მოციქულეფიშ საქმეეფ 17:1-34
17 თინეფქ ამფიპოლის დო აპოლონიაშა გემშართეს დო თი შარათ თესალონიკეშა გენორთეს, სოდეთ იუდეველეფიშ სინაგოგა რდჷ.
2 მუჭოთ წესო უღუდ, პავლექ სინაგოგაშა გემნორთჷ დო სუმ მარას ირ საბატონს თინეფწკუმა ართო იჩიებუდ წმინდა წერილეფშე.
3 თინა ეუნწყუნდჷ დო წმინდა წერილეფშე უმტკიცენდჷ, ნამდა ქრისტექ ოკო დეტანჯუკო დო გეთელუკო, ურაგადუდ: „იესო რე ქრისტე, ნამდგაშ გურშენ მა გეჩიებუთ“.
4 თინეფშე ნამთინექ ქირწმუნ დო პავლე დო სილაწკუმა რდესჷ. თაშ მიქცუ ღორონთიშ მოშიშ ანაყუ ბერძენქ დო ბრელ პატიგედვალირ ოსურკოჩიქ.
5 მარა იუდეველეფს ენჯარეს, მოედანშე მიდეჸუნეს უსაქმურ დო უბადო კათა, აგვართა ხალხ აკოშაყარუეს დო ქალაქის ერია-მორია გეტახეს. იასონიშ ჸუდეშა ქიმეცუეს დო ოკოდეს, პავლე დო სილა თე ხალხიშ წოხოლე გეგშეჸუნესკო.
6 მარა ვა ძირესინ, იასონ დო მუსხირენ ჯიმა ქალაქიშ მმართველეფშა მიდასერგელუეს დო ღვარანდეს: „თენეფქ ქიანა დუდგიმე ქუდახუეს დო თაქ ხოლო ქუმორთეს,
7 მარა იასონქ თე კათა ჸუდეშა გემნაშქვჷ. თენეფ კეისარიშ კანონიშ წინააღმდეგ მეულა დო იჩიებუნა, შხვა მეფე ხოლო რენია, იესო“.
8 თენა ქიმირჩქილუესინ, დუდშე ხალხიქ დო ქალაქიშ მმართველეფქ გეცუეს,
9 მარა თიშ უკულ, მუთ იასონქ დო შხვა ჯიმალეფქ გირაო გეგნიგეს, თინეფ გათავისფალეს.
10 თიმ სერს ჯიმალეფქ პავლე დო სილა ბერეაშა გოუტუეს. თექ გენორთესინ, ხეთეშე იუდეველეფიშ სინაგოგაშა გემნორთეს.
11 თექიანეფ თესალონიკელეფშე უმოს მონდომებულეფ რდესჷ, მუშენდა მთელ გურით მიღეს სიტყვა; ირდღას გურგედვალირო ირკვიენდეს წმინდა წერილეფს, მართალო თაშ ქორენიაო.
12 თინეფშე ბრელქ ირწმუნ. ირწმუნეს ბერძენეფქ ხოლო — ბრელ პატიცემულ ოსურკოჩიქ დო მუსხირენ ქომოლკოჩიქ.
13 მარა, მუჟამსით თესალონიკელ იუდეველეფქ ქიგეგეს, ნამდა პავლექ ბერეას ხოლო იქადაგ ღორონთიშ სიტყვა, თექ ხოლო ქიმერთეს დო ხალხ თინეფიშ წინააღმდეგ გეიახნარეს.
14 ჯიმალეფქ პავლე ხეთეშე ზღვაჸურე გოუტუეს, მარა სილა დო ტიმოთექ თექ ქუდოსქიდეს.
15 მუსხირენ ჯიმაქ პავლე ათენშა გენაზარ; უკულ უკახალე დირთეს. პავლექ თინეფს სილა დო ტიმოთეშა ოჩინ, ნამდა მუთ შილებენ მალას ქიმურთუმუდესკო თიშა.
16 პავლე თინეფს ათენს უჯინედ; მუჟამსით ქოძირ, ნამდა მთელ ქალაქ კერპეფით რდჷ ეფშა, მანგარო შეწუხ.
17 სინაგოგას ჩიება ქიდიჭყჷ იუდეველეფწკუმა დო შხვეფწკუმა, მიდგას ღორონთიშ შიშ უღუდეს, დო ირდღას ეჩიებუდ არძას, მიდგას მოედანს შეხვადუდ.
