მოციქულეფიშ საქმეეფ 25:1-27
25 პროვინციაშ მართუა დიჭყუნ თევრეშე სუმ დღაშ უკულ ფესტუსიქ კესარეაშე იერუსალიმშა მიდართჷ.
2 უნჩაშ მღვდელეფქ დო პატიგედვალირ იუდეველეფქ თის ქეჩუეს, მუ ბრალ გეუძუდეს პავლეშა. თინეფ ოხვეწუდეს,
3 პატი ქოფცით დო პავლე იერუსალიმშა ქუმაჸუნაფევა; ულამუდეს, შარას ქიგლახვადესკო თის დო დოჸვილესკო.
4 მარა ფესტუსიქ უპასუხ, ნამდა პავლე კესარეას ოკო ჸოფედუკო, მუშენდა მუს ხოლო მალას ულამუდ თექ დორთა.
5 თიქ უწუ თინეფს: „მიდგას ძალაუფლება გიღუნა, მოლმაჸუნით დო მართალო დაშებულ ქაფუნ-და, ბრალ ქიგედვით თის“.
6 თაშ ნამდა, ფესტუსიქ თექ სოდგარენ 8-10 დღას ქუდოსქიდ დო უკულ კესარეაშა დირთჷ. მაჟია დღას ქუდოზოჯ სასამართლო ტახტის დო პავლეშ მოჸუნაფა ზოჯჷ.
7 ქიმიჸუნესინ, იერუსალიმშე მოულირ იუდეველეფქ თის ქუგუდირთეს დო მანგარ სერიოზულ მუდგარენეფს აბრალუაფუდეს, მარა ბრალიშ დამტკიცებელო მუთუნ ფაქტ ვა უღუდეს.
8 პავლექ დუდიშ დაცვებელო რაგად ქიდიჭყჷ: „მუთუნნერ ცოდა ვა მიღჷ ვართ იუდეველეფიშ კანონიშ, ვართ ტაძარიშ დო ვართ კეისარიშ წოხოლე“.
9 ფესტუსის ოკოდ, იუდეველეფს გურს მუჰამუკო, ათეშენ პავლეს კითხჷ: „ხომ ვაისხუნ, იერუსალიმიშ სასამართლოშა მიდართე? სქან გასამართლებაშ დროს მა ხოლო თექ იპჸუაფუქ“.
10 მარა პავლექ უპასუხ: „მა კეისარიშ სასამართლო ტახტიშ წოხოლე გივორექ; თაქ ოკო გუმასამართლან. იუდეველეფშა გლახა მუთუნ ვამკეთებ, თენა სი ხოლო გვალო ჯგირო გიჩქჷ.
11 მართალო გლახაშ მაკეთებელ ქუვორექ დო მუთუნ ოღურალ ქუდვაშე-და, მზათ ვორექ ღურაშო, მარა თენეფ ბრალს ტყურათ ქიგებდვანან-და, მითინს ვა უღჷ უფლება, თინეფიშ გურიშ მაჰამაფალო ჩქიმ დუდ გეგნოჩას. კეისარწკუმა ფჩიულენქ!“
12 თიმწკუმა ფესტუსიქ მუშ ელმაჩამალეფწკუმა ქიმირაგადუ დო უპასუხ: „კეისარწკუმა ქოჩიულენქ-და, კეისარშა მიდურქ“.
13 მუსხირენ დღაშ უკულ მეფე აგრიპაქ დო ბერნიკექ კესარეაშა მიდართეს, ნამდა ფესტუსის ქეშეხვადესკო.
14 თექ მუსხირენ დღას ქუდოსქიდეს. ფესტუსიქ მეფეს პავლეშ საქმე გაჩინებაფუ:
„თაქ ართ კოჩ რე, ნამუთ ფელიქსიქ ციხეს ქიმთიტუ.
