რომაელეფშა მეჭარილ წერილ 15:1-33
15 ჩქი, მიდგას ძალიერ რწმენა მიღუნა, ოკო მივეხვარათ თინეფს, მიდგას ვა უღუნა ძალიერ რწმენა; ხვალე ჩქინ დუდის მუჰამუათინ თიშე ოკო ვეფიფქრათ.
2 თითოეულქ ოკო ვეცადათ ჩქინიანს მუჰამუათ, თიშ საჯგირობუოთ დო გამანგარებელო,
3 მუშენდა ვართ ქრისტე ფიქრენდჷ, მუჭო მუჰამუკო მუშ დუდის, მუჭოთ ჭარილ რე თიშ გურშენ: „სქან მალანძღარეფიშ ლანძღუაქ ქიგმოტირხჷ“.
4 ირფელ, მუდგაქ წმინდა წერილეფს ულირს იჭარ, ჩქინ ოგურაფალო იჭარ, ნამდა წმინდა წერილეფშე მეღებულ მოთვენათ დო გურიშელაკინათ მიღუდესკო იმენდ.
5 ღორონთ მარზენა მოთვენაშ ძალას დო გურშა ემქექუანა. ათეშენ ფთხინქჷ ღორონთის, თიცალ აზროვნება გიღუდან, მუნერით ქრისტე იესოს უღუდ.
6 თეშნერო შეგალებენა, არძაქ ართათ განადიდათ ჩქინ უფალ ქრისტე იესოშ ღორონთ დო მუმა.
7 თაშ ნამდა, მუჭოთ ქრისტექ მეიღეს მთელ გურით, თქვა ხოლო თეშ ოკო მიღათ ართიან. თეს მოუღ დიდება ღორონთშა.
8 გირაგადუთ: ქრისტექ იუდეველეფიშ მსახურო გინირთჷ, მუშენდა ქაძირუკო, ნამდა სანდო რე ღორონთ დო სანდო რე თიშ დუნაპირებუეფ ხოლო, ნამუთ თინეფიშ ჯვეშეფს მეჩჷ.
9 თექ თიშენ ხოლო მოხვად, ნამდა ხალხეფქ განადიდესკო ღორონთ თიშ გიმორჩქინელ ჭყოლოფაშენ, მუჭოთ წმინდა წერილეფ იჩიებ: „ათეშენ ერეფ შქას მეიძღვინენქ დიდებას დო ოდიდებელს ქუბირქ სქან სახელს“.
10 თენა ხოლო ჭარჷ: „ერეფ, ხიოლ გიღუდან თიშ ხალხწკუმა ართო!“
11 თეს გეძინელ, ჭარილ რე: „არძა ერქ განადიდით იეჰოვა; არძა ხალხიქ განადიდას თინა!“
12 ესაია ხოლო იჩიებ: „გემკორჩქინდუ იესეშ ჩხვიჩხვ, ნამუთ ერეფიშ მმართველ იჸუაფ; თიშ იმენდ აღვენუნა ერეფს“.
13 იმენდიშ მუმაჩამალ ღორონთიქ ეგოფშან ირნერ ხიოლით დო მშვიდობათ, მუშენდა თის ონდუთ; თიქ ეგოფშან წმინდა შურიშ* ძალათ დო იმენდიქ უმოსო გეგემანგარან.
14 ჯიმალეფ, ბჯერსჷ, ნამდა ეფშა რეთჷ სიჯგირათ, გიღუნა რჩქინა დო შეილებუნა ართიან გიოწურუათ.
15 მარა თე წერილს ალალას რჭარუნთ ნამთინე საკითხიშ გურშენ, მუშენდა ქუგგოშინათ თინეფ. თეს თიშენ ვორთუქ, ნამდა ღორონთიქ მიჭყოლოფუ.
16 მა ქრისტე იესოშ მსახურ ვორექ, შხვა რჯულიშ ხალხშა მოშქუმალირ. ბრელს ფხანდენქ ღორონთიშ გურშენ სახიოლო ამბეშ გაცხადებაშ წმინდა საქმეშო, ნამდა შხვა რჯულიშ ხალხ ღორონთშო მოსაწონ მსხვერპლ რდასჷ, ნამუთ წმინდა შურიშ საშვალებათ წმინდათ გინირთუ.
