რომაელეფშა მეჭარილ წერილ 5:1-21
5 ჩქი რწმენაშ გურშენ ვორეთ მართალეფო მერჩქინელ, ათეშენ გეფხარათ ღორონთწკუმა მშვიდობათ* ჩქინ უფალიშ, იესო ქრისტეშ, საშვალებათ.
2 თიშ რწმენათ შარაქ გუმანწყეს ღორონთიშ ჭყოლოფაშ მიოღებელო დო ქოთ ბღებულენთ თის. თაშ ნამდა, მორთ გეფხარათ* ღორონთშე განდიდებაშ მეღებაშ იმენდით!
3 დო ხვალე თეთ ვარინ, გაჭირებაშ დროს ხოლო გეფხარათ, მუშენდა მიჩქუნა, ნამდა გაჭირება მოთვინებას ავითარენს,
4 მოთვინებას მოჸუნს ღორონთიშ მოწონა, ღორონთიშ მოწონას — იმენდ,
5 დო თე იმენდ ვეგემტყუნებ, მუშენდა ღორონთიქ მუშ ჸოროფა ქუმოძირეს წმინდა შურიშ* საშვალებათ, ნამუთ მუჩეს.
6 ქრისტექ უღორონთე ხალხიშ გურშენ ღურჷ მერჩქინელ დროს, მუჟამსით დიო ხოლო საცოდალეფ* ვორდით.
7 მართალ კოჩშო ნაკლებო ღურუ მითინ, მარა ჯგირ კოჩშო უმოსო შილებე დოღურას კოჩიქ.
8 მარა ღორონთიქ მუშ ჸოროფა თით ქუმოძირეს, ნამდა ქრისტექ თი დროს ღურჷ ჩქინო, მუჟამსით დიო ხოლო ცოდამეფ ვორდით.
9 ხვალე თენა ვარინ, რახანს თიშ ზისხირით მართალეფო იპჸით მერჩქინელ, ღორონთიშ რისხუას ხოლო გინვოსქიდუთ თიშ ჭყოლოფათ.
10 მართალ რე, ღორონთიშ ნტერეფ ვორდით, მარა თიშ სქუაშ ღურათ გევერიგით თის. თენა ხოლო უმოსო ამტკიცენს, ნამდა ასე, მუჟამსით გარიგებულეფ ვორეთ ღორონთწკუმა, იესოშ სიცოცხლეშ საშვალებათ გეგნოფსქიდუთ.
11 ხვალე თეთ ვარინ, ღორონთწკუმა ურთიერთობათ ხოლო ფხარენთ ჩქინ უფალ, იესო ქრისტეშ საშვალებათ, ნამდგაშ ჭყოლოფათ გევერიგით ღორონთის.
12 ართ კოჩშე მიშართჷ ცოდაქ ქიანაშა დო ცოდაშე — ღურაქ, თეშნერო ღურაქ ირ კოჩშა გეგნორთჷ, მუშენდა არძაქ შეცოდ …
13 კანონშახ ცოდა უკვე რდჷ ქიანას, მარა კანონ ვა რენ თიმწკუმა ცოდაშე მითინს ვეგიადვალუ ბრალ.
14 თეშ უმკუჯინუო, ადამშე მოჸუნაფილ მოსეშახ ღურა მართუნდჷ არძას, თინეფს ხოლო, მიდგას ვეშუცოდებ ადამცალო, ნამუთ მოგენდჷ თის, მიდგაქ ოკო მორთუკო.
15 ძღვინს, ნამდგას ღორონთ ირზენს, გვალო შხვა შედეგ მოუღ, ვინემ ცოდას. ართ კოჩიშ შეცოდებაქ ბრელს მოუღ ღურა, მარა ართ კოჩიშ, იესო ქრისტეშ, გიმორჩქინელ ჭყოლოფათ ბრელქ მიღჷ ღორონთიშ ჭყოლოფა დო ძღვინ.
16 ართ კოჩიშ შეცოდებაშ გინაწონს, ძღვინს გვალო შხვა შედეგიქ მაჸუნ: ართ შეცოდებას ბრალიშ გედვალაქ მაჸუნ, მარა ბრელ შეცოდებას — ძღვინქ, გამართლებაქ.
17 ართ კოჩიშ შეცოდებათ ღურაქ არძაშ მართუა ქიდიჭყჷ; თენა ქობჯერან-და, მუზმათ უმოსო შილებე ბჯერდან, ნამდა ართ კოჩიშ, იესო ქრისტეშ, საშვალებათ იცოცხლენა დო იმმართველენა თინეფ, მიდგას ხვეიანო მიაჩეს ღორონთიშ ჭყოლოფაქ დო გამართლებაშ ძღვინქ.
18 თაშ ნამდა, მუჭოთ ართიშ შეცოდებათ არძას გიადვჷ ბრალქ, თეშ ართიშ სწორ საქციელით მართალო იჸუ მერჩქინელქ არძანერ ადამიანქ, ნამდა იცოცხლან.
19 მუჭოთ ართ კოჩიშ უდუჯერებუობათ გინირთჷ ბრელქ ცოდამო, თეშ ართ კოჩიშ დაჯერათ ბრელ იჸუაფ მართალო მერჩქინელ.
20 კანონქ თიშენ იჸუ მოჩამილქ, ნამდა ქიძირუკო, მუზმათ ცოდამ რდჷ ხალხ, მარა სოდეთ ბრელ რე ცოდა, თექ უმოს მეტ ჭყოლოფას გიმირჩქინანს ღორონთ.
21 თაშ ნამდა, მუჭოთ ულირს ცოდა მმართველენდჷ, მუდგას ღურა მოჸუნდჷ, თეშ ასე ღორონთიშ ჭყოლოფა მმართველენს სიმართლეთ, მუდგას ულიებ სიცოცხლე მაჸუნუ ჩქინ უფალ იესო ქრისტეშ საშვალებათ.
სქოლიოეფ
^ ვარდა შილებე: „ათეშენ მიღუნა ღორონთწკუმა მშვიდობა“.
^ ვარდა შილებე: „ფხარენთ“.
^ ქოძირით „ბიბლიურ სიტყვეფიშ ენწყუმა“.
^ შხვანერო — „ცოდამეფ“.
