კოლოსელეფშა მეჭარილ წერილ 1:1-29
1 რჭარუნთ პავლე, ღორონთიშ ნებათ ქრისტე იესოშ მოციქულო გერინაფილ, დო ჯიმა ტიმოთე,
2 წმინდეფს* დო ართგურ ჯიმალეფს კოლოსეშ კრებას, მით ქრისტეწკუმა რეთჷ ართობას:
ჭყოლოფა დო მშვიდობა ვა მორრკებუდან ღორონთშე, ჩქინ მუმაშე.
3 თქვანო ბლოცულენთინ, ირიათო მადლობას ურაგადუთ ღორონთის, ჩქინ უფალ იესო ქრისტეშ მუმას,
4 მუშენდა გებგით, მუჭო რწანა ქრისტე იესო დო მუჭო გიჸორა არძა წმინდა*.
5 თე რწმენა დო ჸოროფა თი იმენდშე მოურს, ნამუთ ზეცას გელუნა. თე იმენდიშ გურშენ თქვა თიმწკუმა გეგით, მუჟამსით მირჩქილეთ სიმართლე — სახიოლო ამბე.
6 თე სახიოლო ამბე მთელ მსოფლიოს ივრცელებ, მუდგას ჯგირ შედეგეფ მოჸუნს. თიქ თქვანწკუმა ხოლო ჯგირ შედეგეფ მიღჷ თი დღაშე მოჸუნაფილ, მუთ მირჩქილეთ თინა დო ქიგეგით, სინამდვილეს მუ რე ღორონთიშ ჭყოლოფა.
7 თინა თქვა მირჩქილეთ ეპაფრაშე, ჩქინ საჸოროფო დო ართგურ ჯიმაშე, მით ჩქინ მანგიორო ელაირენა.
8 თიქ თინა ხოლო მეჩუეს, მუჭო გოხვარუნა წმინდა შურ* ჸოროფაშ გიმორჩქინას.
9 თი დღაშე მოჸუნაფილ, მუთ თენა გებგით, ვემემტებუნა თქვანო ლოცვა. ირიათო ფთხინთჷ ღორონთის, ნამდა მიღათ ღორონთიშ ნებაშ ზუსტ რჩქინა, სიბრძნეწკუმა დო ინონჭაფაწკუმა ართო, ნამუთ წმინდა შურშე მოურს.
10 ბლოცულენთ, ნამდა თეშ იცხოვრათ, მუჭოთ იეჰოვაშ* მსახურეფს ოსქვანა, დო თეწკუმა ართო, ჯგირ საქმეეფიშ კეთებათ დო ღორონთიშ გურშენ მეტ რჩქინაშ მეღებათ ირნერო გურს მოუჰამუათ თის.
11 თიშო ხოლო ბლოცულენთ, ნამდა ღორონთიქ მუშ დიდებულ ძალათ გუგამანგარან, მუშენდა მოთვინებათ დო ხიოლით ქუგურზათ ირფელს.
12 ირიათო მადლობა გინუგით ზეციერ მუმას, ნამდგაქ თი მემკვიდრეობაშ მიოღებელო მუგამზადეს, ნამუთ ოკუთვნ წმინდეფს*, მიდგას ღორონთ ხელმძღვანელენს.
13 თიქ უკმელაშ ძალაუფლებაშე მირსხეს დო მუშ საჸოროფო სქუაშ სამეფოშა გეგნომიჸუნეს;
14 თიშ მსხვერპლით ვორეთ გათავისფალებურ დო მეპატიებუნა ცოდეფ.
15 თინა კოჩიშ თოლშო უძირაფ ღორონთიშ ამნახანტ რე, არძა გუნაჭყეფშახ თიქ იჸუ გოჭყაფილქ.
16 შხვა ირფელქ, მუდგას ვორწყეთ დო მუდგას ვა ვორწყეთ, ზეცას დო დედამიწას თიშ მონაწილებათ იჸუ გოჭყაფილქ — მთავრობეფქ დოვარ ხელისუფლებეფქ, ძალაუფლებეფქ დოვარ მმართველობეფქ — ირფელქ თიშ მონაწილებათ დო თიშო იჸუ გოჭყაფილქ.
17 თინა შხვა ირფელიშ გოჭყაფაშახ რდჷ დო ირფელქ თიშ მონაწილებათ იჸუ გოჭყაფილქ.
18 თინა რე სხეულიშ, კრებაშ დუდ. თინა რე დაჭყაფ, თინა რე გათელებურეფ შქას პირველ, თაშ ნამდა, თინა რე პირველ ირფელს.
19 ღორონთის ოკოდ, არძა მუშ თვისება ნოღვედუკო ქრისტეს
20 დო თიშ საშვალებათ, წამებაშ ძელს დობუნილ თიშ ზისხირით, აკირიგუკო დო მუწკუმა მშვიდობა დართინაფუკო არძას ზეცას დო დედამიწას.
21 ულირს თქვა შორს რდითჷ ღორონთშე, თიშ ნტერეფ რდითჷ, მუშენდა თქვან გურ უბადოშა ინჭუაფუდ,
22 მარა ასე ღორონთიქ მუწკუმა აკოირიგეს თიშ სხეულიშ საშვალებათ, მიდგაქ მუშ დუდ ღურას გეგნოჩ, ნამდა წმინდეფ*, სუფთეფ დო ბრალ ვეგეძუნან ფერეფ ჸოფედითკო თიშ თოლს.
23 მუშო ოკო რაგად, თქვა კინ მტკიცე რწმენა ოკო გიღუდან დო მანგარო გერდათ; მუთუნს ვემეჩათ საშვალება, მიდაიღან სახიოლო ამბეშ მორჩქილაფაშე მეღებულ იმენდ, სახიოლო ამბეშ, ნამდგაქ მთელ ქიანას არძა ხალხშა იჸუ ქადაგებულქ. მა, პავლე, თე სახიოლო ამბეშ მსახურ ვორექ.
24 მოხიოლ, თქვან გურშენ იპტანჯებუქინ. მიჩქჷ, ნამდა ხოლო ოკო დეპტანჯე ქრისტეშო, თიშ სხეულიშ, კრებაშ საჯგირობუოთ.
25 მა თე კრებაშ მსახურ ვორექ, მუშენდა ღორონთიქ მუმანდჷ თე პასუხიშმგებლობა თქვან საჯგირობუოთ, ათეშენ ფქადაგენქ ღორონთიშ სიტყვას მთელ შურ დო გურით.
26 თე წმინდა საიდუმლო ფულირ რდჷ ჯვეშ დროს მახორუ ხალხშო დო ულირ თაობეფშო, მარა ასე თიქ გაცხადებულქ იჸუ ღორონთიშ ხალხშა.
27 ღორონთის ოკოდ, ზუსტას თინეფს გაუცხადუკო წმინდა საიდუმლო, დიდებულ განძ. თე წმინდა საიდუმლო ქრისტე რე, მით თქვანწკუმა რე ართობას; თენა თიშ იმენდის გარზენა, ნამდა თიწკუმა ართო იჸუაფუთ განდიდებულ.
28 ჩქი ქრისტეშ გურშენ ვაცხადენთ, ირკოჩის გივოწურუანთ, ვოგურუანთ დო თი სიბრძნეს გინოფჩანთ, ნამუთ ჩქი მიბღით, ნამდა ქრისტეშ არძა მიმაჸუნალს მივეხვარათ, სულიერო მირდან.
29 ათეშენ თე საქმეს ხანდას ვა ვარკენქ დო დუდის ვა ბზოგენქ თიშ ძალათ გამანგარებულ.
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
