumeele atthu akina (Moone ettima 4)
5. Eseeni en’ya wookhaliherani ophwanya eparakha ya okhala nrumeyi ookhalihera?
5 Biibiliya onnoonihera etthu munna onreerela iye opaka wiira athanliwe okhala nrumeyi ookhalihera. (1 Tim. 3:8-10, 12, 13) Nnoonela dhai osoma itthu anvekeliwa awa anna antthuna okhala arumeyi ookhalihera ni wiilipihera ovarihela nteko? Akhala wiira nnoopaka elo, enawookhaliherani waakhela eparakha elo. Masi nhinatthi nhaana wuupuwelela toko nthowa ninwiirihani otthuna okhala nrumeyi ookhalihera.
ESEENI ENWIIRIHANI OTTHUNA OKHALA NRUMEYI OOKHALIHERA?
6. Nkhalelo seeni okhanle wootumereryani opaka etthu wiira mwaakhalihere atthu akina? (Matheyo 20:28; moone-tho efootu ya .)
6 Muupuwele ntakihero nuulupale Yeesu onivanhe iye. Owo anipaka itthu dhootheene mwaha wa ompheta Tiithi-ye vamodha ni atthu. Opheta waahimwiiriha Yeesu wiilipihera waakhalihera atthu akina ni ovara miteko dhaavekela okhala awiiyeviha. (Munsome Matheyo 20:28; Yohani 13:5, 14, 15) Akhala wiira nnoopaka itthu dhootheene mwaha wa opheta, Yehova onawoorelihani ni onawookhaliherani waakhwanihera yoolukama nnyu yookhala nrumeyi ookhalihera.—1 aKor. 16:14; 1 Ped. 5:5.
Vaavo Yeesu arapinhe iye manawu arummwa, ahaahudhiha awo okhala a wiiyeviha ni waarumeela atthu akina, ohiya otthuna okhalana opuro woottittimiheya (Moone ettima 6)
7. Seeni munna onreerela oxaka okhala ntthu awiikuserera ni a nrima?
7 Olumwinku wootheene atthu annaaxankela atthu arina nrima ni anoonihera wiira tootepa otthuneya waaxira atthu akina. Munna onaarumeela atthu akina mwaha wa opheta antakihaka Yeesu, khampaka elo atthunaka okhalana owerya, okhulupale ni wiidhoonihera wiira tootepa otthuneya waaxira atthu akina. Vakhanle wiira onnithanliwa munna mmodha okhala nrumeyi ookhalihera mwaha wa okhalela nrima eparakha elo, woonawene akankhootta miteko dhikina dhootthuneya dhinvekela okhala a wiiyeviha wiira ikhapeleliwe ipwittipwitthi dha Yehova. Nitho akamwiidhoona okhala ntthu ootepa ophwanelela wiira avare miteko dhikina. (Yohani 10:12) Yehova khankhalakhala aarelihaka atthu ampaka itthu mwaha wa wiikuserera aahiidho antthuna woonihera wiira tootepa otthuneya.—1 aKor. 10:24, 33; 13:4, 5.
8. Miruku seeni Yeesu avanhe iye aummwa 12?
8 Ivaara dhikina axirikha a Yeesu, yaahehererya otthuna okhalana iparakha ni moonelo woohikhalela. Moone ele yairala awa arummwa a Yeesu Yakobu ni Yohani. Awo yahinvekela Yeesu wiira avahe opuro woottittimiheya Momweneni mwe. Yeesu khaattottopenle mwaha wa moonelo-ya wootthuna okhala ootthuneya waaxira atthu akina. Ohiya-vo, owo ahaleela arummwa ale 12 wiira: ‘Ole ontthuna okhala nkhulupale eriyari nnyu ohaana okhala nrumeyi nnyu, nitho ole ontthuna okhala oopacera eriyari nnyu ohaana okhala epottha nnyu.’ (Mar. 10:35-37 43, 44) Vaavo munna oniilipihera iye okhala nrumeyi ookhalihera ni moonelo wookhalela ori waarumeela atthu akina, owo onookhalihera vawaatta mmulokoni—1 aTes. 2:8.
MUN’YA OWERYA DHAI WAACERERA YOOTTHUNA NNYU YOOKHALA NRUMEYI OOKHALIHERA?
