რომაელეფშა მეჭარილ წერილ 4:1-25
4 თაშ ქორენ-და, იმწკუმა მუ მიბღით ჩქინ ჯვეშშე, აბრაამშე?
2 მაგალთო, აბრაამქ მართალო მერჩქინელქ მუშ საქმეეფით ქიჸუ-და, ოცქვაფალ მიზეზ ხოლო ქაღვენუდ, მარა ღორონთიშ წოხოლე ვარ.
3 მუს იჩიებ წმინდა წერილეფ? „აბრაამქ ირწმუნ იეჰოვა* დო ათეშენ მართალო იჸუ მერჩქინელქ“.
4 კოჩშა ნამუშერიშ მეჩამა ჭყოლოფა ვარინ, მუთ ოკუთვნუნ თინა რე.
5 თეშ გინაწონს, თის, მით მუშ საქმეეფშა ვა რე დაიმენდებულ დო წანსჷ ღორონთ, ნამუთ უღორონთე კოჩის მართალო მირჩქინანს, მუშ რწმენა სიმართლეთ ათვალუ.
6 მუჭოთ დავით იჩიებ, ბედნერ რე თი კოჩ, მით ღორონთის მართალო აფჷ მერჩქინელ, მარა საქმეეფიშ გურშენ ვარ. თიქ თქუ:
7 „ბედნერ რე თინა, მიდგას ეპატუ უკანონო საქმეეფქ დო მიდგაშ ცოდეფქ დიფორ.
8 ბედნერ რე კოჩ, მიდგას იეჰოვა დაშებულს ცოდათ ვა უთვალუნს“.
9 თე ბედნერობა ხვალე წინადაცვეთილეფშო რენო დოვარ თინეფშო ხოლო, მით ვა რენა წინადაცვეთილეფ? მუშენდა იფჩიებუთ, აბრაამქ რწმენაშ გურშენ იჸუა მართალო მერჩქინელქ.
10 მარა, მუჟამ იჸუ თიქ მართალო მერჩქინელქ, წინადაცვეთილ რდუნ თეშიო დოვარ თეიშახ? თიმწკუმა, მუჟამსით დიო ხოლო ვა რდჷ წინადაცვეთილ!
11 ღორონთიქ უწუ თის, ნამდა წინადაცვეთა გეკეთუკო; თენა იჸუაფუდ თიშ ნიშან, ნამდა წინადაცვეთაშახ რდჷ მართალ კოჩო მერჩქინელ. თეშნერო თიქ გინირთჷ წინადაცვეთილ ვა რენ ფერ არძა მორწმუნეშ მუმათ, ნამდა თინეფქ ხოლო მართალეფო იჸუესკო მერჩქინელქ.
12 თეს გეძინელ, თიქ წინადაცვეთილეფიშ მუმათ ხოლო გინირთჷ დო ხვალე თინეფიშ ვარინ, არძაშ, მით თი რწმენაშ ნაკვალუს გეჸუნს, ნამუთ ჩქინ მუმას, აბრაამს, წინადაცვეთაშახ უღუდ.
13 აბრაამს ვარდა თიშ გამნარყის კანონიშ ჭყოლოფათ ვემუღებ დუნაპირებ, ნამდა დემკვირდენდჷ მთელ ქიანას*. თე დუნაპირებუქ თიშ ჭყოლოფათ მიაჩ, ნამდა რწმენათ მართალო იჸუ მერჩქინელქ.
14 თე დუნაპირებუს კანონიშ საშვალებათ ქიმიღენდეს-და, რწმენა ურგებელ ჸოფე დო აბრაამშა მეჩამილ დუნაპირებ მუთუნს ვა ნონიშნებუე.
15 სინამდვილეს კანონს ღორონთიშ რისხუა მოჸუნს, კანონ ვა რენ თექ კანონიშ გინორთა ხოლო ვა რე.
16 დუნაპირებ რწმენაშ საშვალებათ მიბღით. თენა ღორონთიშ ჭყოლოფა რე. თე დუნაპირებ აუცილებერო შისრულებუდ თიშ გამნარყშა — ხვალე თინეფშა ვარ, მით კანონს მეჸუნა, თინეფშა ხოლო, მიდგას აბრაამცალ რწმენა უღუნა, ნამუთ ჩქინ, არძაშ, მუმა რე
17 (მუჭოთ ჭარილ რე: „მა გინგოშქვჷ ბრელ ხალხიშ მუმათ“). აბრაამქ ღორონთის ქაძირუ, ნამდა თენა წანდჷ — ღორონთის, მით ღურელეფს სიცოცხლეს არზენს დო დიო ვა რენ თიშ გურშენ, უკვე რდასინ თეშ იჩიებ.
18 თის მუთუნ მიზეზ ვა უღუდ, იფიქრუკო, ნამდა სქუალეფ აჸვენუდ, მარა იმენდ უღუდ დო ათეშენ წანდჷ, ნამდა იჸუაფუდ ბრელ ხალხიშ მუმა, მუჭოთ ღორონთის აფუდ რაგადებულ: „თაშ იჸუაფ სქან გამნარყ ხოლო“.
19 თის რწმენა ვა დასუსტებ, მარა თიშე ხოლო ფიქრენდჷ, ნამდა ოშ წანაშა მეჭირნაფილს სქუა უკვე ვაჸვენუდ დო სარა ხოლო თიცალ ხანშამიშულირ რდჷ, ნამდა სქუა მუთუნით ვეურჩქინდუდ.
20 მარა, რახანს ღორონთიქ დეპირ, ეჭვეფ ვა გორჩქინუ დო რწმენა ვა დასუსტებ; თეშ გინაწონს, რწმენათ გამანგარებულ ღორონთის ადიდენდჷ.
21 თის ბოლოშა ჯერდჷ, ნამდა ღორონთის შეულებუდ მუშ დუნაპირებუშ შესრულება.
22 თაშ ნამდა, მუშ რწმენაშ გურშენ „მართალ კოჩო იჸუ მერჩქინელქ“.
23 მარა სიტყვეფქ „მართალ კოჩო იჸუ მერჩქინელქ“, ხვალე თიშ გურშენ ვა ჭარენ,
24 ჩქინ გურშენ ხოლო იჭარ, მით მართალეფო იპჸუაფუთ მერჩქინელ, მუშენდა პწანა თინა, მიდგაქ გათელ იესო, ჩქინ უფალ.
25 თიქ ჩქინ ცოდეფიშ გურშენ იჸუ გინოჩამილქ ღურაშა დო გეთელ, ნამდა მართალეფო იპჸუათ მერჩქინელქ.
