მოციქულეფიშ საქმეეფ 21:1-40
21 დევეთხით ართიანს დო ზღვათ მიდამნჩურით ბორია უმბარდუნ თევრე დო ქავოდირთით კოსის; მაჟია დღას როდოსშა მიდაბრთით, თევრეშე პატარაშა გენობრთით.
2 თექ დობგორით ფინიკიაშა მაულარ გემ, გეშაბრთით თიშა დო მიდამნჩურით.
3 კვარჩხანშე კუნძულ კვიპროს ქობძირით, ელულეთ თის დო სირიაჸურე მიდაბრთით; ტვიროსის გუვაჩერდით, სოდეთ გემ ოკო ჩოლუესკო.
4 თექ მოწაფეეფ დობგორით დო თინეფწკუმა შქვით დღას ქუდოფსქიდით. თინეფს წმინდა შურქ* თიცალ მუდგარენ გაუცხად, ნამდა პავლეს ურაგადუდეს, კუჩხ ვემშაბიჯგუკო იერუსალიმშა.
5 ულაშ დროქ ქუდოდირთუნ, შარას ქიგვოდირთით. არძაქ, თინეფ შქას ოსურკათაქ დო ბაღანეფქ, ქალაქშე გეგშმაზარეს. ზღვაპიჯის ბირგულ ქუდვაშქვით, ქიბლოცით
6 დო ჯგირობუა ქუდუჩინით ართიანს; უკულ ჩქი გემშა ეშებლით; თინეფქ ჸუდეეფშა დირთეს.
7 ტვიროსშე პტოლემაიდაშა გენობრთით. უკულ გემით სოთინ ვამლინუნა. თექ ქეშეფხვადით ჯიმალეფს დო ართ დღას თინეფწკუმა ქუდოფსქიდით.
8 მაჟია დღას კესარეაშა გენობრთით. შქვით გიშაგორილ ქომოლკოჩშე ართ-ართიშ, მაქადაგებელ ფილიპეშ, ჸუდეშა გემნობრთით დო თექ ქუდოფსქიდით.
9 თის ჸუნდჷ ოთხ უგუთხუ ცირასქუა; თინეფ წინასწარმეტყველენდეს.
10 ფილიპეწკუმა გვარიან ხანს ქუდოფსქიდით. თექ ვორდითინ თეშ იუდეაშე წინასწარმეტყველ აგაბექ ქუმორთჷ.
11 თიქ ჩქინდა ქუმორთჷ, პავლეშ ორტყაფ გეჭოფ, ხე დო კუჩხ დიბორკჷ დო თქუ: „წმინდა შურ იჩიებ, თე ორტყაფუშ მინჯეს თაშ დობორკუნა იუდეველეფ იერუსალიმს დო შხვა რჯულიშ ხალხის გეგნოჩანანია“.
12 თენა ქიმიბრჩქილეთინ, ქოთ ჩქი დო ქოთ თექ რდესინ თინეფ პავლეს ვოხვეწუდით, ვა ულინუდუკო იერუსალიმშა.
13 თიქ მიპასუხეს: „მუშენ ინგართ დო მუშენ ოცადუთ, გურ გემიჸოთათ ულაშა? რჯერდან, უფალ იესოშ სახელიშ გურშენ ხვალე ციხეშო ვარინ, იერუსალიმს ღურაშო ხოლო ვორექ მზათ“.
14 მუჟამსით ქიმეფხვადით, ნამდა მუთუნით ვეთირანდჷ აზრის, დუდ დუვანებით დო ფთქვით: „თეშ ქორდას, მუჭოთ იეჰოვაშ ნება იჸუაფ“.
15 უკულ გაკიმნწყით მაულარო დო ქიგვოდირთით იერუსალიმიშ შარას.
16 მუსხირენ კესარეელ მოწაფექ ხოლო ქუმაჸუნეს, ნამდა ქიმემიჸუნესკო ართ-ართ პირველ მოწაფეშ, კვიპროსელ მნასონიშ, ჸუდეშა, მიდგაწკუმა სტუმარო ქუდოფსქიდუდით.
17 იერუსალიმშა გენობრთითინ, ჯიმალეფქ ხიოლით მემღეს.
18 მაჟია დღას პავლექ ჩქინწკუმა ართო მოლართჷ იაკობშა, არძა უხუცეს თექ რდჷ შაყარელ.
19 გამარჯობა ქოუწუ თინეფს დო კილ-კილშა გეუნწყჷ ირფელ, მუთ ღორონთიქ მუშ მსახურებათ შხვა რჯულიშ ხალხშო აკეთ.
20 თენა ქიმირჩქილუესინ, თინეფქ ღორონთიშ განდიდება ქიდიჭყეს დო პავლეს უწუეს: „ქარწყექო, ჯიმა, მუსხი ანთას მორწმუნე რე იუდეველეფ შქას?! თინეფ არძა შურ დო გურით მეჸუნა კანონს.
21 მარა სქანიშ გურშენ ხონარ რე გოსიმაფილ, ნამდა შხვა რჯულიშ ხალხ შქას მახორუ იუდეველეფს ოგურუანქ, გინურთან მოსეშ კანონს, წინადაცვეთა ვა უკეთან მუნეფიშ სქუალეფს დო ვემიაჸუნან ადათ-წესეფს.
22 მუჭო მიფქცუათ? მუთუნ ვახვარუნ თეშ ქიგეგენა, თაქ რექინ.