9. Eseeni munreerela nnyu opaka wiira mwaacerere yootthuna nnyu ya warumeela atthu akina?
9 Moohaakanyera, nyuwo munnimpheta vawaatta Yehova ni muntthuna waarumeela atthu akina. Hata eri dhiidho, woonawene nyuwo pooti ohitthuna okhala nrumeyi ookhalihera, okhala wiira moodhuwela wiira okhala nrumeyi ookhalihera onhela mpuwa miteko dhawaatta. Ndho eseeni munreerela nyu opaka wiira mwaacerere yootthuna nnyu ya waarumeela atthu akina? Enamuna emodha ekhanle wookhaliherani ori wuupuwelela ohakalala mumphwanya nnyu vaavo nnaakhalihera nnyu anna ni arokora. Yeesu olontte wiira: ‘Ovaha onnitepa ohakalaliha oxira ovahiwa.’ (Mit. 20:35) Yeesu oovaha ntakihero nooreera, owo aaniphwanya ohakalala weekhweeli mwaha wa waarumela atthu akina. Niho elo pooti wiiraneya ni nyuwo.
10. Eseeni enoonihera wiira Yeesu aanihakalala vaavo aarumela iye atthu akina? (Marko 6:31-34)
10 Moone ntakihero ninoonihera wiira Yeesu anihakalala vaavo aarumeela iye atthu akina. (Munsome Marko 6:31-34.) Evaara emodha Yeesu ni arummwa-ye yaahikhumuwa vawaatta. Ndho awo yaahirowa opuro woomaleleya wiira yaitthuwe. Masi nttitthi wa atthu waahiphiya opuro owo Yeesu ni arummwa-ye ehinaphiye, atthu awo yaatthuna wiiwa dhoohudhiha dha Yeesu. Woonawene Yeesu ankhootta okhala wiira owo ni arummwa-ye ‘khiyaarina okathi woomumula nnakhala wooca’, aahiidho Yeesu amwaahudhiha ikhweeli vakhaani noomala aamwarye. Masi Yeesu anaapheta vawaatta atthu. Ndho mwaha wa elo, owo aahipacera waahudhiha itthu dhawaatta’. Owo aahipaka elo mpakha ophiya odhoodhilo. (Mar. 6:35) Etthu yamwiirinhe Yeesu opaka elo khiwaari mwaha wookhanyereriwa, masi ‘waari mwaha wa owoonela othunku atthu. Owo anitthuna waahudhiha okhala wiira anaapheta. Ndho opaka elo yaninhakalaliha vawaatta.
11. Etthu seeni ekina Yeesu apanke iye wiira akhalihere nttitthi ole wa atthu? (Moone-tho efootu.)
11 Ohiya-vo, ohiya pahi ohudhiha itthu dhawaatta, Yeesu ahikhalihera nttitthi ole wa atthu mwa enamuna ekina. Owo ahaavaha atthu ale itthu dha veerutthuni dhaathowa. Okathi ole Yeesu ahipaka mwiirirya airihaka wacerereya iphaawu ni ihopa ni ahaarumeela ahudheri-ye wiira yaakawele atthu eyooca ele. (Mar. 6:41) Yeesu ahipaka elo wiira aahudhihe ahudheri-ye waarumeela atthu akina. Nitho ohoonihra wiira tivootthuneya opaka etthu wiira naakhalihere atthu akina, ndho elo etthu arumeyi ookhalihera anreerela awa opaka. Voohakanyera, arummwa yaahihakalala onkhalihera Yeesu okawa eyooca yeelo atthu ootheene yaaciya awa mpakha ovona! (Mar. 6:42) Nitho okathi Yeesu aariiye valaponi, aahipaka itthu dhoovirikna dhoonihera wiira anipweha nipuro noopacera itthu dhaathowa atthu akina. (Math. 4:23; 8:16) Waahudhiha ni opaka itthu dhaavekela wiiyeviha wiira aakhalihere atthu akina, dhaanimwiiriha Yeesu ohakalala vawaatta. Moohakanyera nyuwo nnoohakalala vakhala wiira nnoopweha nipuro noopacera itthu inaathowa atthu akina ni wiilipihera okhala nrumeyi ookhalihera.
Ompheta winyu Yehova ni otthuna winyu orumeela, onawootumereryani opaka itthu dhootheene munwerya nnyu wiira mwaakhalihere anna ni arokora mmulokoni (Moone ettima 11) a
12. Seeni nihinrerela nhu wuupuwelela wiira itthu nindhuwela nhu khadhinvareleya nteko nmulokoni?
12 Atthu akina anoona wiira miteko andhuwela awa khadhinvareleya nteko mmulokoni. Akhala wiira nnoona dhiidho nhikhulumuwe. Moohakanyera nyuwo mookhalana mikhalelo ikhanle waakhalihera anna ni arokora mmulokoni. Nnoonela dhai osoma moolumo aalontte Paaulu ari 1 aKorinto 12:12-30 ni ovekela voohima dha mwaha owo? Yawaatikhiwa ela Paaulu onnoonihera wiira arumeyi ootheene a Yehova, woohelani mpuwa nyuwo, tootepa otthuneya ni aakhalana efaita mmulokoni. Ndho nhikhulumuwe akhala wiira nenna khamunwerya opaka itthu dhinvekeliwa wiira nkhale nrumeyi ookhalihera. Ohiya-vo, mpake itthu dhootheene munwerya nnyu wiira nvikanihe onrumeela Yehova ni waakhalihera anna ni arokora. Ndho mwapaka elo, nkhupali wiira asitokweene anawuupuwela itthu mundhuwela nnyu ni anawoothanlelani miteko mundhuwela nnyu ovara.—aRo. 12:4-8.
