რომაელეფშა მეჭარილ წერილ 3:1-31
3 იმწკუმა, მუთ რე უმოს იუდეველობა ვარდა მუ ჯგირობუა მოუღ წინადაცვეთას?
2 ჟირხოლოს ბრელ ჯგირობუა მოუღ. პირველ რიგის, თინა, ნამდა იუდეველეფს მენდებულ აფუნა ღორონთიშ წმინდა სიტყვეფ.
3 მარა მუშ რაგად შილებე თი იუდეველეფშე, მიდგაქ რწმენა ვეგმირჩქინეს?! თინეფიშ ურწმუნოება ნიშნენსო, ნამდა ხალხიქ მეტო ოკო ვენდას ღორონთის?
4 მუშო ოკო რაგად, ვარ! ირკოჩიქ მეტყურეთ გინირთასინ ხოლო, ღორონთ იშენით მართალ იჸუაფ, მუჭოთ ჭარილ რე: „სქან სიტყვეფ ქაძირანს, ნამდა მართალ რექჷ დო, მუჟამსით გუგასამართლენა, სქან სიმართლეს დამტკიცენქ“.
5 ჩქინ გლახა საქმეეფ ღორონთიშ სიმართლეს ქაძირანს-და, მუ გიშურს, უსამართლოთ გიმირჩქინანსო ღორონთ რისხუას?! (თეს კოჩიშ გინაჯინშე იფჩიებუქ).
6 მუშო ოკო რაგად, ვარ! ღორონთ უსამართლო ქორენ-და, მუჭო გასამართლენს თე ქიანას?!
7 მარა ჩქიმ ტყურათ ღორონთიშ სიმართლეს ქუვოძირანქ დო თიშა დიდება ქუმომიღუნ-და, მუშენ ოკო მემრჩქინას თიქ ცოდამო?!
8 იმწკუმა ქოფთქუათ თინა, მუდგაშ რაგადის ნამთინე ეკმაბრალენა, მორთ გლახა გუვაკეთათ, ნამდა ჯგირქ გეგშართასია. თეცალეფშა გიშაღალირ განაჩენ სამართლიან რე.
9 თენა თის ნიშნენსო, ნამდა იუდეველეფს შხვეფშე უჯგუშო მიღუნა საქმე? შუროთ ვარ! მუშენდა ჩქი უკვე ქოფთქვით, ნამდა ქოთ იუდეველეფ დო ქოთ ბერძენეფ ცოდაშ ხეს რენა;
10 მუჭოთ ჭარილ რე: „მითინ ვა რე მართალ, მითინ,
11 მითინ ვა რე გოხვალამირ, მითინ ვა გორუნს ღორონთის.
12 არძაქ გეგნურთჷ შარას, მუთუნიშ მოღეეფ ვა რენა. მითინ ვართჷ ჯგირს, მითინ“.
13 „თინეფიშ ყორყელ გონჯამილ სასაფლა რე, თინეფიშ ნინა ტყურას იჩიებ“, „გვერიშ შხამცალ რე თინეფიშ სიტყვეფ“,
14 „პიჯ ეფშა აფუნა ჭყალათ დო ნწარე სიტყვეფით“,
15 „თინეფიშ კუჩხეფ ზისხირიშ დაბუნშა ინჭუაფ“,
16 „მოსპუალა დო უბედრობა რე თინეფიშ შარეფს
17 დო ვა უჩქუნა მშვიდობაშ შარა“,
18 „ვა უღუნა ღორონთიშ შიშ“.
19 მიჩქუნა, ნამდა ირფელ, მუდგას კანონ იჩიებ, იუდეველეფშო* რე, მუშენდა მეტო ვემართლან დუდ დო ქიძირას, ნამდა მთელ ქიანას დაშებულ აფჷ ღორონთიშ წოხოლე, მუდგაშ გურშენ დასაჯება ხვადჷ.
20 თაშ ნამდა, ღორონთიშ თოლს მითინ ვეჸუაფ მართალო მერჩქინელ თი საქმეეფით, ნამდგაშ კეთებას კანონ ითხინს, მუშენდა კანონ ხვალე თის მოხვარუნა, ქინვანჭათ, მუ რე ცოდა.
21 მარა ასე გეგმიარგამ, ნამდა კანონიშ უმშო შილებე ღორონთიშ თოლს მართალო რდე მერჩქინელ, მუჭოთ თეს კანონ დო წინასწარმეტყველეფიშ წიგნეფ ხოლო ამოწმენს.
22 თაშ რე, არძა, მიდგას ქრისტე წანსჷ, ღორონთიშ თოლს მართალო იჸუაფ მერჩქინელ, მუშენდა ღორონთ მითინს ვეგშართუნს;
23 ირკოჩიქ შეცოდ დო მორკებულ რენა ღორონთიშ დიდებას.
24 თინეფშო ძღვინ რე, ნამდა იესო ქრისტეშ გინოგაფილ გიშაჸიდირალიშ საშვალებათ გეთავისფალეს დო ღორონთიშ თოლს მართალეფო იჸუეს მერჩქინელქ. თენა ღორონთიშ ჭყოლოფა რე.
25 ღორონთიქ იესო შერიგაშ შესაწირო გინაშქვჷ დო თე შერიგა თიშ დობუნილ ზისხირიშ რწმენათ რე შეიოლებერ. ღორონთიქ თენა თიშენ აკეთ, ნამდა მუშ სიმართლე ქაძირუკო. ათეშენ ჯვეშო მახორუ ხალხის უთვინენდჷ დო მუნეფიშ ცოდეფს პატიენდჷ.
26 თეს გეძინელ, მუშ სიმართლეს ამდღა ხოლო მოძირანა თით, ნამდა მართალ კოჩო მირჩქინანს თის, მიდგას იესოშ წანსჷ.
27 იმწკუმა მუ მიღუნა ოცქვაფალ? ვართ მუთუნ! ნამ კანონით იფცქუათ? საქმეეფს ითხინსინ თი კანონითო? ვარ, რწმენაშ კანონით,
28 მუშენდა მიჩქუნა, ნამდა კოჩ რწმენათ იჸუაფ მართალო მერჩქინელ დო ვართ ხოლო თი საქმეეფით, ნამდგას კანონ ითხინს.
29 ხვალე იუდეველეფიშ ღორონთ რენო თინა? არძა ხალხიშ ღორონთ ვა რენო? ქო, არძა ხალხიშ ღორონთ რე!
30 ღორონთ ართ რე, ათეშენ თინა ქოთ წინადაცვეთილეფს დო ქოთ თინეფს, მით წინადაცვეთილ ვა რენა, მუნეფიშ რწმენათ გამართლენს.
31 თეთ თის იფჩიებუთო, ნამდა კანონ მეტო ვა რე საჭირო? შუროთ ვარ! ჩქი ხუჯის უკინენთ კანონს!
სქოლიოეფი
^ პირდაპირ თარგმან — „თინეფშო, მით კანონიშ თუდო რე“.