23 ათეშენ მუდგას გიწინთინ, თინა გაკეთ. ჩქი პჸუნა ოთხ კოჩ, მიდგას ღორონთშა აღთქმა აფჷ მეჩამილ.
24 მიდეჸუნ თინეფ დო ართო შეასრულით განწმენდაშ წეს. თინეფიშ თუმაშ ღაჭუაშ ხარჯეფ სქან დუდშა გეჭოფ. თიმწკუმა არძა ქიმეხვადუ, ნამდა, მუთ სქანიშ გურშენ რე გოსიმაფილ, ირფელ ტყურა რე; თის ხოლო ქიმეხვადუნა, ნამდა სწორას იქციებუქ დო კანონს ხოლო მეჸუნქ.
25 ჩქი შხვა რჯულიშ ხალხ შქას მახორუ იუდეველეფს წერილით ქუგვოგებაფეთ, მუ გინოპჭყვიდით, ნამდა დუდ აურიდან კერპეფშა შეწირულს, ზისხირს, შქვიდაფილს დო უზნეობას*“.
26 მაჟია დღას პავლექ მიდეჸუნ თი კოჩეფ დო თინეფწკუმა ართო შეასრულ განწმენდაშ წეს. უკულ ტაძარშა გემნორთჷ, ნამდა მღვდელს ქოუწუკო, მუჟამ ითებუდ განწმენდაშ დღალეფ, მუშენდა თიქ თითოეულშო მსხვერპლ შეწირუკო.
27 შქვით დღა ითებუდუნ თეშ, აზიელ იუდეველეფქ პავლე ტაძარს ქოძირეს. თინეფქ მთელ ხალხ გეიახნარეს დო ოჭოფეს თინა.
28 იძახუდეს: „ისრაელეფ, ქიმმეხვარით! თენა რე თი კოჩ, მით ირდიხას დო ირკოჩის ჩქინ ხალხიშ, ჩქინ კანონიშ დო თე ადგილიშ წინააღმდეგ ოგურუანს; ხვალე თენა ვარინ, ბერძენეფ ხოლო გამნიჸუნ ტაძარშა დო თეშნერო შეურაცხყოფა მიორინუ თე წმინდა ადგილს“.
29 თეიშახ ქალაქის თიწკუმა ართო ეფესოელ ტროფიმე ძირეს დო იფიქრეს, ნამდა პავლექ თინა ტაძარშა მინიჸუნ.
30 მთელ ქალაქიქ გეცუ. ხალხიქ რულაიათ ქუმორთჷ პავლეშ ოჭოფშა; თინა ტაძარშე გეგმასერგელუეს დო კარ თიმწუთის ქენაკილუეს.
31 პავლეშ ჸვილუა ულამუდესინ თეშ, რაზმიშ მეთაურშა ხონარქ ქიმერთჷ, ნამდა მთელ იერუსალიმს ერია-მორია რდჷ.
32 თიქ ხეთეშე გაკოშაყარუ ჯარიშკოჩეფ დო ოშიშდუდეფ დო მიდერულ ხალხშა. მუჟამსით თინეფქ თოლ ქუმუკინდუეს ანთასიშდუდის დო ჯარიშკოჩეფს, პავლეშ ლახუა მიოტუეს.
33 ანთასიშდუდიქ ხოლოშა ქიმერთჷ; ოჭოფ თინა დო ზოჯჷ, ჟირ ხაჯალურით დუბორკუდესკო; უკულ იკითხჷ, მი რდჷ თინა დო მუ დაშუ.
34 ართ პარტია ხალხ ართის იძახუდ, მაჟია პარტია — მაჟიას. თეცალ ერია-მორიას თის მიზეზიქ ვაგაგინ დო ზოჯჷ, პავლე ყაზარმაშა მიდუჸუნაფუდესკო.
35 ხალხ მანგარ გაჟღამებულ რდჷ, ათეშენ პავლექ კიბეშახ ქიმერთუნ, ჯარიშკოჩეფს თიქ ხეთ აჸუეს ეშაჸუნაფალქ.
36 ქიანაშ ხალხ ეკოჸუნდჷ თის; თინეფ იძახუდეს: „დოჸვილით!“
37 ყაზარმაშა მინოჸუნდესინ თეშ, პავლექ ანთასიშდუდის კითხჷ: „ქიშილებენო, მუდგარენ ქოიწუე?“ თიქ უპასუხ: „ბერძნულ გიჩქუნო?
38 სი თი ეგვიპტელ ვა რექო, ნამდგაქ ამარდე ბუნტ ეტახ დო 4 000 იარაღამ კოჩ იჸუნ უდაბნოშა?“
39 პავლექ უწუ: „მა იუდეველ ვორექ, კილიკიაშ ტარსოსშე, ირკოჩის უჩქუნ ფერ ქალაქშე. გოხვეწუქ, უფლება ქომუჩ, ხალხის ქუდურაგადუე“.
40 თიქ ქიმეჩ თეშ უფლება. პავლექ კიბეს ქიგმადირთჷ დო ხეთ ქაჩინებაფუ ხალხის, გაჩერდესკო. ირკოჩიქ გაჩერდუნ, თინეფს ებრაულო ქუდურაგადუ.
სქოლიოეფი
^ ქოძირით „ბიბლიურ სიტყვეფიშ ენწყუმა“.
^ ბერძნ. „პორნია“. ქოძირით „სექსუალურ უზნეობა“ („ბიბლიურ სიტყვეფიშ ენწყუმა“).