13. Etthu seeni yoohakalaliha voohima dha itthu onvekeliwa iye ntthu ontthuna okhala nrumeyi ookhalihera?
13 Moone nthowa nikina nikhanle owiirihani wiilipihera wiira nkhale nrumeyi ookhalihera: Itthu dhawaatta onvekeliwa iye ntthu ontthuna okhala nrumeyi ookhalihera ti dheidho Makiristau ootheene anreerela awa opaka. Makiristau ootheene ahaana olipiha wataana wa ni Yehova, okhala oolikana ene waarumeela atthu akina moohakalala ni okhalana mweettelo onvaha ntakihero nooreera. Wonawene nyuwo mookhalana mikhalelo dhootthuneya wiira nkhale nrumeyi ookhalihera. Masi itthu seeni onvekeliwa iye munna ontthuna okhala nrumeyi ookhalihera?
ITTHU MUNREERELA NNYU OPAKA WIIRA NKHALE NRUMEYI OOKHALIHERA
14. Ontaphulelani okhala ‘oororomeleya’? (1 Timootheyo 3:8-10, 12)
14 Nirowe noone itthu ikina Biibiliya onlotta iye 1 Timootheyo 3:8-10, 12. (Munsome.) Arumeyi ookhalihera ahaana okhala ‘oororomeleya’. Nuulumo nna pooti otaphulela ophwanelela ‘ottittimihiwa ni atthu akina’, ‘ophwanela’ aahiidho opaka itthu ikhanle owiiriha atthu akina ‘woottittimihani’. Elo khentaphulela wiira nhaana okhala ntthu ohintthuna isorope aahiidho ohintheya ni atthu akina. (Mus. 3:1, 4) Masi elo entaphulela wiira nhaana wakhwaaanihera miritti dhinyu moororomeleya. Akhala wiira nnoodhuweliwa okhala ntthu oniilipihera ni oororomeleya, elo enoowiiriha atthu ootheene mmulokoni woottittimihani.
15. Ontaphulelani ‘ohootha’ ni ‘ohitthuna ophwanya itthu voohiphiyeriwa’?
15 ‘Ohootha’ ontaphulela ohikhuwa etthu, ororomeleya ni okathi wootheene olotta ekhweeli. Ntthu ohinootha, alotta etthu enkhala yeelo ni khanwoototha atthu akina. (Mir. 3:32) ‘Ohitthuna ophwanya itthu voohiphiyeriwa’ ontaphulela okhala oororomeleya ontekoni ni okhalana moonelo wooreera voohima dha nsurukhu. Nitho elo entaphulela wiira nhaana oxaka waarumeela axirikha nnyu a mmulokoni ntthunaka ophwanya nsurukhu.
16. (a) Ontaphulelani ‘ohiwurya eviinyu yawaatta’? (b) Ontaphulelani okhalana ‘yawuupusera ya nrima yooreera’?
16 ‘Ohiwurya evinyu yawaatta’ ontaphulela okhalana mphimo vaavo munwurya nnyu eviinyu ni ohidhuweliwa okhala nanhapaliwa. Okhalana ‘yawuupusera ya nrima yooreera’ ontaphulela wiira nyuwo munnittittimiha ele Yehova onlotta iye okhala yooreera ni yoonanara. Ekhweeli wiira mwa ntthu oohimalela masi mookhalana waataana wooreera ni Yehova, ndho elo enniwiirihani okhalana nrettele.
