Aayo. Muluku onnixanka aamoonaka nrumeyi iye awereiwaka. Biibiliya, onnileihera wiira: “Apwiya animwakhapelela okathi w’ohawa.” (Esalimo 41:4) Mwakhalana eretta ehimpenuiwa, ipontu dhinttharelana dhinamookhaliherani:

1.   Mmuvekele Muluku ikuru wiira nwerye ovilela. Nyuwo nnawaakhela ‘nrettele wa Muluku yoowo onxira odhuwela wa apinaatamu’, ndho owo onoovukula oxanka winyu ni onawookhaliherani ovilela.— aFilipi 4:6, 7.

2.   Nhitepesa oxanka. Biibiliya onlotta wiira: “Murima woottela murettele w’erutthu: murima woripiwa wumiha makhuva.” (Miruku 17:22, Biblia Solempwa Sowarya) Mwiilipihere okhala oohakalala, okhala wiira elo onoovukula oriipiwa winyu nrima ni enawoophwanyihani ohakalala mweekumini mwinyu.

3.   Nlipihe waamini winyu dhooleihera dha nhoolo. Okhalana nlipelelo noolipa nnawookhaliherani ophwanya ohakalala ni ovilela eretta ehimpenuiwa. (aRoma 12:12) Biibiliya onlotta wiira onoophiya okathi ohin’ya aya okhala ntthu on’ya olotta wiira: ‘miyo kanretta’. (Yesaya 33:24) Muluku onoomaliha iretta dhootheene dhihimpenuiwa dheidho siyensiya ohinwerya iye omaliha. Mwa ntakihero, Biibiliya onlotta wiira atthu awuuluvala an’ya otthikela erapasi owo onlotta wiira: “Siso irutthu saya sinotthikela okhalana ikuru s’omirao aya: sinokhala-tho ntoko mahiku ònamwane aya.”—Yobi 33:25.

 Moone: Hata Anamoona a Yehova edhuwelaka wiira Muluku onnikhalihera, awo annooca mirette dhoospitali. (Marko 2:17) Akhala wiira ookhalana ntthu orina eretta ehimpenuiwa, hiyo, khaninthanla mirette dhinreerela ociwa; masi khuta ntthu ohaana othanla mwaneene.