17 მოხიოლ, ნამდა ქრისტეშ მოწაფე ვორექ დო ღორონთიშ საქმეს ვასრულენქ.
18 თიშე ვედიპჭყანქ რაგადის, მუ მაფჷ ნაკეთებ, ხვალე თის ფთქუანქ, მუთ ქრისტექ აკეთ ჩქიმ საშვალებათ, ნამდა შხვა რჯულიშ ხალხიქ დემორჩილუკო თის. ქრისტექ თენა აკეთ ჩქიმ სიტყვეფით დო საქმეეფით,
19 წმინდა შურით კეთებულ სასწაულეფით დო სარკო საქმეეფით. თეშნერო, იერუსალიმშე ილირიაშახ ირდიხას გურგედვალირო ქიფქადაგ ქრისტეშ გურშენ სახიოლო ამბე.
20 მიზანო მიღუდ, სახიოლო ამბე ვეფქადაგიკო თექ, სოდეთ უკვე უჩქუდეს ქრისტეშ გურშენ, მუშენდა ვა მოკოდ, შხვაშ ინორღვაფილ ოსხირს გივაშენიკო.
21 მუჭოთ ჭარილ რე: „მიდგაშათ თიშ გურშენ ვა უთქუალუნა, ქიგეგენს, დო მიდგას ვა მურჩქილუაფ, ქინანჭუ“.
22 ზუსტას ათეშენ ვამმართინ თქვანდა, ვარინ ბრელშა მიმნდომ მოულა.
23 რახანს ასე თე ადგილეფს ირდიხას ნაქადაგებ მაფჷ დო ბრელ წანა რე, თქვანდა მეულას მივანატრუქ,
24 იმენდ მიღჷ, ესპანეთშა ულაშ დროს ქორძირუნთ, ჭიჭე ხანით თქვანწკუმა რინათ გეფხარენქ დო ესპანეთშა ხოლო მიდმაზარენთ.
25 მარა ასე იერუსალიმშა მეურქ, ნამდა წმინდეფს* ქიმვეხვარე.
26 მაკედონელ დო აქაიელ ჯიმალეფქ, ხიოლით გეგნოდვეს თინა, მუთ უღუდეს, ნამდა ქიმეხვარესკო იერუსალიმს მახორუ თი წმინდეფს*, მით უღონოეფ რენა.
27 მართალ რე, ჯიმალეფქ თენა ხიოლით აკეთეს, მარა თინეფიშ მოვალეეფ ხოლო რდესჷ, მუშენდა იერუსალიმს მახორუ ჯიმალეფქ მუნეფს სულიერ ძღვინ გუნაწილეს. თაშ ნამდა, თე ჯიმალეფს ქოთ ოვალუნა, უღონობაშ დროს ქელუდირთან იერუსალიმს მახორუ ჯიმალეფს.
28 მუჟამსით გეგნოფჩანქ თინეფს, მუთ და დო ჯიმალეფქ შაყარუეს, ესპანეთშა მიდურქ დო თქვა ხოლო გემკოიშარუანთ.
29 თინა ხოლო მიჩქჷ, ნამდა თქვანდა ქიმურქინ, ქიმურქ ეფშა ხვამათ, ნამუთ ქრისტეშე რე.
30 ასე ელაიჩანთ, ჯიმალეფ, ჩქინ უფალიშ, იესო ქრისტეშ, საშვალებათ დო ჸოროფათ, ნამუთ წმინდა შურშე მოურს, ჩქიმწკუმა ართო ირიათო ილოცათ ჩქიმიშ გურშენ.
31 ილოცით, ნამდა იუდეას მახორუ ურწმუნოეფს გინუსქიდე დო იერუსალიმს მახორუ წმინდეფქ* ხიოლით მიღან თინა, მუთ თინეფშა მემიღ.
32 თეშ უკულ, ღორონთიშ ნებაქ ქიჸუ-და, ხიოლით ეფშა ქიმურქ თქვანდა დო გურშა ელუკინანთ ართიანს.
33 მშვიდობაშ მუმაჩამალ ღორონთ ჸოფედას თქვანწკუმა! ამინ!
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
