რომაელეფშა მეჭარილ წერილ 9:1-33
9 მუჭოთ ქრისტეშ მიმაჸუნალ, ტყურას ვეფჩიებუქ, სიმართლეს ბრაგადანქ; ჩქიმ სინდის, ნამდგას წმინდა შურ* ხელმძღვანელენს, მიმოწმენს,
2 ნამდა დიდ ოწუხებელ დო ნინათ ვეიჭარენ ფერ ჭუა მიღჷ გურს.
3 ნოტე, მა ქოპჸოფედიკო ჭყელ დო ქრისტეშე ჩათხინაფილ ჩქიმ ჯიმალეფიშ, ხორციელ ნათესეეფიშ საჯგირობუოთ!
4 თინეფ ისრაელეფ რენა, მით ღორონთიქ სქუათ ეჭოფ დო უძღვინ დიდება, ქუდუდვჷ შეთანხმება, ქიმეჩ კანონ, დუნაპირებუეფ დო ქიმიანდჷ მსახურებაშ პატი.
5 თინეფ რენა ჩქინ ჯვეშეფიშ გამნარყეფ; თე ჯვეშეფშე მოურს ქრისტე ხოლო. სადღამუშოთ დიდება ღორონთის, ნამდგას ირფელშა უღჷ ძალაუფლება! ამინ!
6 მარა ღორონთიშ სიტყვა ვა გამტყუნებე, მუშენდა არძა ისრაელ ვა რე ნამდვილ ისრაელ.
7 აბრაამიშ გამნარყეფ რენან თინა ვა ნიშნენს, ნამდა თინეფ ღორონთიშ თოლს მართალო აბრაამიშ სქუალეფ რენა, მუჭოთ ღორონთიქ აბრაამს უწუ: „გამნარყ, ნამდგას დეგეპირ, ისაკშე იჸუაფ“.
8 თენა ნიშნენს, ნამდა აბრაამიშ არძა კვიდრ სქუა სინამდვილეს ვა რე ღორონთიშ სქუა. თეშ გინაწონს, ნამდვილ გამნარყეფ ღორონთიშ მეჩამილ დუნაპირებუთ დაბადებულეფ რენა.
9 ღორონთიშ დუნაპირებ თეცალ რდჷ: „წანას, თე დროშო, კინ ქუმულ დო სარას ქომოლსქუა აჸვენუ“.
10 ღორონთიქ თეცალ დუნაპირებ ხვალე სარას ვარინ, რებეკას ხოლო მეჩჷ, მუჟამსით თის ტყუპეფქ ქაშუ ისაკშე, ნამდგაშ გამნარყეფ ვორეთ.
11 თინეფ დიო ხოლო ვა რდესჷ დაბადებულ დო ვართ ჯგირ დო ვართ ფურ აფუდეს კეთებულ, მუჟამსით ღორონთიქ ქაძირუ, ნამ აფუდ გიშაგორილ, მუშენდა ღორონთ კოჩის მუშ ნებათ გიშაგორუნს დო ვართ ხოლო თიშ საქმეეფით.
12 ათეშენ ღორონთიქ რებეკას უწუ: „უნჩაშ ქომოლსქუა უკლაშიშ მსახურ იჸუაფ“,
13 მუჭოთ ჭარილ რე: „იაკობ ქიპჸოროფე დო ესავ გიბჯოგე“.
14 თის იფჩიებუთო, ნამდა ღორონთ უსამართლო რე? მუშო ოკო რაგად, ვარ!
15 თინა მოსეს ურაგად: „მიდგას გიშებგორუნქ, თის ქიპჭყოლოფუანქ დო მიდგას მოკონ, თიშ გაჭირებას მიბღანქ გურშა“.
16 თაშ ნამდა, ღორონთიშ ჭყოლოფაშა რე დამოკიდებულ, მის გიშეგორუნს თინა დო ვართ ხოლო თიშა, კოჩის მუ ოკო ვარდა მუს ოცად.
17 წმინდა წერილეფს ღორონთ ფარაონს ურაგად: „თიშენ დოიტე ცოცხალ, ნამდა ჩქიმ ძალა ქუგოძირუე დო მთელ ქიანაქ ქიგეგას ჩქიმ სახელ“.
