მოციქულეფიშ საქმეეფ 27:1-44
27 გეგნოჭყორდჷ, იტალიაშა მიდამნჩურითკო. პავლე დო მუსხირენ პატიმარ ავგუსტუსიშ რაზმიშ ოშიშდუდის, იულიუსის, ჩაბარეს.
2 ეშებლით ადრამიტეიონიშ გემშა, ნამდგაქ აზიაშ ზღვაპიჯიშ პორტეფ ოკო მიკორთუკო, დო მიდაბრთით. ჩქინწკუმა ართო რდჷ არისტარქე თესალონიკეშე, მაკედონიაშ პროვინციაშე.
3 მაჟია დღას სიდონშა მიშებლით. იულიუსიქ პატი ქოცჷ პავლეს დო უფლება ქიმეჩ, მუშ მეგობრეფშა მიდურთუმუდუკო, ნამდა ქიმკაჯინესკო თის.
4 თევრეშე მიდამნჩურით დო კუნძულ კვიპროსის ქუგვაჸუნით, მუშენდა ბორია წოხოლეშე მიმბარდეს.
5 უკულ გენშამნჩურით შქა ზღვაშა კილიკიაშ დო პამფილიაშ მანგას დო მიშებლით მირაშ პორტშა, ლიკიაშ პროვინციაშა.
6 თექ ოშიშდუდიქ დოგორ ალექსანდრიაშ გემ, ნამუთ იტალიაშა მიშჷ დო თიშა გეშამიჸუნეს.
7 ბრელ დღას ჭიე-ჭიეთ მემნჩურუნდით დო ონდეთ ქიმვოჭირინეთ კნიდოსის. ბორიაქ წოხოლე ულაშ საშვალება ვა მუჩეს, ათეშენ კრეტას სალმონეშ მხარეშე ელულეთ.
8 ონდე-ონდეთ ელაპჸუნდით ზღვაპიჯის დო გენობრთით ადგილშა, ნამდგას „წყნარ პორტის“ უძახუდეს. თინა ქალაქ ლასეაშ გოხოლუას რდჷ.
9 თექ გვარიან ხანს ქუდოფსქიდით, გიშაჸიდირიშ დღაშ მარხვა ხოლო თებულ რდჷ* დო ნჩურუაშ გაგრძელება ოშქურანჯ რდჷ. ათეშენ პავლექ თინეფს ელუჩ:
10 „ვორწყექ, ნამდა თე შარა ჯგირს მუთუნს ვა მომკინდუანა, ბრელ მუდგარენს მივოდინუანთ, ხვალე ოღალ დო გემს ვარინ, ჩქინ სიცოცხლეს* ხოლო“.
11 მარა ოშიშდუდიქ პავლეშ მანგიორო გემიშ კაპიტანს დო გემიშ მინჯეს დუჯერ.
12 პორტ გითაზოთონჯაფალო უხუჯურ რდჷ, ათეშენ უმენტაშიქ ისხუნუ, მუდგათიჸინ გენობრთითკო ფენიქსშა, კრეტაშ პორტშა, ნამდგაშა მიშულა ჩრდილო-აღმოსავლეთ დო სამხრეთ-აღმოსავლეთჸურე შილებედ, დო თექ გეგთიბზოთონჯეთკო.
13 სამხრეთიშ ბორიაქ ქუდუმბარუნ, იფიქრეს, ფენიქსშა მალნენანია, ათეშენ ღუზა გეშეღეს დო კრეტაშ ზღვაპიჯიშ მანგას მიდანჩურეს.
14 ჭიჭე ხანშა მანგარ ბორიაქ, ევრაკილონქ*, გელჷ, გემს ქახირცქჷ
15 დო ქიხვამილუ. ძალიერ ბორიაშ გურშენ გემს წოხოლე ვალინ, ათეშენ მივაშქვით თინა დო ბორიას გილაპჸუნდით.
16 თოლიშ გოვალაფაშა ელულეთ ჭიჭე კუნძულ კავდას დო ძიუთ გინვოტეთ გემს მიკოკირილ ნავ.
17 ნავიშ ეშაღალაშ უკულ მეზღვაურეფქ დიდ თოკეფით გემიშ გამანგარება ქიდიჭყეს. თიშ შიშით, ნამდა სირტისის ქვიშამ ადგილს ვეგეჩერდესკო, აფრეფს გეგმუკინეს დო ბორიას მეპჸუნდით.
18 ქარბორია მანგარო მიქანჩუანდეს, ათეშენ მუდგარენეფიშ გინორღვაფა ქიდიჭყეს, ნამდა გემ დაქექესკო.
19 მასმა დღას მუნეფიშ ხეთ გეგნარღვეს გემიშ მონწყილობა.
20 ბრელ დღას ვართ ჩხანა დო ვართ მურიცხეფ იძირედ, ქარბორია ხოლო ვა ჩერდუდ დო გინოსქილადაშ ირნერ იმენდიქ მემდინეს.
21 ბრელ ხან რდჷ, ხალხის მუთუნ ვა აფუდ ნაჭკუმა. პავლექ გამწოდირთჷ, თინეფ შქას ქაშადირთჷ დო თქუ: «ჩქიმდა ქუდაიჯერებუდესკო დო კრეტაშე ვეგშამრთუმდესკონ, თე ირფელ ვეგმოტირხუდეს დო ვართ თეცალ ზარალს ბძირუნდით,
22 მარა ასე გირაგადუთ, გემანგარით. ნამთინ ვა ღურუთ, ხვალე გემს მივოდინუანთ.
