მოციქულეფიშ საქმეეფ 20:1-38
20 ბუძოლიაქ ქიკნიწყნარუნ, პავლექ მოწაფეეფ ქიჭანუ, ჯგირობუა ქუდუჩინ დო მაკედონიაშ შარას ქიგიოდირთჷ.
2 თიშ უკულ, მუთ თექიანობა მილჷ დო მოწაფეეფს გურშა ელუკინ, საბერძნეთშა მიდართჷ.
3 თექ სუმ თუთას ქუდოსქიდ. თევრეშე სირიაშა ულამუდ ულა, მარა, მუჟამსით ქიგეგ, ნამდა იუდეველეფ მუშ ჸვილუაშ გეგმას ორსხუანდეს, გეგნოჭყვიდ, უკახალე მაკედონიათ დირთუკო.
4 თიწკუმა ართო რდესჷ პიროსიშ ქომოლსქუა სოპატრე ბერეაშე, არისტარქე დო სეკუნდუს თესალონიკეშე, გაიუს დერბეშე, ტიქიკე დო ტროფიმე აზიაშე დო ტიმოთე.
5 თინეფქ ჩქინშახ მიდართეს დო ტროას მიჯინედეს,
6 მარა ჩქი ქობალიშ დღახუშ* უკულ ფილიპეშე ზღვათ მიდაბრთით დო ხუთ დღაშა თინეფშა ქიმებრთით ტროაშა. თექ შქვით დღას ქუდოფსქიდით.
7 მარაშ პირველ დღას გეკიფშაყარით, ნამდა ართო ომჭკუმუდესკო. პავლეს მაჟია დღას ულამუდ ულა, ათეშენ თექ რდესინ თინეფიშ წოხოლე რაგად ქიდიჭყჷ დო ქიანა ხანს, შქა სერშახ, ქიჩიებუდ.
8 ჟინ ოთახის, სოდეთ შაყარელ ვორდით, ბრელ ლამპა რდჷ ერზამილ.
9 პავლე იჩიებუდუნ თი დროს, ართ ახალგაზრდა ბოშ, ევტიქე, აკოშკას გილახედ. თის ქიმკარულ, მასმა სართულშე გეგთანთხჷ დო დოღურ.
10 პავლექ თუდო გეგმორთჷ, თე ახალგაზრდა ბოშის ქიმნანჯირ, ქახუტოლ დო ხალხის უწუ: „მიოტეთ ნგარა, ცოცხალ რე“.
11 უკულ პავლექ ჟი გეშართჷ დო ჭკუმუა ქიდიჭყჷ. თინა გვარიან ხანს, გოთანაშახ, ქორაგადანდჷ; უკულ მიდართჷ.
12 ხალხიქ თი ბოშ ჸუდეშა ცოცხალ მიდეჸუნ; თინეფ მანგარ გახარებულეფ რდესჷ.
13 ჩქი გემჸურე მიდაბრთით დო მიდამნჩურით ასოსშა, სოდეთ პავლე ოკო ემჭოფუდესკო, მუშენდა თაშ აფუდ ჩქინდა ნარაგად. მუს გინოჭყვიდილ აფუდ, თექ კუჩხით გენორთუკო.
14 თაშ ნამდა, მუჟამსით ასოსის ართიანს ქეშეფხვადით, გემშა გეშეპჸუნით დო მიტილენეშა მიდაბრთით.
15 მაჟია დღას თევრეშე მიდამნჩურით დო ქიოსშა გენობრთით, მასმა დღას სამოსის ქავოდირთით დო მანთხა დღას მილეტშა ენიბლით.
16 პავლეს გინოჭყვიდილ აფუდ, ეფესოს ელულუკო, ნამდა აზიას ვა გაჩერდუკო, თინა ჩქარენდჷ იერუსალიმშა ენულას, მუშენდა, ქეშიალებედ-და, ოკოდ, ჟარნეჩდომავითა დღაშ დღახუს ქიმიოჭიშუკო.
17 თიქ ეფესოშ კრებაშ უხუცესეფ მილეტშა ქიჭანუ.
18 უხუცესეფქ თექ გენორთესინ, პავლექ თინეფს უწუ: «თქვა ჯგირო გიჩქუნა, ნამდა თი დღაშე მოჸუნაფილ, მუთ პირველო ენობრთჷ აზიაშა, ირიათო თქვანწკუმა ვორდჷ;
19 მონაცალო ვომსახურუდ უფალს მთელ თანდაბლობათ დო იუდეველეფიშ უბადო გეგმეფიშ გურშენ ბრელშა დომბუნ ჩილამურ დო ბრელ მუდგარენ გინომღალ.