18 თაშ ნამდა, ღორონთ გინმოჭყვიდუნს, მი იჭყოლოფუას, მარა აჯამეფს მუნეფიშ ნებაშა მიაშქვანს.
19 შილებე, ქოპკითხათ: „იმწკუმა მუშენ გებდვანა თინა ბრალს?! მის აწარნე თიშ ნებაშა?!“
20 სი მი რექჷ, ღორონთის პასუხის ურთინუანქინ?! ნახელუან უწინსო მუშ გიშმაჸუნაფალს, თეცალ მუშენ გიშამიჸუნია?!
21 ნახელუანიშ გიშმაჸუნაფალს ვა უღუნო თიშ უფლება, დიხაჭუბერშე ქოთ სუფთა მუდგარენეფშო გიმარნაფალ ჭკუდ გეგშეჸუნას დო ქოთ სუფთა ვა რენ ფერშო?!
22 ღორონთ ხოლო თაშ რე. თის ოკოდ, რისხუა ქიგიოტახუკო უბადო ხალხის დო მუშ ძალა ქაძირუკო, მარა მანგარო უთვინენდჷ თინეფს, მიდგაშეთ გარისხებულ რდჷ დო მით თიცალ ჭკუდის მოგენდჷ, ნამუთ მასპალ რე.
23 თენა თიშენ აკეთ, ნამდა მუშ დიდება ქაძირუკო თინეფს, მით მუშ ჭყოლოფას მიღენდეს დო მით თი ჭკუდის მოგენდეს, ნამუთ ღორონთიქ დიდებაშო მამზად.
24 ჩქი ვორეთ თინეფ, მით ღორონთიქ ქოთ იუდეველეფშე დო ქოთ შხვა ხალხეფშე გიშეგორ,
25 მუჭოთ ოსიაშ წინასწარმეტყველებას ჭარჷ: „ჩქიმ ხალხ ვა რენან თინეფს, ჩქიმ ხალხის ქუდუძახუქ დო ვა მიჸორდუნ თინეფს — საჸოროფოეფს,
26 დო თექ, სოდეთ უწი, ჩქიმ ხალხ ვა რეთ-მაქ, ცოცხალ ღორონთიშ სქუალეფს ქიგვოდვანქ“.
27 ესაიაქ ისრაელიშ გურშენ თქუ: „ისრაელეფ გვალო ზღვაშ ქვიშაცალო ანაყუ ქორდანინ ხოლო, თინეფშე ხვალე აკაბცხა გინოსქიდუ,
28 მუშენდა იეჰოვა გასამართლენს მთელ ქიანას დო ხეთეშე შეასრულენს განაჩენს“.
29 მუჭოთ ესაიაქ იწინასწარმეტყველ: „ლაშქარეფიშ ღორონთ იეჰოვას ჩქინ გამნარყეფშე ცოცხალ მითინ ვა დუტებუდუკონ, სოდომცალ იპჸუაფუდით დო გომორას ქუვაგურუდით“.
30 იმწკუმა, მუშ რაგად შემლებუნა? მართალ რე, შხვა რჯულიშ ხალხ ვენჭუაფუდ სიმართლეშა, მარა რწმენა გიმირჩქინეს დო თეშ ჭყოლოფათ მართალეფო იჸუეს მერჩქინელქ.
31 თინეფიშ გინაწონს, ისრაელეფ სიმართლეშ კანონით ცხოვრებაშა ქინჭუაფუდეს, მარა ბოლოშახ ვემიაჸუნინეს თე კანონშა.
32 მუშენ? თინეფ სიმართლეშა საქმეეფით მინჭუაფუდეს დო ვართ ხოლო რწმენათ. თინეფქ „ქუას“ ქეკახაბარკეს,
33 მუჭოთ ჭარილ რე: „სიონს გებდვანქ ეკახაბარკალ ქუას, კირდეს, ნამუთ ხალხის დარაგუანს, მარა მიდგას თიშ წანსჷ, იმენდ ვეგემტყუნებ“.
სქოლიოეფი
^ ქოძირით „ბიბლიურ სიტყვეფიშ ენწყუმა“.
