რომაელეფშა მეჭარილ წერილ 6:1-23
6 თაშ ქორენ-და, ვაგრძელათო ცოდაშ კეთება, ნამდა უმოს მეტ ჭყოლოფაქ ქუმაშუან?!
2 მუშო ოკო რაგად, ვარ! ცოდაშო ღურელ ქუვორეთ-და, კინ მუჭო ოკო ვაგრძელენდათ ცოდაშ კეთებას?!
3 ვაიჩქუნანო, ნამდა მიდგაქ ქრისტეწკუმა ართობას იმნათით, თიშ ღურას იმნათით?!
4 თეშნერ ნათუათ თიწკუმა ართო ვორეთ დასაფლებურ, მუშენდა, მუჭოთ იესოქ გეთელ მუმაშ დიდებულ ძალათ დო ახალ ცხოვრებათ ცხოვრენს, თეშ ჩქი ხოლო ასე ახალ ცხოვრებათ ფცხოვრენთ.
5 ართნერ ღურა ქომღუნან-და, იმწკუმა ართნერ გათელება ხოლო მაღვენუნა.
6 მიჩქუნა, ნამდა ჩქინ ჯვეშ პიროვნებაქ იესოწკუმა ართო ძელშა იჸუ მიკოჭკადილქ, მუშენდა ძალაქ მეუდინუკო ცოდას, ნამუთ ჩქინ სხეულს რე. თაშ ნამდა, ცოდაშ მონეფ მეტო ოკო ვა ვორდათ,
7 მუშენდა მიდგაქ ღურჷ, თიქ ცოდაშე გეთავისფალ.
8 ხვალე თენა ვარინ, ქრისტეწკუმა ართო დობღურით-და, ბჯერა, ნამდა თიწკუმა ართო იფცოცხლენთ.
9 მიჩქუნა, ნამდა ქრისტე, ნამდგაქ გეთელ, მეტო ვა ღურუ; ღურას თიშა მეტო ვა მარიებე.
10 თიქ ართშა ღურჷ ცოდაშ მასპალო, მარა ასე ცოცხლენს ღორონთშო.
11 თქვა ხოლო მირჩქინით, ნამდა ღურელ რეთჷ ცოდაშო დო ცოცხლენთ ღორონთშო იესო ქრისტეშ საშვალებათ.
12 ათეშენ, ვემეჩათ ცოდას თქვან ცხოვრებაშ მართუაშ უფლება დო ვაკეთათ თინა, მუთ ოკო თქვან სხეულს, ნამდგას ღურა მოძჷ.
13 ცოდას ვეგნოჩათ თქვან სხეულეფ გლახაშ ოკეთებელო, თეშ გინაწონს, ღორონთის გეგნოჩით თქვან დუდ, მუჭოთ ხალხიქ, მით ღურელ რდჷ დო გეთელ; თქვან სხეულეფ ხოლო გეგნოჩით ღორონთის ჯგირიშ ოკეთებელო.
14 ცოდაქ ოკო ვემგერუან, მუშენდა ღორონთიშ ჭყოლოფა გაფუნა მეღებულ დო კანონიშ მეჸუნა მეტო ვემგეთხიებუნა.
15 თაშ ქორენ-და, იმწკუმა ოკო შეფცოდათო, რახანს კანონიშ მეჸუნა ვემმეთხიებუნა დო ღორონთიშ ჭყოლოფა მაფუნა მეღებულ?! მუშო ოკო რაგად, ვარ!
16 ვაიჩქუნანო, ნამდა მიდგას ომორჩილუთ დო მიდგაშ მონათ გინიშქვანთ დუდის, თიშ მონა რეთჷ?! ცოდაშ მონობა ღურაშა მეიჸუნანა, მარა ღორონთიშ მონობა დო მორჩილება — გამართლებაშა.
17 მადლობა ღორონთის, ნამდა, ართ დროს ცოდაშ მონეფ ქორდით, მარა ასე მთელ გურით დემორჩილით ღორონთშე ნაგურეფუს.
18 რახანს ცოდაშე გეთავისფალით, სიმართლეშ მონეფო გინირთით.
19 კოჩშო გასაგებ ნინაშა გეჩიებუთ, ცოდამეფ რეთინ თიშენ: მუჭოთ თქვან სხეულეფ გინოჩით უწმინდურებას დო უკანონობას უკანონობაშო, თეშ ასე გეგნოჩით თქვან სხეულეფ სიმართლეს სიწმინდეშო.
20 ცოდაშ მონეფ რდითინ, სწორიშ კეთება ვემგეთხიებუდეს.
21 მუ შედეგიქ მაჸუნ თქვან საქმეეფს თი დროს? თიცალ მუდგარენეფს ორთუდით, მუდგაშ გურშენ ასე ონჯღორე გიჩქუნა დო მუდგას ღურა მოჸუნს.
22 მარა ასე, მუჟამსით ცოდაშე გეთავისფალით დო ღორონთიშ მონეფ რეთჷ, თინა აკეთით, მუთ წმინდა რე დო მუდგას ულიებ სიცოცხლე მაჸუნუ.
23 ცოდაშ ოგაფურ ღურა რე, მარა ძღვინ — ულიებ სიცოცხლე, ნამდგას ღორონთ ჩქინ უფალ ქრისტე იესოშ საშვალებათ მარზენა.
