მათე 19:1-30
19 თეშ ჩიება გათუნ, იესოქ გალილეაშე მიდართჷ დო იორდანეშ მელე იუდეაშ მოსაზღვრე მხარეშა ქიმერთჷ.
2 ბრელ ხალხ ეკოჸუნდჷ თის დო ოსქილიდუანდჷ თინეფს.
3 თი დროს ფარისეველეფქ ქიმერთეს თიშა დო მიოჩილითაფარო კითხეს: „არძანერ მიზეზით შილებენო ოსურწკუმა ჩათხია?“
4 იესოქ უპასუხ: «ვა გაფუნანო ნაკითხირ, ნამდა ღორონთიქ დუდშე ადამიანეფ გაჭყუნ, ქომოლკოჩო დო ოსურკოჩო გაჭყჷ თინეფ
5 დო თქუ: „მიოტენს კოჩ მუმას დო დიდას, ირიათო მუშ ოსურწკუმა იჸუაფ* დო თე ჟირ ართ ხორცო გინირთუ“?
6 თაშ ნამდა, თინეფ უკვე ჟირ ვარინ, ართ ხორც რენა. ათეშენ კოჩიქ ვა ჩუთხინუას ართიანს თინეფ, მით ღორონთიქ ართ ხორცო გინაშქვჷ*».
7 თინეფქ უწუეს: „იმწკუმა მუშენ თქუ მოსექ, მიდგას ოსურწკუმა ჩათხია ოკო, თის ჩათხიაშ მოწმობა ქიმეჩასია?“
8 თიქ უპასუხ: „თქვა მოსეს შხვა შარა ვა დუტეთ, მუშენდა ირნერო ოცადუდით თქვანიშ გოჸუნაფას, ათეშენ მერჩეს ოსურწკუმა ჩათხიაშ უფლება, მარა დაჭყაფშე თაშ ვა ჸოფე.
9 გირაგადუთ: მით ოსურს ეთხიებ, მარა მიზეზ ღალატ* ვა რე, დო შხვა მოჸუნს, მრუშენს“.
10 მოწაფეეფქ თის უწუეს: „თაშ ქორენ-და, იმწკუმა უჯგჷ, შურო ვემიჸუნას კოჩიქ ოსურ“.
11 იესოქ უპასუხ: „არძას ვეშულებ თაშ ცხოვრება; ხვალე თინეფს შეულებუნა, მიდგას თეშ ძღვინ უღუნა.
12 რენა თიცალეფ, მიდგაქ კილუანო დებადეს დო ვეშულებუნა ოსურიშ მოჸუნაფა, თიცალეფ ხოლო რენა, მით შხვეფქ გინაშქვეს კილუანო* დო თიცალეფ ხოლო — მით ზეციერ სამეფოშ გურშენ გინოჭყვიდუნა, ვემიჸუნან ოსურ. მიდგას შეულებ თაშ ცხოვრება, იცხოვრას“.
13 ხალხიქ ქიმუჸუნ თის ბაღანეფ, ნამდა ხელეფ ქიგუდვალუდკო* დო ქილოცუკო თინეფშო, მარა მოწაფეეფ უვარიენდეს თინეფს.
14 იესოქ უწუ: „დანებით დუდ ბაღანეფს, ნუმ ოცილუთ, ქუმაშქვით ჩქიმდა, მუშენდა თეცალეფშო რე ზეციერ სამეფო“.
15 უკულ ხელეფ ქიგედვჷ თინეფს დო მიდართჷ თევრეშე.
16 ქიმერთჷ თიშა ართ ახალგაზრდაქ დო კითხჷ: „მოძღვარ, ნამ ჯგირ საქმეეფ ოკო ვაკეთე, ნამდა ულიებ სიცოცხლე მიბღე?“
17 იესოქ უპასუხ: „მა მუშენ მოკითხუქ, ნამ რე ჯგირ? ჯგირ ხვალე ღორონთ რე*. სიცოცხლეშ მეღება ქუგოკონ-და, ირიათო მიაჸუნ თიშ კანონეფს“.