20 თინა ხოლო ჯგირო გიჩქუნა, ნამდა დუდ ვა დამზოგებ თქვანო, ირფელს გირაგადუდით თქვან საჯგირობუოთ, გოგურუანდით სახალხოთ დო კარდოკარ.
21 გურგედვალირო უქადაგენდჷ ქოთ იუდეველეფს დო ქოთ ბერძენეფს, ნამდა ღორონთიშ წოხოლე ინარღესკო დაშებულ* დო ირწმუნესკო ჩქინ უფალ, იესო.
22 ასე წმინდა შურიშ* ხელმძღვანელობათ იერუსალიმშა მეურქ, მარა ვა მიჩქჷ, თექ მუ მელჷ,
23 ხვალე თინა მიჩქჷ, ნამდა ციხე დო ბრელ გაჭირება მელჷ, მუშენდა ქალაქშე ქალაქშა წმინდა შურ ირიათო თეს მირაგად,
24 მარა ჩქიმ დუდ ვა მონარღ, ოღონც ბოლოშახ გემკიბრულე ჩქიმ ორულარ შარა დო ბოლოშახ ქიმიპჸუნე უფალ იესოშე დავალებურ მსახურება, ნამდა გურგედვალირო დუვამოწმე სახიოლო ამბე ღორონთიშ ჭყოლოფაშ გურშენ.
25 ასე მიჩქჷ, ნამდა მიდგას სამეფოშ გურშენ გიქადაგით, მეტო ნამთინ ვა ძირუნთ ჩქიმ სახეს.
26 ათეშენ ამდღა რთხინთჷ, დამმოწმათ, ნამდა სუფთა ვორექ არძაშ ზისხირშე.
27 დუდის ვა ბზოგენდჷ, მუშენდა გაიცხადითკო ღორონთიშ არძა განზრახვა.
28 ქიდეკვირით ქოთ თქვან დუდის დო ქოთ მთელ ოჭყიშალს, ნამდგაშ ზედამხედველეფო წმინდა შურქ გიგორინუეს, ნამდა დოჭყიშუათ ღორონთიშ კრება, ნამუთ თიქ მუშ სქუაშ ზისხირით გიშეჸიდ.
29 მიჩქჷ, ნამდა ჩქიმ ულაშ უკულ უდუნდებელ გერეფ გამშგაკათუნა დო ვედენდენა შხურს.
30 თქვან შქას ხოლო გამკორჩქინდუნა თიცალეფ, მით გინორთელ გურაფეფიშ რაგადის ქიდიჭყანა, მუშენდა მოწაფეეფ ქეკიჸუნუან.
31 ათეშენ კურცხას რდათჷ დო რშუდან, ნამდა სუმ წანას, დღაშ დო სერით, ირიათო ჩილამურეფით გიგოწურუანდით თითოეულს.
32 ასე თქვან დუდის ვაბარენქ ღორონთის დო თიშ ჭყოლოფაშ სიტყვას. თე სიტყვას შეულებ გუგამანგარან დო თქვა ხოლო მერჩან თი მემკვიდრეობა, ნამდგას არძა წმინდას* არზენს.
33 მითინიშ ვართ ვარჩხილშა, ვართ ოქროშა დო ვართ მიკაქუნალშა პჸოფჷ გურ.
34 თქვა ჯგირო გიჩქუნა, ნამდა ჩქიმ ხელეფით ფხანდენდჷ, მუშენდა ქოთ ჩქიმ დუდის ქიმკვოჯინკო დო ქოთ ჩქიმწკუმა ართო რდესინ თინეფს.
35 ირფელნერო ქუგოძირით, ნამდა ბრელ იხანდათ დო ქელუდირთათ თინეფს, მიდგას მოხვარა ოსაჭირ; ირიათო რშუდან უფალ იესოშ სიტყვეფ: „შხვაშა ჯგირიშ კეთებას უმოს ბედნერობა მოუღ, ვინემ თის, ნამდა აშო გიკეთენა ჯგირს“».
36 თე ირფელიშ რაგად გათუნ, ბირგულ ქუდაშქვჷ თინეფწკუმა ართო დო ქილოც.
37 არძას ნგარაქ გეუოლ, თინეფ ოხუტოლუდეს პავლეს დო ჯუნუნდეს;
38 არძაშ უმოსო თიშენ აჭუდეს გურს, ნამდა პავლექ უწუ, მეტო ვა ძირუნთია ჩქიმ სახეს. უკულ გემშახ ქიმიაზარეს თინა.
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ქოძირით „დაშებულიშ ნარღება“ („ბიბლიურ სიტყვეფიშ ენწყუმა“).
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
