რომაელეფშა მეჭარილ წერილ 7:1-25
7 ჯიმალეფ, ვაიჩქუნანო, ნამდა კანონ თეიშახ მართუნს კოჩის, ონდო ცოცხალ რე?! თეს თინეფს ურაგადუქ, მიდგას კანონ უჩქჷ.
2 მაგალთო, კანონ იჩიებ, ნამდა გათხილ ოსურ ართობას რე ქომონჯწკუმა ონდო ქომონჯ ცოცხალ რე, მარა ქომონჯიქ დოუღურ-და, თავისფალ რე თიშ კანონშე.
3 თაშ ნამდა, ოსურ, ონდო ქომონჯ ცოცხალ რე, შხვას მიდაჸუნუნ-და, მრუშ იჸუაფ. მარა, ქომონჯიქ დოუღურ-და, თავისფალ რე თიშ კანონშე დო შხვას მიდაჸუნუნ-და, მრუშ ვეჸუაფ.
4 თეშნერო, ჩქიმ ჯიმალეფ, ქრისტეშ მსხვერპლით* თქვა ხოლო გეთავისფალით მოსეშ კანონშე. თექ თიშენ მოხვად, ნამდა თიშ ქოჸოფედითკო, მიდგაქ გეთელ. ასე შემლებუნა გიმობდირთათ ღორონთიშ მსახურებაშო.
5 მუჟამსით ჩქინ ცოდამ სხეულს ოკოდუნ თეშ ფცხოვრენდით, კანონქ გეგმაარგამ, ნამდა თი გლახა მუდგარენეფქ, მუთ სხეულს ოკოდ, ცოდაშა ქიმემიჸუნეს. თე ირფელს ღურა მაჸუნუდ.
6 მარა ასე კანონშე თავისფალეფ ვორეთ, მუშენდა დობღურით თიშო, მუდგას აკოჭოფილ ვაფუდით. ასე ღორონთის შხვანერო, თიშ წმინდა შურით* ვომსახურუთ დო ვართ ხოლო ჯვეშობურო — ჭარილ კანონით.
7 იმწკუმა, მუ გიშურს, კილ* უღუნო კანონს? მუშო ოკო რაგად, ვარ! კანონ ვა ჸოფედუკონ, ვა მარჩქვენუდ, მუ რე ცოდა. მაგალთო, კანონს ვა ჭარუდკონ: „შხვაშ მუთუნ ვემიკორინუა“, ვა მარჩქვენუდ, ნამდა თენა სწორ ვა რე;
8 მარა ცოდაქ, ნამდგას კანონშე მიაჩ ძალაქ, ირნერ ჰარამობა გომკურცხინუ. კანონიშ უმშო ვა მიჩქუდ, მუ რდჷ ცოდა.
9 კანონიშ უმშო ცოცხალ ვორდჷ, მარა კანონქ გორჩქინდუნ, ქიძირ, ნამდა ცოდამ ვორდჷ, ათეშენ დობღურ.
10 ქიმეფხვად, ნამდა კანონქ, ნამდგაქ სიცოცხლეშა ოკო მემიჸუნუკო, ღურა ქუმომიღ.
11 ცოდაქ, ნამდგას კანონშე მიაჩ ძალაქ, მიმოჩილითუ დო დოპჸილ თიშ საშვალებათ,
12 მარა კანონ წმინდა რე დო მუდგას იჩიებუნ თინა ხოლო წმინდა, მართალ დო ჯგირ რე.
13 იმწკუმა მუ გიშურს, მუთ ჯგირ რენ თიქ მომიღუო ღურა? მუშო ოკო რაგად, ვარ! ცოდაქ ჯგირიშ საშვალებათ მომიღ ღურა, მუშენდა ქიძირუკო, მუ რე ცოდა. თაშ ნამდა, კანონქ ოძირუ, მუნერ უბადო რე ცოდა.
14 მიჩქუნა, ნამდა კანონ ღორონთშე რე, პრობლემა თინა რე, ნამდა ცოდამ კოჩ ვორექ, ცოდაშა მეჸიდირელ.
15 ბოლოშახ ვენვანჭუქ, მუშენ ვორთუქ თის, მუდგას ვორთუქ, მუშენდა, მოკონ თის ვარინ, ბჯოგუნ თის ვორთუქ.
16 კანონ ჩქიმ თოლს ხოლო ჯგირ რე, მარა იშენით თინა მაკეთებუაფ, მუთ ვა მოკო.
17 სინამდვილეს, თე ირფელს მა ვა ვორთუქ, ცოდა ორთჷ, ნამუთ ჩქიმ სხეულს რე.
18 მიჩქჷ, ნამდა ჩქიმ ცოდამ სხეულს ჯგირ მუთუნ ვა რე, მუშენდა ქუმოკო, ჯგირ ვაკეთე, მარა ვეგშმალე.
19 ჯგირიშ კეთება მოკო, მარა ვა მაკეთებე, გლახაშ კეთება ვა მოკო, მარა იშენით ვორთუქ.
20 თაშ ნამდა, ვა მოკონ თის ქუვორთუქ-და, თეს მა ვარინ, თი ცოდა ორთჷ, ნამუთ ჩქიმ სხეულს რე.
21 თეშნერო ვორწყექ, ნამდა ვორექ თეცალ კანონიშ ხეს: მოკო, ვაკეთე, მუთ სწორ რე, მარა გლახა ვა მოთხუ.
22 გურს მართალო მოჰამ ღორონთიშ კანონ,
23 მარა ჩქიმ სხეულს შხვა კანონს ვორწყექ, ნამუთ ორკინ ჩქიმ გონებაშ კანონს დო აშმოჸოთანს ცოდაშ კანონიშ ხეს, ნამუთ ჩქიმ სხეულს რე.
24 საცოდალ კოჩ ვორექ! მი მირსხენს ღურუნ ფერ სხეულშე?
25 მადლობა ღორონთის, ნამუთ მირსხენს ჩქინ უფალიშ, იესო ქრისტეშ, საშვალებათ. თაშ ნამდა, გონებათ ღორონთიშ კანონიშ მონა ვორექ, მარა სხეულით — ცოდაშ კანონიშ.
სქოლიოეფი
^ პირდაპირ თარგმან — „ქრისტეშ სხეულიშ“.
^ ქოძირით „ბიბლიურ სიტყვეფიშ ენწყუმა“.
^ პირდაპირ თარგმან — „ცოდა“.
