მარკოზ 11:1-33
11 მუჟამსით თინეფქ იერუსალიმიშ გოხოლუას ზეთისხილიშ გვალას ქიმიოდირთეს, სოდეთ ბეთბაგე დო ბეთანია რე, იესოქ ჟირ მოწაფე გოუტუ
2 დო უწუ: „მეუთ თე სოფელშა; თექ გემშურთინ, ქოძირუნთ მიკოკირილ ჩოჩორს, ნამდგაშა დიო მითინს ვეგუხუნ. თოკ გენწყით დო ქუმომიჸუნით.
3 თეს მუშენ ორთუთია, მითინქ ქორკითხეს-და, ქუწით, უფალს ოსაჭირ დო მალას დართინუანს-შო“.
4 მიდართეს თინეფქ დო შარას ქოძირეს კარწკუმა მიკოკირილ ჩოჩორ, ქიმერთეს დო თოკ გენწყეს.
5 თექ გერდუნ თინეფშე ნამთინექ თინეფს კითხჷ: „მუს ორთუთ, მუშენ უტენთ ჩოჩორს?“
6 მოწაფეეფქ ქუწუეს, მუთ იესოქ ოჩინ დო თინეფქ ხოლო მიაშქვეს.
7 ქუმუჸუნეს იესოს ჩოჩორ, ქიგურჩეს მუნეფიშ გინაქუნალეფ დო თიქ ხოლო ქუმნოზოჯ.
8 ბრელ მუშ გინაქუნალს გილურჩანდჷ შარაშა, ნამთინე ხოლო პალმაშ ნოჸელეფს ჭკირუნდჷ დო თის გილურჩანდჷ.
9 თიშ წოხოლე დო უკახალე მიშესინ თინეფ ხონარმაღალო იძახუდეს: „ღორონთ, გოხვეწუთ, დოთხილე! ხვამელ რე, მით იეჰოვაშ სახელით მოურს!
10 ხვამელ რე ჩქინ მუმაშ, დავითიშ, სამეფო, ნამუთ მოურს! ზეციერ, გოხვეწუთ, დოთხილე თინა!“
11 იერუსალიმშა ქიმერთუნ, ტაძარშა მინილ, თექიანობა მილჷ დო, რახანს გვიან რდჷ, ვითოჟირ მოციქულწკუმა ართო ბეთანიაშა მიდართჷ.
12 მაჟია დღას, ბეთანიას იტენდესინ, იესოს ქუმაშქირენ.
13 შორშე თოლ ქუმუკინდუ გოფალირ ლუღიშ ჯას, ეგება მუთუნ მიკოჩანდასია, დო ქიმერთჷ თიშა, მარა ფურცელეფიშ მეტ მუთუნ ვემკახვილუ, მუშენდა ლუღობა დიო ვა რდჷ.
14 თიქ ჯას უწუ: „დღას მითინს ვა უჭკუმუდას სქან მიკნაღელ!“ თეს მოწაფეეფ ხოლო ირჩქილედეს.
15 იერუსალიმშა ქიმერთესინ, თიქ ტაძარშა მინილ დო გალე გეგმორაჸ თინეფ, მით თექ გიმოჩანდეს დო ჸიდულენდეს; ფარაშ მახურდალეფს სტოლეფ გემნურთინუ დო ტორონჯეფიშ გიმმაჩამალეფს — სკამეფ.
16 მითინს ვარზენდჷ უფლებას, მუდგარენეფიშ გილაღალარო ტაძარით გეგნოჭკირესკო შარა;
17 ოგურუანდჷ თინეფს დო ურაგადუდ: „ჭარილ რე, ჩქიმ ჸუდე არძა ხალხშო ოლოცებერ ადგილ იჸუაფუნია, მარა თქვა ყაჩაღეფიშ ჸუდეთ გინოიშქუმალუნა!“
18 თენა უნჩაშ მღვდელეფქ ქიგეგონესინ, მოხუჯურ დროშ გორუა ქიდიჭყეს თიშ ოჸვილარო, მარა ოშქურუდეს თიშა, მუშენდა ხალხის მანგარო მოწონდჷ, მუს დო მუჭო ოგურუანდჷ.
19 ჩხანაშ ენულაშ დროშო თინეფქ ქალაქშე გიშელეს.
20 ოჭმარეს ადრე, თი ლუღიშ ჯას ელულუესინ, ქოძირეს, ნამდა თინა ჯინჯამო გოხუმაფედ.
21 პეტრეს ქუგაშინ იესოშ სიტყვეფქ დო უწუ თის: „რაბი, ქიდეკვირ, სი ჭყენ თი ლუღიშ ჯა, გოხუმაფე“.
22 იესოქ უწუ თინეფს: „ღორონთიშ რწანდან.
23 მართალს გირაგადუთ: მით ათე გვალას უწინს, გეიკინ დო ზღვას ქინოლია, მარა ეჭვიშ თოლით ვა უჯინე დო უღჷ რწმენა, ნამდა მუშ ნარაგად შისრულებ, მართალო თაშ ქუმოხვადუ.
24 ათეშენ გირაგადუთ: რწანდან, ნამდა ირფელ, მუდგაშ გურშენ ლოცულენთ დო მუდგას ითხინთ, უკვე მეღებულ გაფუნა, დო ქოთ მიღენთ.
25 მუჟამსით გერეთ დო ლოცულენთ, ქაპატით თის, მიდგაქ დაიშუეს, ნამდა თქვან ზეციერ მუმაქ ხოლო ქუგაპატუან ცოდეფ“.
26 *——
27 თინეფქ დირთეს იერუსალიმშა. იესო ტაძარიშ ოზეს გილეშუნ, თიშა უნჩაშ მღვდელეფქ, მწიგნობარეფქ დო უხუცესეფქ ქიმერთეს.
28 თინეფქ კითხეს: „მუ უფლებათ ორთუქ თეს? მიქ მერჩჷ თეშ კეთებაშ უფლება?“
29 იესოქ უპასუხ: „მა ხოლო ქორკითხენთ ართ მუდგარენს დო ქომპასუხენთ-და, ქოიწინთ, მუ უფლებათ ვორთუქ თეს.
30 იოანეს ნათუაშ უფლება ღორონთშე* უღუდ დოვარ კოჩშე? ქომპასუხით“.
31 თინეფქ ართიან შქას ჩიება ქიდიჭყეს: „ღორონთშევა, ქოფთქუათინ, თინა მიწინა, იმწკუმა მუშენ ვერწმუნითია.
32 მარა, კოჩშევა, ქოფთქუათინ, ქუგმაბედინენანო?“ თინეფს ხალხშა ოშქურუდეს, მუშენდა იოანე არძას წინასწარმეტყველო მიორჩქუდ.
33 თაშ ნამდა, უპასუხეს: „ვა მიჩქუნა“. იესოქ უწუ: „ვართ მა გიწინთ, სოვრეშე მიღჷ თეშ უფლება“.
სქოლიოეფ
^ თე მუხლ ბიბლიაშ ნამთინე თარგმანს ჭარჷ, მარა თინა შხვადოშხვა სანდო ბერძნულ ხეშნაჭარეფს ვა რე მოჩამილ.
^ პირდაპირ თარგმან — „ზეცაშე“.
