ფილიმონ 1:1-25
1 პავლე, ქრისტე იესოშ გურშენ ჭოფილ, დო ჯიმა ტიმოთე რჭარუნთ ჩქინწკუმა ართო მოხანდე დო საჸოროფო ჯიმას, ფილიმონს,
2 ჩქინ და აპფიას, ჩქინწკუმა ართო უფალიშ ჯარიშკოჩ არქიპეს, დო კრებას, ნამუთ სქან ჸუდეს იშაყარუ:
3 ჭყოლოფა დო მშვიდობა ვა მორრკებუდან ღორონთშე, ჩქინ მუმაშე, დო უფალ იესო ქრისტეშე!
4 ირიათო მადლობას ურაგადუქ ღორონთის, მუჟამსით ლოცვეფს გიშინუანქ,
5 მუშენდა ირიათო იფრჩქილუაფუქ სქან რწმენაშ გურშენ დო თიშ გურშენ, მუჭო გიჸორს უფალ იესო დო არძა წმინდა.
6 ბლოცულენქ, ნამდა თი რწმენაქ, ნამუთ სქანცალო ჩქი ხოლო მიღუნა, ქიმგეხვარას, დაფასე ირფელ ჯგირ, მუთ ქრისტეშ საშვალებათ ვა მორკუნა.
7 ჯიმა, დიდ ხიოლ მომიღ დო გურშა ელამკინ თიშ მორჩქილაფაქ, ნამდა სქან ჸოროფათ გურ გოუტიბე წმინდეფს.
8 ათეშენ, მუჭოთ ქრისტეშ მოციქულქ, თამამას შემლებ გიზოჯე თიშ კეთება, მუთ სწორ რე,
9 მარა თი ჸოროფაშ გურშენ, ნამდგას გიმირჩქინანქ, მისხუნ, რთხუე, მა, პავლექ, ხანიერ კოჩიქ, დო თეს გეძინელ, ქრისტე იესოშ გურშენ ჭოფილქ.
10 რთხინქჷ, ქელუდირთ ონისიმეს, ნამუთ სქუაცალ მაფჷ დო ნამდგაშოთ მუმაცალო გინიბრთჷ პატიმრობაშ დროს.
11 ართ დროს თინა მუთუნს ვა გორგუდ, მარა ასე ქოთ სქანო დო ქოთ ჩქიმო ჯგირიშ კეთება შეულებ.
12 თინა ჩქიმ შურ დო გურ რე დო ასე კინ სქანდა უტენქ.
13 ქუმოკოდ, ჩქიმწკუმა ქუდომტებუდუკო, ნამდა სქან მანგიორო მიმემსახურუკო, ონდო სახიოლო ამბეშ გურშენ ჭოფილ ვორექ,
14 მარა ვა მოკო, თენა სქან უკითხირუო ვაკეთე, მუშენდა თე ჯგირ საქმე სქან ნებათ ოკო აკეთე დო ვართ ხოლო ნანძალუო.
15 ეგება თიშენ ჩეგეთხუ ჭიჭე ხანით, ნამდა სადღამუშოთ დუგართუკო,
16 მარა მუჭოთ მონაქ ვარინ, მონაშე უმოსიქ — საჸოროფო ჯიმაქ, ნამუთ მა მანგარო მიჸორს, მარა სი უმოსო ქიგეჸოროფებ, მუჭოთ მონა დო მუჭოთ ქრისტიან ჯიმა.
17 თაშ ნამდა, მეგობარო ქიმგორჩქუქ-და, მთელ გურით მიღჷ თინა, თეშ, მუჭოთ მა მემღენდ.
18 ხვალე თენა ვარინ, ზარალ ქუგოძირუ ვარდა სქან მუთუნ ქიგეძუნ-და, ირფელ მა ქიგმოდვ ვალო.
19 მა, პავლე, ჩქიმ ხეთ პჭარუნქ თეს: მა გინიბგანქ ირფელს; თინა ხოლო გვალო ჯგირო გიჩქჷ, ნამდა სქან სიცოცხლეთ რექჷ ჩქიმ მოვალე.
20 ჯიმა, ქიმმეხვარ უფალიშ გურშენ, გურ გამხარ ქრისტეშ გურშენ.
21 თიშენ რჭარუნქ, ნამდა ბჯერსჷ, ქუდმაჸუნუქ დო თიშე უმოსის ხოლო გაკეთენქ, ვინემ გირაგადუქ.
22 თეს გეძინელ, რთხინქჷ, გიოჩერებელ ადგილ ხოლო გამხაზირ, მუშენდა იმენდ მიღჷ, თქვან ლოცვეფიშ ჭყოლოფათ გომტენა დო თქვანდა დიბრთუქ.
23 მოკითხვას გიჩინანს ეპაფრა, ნამუთ ჩქიმცალო ქრისტეშ გურშენ რე ჭოფილ;
24 მოკითხვას გიჩინანა მარკოზ, არისტარქე, დემას დო ლუკა, მით ჩქიმწკუმა ართო ხანდენა.
25 უფალ იესო ქრისტეშ ჭყოლოფა ვა მორრკებუდან თქვან შურ დო გურიშ გურშენ!