15 მუჟამსით იერუსალიმს ვორდჷ, უნჩაშ მღვდელეფქ დო იუდეველეფიშ უხუცესეფქ თის ბრალ ქიგედვეს დო თიშ დასაჯებას ითხინდეს,
16 მარა მა თინეფს უპასუხ, ნამდა რომაელეფს წესო ვა უღუნა, შხვეფს გურს მუჰამუანინ თიშენ კოჩის ბრალ გედვან. თის დიო საშვალებაქ ოკო ქიმიაჩას, ბრალს გედვანან თინეფწკუმა დეცვას მუშ დუდ.
17 თაშ ნამდა, თინეფქ ქუმორთესინ, დრო ვამღალ, მაჟია დღას ქუდობზოჯ სასამართლო ტახტის დო თიშ მოჸუნაფა ბზოჯჷ.
18 ბრალიშ გიმადვალარეფქ რაგად ქიდიჭყესინ, მა ველუდინ თი ნამთინ უბადობაშენ ვეგუდვალუნა ბრალ.
19 თინეფ უბრალოთ მუნეფიშ რელიგიაშ გურშენ ონირზუდეს თის დო მიდგარენ იესოშე იჩიებუდეს, ნამუთ ღურელ ჸოფე, მარა პავლე ამტკიცენდჷ, ცოცხალ რენია.
20 ვა მიჩქუდ, მუჭო გინოპჭყვიდიკო თე საქმე, ათეშენ პკითხჷ, იერუსალიმიშ სასამართლოშა ხომ ვა უსხუნუდ ულა, ნამდა თექ გასამართლესკო.
21 მარა, მუჟამსით პავლექ კეისარწკუმა* ჩიულ მითხუ, ნამდა თიქ გეგნოჭყვიდუკო თე საქმე, ბზოჯჷ, კეისარშა ულაშახ თინა ციხეს ქუდუტებუდესკო“.
22 თიმწკუმა აგრიპაქ ფესტუსის უწუ: „მა ხოლო მოკო, თე კოჩის ქუმურჩქილუე“. ფესტუსიქ უპასუხ: „ჭუმან ქუმურჩქილუანქ“.
23 მაჟია დღას აგრიპაქ დო ბერნიკექ თექ დიდ ამბეთ ქიმერთეს დო ანთასიშდუდეფწკუმა დო ქალაქიშ პატიგედვალირ კათაწკუმა ართო დარბაზშა გემნორთეს. უკულ ფესტუსიქ ზოჯჷ, პავლე გამნიჸუნესკო.
24 ფესტუსიქ რაგად ქიდიჭყჷ: „მეფე აგრიპა დო არძა, მით თაქ ზოჯუნთ, თქვან წოხოლე რე კოჩ, მიდგაშ გურშენ არძა იუდეველქ, ქოთ იერუსალიმს დო ქოთ თაქ, ჩქიმდა მორთჷ დო იჩიულ. თინეფ ღვარანდეს, თე კოჩიქ ოკო დოღურასია.
25 ქიმეფხვად, ნამდა თიცალ მუთუნ ვა უკეთებ, ღურაშ ღირს რდასინ. თაშ ნამდა, მუჟამსით მუქ ქიჩიულ კეისარწკუმა, გეგნოპჭყვიდ, თიშა გომტებუდუკო,
26 მარა თიშ წინააღმდეგ მუთუნ კონკრეტულ ვემმაჭარე კეისარშა. ათეშენ გიშეპჸუნ თინა არძაშ წოხოლე, უმოსო სქან წოხოლე, მეფე აგრიპა, ნამდა ეგება თე სასამართლოშ უკულ ვარა მუდგარენ ქობძირე, მუთ მიმაჭარე,
27 მუშენდა, ჩქიმ აზრით, მუჟამსით პატიმარს რომშა უტენქ, საჭირო რე, წერილ ხოლო ქეკუჸუნუე დო გენწყე მუს აბრალუაფუნა“.
სქოლიოეფი
^ შხვანერო — „ავგუსტუს“. თენა რომიშ იმპერატორიშ ტიტულ რე.
