ეფესოელეფ 3:1-21
3 ათეშენ მა, პავლე, ციხეს ვოხექ ქრისტეშ გურშენ დო თქვანო, შხვა რჯულიშ ხალხშო.
2 მუჭოთ გეგით, მა თიშო ვორექ გერნაფილ, ნამდა ღორონთიშ ჭყოლოფაშ მეღებას ქიმგეხვარათ თქვან საჯგირობუოთ.
3 თაშ რე, ღორონთიქ გამცხად წმინდა საიდუმლო, მუდგაშ გურშენ ჭიჭე მუდგარენ უკვე ქუმორჭარით.
4 ათეშენ, თეს წეკითხენთინ, ქიმეხვადუთ, ნამდა ინვანჭუქ წმინდა საიდუმლოს ქრისტეშ გურშენ.
5 ჩქინ წოხოლეიან თაობეფშა ღორონთის თე საიდუმლო თიზმათ ვა გაუცხადებ, მუზმათ ასე გაუცხად წმინდა შურით* მუშ წმინდა* მოციქულეფს დო წინასწარმეტყველეფს.
6 თე საიდუმლო თინა რე, ნამდა შხვა რჯულიშ ხალხ, მიდგაქ მიღეს სახიოლო ამბე დო ქრისტეშ მოწაფეეფ რენა, ჩქინწკუმა ართო იჸუაფუნა მემკვიდრეეფ, ართ სხეულიშ ნაწილეფ იპჸუაფუთ დო ართო მიბღენთ ღორონთიშ დუნაპირებუს.
7 თიშ სარკო ჭყოლოფათ გინიბრთჷ თე წმინდა საიდუმლოშ მსახურო დო თიშ ძალათ მიბღჷ თე ძღვინ.
8 ღორონთიქ თე ძღვინ მუჩჷ მა, წმინდეფ* შქას არძაშ უნაკლებაშის, ნამდა შხვა რჯულიშ ხალხის გაუცხადიკო სახიოლო ამბე თი უზომე ხვამაშენ, ნამუთ ქრისტეშე მოურს
9 დო არძას ქუვოძირეკო, მუჭო ხელმძღვანელენს ღორონთ წმინდა საიდუმლოშ გიმოარგამებას, ნამუთ თის, ირფელიშ გუმაჭყაფალს, ქიანაშ ხანს ფულირ აფუდ.
10 თექ თიშენ მოხვად, ნამდა ასე ღორონთიშ ირნერ სიბრძნე კრებაშ საშვალებათ რდასჷ გაცხადებულ ზეციერ ხელისუფლებეფშა დო მთავრობეფშა*.
11 თენა ღორონთიშ სადღამუშო ნებას მეურე; თიქ გინოჭყვიდ, ჩქინ უფალ ქრისტე იესოშ საშვალებათ ბოლოშახ შეასრულას მუშ ნება.
12 რახანს ქრისტე პწანა, თამამას ბრაგადანთ დო ღორონთშა მენდებულეფ თავისფალო ბლოცულენთ.
13 თაშ ნამდა, რთხინთჷ, თქვან გურშენ გაჭირებას ვორექინ თიქ გურ ვა გოიტახან, მუშენდა თენა დიდებას მოიღანა.
14 ათეშენ ბირგულს ვოშქვანქ მუმაშ წოხოლე,
15 ნამდგაშ ჭყოლოფათ რე გოჭყაფილ არძა ოჯახ ზეცას დო დედამიწას*.
16 ბლოცულენქ, ნამდა ღორონთიქ, ნამდგას უზომე დიდება უღჷ, გურეფ გაიმანგარან მუშ წმინდა შურით
17 დო თქვან რწმენაშ ჭყოლოფათ ქრისტექ დემკვირდას თქვან გურს, მუშენდა ჸოროფას გიმირჩქინანთ. თის ხოლო ფთხინქჷ, ნამდა ტომბას გიდგათ ჩხვიჩხვეფ დო მტკიცას რდათჷ გერსხილ რწმენაშ ოსხირშა,
18 მუშენდა არძა წმინდაწკუმა* ართო ბოლოშა ქინანჭათ სიმართლეშ სიტომბას, სიგინძას, სიგანეს დო სიმაღლეს,
19 დო ქიგეგათ, მუნერ რე ქრისტეშ გიმორჩქინელ ჸოროფა, ნამუთ რჩქინაშე უმოს რე, დო შედეგო სრულას გევითარათ თი არძა თვისება, ნამუთ ღორონთშე მოურს.
20 ღორონთის მუშ ძალათ, ნამუთ ჩქინდა მოქმედენს, შეულებ თიშე ბრელით უმოს გაკეთას, ვინემ ჩქი ფთხინთჷ ვარდა აზრო მუმალენა.
21 დიდება ღორონთის კრებაშ დო ქრისტე იესოშ საშვალებათ არძა თაობას სადღამუშოთ! ამინ!
სქოლიოეფ
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ მუჭოთ იძირენ, „ზეციერ ხელისუფლებეფს დო მთავრობეფს“ იგულისხმებუნა ანგელოზეფ.
^ შხვანერო — „ნამდგაქ ზეცას დო დედამიწას არძა ოჯახის სახელ გიოდვჷ“.
^ ქოძირით „ბიბლიურ სიტყვეფიშ ენწყუმა“.
