პირველ თესალონიკელეფ 1:1-10
1 რჭარუნთ პავლე, სილვანუს* დო ტიმოთე თესალონიკეშ კრებას, ნამუთ ართობას რე ღორონთწკუმა, ჩქინ მუმაწკუმა, დო უფალ იესო ქრისტეწკუმა:
ჭყოლოფა დო მშვიდობა ვა მორრკებუდან!
2 ირიათო მადლობას ურაგადუთ ღორონთის, მუჟამსით ლოცვეფს მოიშინუანთ,
3 მუშენდა ჩქინ მუმაშ, ღორონთიშ წოხოლე ირიათო ფშუნა რწმენათ კეთებულ თქვან საქმეეფ, თქვან ჸოროფა დო მოთვინება, ნამდგას თიშ გურშენ გიმირჩქინანთ, ნამდა გიღუნა ჩქინ უფალ იესო ქრისტეშ იმენდ.
4 მიჩქუნა, ჯიმალეფ, ღორონთშო საჸოროფოეფ, ნამდა თიქ გიშარგორეს,
5 მუშენდა სახიოლო ამბე, ნამუთ გიქადაგით, უბრალო სიტყვეფ ვა რე, თის დიდ ძალა უღჷ; თინა წმინდა შურით* გაიცხადით დო მტკიცას ბჯერდეს, მუდგას ფქადაგენდით. ხომ ქოიჩქუნა, მუჭო მეირდით თქვან საჯგირობუოთ?!
6 თქვა ხოლო ჩქინ დო უფალიშ მაგალითიშ მეჸუნა ქიდიჭყით, მუშენდა მანგარ თხოზინიშ უმკუჯინუო, წმინდა შურშე მოურსუნ თი ხიოლით მიღით ღორონთიშ სიტყვა.
7 თეშნერო მაგალით მეჩით მაკედონელ დო აქაიელ მორწმუნეეფს.
8 თქვან ჭყოლოფათ იეჰოვაშ* სიტყვაქ ქიმიოჭირინუ მაკედონიაშა დო აქაიაშა; ხვალე თენა ვარინ, ირდიხას ქიგეგეს, მუჭო რწანა ღორონთ; თაშ ნამდა, ჩქი მუთუნიშ რაგად ვა მოსაჭირუნა,
9 მუშენდა მუნეფ იჩიებუნა, მუჭო შეფხვადით პირველო, მუჭო ურთინეთ ოჭიშ თქვან კერპეფს დო მუჭო მიკირთით ღორონთჸურე, ნამდა ცოცხალ, ნამდვილ ღორონთიშ მონეფ ჸოფედითკო,
10 დო მოთვინებათ ქუჯინითკო თიშ სქუაშ, იესოშ, ზეცაშე მოულას, ნამუთ თიქ გათელ დო ნამუთ მირსხენა ღორონთიშ რისხუაშე.
სქოლიოეფი
^ თის სილას ხოლო უძახუდეს.
^ ქოძირით „ბიბლიურ სიტყვეფიშ ენწყუმა“.
^ ქოძირით „ბიბლიურ სიტყვეფიშ ენწყუმა“.
