რომაელეფშა მეჭარილ წერილ 10:1-21
10 ჯიმალეფ, მთელ გურით მოკო დო ღორონთის ვოხვეწუქ, ნამდა ისრაელეფქ გინოსქიდან.
2 მა ვორექ მოწმე, ნამდა თინეფ ირფელს ორთუნა ღორონთიშ მსახურებაშო, მარა ზუსტას ვა უჩქუნა, მუ რე ღორონთიშ ნება.
3 თინეფს ვა უჩქუნა, მუ რე ღორონთიშ თოლს სწორ, ათეშენ მუნეფიშ წესეფს მეჸუნა დო შედეგო ვართუნა თის, მუთ ღორონთიშ თოლს სწორ რე.
4 კანონქ ქრისტეშ საშვალებათ მისპჷ, მუშენდა არძაქ, მიდგას რწმენა უღჷ, მართალო იჸუას მერჩქინელქ.
5 მოსექ ჭარჷ, მუჟამ იჸუაფ კოჩ კანონით მართალო მერჩქინელ: „მით თე ირფელს მეჸუნს, იცოცხლენს“.
6 მარა წმინდა წერილეფ თის ხოლო იჩიებ, ნამდა კოჩ რწმენათ იჸუაფ მართალო მერჩქინელ. თექ ჭარჷ: „გურს ვა თქუა, მი ეშურსია ცაშა“, თევრეშე ქრისტეშ გიმაჸუნაფალო,
7 „ვარდა მი ენურსია წკურუმშა“, ქრისტეშ გათელებერო.
8 მუს იჩიებ წმინდა წერილეფ? „თე სიტყვა ხოლოს რე თქვანწკუმა. თქვან პიჯის დო თქვან გურს რე“, თენა რე სიტყვა, ნამდგას ჩქი ფქადაგენთ დო ნამდგაშოთ რწმენა რე საჭირო.
9 იესო უფალ რენ თის თქვან პიჯით სახალხოთ ქაცხადენთ დო ღორონთიქ თინა გათელუნ მთელ გურით ქორწანან-და, გინოსქიდუთ.
10 ათეშენ მთელ გურით ოკო რწანდან, ნამდა მართალეფო იჸუათ მერჩქინელქ დო სახალხოთ ოკო გაცხადათ, ნამდა გინოსქიდათ.
11 წმინდა წერილეფ იჩიებ: „მიდგას თიშ წანსჷ, იმენდ ვეგემტყუნებ“.
12 მუქ გორთჷ იუდეველ დო ბერძენ? უფალ არძაშო ართ რე. თინა გურხვე რე თინეფშო, მით თის შინანს*,
13 მუშენდა წმინდა წერილეფ იჩიებ: „არძა, მით იეჰოვაშ სახელს შინანს*, გინოსქიდუ“.
14 მარა მუჭო შინანა, ვერწმუნეს-და? ვარდა მუჭო ირწმუნან, თიშ გურშენ ვა გაუგებუნან-და? ვარდა მუჭო გეგან, მითინქ ვა უქადაგ-და?
15 ვარდა მუჭო იქადაგან, მითინქ ვა გოუტუ-და? მუჭოთ ჭარილ რე: „მუშმაჯგირა რე თინეფიშ ძირაფა, მით ჯგირ ამბეს აცხადენს*!“
16 მარა არძაქ ვემიღ სახიოლო ამბე, მუჭოთ ესაია იჩიებ: „იეჰოვა, მიქ ირწმუნ ჩქინდე მორჩქილაფირ?“
17 რწმენა სიტყვაშ მორჩქილაფაშე მოურს დო სიტყვაშ მორჩქილაფა — ქრისტეშ გურშენ ქადაგებაშე.
18 მარა გოკითხუთ: ქოუღუდესო ისრაელეფს მორჩქილაფაშ საშვალება? ქო, უღუდეს. წმინდა წერილეფს ჭარჷ: „თინეფიშ ხონარქ მთელ დედამიწას გისიმ დო თინეფიშ გაცხადებულ ამბექ დედამიწაშ არძა კუნთხუს ქიმიოჭირინუ“.
19 კინ გოკითხუთ: ვეგეგუო ისრაელქ? თე კითხვას დიო მოსე პასუხენს: „თეშ გუვაკეთენქ, ნამდა შხვა ერიშ ხალხიშ გენჯარან დო უჭკუეთ მერჩქინელ ხალხშე გერისხათ“.
20 უკულ ესაია გაბედულო იჩიებ: „ვა ბგორუნდესინ, თინეფქ ქობძირეს დო ვა პკითხულენდესინ, თინეფს გაუცხად ჩქიმიშ გურშენ“;
21 თინა ისრაელეფშე იჩიებ: „მთელ დღას უდუჯერებელ დო აჯამ ხალხჸურე მაფჷ ხე გოფაჩილ“.
სქოლიოეფ
^ შხვანერო — „მით თის ონდჷ“.
^ შხვანერო — „მით იეჰოვაშ სახელშა რე მენდებულ“.
^ პირდაპირ თარგმან — „ჯგირ ამბეშ გუმაცხადებელეფიშ კუჩხეფ“.