18 ნამთინე ეპიკურელ დო სტოიკოს ფილოსოფოსიქ თის ნირზ ქუდუჭყჷ. ნამთინე იჩიებუდ: „მუ ბორულ-ბორულეფს იჩიებ თე კოჩ. მუშ რაგად ოკო თის?“. შხვეფ იჩიებუდეს: „მუჭოთ იძირენ, შხვა ღორონთეფიშ გურშენ ქადაგენს“. თეს თიშენ იჩიებუდეს, ნამდა პავლე სახიოლო ამბეს ქადაგენდჷ იესოშ დო გათელებაშ გურშენ.
19 ქიმიჸუნეს თინა არეოპაგშა დო კითხეს: „ქუგმოგებაფეთ, მუ ახალ გურაფაშ გურშენ რე რაგადანქინ?
20 დღას ვა გამგებნან ფერ მუდგარენს იჩიებუქ დო მოკონა, ქიგებგათ, მუს ქადაგენქ“.
21 ათენელეფ დო თექ ენულირ უცხოელეფ თავისფალ დროს ახალ ამბეეფიშ ჩიებას დო რჩქილას მიკალიენდეს.
22 პავლექ შქა არეოპაგის ქაშადირთჷ დო თქუ:
«ათენელეფ, ირფელშე ვორწყექ, ნამდა შხვეფშე უმოსო ნორღვენა ღორონთეფიშ შიშ.
23 მუჟამსით მიფშჷ დო ვოკვირუდ თი ირფელს, მუდგას თქვა თაყვანს ცენთჷ, ქობძირ სამსხვერპლო, სოდეთ გეჭარუდ: „უჩინებ ღორონთის“. ზუსტას თი ღორონთიშ გურშენ გეჩიებუთ, ნამდგას თაყვანს ცენთჷ, მარა ვეჩინენთ.
24 ღორონთ, ცა დო დიხაშ უფალ, ნამდგაქ გაჭყჷ დედამიწა დო ირფელ, მუთ თექ რე, ხეშნაკეთებ ტაძარეფს ვა კვიდრენს
25 დო ვართ კოჩიშ ხეშე ოსაჭირ მუთუნ; იშო არზენს არძას სიცოცხლეს, სუნთქვას დო ირფელს.
26 თიქ ართ ადამიანშე გარჩქინ არძა ხალხ, ნამდა მთელ დედამიწას ქიდიხორესკო; დანიშნჷ დროეფ დო თეწკუმა ართო, ხალხის ოცხოვრებელო საზღვარეფ ქიმურჩქინ,
27 ნამდა მთელ გურით უგორუდესკო ღორონთ დო ქიმიოგორესკო თის. სინამდვილეს თინა შორს ვა რე ჩქინდე ნამთინშე.
28 ჩქი თიშით ვორეთ, თიშით გილურთ დო თიშით მიდგუნა შურ. მუჭოთ ნამთინე თქვან პოეტ იჩიებ: „ჩქი ხოლო თიშ სქუალეფ ვორეთ“.
29 რახანს ღორონთიშ სქუალეფ ვორეთ, ოკო ვეფიფქრათ, ნამდა ღორონთ მოგენს ოქროშე, ვარჩხილშე ვარდა ქუაშე კეთებულ გამოსახულებას, ნამდგას კოჩ მუშ წარმოდგენათ ორთჷ.
30 აიშახ ღორონთ თოლს წკურუნდჷ თეშ გურშენ, მარა ასე ირდიხას უცხადენს ხალხის, ნამდა ინარღან დაშებულ*,
31 მუშენდა მერჩქინელ აფჷ დღა, მუჟამსით სამართლიანო გასამართლენს დედამიწას თი კოჩიშ საშვალებათ, მით მუს აფჷ გერინაფილ. თენა არძას თიშ გათელებათ დუმტკიც».
32 ღურელეფიშ გათელებაშ გურშენ ქიმირჩქილუესინ, ნამთინექ გოძიცა ქუდუჭყჷ, მარა შხვეფ ურაგადუდეს, თეშ გურშენ შხვა დროს ხოლო ქუმოირჩქილუანთია.
33 თეშ უკულ პავლექ თევრეშე მიდართჷ.
34 ნამთინექ ქეკაჸუნ თის დო ირწმუნ. თინეფ შქას რდესჷ არეოპაგიშ მოსამართლე დიონისე, ართ ოსურ, სახელო დამარის, დო შხვეფ.
სქოლიოეფი
^ ქოძირით „დაშებულიშ ნარღება“ („ბიბლიურ სიტყვეფიშ ენწყუმა“).