23 ჩქიმ ღორონთიქ, ნამდგას წმინდა მსახურებას უსრულენქ, ღუმა ანგელოზ მომიშქვჷ
24 დო მიწუ: „ვა გაშქურინას პავლე! კეისარიშ წოხოლე ოკო გედირთე; ღორონთ სქანწკუმა ართო რენან თინეფს ხოლო გინატენს“.
25 თაშ ნამდა, გემანგარით. პწანსჷ, ღორონთ თეშ გაკეთენს ირფელს, მუჭოთ ანგელოზიქ მიწუ;
26 ჩქინ გემ ნამდგაინ კუნძულწკუმა აკოცენს».
27 მა-14 სერს დიო ხოლო ბორიას გილაპჸუნდით ადრიატიკიშ ზღვას. შქასერს მეზღვაურეფქ იფიქრეს, დიხაწკუმა ხოლოს ვორეთია.
28 გოზიმეს სიტომბა დო სოდგარენ 36 მეტრაქ გიშართჷ, ხოლო ჭიჭე მიდანჩურეს დო კინ გოზიმესინ, სოდგარენ 27 მეტრაქ იჸუ.
29 ოშქურუდეს წყარიშ თუდოიან კირდეეფს ვა ვარაგვათია, ათეშენ გემიშ უკახალე ოთხ ღუზა გოუტუეს წყარშა დო ნატრენდეს, მალას გოთანდუდასია.
30 მეზღვაურეფქ გემშე ნტება მინდომეს, იჩიებუდეს წოხოლენ მხარეშე ღუზეფს გოუტენთია წყარშა, ვარინ სინამდვილეს, ნავს უტენდეს.
31 პავლექ ოშიშდუდის დო ჯარიშკოჩეფს უწუ: „თე ხალხიქ გემს ვა გაჩერდ-და, ვეგნოსქიდუთ“.
32 თიმწკუმა ჯარიშკოჩეფქ თოკეფ გეგნოჭკირეს დო ნავქ წყარს ქინოლ.
33 გოთანა ბორჯის პავლექ არძას ელუჩ, ჭიჭე ქიმლუჭკუმუაფუდესკო. თიქ უწუ: „მა-14 დღა რე, გინოსქილადას ელუთ დო ნერვიანობათ ლუკმა ვემლაიდვალუნა პიჯშა.
34 ათეშენ რთხინთ, მუდგაინ ქიმლეჭკუმეთ, თეს კინ თქვანიშ გურშენ იფჩიებუქ. ვა გაშქურინან, თუმაშ ღერ ხოლო ვამკოიოლუნა დუდშე“.
35 თენა ქოთქუნ, გეჭოფ ქობალ, არძა ირჩქილედუნ თეშ მადლობა გეგნუგ ღორონთის, ქობალ გოტახ დო ჭკუმუა ქიდიჭყჷ.
36 თექ არძას გურშა ელუკინ დო მუნეფქ ხოლო ქიდიჭყეს ჭკუმუა.
37 თი გემს 276 კოჩ რდჷ.
38 არძაქ ჯგირო ოჭკუმ; უკულ გემ დაქექესკონ თიშენ, ზღვაშა ქობალიშ კაკალიშ გინორღვაფა ქიდიჭყეს.
39 გოთანდუნ, ქვიშამ ზღვაპიჯ ქოძირეს, მარა ვემეხვადეს, სო რდესჷ. გეგნოჭყვიდეს, ქეშიალებედეს-და, გემ თე ზღვაპიჯის ქეკარინუესკო.
40 ღუზეფს თოკეფ მეჭკირეს დო ზღვას ქინაჸათეს, გემიშ რულს თოკეფ გენწყეს, წოხოლენ იალქან ბორიაჸურე გოფაჩეს დო ზღვაპიჯჸურე მიდართეს,
41 მარა გემქ წყარიშ თუდო ქვიშას ჩხვინდით ქიგეჩერდჷ დო გიჭკად. ტალღეფ გემიშ უკახალენ მხარეს ახირცქუდ დო აკმოტახუნდჷ თის.
42 პატიმარეფქ წყარშა ვა სხაპესკო დო ვენტესკონ თიშენ ჯარიშკოჩეფქ თინეფიშ ჸვილუა გინოჭყვიდეს,
43 მარა ოშიშდუდის ოკოდ, პავლე გეგნატუკო; ათეშენ ჯარიშკოჩეფს თეშ კეთებაშ ნება ვემეჩ. თიქ ნჩურუა უჩქუდუნ თინეფს უზოჯ, პირველო მუნეფქ ქოსხაპესკო დო წყარპიჯშა გეკორთესკო
44 დო უკულ შხვეფქ ქეკაჸუნესკო, ნამთინექ ფიცარეფ ქიმიხვარუკო, ნამთინექ — გემიშ აკნაცუმა შხვა ნაწილეფ. თეშნერო არძაქ გეგნოსქიდ დო გეკორთჷ ზღვაპიჯშა.
სქოლიოეფი
^ თენა რდჷ თიშრიშ თუთას, ნამუთ სექტემბერ-ოქტომბერს უხვადუ. თე დროს იჭყაფუდ ჭვემეფ დო ზღვას ქარბორიეფ.
^ ბერძნ. „ფსიქე“. ქოძირით „შურ“ („ბიბლიურ სიტყვეფიშ ენწყუმა“).
^ თენა რე ჩრდილო-აღმოსავლეთიშ ბორია.