17. Ontaphulelani ‘opacera wooniwa toko yaaphwanelelaka’? (1 Timootheyo 3:10; moone-tho efootu.)
17 ‘Apacere toko wooniwa aaphwanelaka’ elo entaphulela wiira asitokweene ahaana woona akhala wiira munnikhapelela saana miritti munvahiwa nnyu ni annoororomelani. Ndho akhala wiira asitokweene anawoovekelani okhapelela nteko mmodha, ntthare malakihero anovahaawani ni malakihero a ntthenkeso. Mwiilipihere wiiwasasa itthu dhootheene dhinhela mpuwa nteko mun’ya nnyu ovara ni nihiku mun’ya nnyu omaliha. Akhala wiira munookhapelela saana miteko munvahiwa nnyu, atthu ootheene mmulokoni anawoona wiira mwa ntthu oororomeleya ni munnirowa vahoolo. Ndho asitokweene ehihiye waahudhiha moopora wookhapelela miritti anna oopatisiwa. (Munsome 1 Timootheyo 3:10.) Niire muloko nnyu akhala marapasi arina iyaakha 13, 14 aahiidho ahiphiyerinhe? Niire awo akhalana yoolema ya opaka yoosoma-ya yoomwaneene ni olokihera saana mithukumano? Niire anniilipihera ovaha ikomentaariyu omithukumanoni ni oluttuweliwa nteko woolaleerya? Akhala wiira nnaakhula wiira aayo, nandho mwaavahe miteko akhanla awa owerya okhapelela hata erina iyaakha vakhaani. Akhala wiira asitokweene anoopaka elo, anoowerya owoona marapasi awo yaaphwanelelaka. Ndho noomala okhalana iyaakha 17 aahiidho 18, woonawene awo pooti othanliwa wiira ekhale arumeyi ookhalihera.
Vaavo asitokweene anaavaha awa miteko anna oopatisiwa, anniwerya woona yaaphwanelelaka (Moone ettima 17)
18. Ontaphulelani ‘ohikhalana nlattu’?
18 ‘Ohikhalana nlattu’ ontaphulela wiira khaavo orina nthowa na owootheryani wiira munnipaka itthu dhoonanara. Ekhweeli wiira atthu pooti owootheryani wiira moopaka etthu. Elo yaahiiraneya ni Yeesu, owo aalontte wiira atthareli-ye yanwiiranela etthu emodharu. (Yohani 15:20) Masi akhala wiira nnookhalana mweettelo wooreera nkhama wa Yeesu, anna anoodhuwela elo.—Math. 11:19.
19. Ontaphulelani okhala ‘nlopwana orina nthiyana mmodha pahi’?
19 ‘Nlopwana orina nthiyana mmodha pahi.’ Ontaphulela okhalana moonelo wa Yehova voohima dha ekasamento, niire dho, wiiraana wa nlopwana mmodha ni nthiyana mmodha. (Math. 19:3-9) Nkiristau ohaana oxaka orupihana woohiloka. (aHeeb. 13:4) Ohiya-vo, owo ohaana okhala oororomeleya wa amwaariye ni oxaka woonihera wiira onnidhiveliwa ni athiyana akina.—Yoobi 31:1.
20. Nlopwana onoonihera dhai wiira ‘onneettiha saana ettheko-ye’?
20 ‘Eweettihe saana anaya ni ettheko-ya.’ Akhala wiira mwa nhooleli a ettheko, nhaana okhapelela saana miritti dhinyu. Nhilove onkokhorela Muluku khuta esumana. Mpake itthu dhootheene munwerya nnyu wiira nvare nteko woolalerya vamodha na amwaarinyu ni aninnyu. Nitho mwaakhalihere aninnyu okhalana waataana woolipa ni Yehova. (aEef. 6:4) Nlopwana onkhapelela saana ettheko, onnoonihera wiira onoowerya okhapelela saana muloko.—Nlikanyihe ni 1 Timootheyo 3:5.
21. Eseeni munreerela nnyu opaka akhala wiira nlelo kahi mwa nrumeyi ookhalihera?
21 Akhala wiira munna nlelo kahi mwa nrumeyi ookhalihera, safatali nsome mwaha ola ni ephoole ni nvekele. Nitho nsome itthu Biibiliya onlotta iye dheidho nrumeyi ookhalihera onreerela iye opaka ni mwiilipihere waakhwanihera itthu idho. Muupuwele ompheta winyu Yehova ni waapheta winyu anna ni arokora a muloko nnyu. Mwapaka elo, enawaacerera otthuna winyu waarumeela atthu akina. (1 Ped. 4:8, 10) Ndho akhala wiira nnawiilipihera wiira nkhale nrumeyi ookhalihera, nnoohakalala vawaatta mwaha wa waarumeela anna ni arokora mmulokoni. Nitho nkhupali wiira Yehova onooreeliha wiilipihera winyu wiira nkhale nrumeyi ookhalihera!—aFil. 2:13.
NCIPO 17 “Kinnitthuna”
a OTTHOKIHERIWA WA EFOOTU: Moono weethiyana Yeesu aarumeelaka ahudheri-ye mwa wiiyeviha; moono weelopwana nrumeyi ookhalihera mmodha ankhaliheraka munna awuuluvala a mmulokoni.
