რომაელეფშა მეჭარილ წერილ 14:1-23
14 მთელ გურით მიღით თინა, მიდგას ვა უღჷ ძალიერ რწმენა, დო ბრალ ვეგედვათ თის, მით თქვანცალო ვა ფიქრენს დო შხვა აზრ უღჷ.
2 მიდგას ძალიერ რწმენა უღჷ, ირფელს ჭკუმუნს, მარა მიდგას ვა უღჷ ძალიერ რწმენა, ვა ჭკუმუნს ხორცის.
3 თიქ, მით არძანერ ოჭკუმალს ჭკუმუნს, ჟიშე ოკო ვა უჯინას თის, მით ვა ჭკუმუნს, დო ვა ჭკუმუნსინ თიქ ხოლო ვა გასამართლას თინა, მით ჭკუმუნს, მუშენდა ღორონთიქ მთელ გურით მიღჷ თინა.
4 სი მი რექჷ შხვაშ მსახურს ასამართლენქინ?! გერენო დოვარ ანთხუნო, თეს მუშ ბატონ ქოძირუნს; იეჰოვა ქიმეხვარებ თის, მტკიცას გერდას.
5 ნამთინე ფიქრენს, ნამდა ართ დღა შხვა დღალეფშე უმოს რე, შხვეფ ფიქრენა, ნამდა არძა დღა ართნერ რე. არძა ბოლოშა რდასჷ მუშ აზრშა დარწმუნებულ.
6 მით ნამდგარენ დღას იცვენს, თეს იეჰოვაშ ოდიდებელო ორთჷ; მით ირნერ ოჭკუმალს ჭკუმუნს, თიშენ ჭკუმუნს, ნამდა იეჰოვა განადიდას, დო მადლობას ურაგად ღორონთის; მით ვა ჭკუმუნს, თიშენ ვა ჭკუმუნს, ნამდა იეჰოვა განადიდას, დო თინა ხოლო მადლობას ურაგად ღორონთის.
7 ნამთინ ვა ფცხოვრენთ ხვალე ჩქინ დუდშო დო ვართ ნამთინ ბღურუთ ხვალე ჩქინ დუდშო,
8 მუშენდა, ქოფცოცხლენთ-და, იეჰოვაშო ფცოცხლენთ დო ქობღურუთ-და, იეჰოვაშო ბღურუთ. თაშ ნამდა, ფცოცხლენთ დოვარ ბღურუთ, იეჰოვას ვოკუთვნუთ.
9 ქრისტექ ხოლო თიშენ ღურჷ დო ითელ, ნამდა ქოთ ცოცხალეფიშ დო ქოთ ღურელეფიშ უფალ ქოჸოფედუკო.
10 მუშენ ასამართლენქ სქან ჯიმას ვარდა მუშენ უჯინექ თის ჟიშე?! არძა ქიგებდირთუთ ღორონთიშ სასამართლო ტახტიშ წოხოლე,
11 მუშენდა წმინდა წერილეფ იჩიებ: „ჩქიმ დუდის იფუფჩუანქ — იჩიებ იეჰოვა — არძა ბირგულს ქუდაშქვანს ჩქიმ წოხოლე დო არძა სახალხოთ ქოთქუანს, ნამდა მა ვორექ ღორონთ“.
12 თაშ ნამდა, თითოეულს ჩქინ დუდიშ გურშენ მიმეთხიებუნა პასუხ ღორონთიშ წოხოლე.
13 ათეშენ მეტო ვა გუვასამართლათ ართიან დო გინოჭყვიდილ მაფუდან, დღას ვა ვაკეთათ თიცალ მუდგარენ, მუთ ეკახაბარკალ ქუაცალ იჸუაფ ჯიმაშო ვარდა რწმენაშე გემკაჸათანს თის.
14 მუჭოთ უფალ იესოშ მიმაჸუნალ, ბოლოშახ ვორექ დარწმუნებულ, ნამდა უწმინდურ მუთუნ ვა რე, მუდგას პჭკუმუნთ, მარა, კოჩის მუდგარენ უწმინდურო ქიმიორჩქუნ-და, თიშო სწორ ვეჸუაფ თიშ ჭკუმუა.
15 ოჭკუმალ, ნამდგას სი ჭკუმუნქ, სქან ჯიმაშო ეკახაბარკალ ქუაცალ ქორენ-და, თენა ვეჸუაფ ჸოროფაშ გიმორჩქინა. ოჭკუმალიშ გურშენ რწმენა ვაკურღვა თის, მიდგაშოთ ქრისტექ ღურჷ.
16 ათეშენ ვაკეთათ თიცალ მუდგარენ, მუთ სწორ ქორე, მარა მუდგაშ გურშენ შხვეფ გაიდღანუნა.
17 ღორონთიშ სამეფოშა მინურთ დო ვარ თით ვეგნოჭყორდუ, მუს პჭკუმუნთ დო მუს ფშუნთჷ, თით გინოჭყორდუ, ქომღუნან დო ვარ სიმართლე, მშვიდობა დო ხიოლ წმინდა შურიშ* ჭყოლოფათ.
18 მით თაშ ომსახურ ქრისტეს, მოსაწონ რე ღორონთშო დო ხალხშე ხოლო მიღენს მოწონას.
19 თაშ ნამდა, იმნჭუათ თიშა, მუთ ხეს შეუნწყუნს მშვიდობას დო მუთ მიმეხვარებუნა, გუვამანგარათ ართიან.
20 ოჭკუმალიშ გურშენ მეტო ვეკარღვათ ღორონთიშ ნახელუან. მართალ რე, არძა ოჭკუმალ წმინდა რე, მარა მუდგარენიშ ჭკუმუა შხვას რწმენას მიოდინაფუანს-და, ვეჸუაფ სწორ თეშ კეთება.
21 უჯგუშ რე, ვა ჭკუმე ხორც, ვა შვე ღვინ დო ვართ შხვა მუთუნ აკეთე თიცალ, მუთ სქან ჯიმას რწმენას მიოდინაფუანს.
22 სქან რწმენა სქან დო ღორონთიშ საქმე რე. ბედნერ თიმწკუმა იჸუაფუქ, მუჟამსით სქან დუდ ბრალს ვეგერდვანს თიშ გურშენ, მუდგაშ კეთება გინოჭყვიდ.
23 მარა, კოჩის მუდგარენ ქათაკილ დო იშენით ქოჭკუმუნს-და, ბრალ ქიგიადვალუ, მუშენდა რწმენათ ვა მოქმედენს. ირფელ, მუდგას რწმენათ ვა ვორთუთ, ცოდა რე.
სქოლიოეფი
^ ქოძირით „ბიბლიურ სიტყვეფიშ ენწყუმა“.