18 თიქ კითხჷ: „ნამ კანონეფს?“ იესოქ უპასუხ: „ვაჸვილა, ვემრუშა, ვეხირა, ვეგედირთა ტყურა მოწმეთ,
19 პატი ცი სქან მუმას დო დიდას დო სქან დუდცალო გიჸორდას სქანიან*“.
20 ახალგაზრდაქ უწუ: „თე ირფელს ვორთუქ, მეტ მუ ოკო ვაკეთე?“
21 იესოქ უპასუხ: „სრულყოფილება ქუგოკონ-და*, მეუ, გეგმოჩ სქან ქონება, უღონოეფს ქიმეჩ დო ზეცას უჯგუშ ქონება გაღვენუ; უკულ ქუმორთ დო ქეკმაჸუნ!“
22 მუჟამსით ახალგაზრდაქ თე სიტყვეფ ქიმირჩქილუ, გურშეწუხებულქ მიდართჷ, მუშენდა დიდ ქონება უღუდ.
23 იესოქ მოწაფეეფს უწუ: „დამჯერით: ქონებიერ კოჩის გუჭირდუ ზეციერ სამეფოშა მინულა.
24 გირაგადუთ: აქლემშო უმოს ადვილ იჸუაფ ლიშიშ კილარხუაფალს გითულა, ვინემ ქონებიერშო ღორონთიშ სამეფოშა მინულა!“
25 მოწაფეეფს მანგარო გუკვირდეს იესოშ ნარაგადიქ დო თქუეს: „შურო მითინს ქეშიალებენო გინოსქილადა?!“
26 იესოქ ქიმკაჯინ თინეფს დო უწუ: „თენა კოჩშო ვა რე შეიოლებერ, მარა ღორონთშო ირფელ შეიოლებერ რე“.
27 თიმწკუმა პეტრექ უწუ: „ჩქი ირფელ ქიდიპტეთ დო სი ქეგკაჸუნით. მუს მიბღენთ თეშე?“
28 იესოქ უპასუხ: „მართალს გირაგადუთ: ირფელიშ გაახალებაშ დროს, მუჟამსით კოჩიშ სქუა მუშ დიდებულ ტახტის ქუდოზოჯუ, თქვა, მიდგაქ მა ეკმაჸუნით, 12 ტახტის ქუდოზოჯუნთ დო ისრაელიშ 12 ტომს გასამართლენთ.
29 მიდგაქ ჩქიმ სახელიშ გურშენ დიტუ ჸუდე ვარდა ჯიმალეფ, ვარდა დალეფ, ვარდა მუმა, ვარდა დიდა, ვარდა სქუალეფ, ვარდა დიხეფ, თე ირფელ ოშ თისხი აში დო ულიებ სიცოცხლეს ხოლო მიღენს.
30 მარა ბრელ, მით პირველ რე, ბოლო იჸუაფ დო ბოლო — პირველ“.
სქოლიოეფ
^ თაქ გიმორნაფილ ბერძნულ სიტყვა ნიშნენს თიცალ მიკოჭაბაფას, მუჭოთ წებო აკოჭაბუნს მუდგარენეფს.
^ პირდაპირ თარგმან — „ართ უღუს ეთურინუ“.
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
^ პირდაპირ თარგმან — „კასტრირებულო“.
^ შხვანერო — „დოხვამუკო“.
^ შხვანერო — „ხვალე ღორონთ გინოჭყვიდუნს, მუ რე ჯგირ“.
^ ბერძნულ სიტყვა, ნამუთ თარგმნილ რე, მუჭოთ „სქანიან“, ხვალე ხოლოშიანეფს ვა ნიშნენს. თიშა შილებე მიშეშას ნებისმიერ ადამიან.
^ შხვანერო — „ღორონთიშ თოლს ირფელ ჯგირო გაკეთე, ქუგოკონ-და“.
